युहन्न 5
5
ग्येइ रेइकी नबे म्ही फेन्बल
1हुजु लीप्चे यहुदीमाकी पर्बइ लागीरी येसु यरुस्लेम्री स्येःजेत्ज्यी। 2यरुस्लेम्री ग्युःकी म्रप् पङ्बे म्रप् गी मुबल, ओसेम् हुजु म्रप्की ज्यदङ् हीब्रु ग्योत्री बेथेस्दा पङ्बे ग्ये मुबल, हुजु ग्येइ कोरोरो ब्रङ्मा ङ्ह मुबल। 3हुजुरी कन, खोरा ओसेम् या कङ् अचल्तीबे नबे य्हक्को म्हीमा क्योङ्ले टीब मुबल। [थेङ्यीमा गदे बेलो ग्येइ यी य्होङ्ब पङ्ज्यीम् ब्रेन्ज्यीम् टीब मुबल। 4तलेपङ्सम् पर्मप्रभुइ चव गी बेलो-बेलोरी ग्येरी युज्यीम् यी य्होङ्पीन्ब मुबल। ओसेम् यी य्होङ्ब साच्चेनो यीन्हङ् ङोन्ग्यम् वङ्बे म्हील खतेबे नेत् मुलेएनो फेन्ब मुबल।]#५:४चु पद् य्हक्को बर्स ङोन्ग्यम्की बाइबलमारी ब्रीबल अरे।
5ओसेम् ल्हेगोर् सोम् स्यी ङ्य्हीत्तीङ् य्हङ्से नबे म्ही गी हुजुरी मुबल। 6येसुचे हुजु म्हीत क्योङ्ले टीटीबल म्रङ्जेत्ज्यी, ओसेम् थेङ्चे हुजु म्ही य्हक्को बर्स य्हङ्से नबल खेम्जेत्ज्यीम् सुङ्ज्यी, “एत र्हङ् फेन्खइ पङ्बे सेम् मुब?”
7ओसेम् हुजु नबे म्हीचे पङ्ज्यी, “लोप्पोन्, यी य्होङ्बे बेलोरी ङत कोत्ज्यीम् ग्येरी बोर्पीन्बे म्ही खलेएनो अरे। ङ ङ्यीन ङ्यीननो ल्हो-ल्हो म्ही ङोन्नो वङ्य्हर्ब।”
8हुजु लीप्चे येसुचे थेत सुङ्ज्यी, “रेःगो ओसेम् र्हङ्की तीत्स नाज्यीम् ब्रउ।” 9होले सुङ्ब साच्चेनो हुजु नबे म्ही फेन्ज्यीम् र्हङ्की तीत्स नाज्यीम् ब्रज्यी।
तर हुजु दीन् पबीत्र दुःब न्हबे दीन् मुबल। 10होत्तज्यीम् यहुदी अगुवामाचे हुजु फेन्बे म्हीत पङ्ज्यी, “तीङ्यीम् पबीत्र दुःब न्हबे दीन् य्हीन्ब, नीयम् अनुसार् एचे र्हङ्की तीत्स नाब ठीक् अय्हीन्।”
11तर हुजु म्हीचे थेङ्यीमात जोहप् पीन्ज्यीम् पङ्ज्यी, “ङत खल्चे फेन्न लज्यी हुजुचेनो ङत ‘तीत्स नाज्यीम् ब्रउ’ बी सुङ्बल य्हीन्ब।”
12ओसेम् थेङ्यीमाचे थेत ङ्योत्ज्यी, “एत तीत्स नाज्यीम् ब्रउ पङ्बे म्ही खल?”
