লূক 2
2
প্রভু যীশু খ্রীষ্টর জর্ম
(মথি ১:১৮-২৫)
1সে অক্তত্ সম্রাট আগস্ত কৈসরে তা রেজ্যত্ বেক্ মানুচ্চুনোরে নাঙ্ লিগিবাত্তে উগুম দিলো। 2সিরিয়ার শাসনগুরিয়্যে কুরীণিয়র সময়োত্ এই পত্তমবার মানুচ্ গুণিবাত্তে নাঙ্ লেগা অয়। 3নাঙ্ লিগিবাত্তে পত্তিজনে নিজোর্ নিজোর্ আদামত্ যাহ্ ধুরিলাক্।
4-6যোষেফে অলদে রাজা দায়ূদো গুট্টির মানুচ্। রাজা দায়ূদো জর্মর্ জাগায়ান্ এলঅ যিহূদিয়া রেজ্যর্ বৈৎলেহম আদামত্। সেনত্তে যোষেফে নাঙ্ লিগিবাত্তে গালীল রেজ্যর্ নাসরত্ আদামত্তুন্ বৈৎলেহম আদামত্ গেলঅ। মরিয়মেয়ো তা সমারে সিধু গেলঅ। ইবে সমারে যোষেফর্ মেলা ঠিগ্ ওইয়্যে। সে অক্তত্ মরিয়মে পিদিলী এলঅ আর বৈৎলেহমত্ থাগদে তা পুয়োবো জোর্মেবার্ অক্ত অলঅ। 7সিধু তার্ পত্তম পুয়োবোর্ জর্ম অলঅ, আর তে পুয়োবোরে কাবড়ত্ বেড়েইনে য়েমানর্ হের খাজাবোত্ থলঅ, কিয়া হোটেলত্ তারাত্তে কনঅ জাগা ন-এলঅ।
স্বর্গদূত্ আর গরগ্কুন্
8বৈৎলেহম ইধু মাদ ভিদিরে রেদোত্ গরগ্কুনে তারার্ ভেড়া পালুন্ চুগি দেদন্। 9এমন্ সময়োত্ প্রভুর এক্কো দূত আদিক্ক্যেগুরি তারা মুজুঙোত্ এলঅ। সেক্কে প্রভুর মহিমা তারার্ চেরোকিত্তে জোল্জোল্যে গুরি দেগা দিলো। ইয়েন্দোই গরগ্কুনে অমকদ দোরেলাক্।
10স্বর্গদূত্তো তারারে কলঅ, “ন-দোরেয়ো, কিয়া মুই তমাইধু ভারী হুজির্ হবর্ আন্যং। এ হুজিগান্ বেক্ মানুচ্চুনোত্তে। 11এইচ্চ্যে দায়ূদো শঅরত্ তমাত্তে উদ্ধোর্গুরিয়্যে জোর্মেয়্যে। তেয়ই মশীহ্, তেয়ই প্রভু। 12এ কধাগান যে সত্য তমা ইধু সিয়েনর্ চিহ্নোগান অলঅ ইয়েন-তুমি কাবড়ত্ বেড়েয়্যে আর গোরু পিয়োঙত্ থোইয়্যে এক্কো চিগোন্ চিজিরে দেগিবা।”
13এ সময়োত্ সেই স্বর্গদূত্তুনো সমারে আদিক্ক্যেগুরি সিধু আরঅ বোউত্ স্বর্গদূতোরে দেগা গেলঅ। তারা গোজেনরে নাঙ্ গিণোদে গিণোদে কুয়ো ধুরিলাক্। 14“স্বর্গত্ গোজেনরে বাঈনী গরা ওক্,
পিত্থিমীত্ যিগুনো উগুরে তে হুজি
তারার্ শান্তি ওক্।”
15স্বর্গদূত্তুনে তারাত্তুন্ স্বর্গত্ যানার্ পরেদি গরগ্কুনে একজন আর একজনরে কলাক্, “আঢ, আমি বৈৎলেহমত্ যেই আর যে ঘটনাগানর্ কধা প্রভু আমারে জানেল সিয়েন যেইনে চেই ।”
16তারা যাদিমাদি যেইনে মরিয়ম, যোষেফ আর গোরু পিয়োঙত্ পোড়ে থোইয়্যে সেই চিগোন্ চিজিবোরে তোগেইনে নিগিলেলাক্। 17তারা ইধু সেই চিগোন্ চিজিবো পৌইদ্যেনে যিয়েনি জানা ওইয়্যে, চিগোন্ চিজিবোরে দেগানার্ পরেদি তারা সিয়েনি কলাক্। 18গরগ্কুনো কধা শুনিনে বেক্কুনে আমক্ অলাক্; 19মাত্তর্ মরিয়মে বেক্কানি মনত্ রাগেল, কাররে ন-কলঅ; তে সে পৌইদ্যেনে চিদে গরা ধুরিলো। 20স্বর্গদূত্তুনে গরগ্কুনো ইধু যিয়েনি কোইয়োন বেক্কানি সেবাবোত্যেগুরি দেগিনে আর শুনিনে তারা গোজেনরে নাঙ্ গিনিলাক্ আর বাঈনী গত্তে গত্তে ফিরি গেলাক্।
