RASUL-RASUL EKUGWA WENE 9
9
Paulus iliti kwaktarige wene
(Kis. 22:6-16, 26:12-18)
1Ar Saulus nen, Ar Yesus ane waganggwi mende kede warinaka, inebe warinaka, eka dogolir, imam agung oba lagagerek, 2wene men yorige, an ir ap Yahudi mende inewai, o Damsyik paga etoma, ir o tamban erir tagama aruwam werek mende etoma inoba, surat kuasa kuasa kar kendaga paga wornirumo, an etoma wolok lalok, ir akuni Ar Yesus ane waganggwi mende werek kalok, kede warogo o Yerusalem wogorek warik yiluk, nggino yokigi o, yiluk yorige.
3Nen ar Saulus enogo, o Damsyik unggik nen yiluk, o tukandekma korok panggo yi lagagerek mo, akbinak ambi mbogor taga nen, Saulus oba kwi ndede erogo wukdi wagage o. 4Akbinak enogo nen, ar Saulus yuk puk nggilagage o. Nen ane mbogor taga nen yoga dogolir, “Saulus, Saulus! Kar nenaluk An maduk ernabir tagan?” yiluk yorige.
5“Nombae Kar ta nen kane yornirir tagan?” yiluk ar Paulus nen kinok yorige.
Ane enogo nen onggo yoga dogolir, “An Yesus, kar nen maduk ernabir tagan werek nebe yi arar o. 6Nen, yogondak kebe menatuk uma unggi lan o, uma etoma nen, kar eru mende yokirugun enaga o,” yiluk yorige.
7Akuni Saulus inom lagugwa mende, ane yega inaruk kulkugwa mende, ebe inil paga inobade ambik karugwa. 8Ar Saulus il bengge latuk menaga lagage, ye mende nde mende il kabuk ar agage o. Etegerogo eki nanggige, ir akuni nen ninggi pagago wolok, uma Damsyik unggwi lagugwa. 9Ma ar enogo, tiga hari paga, erom inom, i inom ninggidek, il mbuk mondok welagage o.
10O Damsyik etoma ap Yesus wene waganggige mende ambi endaga Ananias werekma, Inggi ambi paga Tuhan oba wagagerek, Ananias akbi ngganggo paga imbirak wene mbalka dogolir, “Ananias!” yiluk yorigemo,
Ar Ananias nen, “An nebe yi o, Tuhan!” yiluk yorige.
11Nen Ar Tuhan nen, “Yogo, yogondak ya, ap Yudas uma tuan mor-mor Yago paga lano o. Kar nen eta ari lalok kalok, akuni kinok wokdano o. Ap ambi endaga Saulus ai Tarsus mende, tamban eka, ebe o nggoma agarik o, yiluk yorano o. 12Saulus nen akbi ngganggo paga, ap ambi endaga Ananias waga lagagerek, il pano aruwak yiluk alubak tebelogo, ebe ake tamban eka karige o.” 13Ma ar Ananias nen, “Tuhan, ap yi akuni o Yerusalem etoma, Kakburi anggon panggon adik negen erinabir taga mende ebe yi arar o, yiluk abok yugwi naruk kolalki o, yiluk yirige. 14Yogondak ir ap imam kepala inoba, surat kuasa wagangga lagarik, kane waganggwi mende, o yoma werek mende ninarik yiluk kwak ninabir wagarik o,” yiluk yorige.
15Tuhan Ane Ananias yoga dogolir, “Kar arar lano! Yorige, ar ebe An nen neyabu eruwak yiluk mikimo o. Ar nen an nabok akuni tekmana mende inom, ap inendaga mbogor inom, ir Israel mende inom, yorar laga dogogin o. 16Ar nen an nake yagal warurak mende, An nen yorigin o,” yiluk yorige o.
17Ar Ananias Saulus oba lagagerek, alubak tebelogo nen, ake tamban ekige. “Kar tuan taga waganem, Tuhan Yesus il keyagemo o. Ar nen an kar koba lakbani wagama wagi o. Kar kil pano aga, nen Roh Allah koba wura waga, erigin o.” 18Eta yoga kigik, ilmo nen ikan agado ndak-ndak, we bonggok togo arar wukigemo, ar il arar pano agage. Nen Ar ebe menagagemo, ima wukdirige. 19Nen ar agarom nengga lagagerek ar obarne agage.
Saulus nen Damsyik mende wene emeriraga lagage wene
Ar Saulus nen, ir Yesus ane waganggwi mende inom inggi yuk negen ar welagage o. 20Ar ir Yahudi tamban erir tagama nggwe etoma laga dogolir, Yesus eti Allah akbur arar o, yiluk yorar nega lagage. 21Saulus wene yir nega kalok, ir akuni nen wi au, yiluk yugu lagugwa, tuguluk Ir nen, “Ar yi ar, o Yerusalem akuni Yesus ane waganggwi mende warinaka laga enogo a? Yogo, ar yoma waga eti akuni Yesus ane waganggwi mende, kede warogo wogorek imam-imam inoba, o Yerusalem lak nen yiluk wagarik o!” yiluk yorarugwa.