13तर हुजु फेन्बे म्हीचे थेङ् खल मुबल बी स्येःबल अरेबल, तलेपङ्सम् हुजु ग्लारी मुबे य्हक्को म्हीमान्हङ्चे येसु स्येःज्यीन्बल मुबल।
14लीप्चे येसुचे हुजु म्हीत पर्मेस्वर्की दीम्री खदु तज्यीम् सुङ्ज्यी, “च्याको, देरेम् ए फेन्बल मुब, देबेएनो पाप् थस्य्हेङो, अय्हीन् पङ्सम् एत ङोन्ग्यम् बीमाएनो य्हक्को अज्यब तस्ये मुब।”
15ओसेम् हुजु म्हीचे थेत येसुचे फेन्नलबल टीम् बी स्येःज्यीम् यहुदी अगुवामाज ङ्यीज्यीम् स्येत्ज्यी। 16होत्तज्यीम् यहुदीमाचे येसुत दुख पीन्ब तीप्ज्यी, तलेपङ्सम् थेङ्चे दुःब न्हबे दीन्री चु लक् स्य्हेङ्जेत्पल मुबल। 17हुजुलीप्चे येसुचे थेङ्यीमात चोले सुङ्ज्यी, “ङइ अपचे खेमपङ्लेनो लक् स्य्हेङ्जेत्स्यीनो टीब। ओसेम् ङएनो होलेनो लक् स्य्हेङ्स्यीनो टीब।”
18होत्तज्यीम् यहुदीमाचे चु तम् थ्येःब बीसेम् थेङ्त झेन् सेत्पे सेम् लज्यी, तलेपङ्सम् थेङ्चे दुःब न्हबे दीन्री लक् स्य्हेङ्ब अत पङ्बे नीयम्त अङ्येन्बकीनो अय्हीन्, तर थेचे पर्मेस्वर्त र्हङ्की अप पङ्ज्यीम् र्हङ्चे र्हङ्त पर्मेस्वर्तेङ् बराबर् स्य्हेङ्ज्यी।
पर्मेस्वर्की जइ अधीकार्
19होत्तज्यीम् येसुचे थेङ्यीमात सुङ्ज्यी, “देमेन्नो ङ एङ्यीमात पङ्ब, जचे र्हङ्चेनो तेएनो स्य्हेङ्ब अखम्, तर अपचे ता स्य्हेङ्जेत्पल म्रङ्ज्यी हुजुकीनो स्य्हेङ्ब, तलेपङ्सम् अपचे ता स्य्हेङ्जेत्ज्यी, जचे हुजुनो स्य्हेङ्ब। 20तलेपङ्सम् अपचे जत म्होइजेत्प, ओसेम् थेङ्चे र्हङ्चे स्य्हेङ्जेत्पे जम्म लक् जत ङोन्जेत्प। ओसेम् थेङ्चे चु लक् बीमएनो ङ्हच्छ्यङ् लक्मा स्य्हेङ्बरी जत ङोन्जेत्स्ये मुब, ओसेम् एङ्यीमा य्हक्को तेःङेन् तस्ये मुब। 21ओसेम् अपचे स्यीबलमात स्यीब ग्यम्से सोनलजेत्ज्यीम् खेमेएनो अबेबे जीवन् न्हङ्ब र्हङ्ले जचेएनो खल्त पीन्बे सेम् लज्यी हुजुत खेमेएनो अबेबे जीवन् पीन्ब। 22तलेपङ्सम् अपचे खल्लेएनो न्याय स्य्हेङ्अजेत्, तर न्याय स्य्हेङ्बे लक् जत न्हङ्बल मुब। 23होत्तज्यीम् थेङ्यीमाचे अपत स्य्हेस स्य्हेङ्ब र्हङ्लेनो जतेएनो स्य्हेस स्य्हेङ्खइ। ओसेम् जत स्य्हेस अस्य्हेङ्बलचे थेत पीत्युजेत्पे अपतेएनो स्य्हेस अस्हेङ्।
24 “देमेन्नो ङ एङ्यीमात पङ्ब, खल्चे ङइ तम् ङ्येन्ज्यीम् ङत पीत्युजेत्पलत बीस्वास् स्य्हेङ्ब, थेतेङ् खेमेएनो अबेबे जीवन् तब। ओसेम् थे न्यायरी दोःस्ये अरे, तर स्यीब ग्यम्से जीवन्री वङ्ज्यीन्बल तब। 25देमेन्नो ङ एङ्यीमात पङ्ब, बेलो खटीब मुब, ओसेम् हुजु बेलो देरे य्हीन्ब, स्यीबलमाचे पर्मेस्वर्की जइ केत् थ्येःस्ये मुब, ओसेम् थ्येःबलमा सोस्ये मुब। 26तलेपङ्सम् खले अपतेङ् जीवन्की म्रुः मुब, होलेनो थेङ्चे र्हङ्की जतेएनो जीवन्की म्रुः स्य्हेङ्जेत्पल मुब। 27ओसेम् थेङ्चे थेत न्याय स्य्हेङ्बे अधीकार् न्हङ्जेत्पल मुब, तलेपङ्सम् थे म्हीइ ज य्हीन्ब। 28चु तम्री तेःङेन् थतउ, तलेपङ्सम् बेलो खटीब मुब, हुजु बेलोरी स्यीबलमा जम्मचे थेइ केत् थ्येःस्ये मुब। 29ओसेम् ज्यबे लक् स्य्हेङ्बलमा खेमेएनो अबेबे जीवन् यङ्बरी, ओसेम् अज्यबे लक् स्य्हेङ्बलमामी दन्ड यङ्बे लागीरी दुर्स न्हङ्चे सोज्यीम् डोङ्खस्ये मुब।