21জর্মর্ আস্টো দিনোত্ যিহূদীগুনোর সুদোম্ মজিম্ যেক্কে চিগোন্ গুরোবোর্ সুন্নত গুরিবার্ অক্ত অলঅ সেক্কে তা নাঙান্ থুয়ো অলঅ যীশু। মা পেদত্ এবার্ আগেদি স্বর্গদূত্তো তার্ এ নাঙান্ দিয়্যে।
উবোসনা-ঘরত্ চিজি যীশু
22পরেদি মোশির আইন-কানুন্ মজিম্ তারার্ সিজি অবার্ অক্ত অলঅ। সেক্কে যোষেফ আর মরিয়ম যীশুরে প্রভুর মুজুঙোত্ আজির্ গুরিবাত্তে তারে যিরূশালেম শঅরত্ নেযেলাক্, 23কিয়া প্রভুর আইন-কানুনোত্ লেঘা আঘে, “পত্তমে জোর্মেয়্যে এবাবোত্যে পত্তি মরদ পুয়োরে প্রভুর্ বিলি ধরা অবঅ।” 24ইয়েন বাদেয়ো “এক জড়া কঅ বা দ্বিবে কোদোর ছঅ” উৎসর্ব গুরিবার কধা যেন প্রভুর আইন-কানুনোত্ লেঘা আঘে সেবাবোত্যেগুরি তারা সিগুন উৎসর্ব গুরিবাত্তে গেলাক্।
25-26সেক্কে যিরূশালেমত্ শিমিয়োন নাঙে এক্কো ধার্মিক আর গোজেনভক্ত মানুচ্ এলঅ। গোজেনে কক্কে ইস্রায়েলীয়গুনো দুঃখানি দূর্ গুরিবো সেই সময়ানত্তে তে বাজ্জেই আঘে। পবিত্র আত্মা তা উগুরে এলঅ আর তাইধু ফগদাং গোজ্যেদে যে, মুরি যেবার্ আগেদি তে প্রভুর সেই মশীহরে দেগিবো।
27পবিত্র আত্মালোই শিমিয়োনে সেদিন্যে যিহূদীগুনোর উবোসনা-ঘরত্ এলঅ। মোশির আইন-কানুন্ মজিম্ যিয়েন গুরিবার্ দরকার সিয়েন গুরিবাত্তে যীশুর মা-বাবে চিজি যীশুরে লোইনে সিধু এলাক্। 28সেক্কে শিমিয়োনে তারে করত্ ললঅ আর গোজেনরে বাঈনী গুরিনে কলঅ,
29“প্রভু, তুই তর্ কধা মজিম্ তঅ চাগর্বোরে
ইক্কিনে সুগে শান্দিয়্যে বিদেয় দুয়োর্,
30-31কিয়া মান্জ্যরে পাপত্তুন্ উদ্ধোর্ গুরিবাত্তে
বেক্ মানুচ্চুনোর্ চোগো মুজুঙোত্
তুই যে বেবস্থা গোজ্যস্,
মুই সিয়েন দেখ্যং।
32অন্য জাদ ইধু ইয়েন্ পথ দেগেবার পহরান্,
আর তঅ ইস্রায়েল জাদ ইধু
ইয়েন বাঈনী গুরিবার্ কধা।”
33শিমিয়োনে চিজিবো পৌইদ্যেনে যিয়েনি কলঅ সিয়েনিলোই চিজিবোর্ মা-বাবে আমক্ অলাক্। 34ইয়েনর্ পরেদি শিমিয়োনে তারারে বর্ দিলো আর যীশুর মাবো মরিয়মররে কলঅ, “গোজেনে ইয়েন ঠিগ্ গোজ্যেদে যে, এ চিজিবোত্তে ইস্রায়েলীয়গুনো ভিদিরে ভালোক্ জনে তলাত্ পড়িবাক্, আরঅ ভালোক্ জনে উদ্ধোর্ পেবাক্। ইবে এমন্ এক্কো চিহ্নো অবঅ যিবের্ বিরুদ্ধে ভালোক্জনে কধা কবাক্, 35আর সিয়েনিলোই তারার্ মনর্ কধাগানি ফগদাং অবঅ। ইয়েনি বাদেয়ো ছুরির্ আঘাত ধোক্ক্যেন্ দুঘ্ তঅ মনত্ ফুদিবো।”