22Saulus nen ane obarne nggok togo yega lagage. Wene edo makbil bega mende eti, inil oba panggorogo Yesus eti ndil ninakwa endaga mbogor, yega paga, ir ap Yahudi mende o Damsyik werek mende nen, nen wene yorurak mondok dek arar etagage o.
23 #
2Kor. 11:32-33
Welagugwarik nen, ir ap Yahudi mende nen Saulus eti waruwok yiluk abok mbalkugwa. 24Ar Saulus arar kurumbi yorugwama, ir Yahudi mende nen, ar Saulus wulka onggega ekanem waruwok nen yiluk, bakma talek welagugwa. 25Kukbaga ambi paga, ar Saulus ogari nen nggidimoge akla yagadogo, kede nggigilogo leger abel tekman nggwe wulakugwa. 26Ar Saulus o Yerusalem wagagerek, Ar Yesus ane waganggwi mende inom, unggik yiluk ekige mende, ndak dek agage o. Ir Yesus ane waganggugwa mende nen, ar ebebar Yesus ane wagangge yiluk inonggokdek ma, ar oba inobade ambik kugu lagugwa. 27Yabungga Barnabas oba wagagerek, wolok ir rasul inoba lagagerek. Barnabas nen Saulus Tuhan imbirak Damsyik bakma abuk agage mende inom, Saulus Tuhan nen wene yorige mende inom, Saulus obade dek dogolir, Ar Yesus ekige wene Damsyik nen emeriraga lagage mende, obogar mbililogo yoragage. 28Ar Saulus ir rasul inom, Yerusalem eta dogolir, Yesus endaga paga Allah wene wuraka lagage. 29Ar nen Yahudi inane Yunani wene yugwi mende wene yoraga, wene kinok wokdaga eka lagage. Ir ar waruwok yiluk eloktekma ya taldigik eku lagugwa. 30Nen Ar Yesus ane waganggugwa mende amberak inilu atuk, Saulus wolok o Kaisarea nen uma Tarsus lakbirugwa. 31Nen jemaat Judea inom, Samaria inom, Galilea inom, pano inabodok dek welagugwa. Roh Allah nen yamak daga kigik, jemaat etoma inobarne aga, inebe ambik agwi eku lagugwa.
Petrus o Lida o, Yope o dogolir eka lagage wene
32Ar Petrus o ya nda etoma, ir jemaat bikdar laga lagage. O ambi paga, Ar Allah akburi o Lida etoma bikda lagage. 33Etoma ap ambi endaga Eneas, ago ndalek windik mondok kigik delapan tahun ekigemo. 34Ar Petrus nen Eneas yoga dogolir, “Eneas, Ar Yesus Kristus nen, kar u koba palkabik yiluk o.” Eta yoga kigik Eneas arar menagage. 35Ir akuni Lida mende, Saron mende, Eneas etaga inil kalok, Tuhan ebebar o yiluk, ane waganggugwa.
36O Yope etoma kwe ambi endaga Tabita, Ar nen Yesus oba panggolek mende, (endaga Yunani inane paga Dorkas), eti rusa yiluk, ar pano mban eka dogolir, akuni ininggi dek mende, yamak daga lagage. 37U oba aga lagagerek arar watagage, ebe anggoma warogo o kamar tida paga windirugwa. 38Yope nen Lida lau eti lok negen kwak dek. Ma, Ir Yesus ane waganggugwa mende, ar Petrus o Lida werek yirugama, elege inebe mbere Petrus ayonggo lakbagu dogolir, “Ibar kinom warno o,” yiluk yorarugwa. 39Ar Petrus iluk atuk inoba lagagemo, wolok tidama dagarugwa. Kumi toge mende nen, Dorkas iluk dogolir erinaka laga yoma o, yiluk tu etoma de paga Petrus inugur karuga. 40Petrus nen kinebe obogar wundi lani yiluk yoralok, ar endop yunggu yiluk, tamban ekige. Tamban ekdiluk Dorkas wene yoga dogolir, “Tabita wae, menarinde!” Yiluk Dorkas yorige. Yorigemo, il benggelatuk birkegalagage mende, Petrus agagemo kortagage. 41Petrus nen inggi pagago mendirige. Petrus nen akuni Yesus ane waganggugwa mende kumi toge mende wairalok, nen Dorkas iluk erogo birige enogo wogoragage. 42Eti ekige wene o Yope etoma wigak yirigemo, akuni ambigar Yesus oba ebebar andalok dek, nir ninewe endaga mbogor ndil ninakwa yi arar, o yiluk waganggugwa. 43Petrus inggi mbere kenagan paga, ap Simon binatang agado nggolalek agabak kigikwi, imbirak welagugwa, welagugwa o.
