Ipakilya 20
20
1N’alubwi Abraam avila vovo gô kènda gô ntye yi re gô nkôṽa yi Sud; alwaṉi yè ntyo Kadès ntyo Sur, gô garegare, n’alwaṉi yè gô Gerar. 2N’awulyi Abraam g’ômwanja wi Sara y’ômwantô wè inè: Ayè mwô’ngi yam̃. N’awongi Abimelèk, y’ôga wi Gerar, Sara. 3N’awôm̃unyi Anyambyè gôr’Abimelèk gô nyinô ôgwèra, awulinyè inè: Vôna, ô be juwa g’ômwanja w’ômwantô wi re wè bonga pa, konde are jômba pa. 4Ndô Abimelèk e pa diwô adèwi na yè, awiṉizi yè inè: Rera, ô be jôṉa vangaṉ’aṉaga w’agôre? 5Abraam e pa bulinya myè inè, ayè mwô’ngi yam̃? Ni Sara kè ayèmè e pa bulinya myè inè, ayè mwô’ngi yam̃ ôṉôm̃e? My’are denda p’ôsam̃u wiṉo n’ôrèm̃’ômbya, n’ago mi nkèrè. 6Ndô Anyambyè awulinyi yè gô nyinô inè: My’avôrô inè, ô re denda pa wô n’ôrèm̃’ômbya, n’ago mi nkèrè, ndô my’alegi wè kè gô fwem̃a gôre myè. Yeṉo mi pa jivira wè gô kôzè. 7Ndô vèṉo wiṉiz’ômwantô gôr’ôṉôm̃e mè; konde ayè ôvogisi; e be kambiṉa kè g’ômwanji wo, ko wè tôla. Ndô j’awè w’awiṉizè, gambèṉè mya inè, ô be juwa, awè n’ezom̃’edu zi re na wè.
8Yeṉo aṉongwi Abimelèk ibanga, awey’inyôngô sè sôdu, arakilya waô isam̃u yiṉo yôdu, n’aryeṉi aṉaga pôlô. 9Vovo aweyi Abimelèk Abraam, awulinyè inè: Ezande zi re wè denda pa gôre zwè? Ni mbe nde yi re myè dendo pa, ko wè bag’ibe sipôlômè gôre myè na gw’iṉongo nyam̃? Ô re denda pa gôre myè ijanja si re si zele kwèkwè gô dendô. 10Awulinyi Abimelèk Abraam inè: W’ayeṉi ande inè, ô re denda p’ôsam̃u wiṉo? 11Awiṉizi Abraam inè: Konde my’awulyi nè, rèti itya s’Anyambyè si zele gô ntye yiṉo, gambèṉè wi be jôṉa myè g’ômwanja w’ômwantô wam̃. 12Ndô rèti ayè mwô’ngi yam̃ ômwantô, ômwaṉ’ômwantô wa reri yam̃; dadyè ayè arang’ômwaṉ’ômwantô wi ngi yam̃; ndô atweṉi ômwantô wam̃. 13Gw’agogunyô myè ne Anyambyè avila gô nagô ya reri yam̃, my’awulinyi Sara inè: Yiṉo ne nkèngo yi be dendiṉo myè inè: Gô mbôr’edu yi be kèndô zwè, wulya g’ômwanji wam̃ inè: Ayè mwô’ngi yam̃ ôṉôm̃e.
14N’awongi Abimelèk adombè, n’inyare, n’inyôngô iṉôm̃e, n’inyôngô inyantô ava sô gôr’Abraam, n’awiṉizyè yè Sara y’ômwantô wè. 15N’awulyi Abimelèk inè: Vôna, ntye yam̃ yi re g’ôzô wo, lwaṉa gô mbôra yi be tondô wè. 16N’awulinyi yè Sara inè: Vôna, mi pa gôre mwô’ngi yo ôṉôm̃e ntôzèni yi sika, yi be dwaṉ’eliṽiṉi gôre wè gw’antyo m’aṉaga waôdu wi re na wè, na g’ôzô wa waôdu ô be tw’ôgôre.
17N’agambiṉi Abraam Anyambyè; n’arôlizi Anyambyè Abimelèk, n’ômwantô wè, n’inyôngô sè inyantô, n’ayaṉi waô awaṉa. 18Konde Anyambyè aliwô apangi nagô yôdu y’Abimelèk nkele, g’ômwanja wi Sara y’ômwantô w’Abraam.
Published by the British and Foreign Bible Society in 1927.
