Keriekitho 45
45
Josef Puo Siezedzürieko Bu Puo Sikelie
1Sitse Josef puo khieki kethako mhodzünu puo kethe salie kenjüta, süla puo pfhephra peto sie di, “Themia kehoupuorei a kinu tuotaliecie,” si. Süla Josef-e puo siezedzürieko bu puo sikelie ki miapuorei puo ze tha mota. 2Sidi puoe krakhouita, süla Ijiptmiako süu si, mu Faro kinuko pete süu si. 3Sitse Josef sie puo siezedzürieko ki, “A Josef zowe, a puo rhei baluo le?” Derei puo dzürieko puo pfhekholie kenjüta, uko puo khieki ketha ha u nou kehoukeruo chütacü la.
4Sitse Josef puo dzürieko ki, “A penuo vorliecie.” Sitse uko puo penuo vorlie. Sitse puo uko ki, “A nieko siezeu Josef zolie, nieko puo zepie Ijipt nu shükewau. 5Mu tsie nieko nousuota hie, morei nie thuo nie ngupie nie nou meyie rei hie, nieko a zepie hanu shükewa la. Kepenuopfü thuo nieko mhodzü a ketseshüwate, kerheiro kelalieketuo la. 6Kijü nu teicie kenie pekrie vorte; mu tsie rei cie pengou ba saluo, süko nu liecie morei liekere rei balie lho. 7Süla Ukepenuopfüe a bu kijüu gei nieko la peshapie keba kro puo pekrupie balieketuo la themia kekra perheishütuo üdi nieko mhodzü a ketseshüwate. 8Süla nieko a ketsepie hanu shü monyü, Ukepenuopfü thuota zo; sidi puo a bu Faro krü puo chüshüte, siro puo kinu niepu chü mu Ijipt kijü pete mho kekhakezhau chü bate. 9Nieko rükri a puo ki kholie, di puo ki pushücie, ‘N nuou Josef haikecü puyawe, Ukepenuopfü a chüpie Ijipt kijü pete mho niepuu chüwate; a kinu tsurtalie, ge ba hie. 10N bu Goshen kijü nu lhoutatuo, n bu a penuo tuotatuo, no mu n nuonuoko, tsiu n nuonuo nuonuoko rei, n kuoko, n thukroko, mu n vie ketuo pete. 11Siro sünu no se morokesuoko a kha n tsütuo, tsie rei cie pengou pekrie satuoluocü la; no mu n kinuko, tsiu n vie ketuoko bu tsopfhütalie lho, sishülie.’ 12Mu tsie nieko mhi mu a siezeu Benjamin mhi-e a thuo die pu ketha ngushüte. 13Siro nieko a puou ki a Ijipt nu therhupfü phi baketa mu nieko kengu pete pushü morosuo bei zo. Rükrilie di a puo ze hanu tsurliecie.” 14Sidi puoe puo siezeu Benjamin vo ciepielie di krata; mu Benjamin rei puo geinu krata. 15Süsie puoe puo dzürieko pete meboshü di uko geinu krata; süsie nu puo dzürieko puo rüchü.
16Siro, “Josef dzürieko vorwe,” icü die Faro ki nu si kevo ki, Faro mu puo kituoko u nei phita. 17Sitse Faroe Josef ki, “N dzürieko ki pushücie, ‘Hau chülie; nieko khunuoko pie dalie di tuo Kanan kijü nu la volie; 18sidi nieko puo mu nie kinuko zelie, di a ki vorlie, siro a Ijipt nu kijü kevitho-u kha nieko tsütuo, mu nieko bu kijü kevitho-u siko cütuo.’ 19Uko ki hau rei pu sashülie, ‘Hau chülie, nie nuonuo kecüko mu nie nupfünuoko la, Ijipt nu bageiko selie, mu nieko puo zelie di vorlie. 20Siro nie nyako la mhapuorei nie nounyü hie. Ijipt nu kijü kevitho-u sü nieko vie zoketuo la’ sishülie.”
21Sitse Israel nuonuoko sükemhie chülie; siro Faro die khakeshü tuoi Josef-e bageiko khapie uko tsüshü, mu uko rüve la se morokesuo kecüca rei kha uko tsüshü. 22Siro puoe pfhenei thulilieketuo pie uko tsü phreshü; derei puo raka shekel krie se, mu pfhenei thuli pengou pie Benjamin tsü. 23Siro puo puo la mha hako ketseshü; Ijipt nu mhanya keviko pie u pie dakepfü gada ker, siro puo puo bu rüvecha nu seketuo la, telha, niekhrüda mu se morokesuo cako mu puo pie dakepfü gadakrü ker. 24Sidi puo dzürieko bu tuota, mu uko tuotakezhü ki, puo uko üse, “Cha nu kegei tuo suo ho.” 25Sidi uko Ijipt nunu tuota, mu Kanan kijü nu uko puo Jakob ki la vorlie. 26Sitse uko puo ki, “Josef tsie rei rhei ba zo, mu puo Ijipt kijü pete mho kekhayakezhau chü sa bate.” Sitse puo puo ngothorta, puo uko pelelie kenjüta. 27Derei uko Josef uko ki pukeshü die pete pie puo ki pukeshü ki, mu Josef-e puo pfüketuo la bagei ketsekeshüko ngukelie ki, uko puo Jakob puo nou rhei la vorlie. 28Sidi Israel-e sie, “Tseite, a nuo Josef tsie rei rhei keba sü; a siaketa mhodzü vo puo ngutuo.”
The Bible Society of India
© 2023, Used by permission. All rights reserved. More
