RASUL-RASUL EKUGWA WENE 8
8
1Saulus Stefanus wakugwama iliti adeknggen ambik agage o.
Saulus nen Jemaat maduk erinabir nega lagage wene
Eti kudi nen, jemaat Yerusalem werek mende mugurek magarek warinabuwok yiluk ekwi kalok, ir rasul-rasul enogo arar dambe dalok, ir jemaat mende, ir inebe kode o Yudea nggwe, o Samaria nggwe, unggir etoma arar wundir lagugwa o. 2Ir akuni Ar Allah oba um nggok togo palek mende nen, Stefanus adenggum makwi, iniliti maduk agwi, eku dogolir ebe kubur ekugwa o.
3 #
Kis. 22:4-5, 26:9-11 Ar Saulus nen jemaat mondok dek erinabik yiluk erir nega lagage. Ar nen akuni inuma dombok unggir laga dogolir, Allah wene waganggugwa mende, kede warogo likdalok, kede warek dogir tagama etoma malinabir nega lagage o.
Pano Wene o Samaria yorar lagugwa wene
4Ir akuni Yesus ane waganggugwa mende, o ya nda mbugulku dogolir, Allah wene Pano Wene enogo, akuni arar yorar lagugwa o. 5Ar Filipus enogo, o Samaria arar lagagerek, Ar Allah ane amburu, Raja Ndilninakwa lakbi warigin yirige eti abok mende, ir akuni obogar etoma emerirar lagage. 6Ir nen Filipus wene yega inaruk kolalkwi, erukbuk mende eka inil kalok dikbir lagwi, eku lagugwa o. 7Akuni irimbo inakla unggirige mende, kener yabak nggodak warogo nen wundir lagwi, akuni inendop kunik mende inom, inago ndalek mende inom, pano erinaka, erir lagage o. 8Ir akuni o Samaria mende iniliti adeknggen ambik agage. 9Kota Samaria etoma ap ambi endaga Simon welagage. Ar aru eka paga, ir akuni o etoma nen, ar ane mondok kolek arar welagugwa. Ar nen yoraga dogolir, an ap nggok mende o, yiluk yega lagage o. 10Ir akuni Samaria mende buk nggok obogar, ar ane mban mutok lagu lagugwa. Ma ir nen yugu dogolir, “Ap yi Ar Allah obarne mende ebe ar arar o. Ma, ar ebe obatne nggok mende arar,” yiluk yugu lagugwa. 11O pagane etoma nen, ar aru eti obarne paga, akuni obogar, ar ane mban kulku lagugwa. 12Ar Filipus nen, Ar Allah awene Pano Wene, Ar Allah endaga mbogor dogorak mende abok inom, Yesus Kristus endaga mbogor ndilninakwa awene mende inom yoragage. Ir nen Filipus wene yege eti ebebar yornirage o, yiluk waganggugwa ma, ap inom kumi inom, obogar ima wukdarige o. 13Ar Simon iliti ebebar andarigemo, ar ima inom wukdirige. Ima wukdirigemo, ar nen Filipus imbirak mondok nega dogolir, ar Filipus nen erukbuk mende eka il kalok, Simon nen bi ambik waka lagage.
14Ir rasul o Yerusalem nen, akuni Samaria mende Allah wene wagangga yiluk inaruk kuldiluk, ar Petrus Yohanes imbirak, o Samaria arar lakbarugwa o. 15Ar Petrus Yohanes imbirak lagugwarik, ir akuni Samaria mende, Roh Allah inoba wura waruwak yiluk inake tamban ekugwa o. 16Ir Yesus endaga paga, ima wurinakugwa mende, Roh Allah inoba wurabi wagikdek werekma, 17ar Petrus Yohanes imbirak nen, ir akuni Samaria mende inalubak tebelogo tamban erinakugwama, ir enogo Roh Allah eti inoba wurabi wagage o.
18Ar Simon nen, akuni Samaria mende inalubak tebelkwi kigik, Roh Allah waganggwi il dalok, ar Simon uang wolok Petrus o, nen ar Yohanes o imbirak uang wogorak nen yiluk inoba wolok lagage. 19Nen yoraga dogolir, “Wadigi yi, ir akuni yoma an ninggi pakdamo, ir Roh Allah eti kodagu dogowak nen, obarne mende eti, an ambi woknirni o,” yiluk yorarige.
20Petrus nen onggo yoga dogolir, “Kebe inom kauwan inom elam watagup o! Kar nen Ar Allah nen wedek wogoragatek mende, onggo birtagama yiluk andagen a? 21Ar Allah oba, kar kilitimo adigar ebeka keyago eti, nir ninom yabu erurak ndak dek o. 22Kar nen kilitimo maduk mende onggege eti dambe kega, Allah nen kaka kau, maga banin o yiluk yoga, etegerogo erin o! 23Nenaluk an nilu, kar kilitimo ade werek mende werek, nen komaduk anggadela nen wulaka keyagi o.”