36-37সে অক্তত্ হান্না নাঙে এক্কো মিলে-ভাববাদী এলঅ। তে আশের গুট্টির পনূয়েল ঝি। তার্ বোউত্ বয়স ওইয়্যে। সাত বজর্ নেগ সমারে ঘর্ গরানার্ পরেদি চুরোশি বজর্ বয়জ সং তে রানি মিলের্ জিংকানি কাদেয়্যে। উবোসনা-ঘর্ ফেলেইনে তে কনত্তে ন-যেদঅ বরং উবোস আর তবনা গুরিনে দিন-রেত্ গোজেনর সেবা গুরিদো। 38তেয়ো ঠিগ্ সে অক্তত্ উজেই এইনে গোজেনরে ভালেদি জানা ধুরিলো, আর গোজেনে যিরূশালেমরে উদ্ধোর্ গুরিবো বিলি যিগুনে বাজ্জেই আগন্ তারা ইধু সেই পুয়োবোর্ কধা কুয়ো ধুরিলো।
39প্রভুর আইন-কানুন্ মজিম্ বেক্কানি থুম্ গুরিনে মরিয়ম আর যোষেফে গালীলোত্ তারার্ নিজো আদামত্ নাসরদত্ ফিরি গেলঅ। 40চিজি যীশু বয়জে দাঙর্ ওইনে খেমতাবলা ওই উদিলো আর জ্ঞানে ভরপুর্ উয়ো ধুরিলো। তা উগুরে গোজেনর্ আশিদ্বাদ এলঅ।
বার বোজোজ্জ্যে যীশু উবোসনা-ঘরত্
41উদ্ধোর্-পরবর্ সময়োত্ যীশুর মা-বাবে পত্তি বজর্ যিরূশালেমত্ যেদাক্। 42যীশুর বয়জ যেক্কে বার বজর্ সেক্কে সুদোম্ মজিম্ তারা সেই পরবত্ গেলাক্। 43পরবর্ শেজদি তারা যেক্কে ঘরত্ ফিত্তোন্ সেক্কে যীশু যিরূশালেমত্ রোই গেলঅ। মাত্তর্ তা মা-বাবে সে কধাগান হবর্ ন-পেদাক্। 44যীশু তারা সমারে মানুচ্চুনো লগে আঘে মনে গুরিনে তারা এক দিনো পথ গেলাক্। যেরেদি তারা তারার্ কুদুম্মো আর হবর্ পেইয়্যে মানুচ্চুনো ইধু যীশুরে তোগা ধুরিলাক্। 45মাত্তর্ চুগ্ ন-পেইনে তারে তোগাদে তোগাদে তারা আরঅ যিরূশালেমত্ ফিরি গেলাক্।
46যেরেদি তিন দিন পরেদি তারা তারে উবোসনা-ঘরত্ পেলাক্। তে মাষ্টরুনো সংমোধ্যে বোইনে তারার্ কধানি শুনের্ আর তারারে নানান্ কধা পুযোর্ গরের্। 47যিগুনে যীশুর্ কধা শুনোদন্ তারা বেক্কুনে তা বুদ্ধিগান্ দেগিনে আর তা জোব্পানি শুনিনে আমক্ ওইয়োন্। 48তা মা-বাবে তারে দেগিনে আমক্ অলাক্। তা মাবো তারে কলঅ, “বাবা, তুই আমা লগে কিত্তে এবাবোত্যে গুরিলে? তঅ বাবে আর মুই কদক্ পাগল ওইনে তরে তোগেইয়্যেই।”
49যীশু তারারে কলঅ, “তুমি কিত্তে মরে তোগেইয়ো? তুমি কি হবর্ ন-পহ্ যে, মঅ বাব ঘরত্ মত্তুন্ থাহ্ পুড়িবো?” 50যীশু যিয়েনি কলঅ তা মা-বাবে সিয়েনি ন-বুঝিলাক্।
51ইয়েনর্ পরেদি যীশু তারা লগে নাসরদত্ ফিরি গেলঅ আর মা-বাবর্ বাধ্য ওইনে রলঅ। তা মাবো ইয়েনি বেক্কানি মনত্ রাগেল। 52যীশু জ্ঞানে, বয়জে আর গোজেনর আহ্ মান্জ্যর্ কোচ্পানায় দাঙর্ উয়ো ধুরিলো।
Copyright © 2021 Bangladesh Bible Society
