Matius 2
2
Boko urakng majus inyo pandai ilmu bintakng datakng monyombah Yesus
(2:1-12)
1Pas, Yesus lahir di Betlehem, di doerah Yudea, timpu Rajo Herodes momorintah doerah nantai.#2:1: Herodes momorintah apo io ija' di babah Kaisar negara Roma inyo kotakng bokuaso. Lopas Yesus lahir, ado boko urakng majus datakng ko kota Yerusalem. Sia' datakng doi' nogori inyo jouh di doerah Timur. 2Sia' botakutn ko boko urakng di su'utn. Kato sia', “Koi moniant sobuti' bintakng inyo timbul di doerah Timur. Koi mongotohu'i bintakng nantai ia'an tando obai ado bobia' hoyu' lahir inyo paca'an monjadi Rajo urakng Yahudi. Di mono kiro bobia' nantai? Obai, koi datakng honda' monyombah Sio.”
3Timpu Rajo Herodes mondinga' borito mongona'i bobia' nantai inyo paca'an monjadi rajo, ongko io monjadi kotakng golisah. Ubo nian jam somuo urakng di Yerusalem.#2:3: Rajo Herodes monjadi gola' obai io co honda' rajo bukai monguti' jabatannyo. Boko urakng Yahudi monjadi gola' obai Rajo Herodes sangant kojapm. Sia' co tohu caro io paca'an molawatn Rajo urakng Yahudi nantai. 4Jadi, Rajo Herodes mongumpulan somuo imam kopala' huatan boko guru agama Yahudi. Io minto oca' sia' momadahan ko io, monurut boko nabi di mono Rajo Inyo Dijanjian Allah nantai paca'an lahir.
5Sia' monimbas, “Rajo nantai paca'an lahir di laman Betlehem di propinsi Yudea. Obai timpu joman komai, ado nabi inyo monulis pomandiran Allah ni'in: 6‘Oi boko urakng Betlehem di doerah Yehuda! Ado siku' urakng inyo paca'an lahir di laman kaitn inyo paca'an monjadi pomimpitn urakng Israel, umant-Ku. Obai nantai, laman kaitn co paca'an dianggap kinyo pontikng di doerah nantai!’ ”#2:6: Doi' buku nabi Mikha 5:1.
7Lopas nantai Herodes moningkau boko urakng majus nantai oca' botomu agatn io socaro bototapu'. Io bodapat kotorakan inyo topat doi' sia' mongona'i sombilo bintakng nantai timbul potamo kali. 8Lopas nantai io monyiuh sia' ko Betlehem agatn posatn, “Botula' huatan goyapicam Bobia' nantai agatn toliti. Lopas kaitn monomuan Sio, cocopat padahan ko aku. Oca' aku pan ulih datakng monyombah Sio.”
9-10Lopas mondinga' pomandiran Rajo Herodes nantai, sia' botula'. Sia' moniant agi' bintakng inyo samo inyo timbul di doerah Timur nantai. Jadi, sia' kotakan rindakng. Bintakng nantai ponunju' jalatn dalapm pojalatan sampai botongga' di pucu' rumah, tompat Bobia' nantai. 11Sia' mansu' ko dalapm rumah nantai ongko moniant Bobia' nantai bosamo agatn Maria, indai-Nyo. Sia' monyungkapan monyombah Bobia' nantai, ongko mombuka' poti tompat bando barakng sia'. Sia' moonju' boko posombahan ko Sio, ia'an omas, monyan ongko mur. 12Sobolupm pulakng ko laman sia', Allah momporingant'i sia' di dalapm mimpi oca' jangan bobali' ko Herodes. Jadi sia' pulakng molalu'i jalatn bukai.