24Simon nen yega dogolir, “Ae nogari, wene yornogop eta, Allah nen anini ambi noba beganem, nake Allah nggino yokni o,” yiluk nggino yorarige.
25Ar Petrus Yohanes imbirak, Ar Allah awene yoragwi, abok bagalkwi eku lagugwarik, o Yerusalem arar lagugwa. Nen ir tuan taga etoma lagu dogolir, ir akuni inai dombok etoma, Pano Wene eti yorar lagugwa o.
Filipus ap nggok Etiopia mende imbirak ekugwa wene
26Ar malaikat mende nen Filipus yoga dogolir, “Yogo kar alibagan selatan nggwe, tuan Yerusalem nen o Gaza lektagama, ir akuni o yogondak lektagodek eti paga nggwe arar lan o,” yiluk yorige. 27Yorigemo, ar Filipus arar lagage mende, ap ambi o Etiopia mende ma, ar ebe eyabu istana paga, kwe ratu Kandake ai negeri Etiopia mende eti werek uma, amindik amendek inggi pago dogirtaga mende. Ma ar ap eti, o Yerusalem etoma, Ar Allah wogokbik nen yiluk lagagerek, tuguluk iyok paga uma Kreta akla lagage. 28Laga dogolir, Buku Nabi Yesus nen diru mbalkige mende eti endaga talir lagage o. 29Roh Allah nen Filipus yoga dogolir, “Kereta eti oba panggorogo lan o,” yiluk yorige. 30Yorigemo, ar Filipus kereta enogo oba panggorogo lagagerek, ap enogo buku Yesaya endaga talka aruk kulka lagagerek, yoga dogolir, “Ai nombae, kar wene endaga talirtagan eti, wene ebe dikbegen a, dek a?” yiluk yorige.
31Ap enogo nen, “Akuni nen wene yi yegerogo yiluk yornugwi dek kigik, naburak nenggerogon nilu arurak kegen?” Yoga lagagerek, tuguluk ar ap enogo nen, ar Filipus kreta akla dagi eme yotuk, imbirak korek lagage. 32#Yes. 53:7-8Ma wene ar endaga talir lagage mende ebe yi o,
“Ar ebe eti domba waruwok nen yiluk, ebe likalok lertagwi ndak-ndak o,
nen ar ebe domba ak iri mbalkwi kigik, ane yigikdek dogir taga eti ndak-ndak o,
Ar wene ambi ogwe andema nen wundudek o.
33Ar ebe miyuk-meyak erogo bugwi, yiduk maduk erogo bugwi,
Ar ebe agataga yoma nen min wakdumo,
akuni amberak nen, Ar akburi wigalek yio, yiluk yugu dogogun dek o.”
34Ar ap nggok Etiopia mende enogo nen, “Filipus wae, wene yi, akuni ta ake yiluk nabi nen diru yi mbalkige nda, an bagalogo yornirin o!” yiluk nggino yorige. 35Yorigemo, ar Filipus wene ar ayat-ayat endaga talir wagage yanogo paga ar yidu kalok, wene Pano Wene Ar Yesus ekige wene, ap nggok Etiopia mende enogo arar yorige o. 36Nen tuan taga i yenggelekma negen ari lagugwarik, ap nggok enogo nen, “An ima wukbanu paga, auwan ekikdek kwak nggi?” Kil lakan! Eloma i werek o.
[37Yorigemo ar Filipus nen, “Nombae kar kiliti paga ebebar andagen kalok, an ima wukdagagin o,” yiluk yorige.
Yorigemo ar nen onggo yoga dogolir, “Ar Yesus Kristus eti, Allah akbur yiluk ebebar andagi o,” yiluk ar ap nggok Etiopia mende enogo nen yirige.] 38Yorigemo, ar Filipus nen ya wurawok o, yiluk yotuk, Filipus ap nggok Etiopia mende imbirak ima unggugu lagugwarik, Filipus nen ima wukdirige o. 39Wukbiluk, auan ima nen wundi wagunem, Ar Roh Allah nen, ar Filipus enogo arar waganggige o. Nen ap nggok Etiopia mende ernogo, ar Filipus il kigikdek arar uma laga dogolir, iliti adenggen mondo paga arar lagage o. 40Nen ar Filipus enogo, Roh Allah nen wolok, o Asdod bilagagemo, tuan paga laga dogolir, wene Pano Wene, Ar Yesus ekige wene, ap ai dombok, obogar etoma yorar, o Kaisarea kudi unggwi lagage o.