30 “ङ र्हङ्चेनोम् तेएनो स्य्हेङ्ब अखम्। पर्मेस्वर्चे ङत खले सुङ्ज्यी होलेनो न्याय स्य्हेङ्ब। होत्तज्यीम् ङचे स्य्हेङ्बे न्याय देमेन् तब, तलेपङ्सम् ङ र्हङ्चे म्हेन्ब र्हङ्ले अय्हीन्, तर ङत पीत्युजेत्पे अपचे थुःलजेत्प र्हङ्ले स्य्हेङ्ब।
31 “ङचे र्हङ्की बारेरी र्हङ्चेकीनो पङ्ज्यी पङ्सम् ङचे पङ्बे तम्त खल्चेएनो स्वीकार् स्य्हेङ्स्ये अरेबल। 32तर ङइ बारेरीम् पर्मेस्वर् अपचेएनो स्येत्जेत्प, ओसेम् थेङ्चे ङइ बारेरी सुङ्जेत्पे तम् देमेन् य्हीन्ब।
33 “एङ्यीमाचे तम् ङ्योत्परी र्हङ्की म्हीमात बप्तीस्मा पीन्बे युहन्नज पीत्ज्यी, ओसेम् थेचे देमेन्कीनो स्येत्ज्यी। 34ङइ बारेरी म्हीमाचे स्येत्पे तम् ङत तोःब पङ्ज्यीम् अय्हीन्, तर एङ्यीमा थर्खइ पङ्ज्यीम् ङचे चु तम् पङ्बल य्हीन्ब। 35युहन्न लुम्ज्यीम् सर्टीबे बत्ती र्हङ्ब मुबल, ओसेम् एङ्यीमा थेइ य्हल्री य्हम्बगी तङ्ज्यी।
36 “तर युहन्नल बीमएनो ङ्हच्छ्यङ् गबाही ङतेङ् मुब। ङइ अपचे ङत स्य्हेङ्बरी कुल्बे लक्मा ङचे स्य्हेङ्टीबल मुब, ओसेम् हुजु लक्माचेनो ङत अपचे पीत्युजेत्पल य्हीन्ब पङ्ज्यीम् गबाही पीन्ब। 37ओसेम् ङत पीत्युजेत्पे अप थेङ्चेनो ङइ बारेरी गबाही न्हङ्जेत्पल मुब। एङ्यीमाचे न्ह खेमेए थेङ्की केत् थ्येःबल मुब न्ह थेङ्की स्य्हल् म्रङ्बल मुब। 38एङ्यीमाचे थेङ्की फ्रोइ सेम्री थेन्बल अरे, तलेपङ्सम् थेङ्चे पीत्युजेत्पे म्हीत एङ्यीमाचे बीस्वास् अस्हेङ्। 39एङ्यीमाचे खेमेएनो अबेबे जीवन् धर्म छ्येःमारी यङ्ब पङ्ज्यीम् ज्यनले म्हइब। ओसेम् हुजु धर्म छ्येःमाचेनो ङइ बारेरी गबाही पीन्ब। 40तर एङ्यीमा खेमेएनो अबेबे जीवन् यङ्बरी ङइज खबे सेम् अल।
41 “ङचे म्हीमा ग्यम्से यङ्बे तोप्प म्हइबल अय्हीन्। 42ङत था मुब एङ्यीमाचे पर्मेस्वर्त म्होइबल अरे। 43ङ ङइ अपइ छेन्री युबल मुब, ओसेम् एङ्यीमाचे ङत ग्रहन् अस्य्हेङ्। तर ल्हो-ल्हो खलपङ्लेनो र्हङ्की मीन्रीनो खज्यी पङ्सम् हुजुत एङ्यीमाचे ग्रहन् स्य्हेङ्स्ये मुब। 44एङ्यीमा गीचे गी ग्यम्से तोप्प म्हइब, तर पर्मेस्वर् ग्यम्सेकीनो खबे तोप्प अम्हइसम् एङ्यीमाचे खले बीस्वास् स्य्हेङ्ब खम्ब स्यीम्?
45 “ङचे एङ्यीमात अपइ ङोन्री दोस् ङोन्स्ये मुब बी थम्हेनो। एङ्यीमाचे आस् थेन्बे मोसाचेनो एङ्यीमात दोस् ङोन्स्ये मुब। 46एङ्यीमाचे मोसात बीस्वास् स्य्हेङ्बल य्हीन्सम् ङतेएनो बीस्वास् स्य्हेङ्स्ये मुबल, तलेपङ्सम् थेचे ङइ बारेरी ब्रीबल मुबल। 47तर एङ्यीमाचे थेचे ब्रीबे तम्मात बीस्वास् अस्य्हेङ्ज्यी पङ्सम् ङचे पङ्बे तम्त खले बीस्वास् स्य्हेङ्ब स्यीम्?”
© 2025 by Mother Tongue Translators Society, Nepal Bible Society
and Wycliffe Bible Translators, Inc.
