Gyenesis 14
14
Ahemfo kɔko gye Lot
1Na Sinear hene Amrafel, Elasar hene Ariok, Elam hene Kedorlaomer ne Goiim hene Tideal bere so, 2#Deut 29.23 wɔne Sodom hene Bera ne Gomora hene Birsa, Adma hene Sinab ne Seboim hene Semeber ne Bela (a ɛne Soar) hene dii ako. 3Ahemfo yi nyinaa behyiae Sidim bon mu, (ɛno ne nkyene Po no). 4Mfirihyia dumien na wɔsom Kedorlaomer na afe a ɛto so dumiɛnsa no, wɔtew atua. 5Na afe a ɛto so dunan no, Kedorlaomer ne ahene a wɔkeka ne ho no bekum Refaim wɔ Asterot-karnaim, ne Susifo wɔ Ham, ne Emifo wɔ Kiriataim tataw so, 6ne Horifo wɔ wɔn bepɔw Seir so de kosii El-paran a ɛwɔ sare so no. 7Na wɔsan baa En-mispat, na wɔkaa Amalekfo asase nyinaa ne Amorifo nso a wɔte Hasesontamar no gui.
8Na Sodom, Gomora, Adma, Seboim ahemfo ne Bela (a ɛne Soar) hene fi bae. 9Na wɔne Elam hene Kedorlaomer, Goiim hene Tideal, Sinear hene Amrafel ne Elasar hene Ariok de bɛbɔɔ ani wɔ Sidim bon mu, ahene baanan a wɔreko atia baanum. 10Na Sidim bon mu yɛ ama amoamoa ara nko. Na Sodom ne Gomora ahemfo guanee. Na ebinom totɔɔ amena no mu, na wɔn a aka no guan kɔɔ bepɔw so. 11Na wɔfaa Sodom ne Gomora nneɛma nyinaa ne wɔn nnuan nyinaa de siim kɔe.
12 #
Gye 13.10-12
Na wɔfaa Abram ne nua ba Lot a ɔte Sodom ne n'ahode kɔe. 13Na oguanfo bi bɛka kyerɛɛ Hebrini Abram a ɔte Amorini Mamre, a ne nuanom ne Eskol ne Aner ne nua, pɔw mu; nso wɔne Abram wɔ apam.
Abram gye Lot
14Na Abram tee sɛ wɔafa ne nua dommum no, ɔde ne mmarima a wɔawo wɔn wɔ ne fi ahasa dunwɔtwe tuu sa tiw wɔn koduu Dan. 15Na ɔne ne nkoa kyɛɛ wɔn ho mu baa wɔn so anadwo, na wɔbobɔɔ wɔn, na wɔtaa wɔn koduu Hoba a ɛda Damasko benkum so no. 16Na ɔde nneɛma no nyinaa ne ne nua Lot nso ne ne nneɛma ne mmea no nso ne nkurɔfo no san bae. Melkisedek hyira Abram. 17Na ɔsan fii Kedorlaomer ne ahemfo a ɛkeka ne ho no so nkonimdi no reba no, Sodom hene fi kohyiaa no wɔ Sawe bon mu.
18 #
Nnw 76.2; 110.4; Heb 7.1-4 Na Salem hene Melkisedek de abodoo ne bobesa brɛɛ no; na ɔyɛ ɔsorosoro Nyankopɔn sɔfo. 19Na ohyiraa no sɛ ɔsorosoro Nyankopɔn a ɔyɛ ɔsoro ne asase wura no nhyira nka Abram, 20na nhyira ne ɔsorosoro Nyankopɔn a ɔde w'atamfo ahyɛ wo nsa. Na Abram maa no nneɛma no nyinaa mu ntotoso du du.
21Na Sodom hene ka kyerɛɛ Abram sɛ: Fa nnipa no ma me, na fa ahode no. 22Na Abram ka kyerɛɛ Sodom hene no sɛ: Mema me nsa so mekyerɛ AWURADE, ɔsorosoro Nyankopɔn a ɔyɛ ɔsoro ne asase wura no, 23sɛ efi asaawa so de kosi mpaboa hama so, meremfa biribiara a ɛyɛ wo de, na woanka sɛ: Me na mama Abram anya ne ho; 24gye nea mmerante no adi no nko, ne mmarima a wɔne me kɔe no, Aner, Eskol ne Mamre nya wɔn kyɛfa.
Revised Akuapem Twi DC Bible © Bible Society of Ghana, 2017.