Urakng tuho Yesus mombaba'-Nyo pindah ko nogori Mesir
(2:13-15)
13Lopas jadi boko urakng majus nantai botula', molekat Tuhatn Allah datakng ko Yusuf dalapm mimpi. Molekat nantai bopandir, “Rajo Herodes paca'an monggoyapi Bobia' nantai oca' ulih mombunuh Sio. Jadi huascam, baba' Bobia' nantai agatn indai-Nyo pindah ko Mesir. Bodiapmcam di su'utn sampai Aku momandiran ko kolai pakai' bobali'.” 14Yusuf pan huas. Pas malapm nantai jam, io mombaba' Bobia' nantai agatn indai-Nyo pindah ko Mesir. 15Sia' bodiapm di su'utn sampai Rajo Herodes mati. Kojadian nantai tojadi oca' pomandiran Tuhatn Allah monjadi nyata. Timpu joman komai ado nabi inyo monyampaian pomandiran Allah nantai dinga' ni'innan bunyinyo: “Aku paca'an moningkau Ana'-Ku koluar doi' Mesir.”#2:15: Doi' buku nabi Hosea 11:1. Posatn Allah ni'in mungkitn paca'an moingant'an urakng Yahudi ubo apo Allah socaro luar biaso monyolamant'an angki-bayatn sia', inyo disobut ‘Ana'-Ku’ di si'itn. Allah monyolamant'an sia' doi' hulutn-pacal di Mesir. Timpu joman Yesus, urakng Yahudi monantian Rajo Inyo Dijanjian Allah, inyo sia' sobut ‘Kristus’. Sia' moharap'an Rajo nantai monyolamant'an sia' doi' kuaso koraja'an Romawi. Di si'itn Allah moningkau Ana'-Nyo doi' Mesir, apo tujuan-Nyo bukainyo doi' inyo diharapan urakng Yahudi. Tujuan-Nyo ia'an pakai' monyolamant'an umant Allah doi' hukupan dosa.
Rajo Herodes mombunuh somuo bobia' kocit di sokitar Betlehem
(2:16-18)
16Timpu Herodes tohu obai boko urakng majus nantai udah mongontumbukinyo, io kotakng godi. Lalu, io monyiuh oca' somuo bobia' lolaki di kota Betlehem ongko sokitarnyo dibunuhi, ia'an boko bobia' inyo boumur di babah duo tohutn. Io mompokiroan umur Bobia' nantai doi' kotorakan boko urakng majus nantai, doi' watu sia' moniant bintakng inyo timbul nantai. 17Kojadian nantai tojadi oca' pomandiran Tuhatn Allah monjadi nyata. Timpu joman komai Nabi Yeremia monulis pomandiran Allah nantai dinga' ni'innan bunyinyo: 18“Di kota Rama,#2:18: Kota Rama ado di sokitar doerah Betlehem todinga' boko saro inyo kotakng salu'. Urakng Israel, ia'an boko koturutan Rahel, bulikng monangisi poana'an sia'. Sia' co honda' dikongkanti'i obai poana'an sia' udah co nyiantam.”#2:18: Doi' buku nabi Yeremia 31:15.
Yusuf mombaba' koluarganyo bobali' doi' nogori Mesir
(2:19-23)
19Yusuf ongko ana' bininyo ija' ado di nogori Mesir. Apo, lopas Rajo Herodes mati, molekat Tuhatn Allah moniant'an diri agi' ko Yusuf dalapm mimpi. 20Kato molekat nantai, “Boko urakng inyo bousaha mombunuh Bobia' nantai udah mati. Jadi huascam, baba' Bobia' nantai agatn indai-Nyo bobali' ko tanah Israel.” 21Ongko, Yusuf huas. Io mombaba' Bobia' nantai agatn indai-Nyo bobali' ko tanah Israel.
22Apo, Yusuf mondinga' obai Arkhelaus, ana' lolaki Rajo Herodes, udah monggonti'i bopainyo momorintah doerah Yudea. Jadi, Yusuf gola' botula' ko su'utn.#2:22: Yusuf gola' obai mungkitn Arkhelaus paca'an monorusan hajat bopainyo pakai' mombunuh Yesus, Rajo Inyo Dijanjian Allah Lalu, io dinosihati dalapm mimpi, ongko io botula' agatn ana' bininyo ko doerah Galilea. 23Sia' botula' ko laman inyo bodamo Nazaret ongko bodiapm di su'utn. Kojadian nantai tojadi oca' pomandiran Tuhatn Allah monjadi nyata. Timpu joman komai boko nabi monulis obai Rajo Inyo Dijanjian Allah paca'an disobut ‘Urakng Nazaret.’
