Ipakilya 13
13
1N’alubwi Abram gw’Egipt, ayè n’ômwantu wè, n’ezom̃’edu z’avegagi na yè, ni Lot na yè, gô kènda gô nkôṽa yi Sud. 2N’avagi Abram pôlômè gw’ilemba y’inyam̃a, gô sika ya pupu na ya teṉateṉa. 3N’agèndi yè ôgèndo wè avila gô nkôṽa yi Sud kwanga gô Betèl, kwanga gô mbôra y’avegag’ôlakô wè gw’alônga, ntyo Betèl ntyo Ai. 4Gô mbôra y’avegagi mbôra yi jiro intyagô y’avangyô yè gw’alônga, n’aweyi Abram ina nyi Yeôva vovo. 5Ndô Lot kè y’agèndi n’Abram, avegagi n’ôlemba w’adombè, n’inyare, n’inagô s’akuku. 6Ndô ntye yi pa keka gôre waô gô dwaṉe mbôra mô; konde yom̃i yaô y’avegagi yenge, ko w’ageka gô dwaṉe mbôra mô. 7Ndô arweṉ’inyôm̃aṉô gôre mongi wi penjavenje nyam̃a y’Abram na gôre mongi wi penjavenje nyam̃a yi Lot. Ndô Kanaan ni Feresi w’alwaṉagi egômbe mè gô ntye mèyo. 8N’awulinyi Abram Lot inè: Kokolo, ga rig’alwaṉ’inyôm̃aṉô gôre myè na wè, ge gôre mongi yam̃ ni mongi yo, kônde azw’are awarerè. 9Ntye yôdu yi zele g’ôzô wo? Sambô ṽangwaṉa avila gôre myè, kokolo; j’awè w’akènda gô nkôṽa y’ôg’ônyantwè, gambèṉè mi be kènda gô nkôṽa y’ôg’ôṉôm̃yè; ndô j’awè w’akènda gô nkôṽa y’ôg’ôṉôm̃yè, gambèṉè mi be kènda gô nkôṽa y’ôg’ônyantwè. 10N’arômbiṉi Lot antyo mè ayeṉ’ôdèdè wôdu wi Yoridan gèygèy gô mbôry’edu, Yeôva yilizaga ro Sodôma ni Gômora, w’avegagi kwanga gô Sôar, ga ntyaga yi Yeôva, egolaṉi ga ntye y’Egipt. 11N’avinji Lot ôdèdè wôdu wi Yoridan agèndaga gô nkôṽa yi tongwa ni nkômbe; n’aṽangwaṉi waô ôm̃ori avila gôr’ôm̃ori. 12N’alwaṉi Abram gô ntye yi Kanaan; ndô Lot alwaṉi gw’inkala s’ôdèdè; n’avangi yè ôlakô wè kwanga gô Sôdoma. 13Ndô aṉôm̃e wi Sôdoma w’avegag’aṽe n’iyanjis’impôlô y’ibe gôre Yeôva.
14N’awulinyi Yeôva Abram, Lot bangwaṉa pa na yè, inè: Rômbiṉ’antyo mo avila gô mbôra yi re wè, ko pôna gô nkôṽa yi Nor, na gô nkôṽa yi Sud, gô nkôṽa yi tongwa ni nkômbe, na gô nkôṽa yi kènda na yô; 15konde ntye yôdu yi jeṉô wè, mi be pa yô gôre wè na gôr’awaṉi wo egômbe zôdu. 16Mi be pang’awaṉi wo ga iroy yi ntye; yeṉo jog’ôma ko tang’iroy yi ntye, gambèṉè awaṉi wo kè waô ko tangô. 17Gum̃aṉa ko pyagaṉa gô ntye, gw’elaviṉi za yô na gw’evendiṉi za yô, konde mi be po yô.
18N’arômbi Abram ôlakô wè, aṽya gô dwaṉa gw’imbilinga si Mamre, si re pyèrè gw’Ebron. N’aṉôgi yè vovo mbôra yi jirô intyagô gôre Yeôva.
Published by the British and Foreign Bible Society in 1927.
