ማ̈ቶ̈ሳ 7
7
ኣሳ ጋልዳ ፊርዳፒ̇ቴ
1ጾ̈ሲ̇ ዪንታ̇ ጋልዳ ፊርዳካ̇ዮ̈ዲፌ̈ን ዪንቲ̇ ኣሳ ጋልዳ ፊርዳፒ̇ቴ። 2ኣባ ጌይን ዪንቲ̇ ኣሳ ጋልዳ ፊርዲኖን ኢዝፌኒ ጾ̈ሲ̇ ዪንታ̇ ጋልዳ ፊርዲ̈ሬ፤ ማ ዪንቲ̇ ማኪ̇ኖ ኢቂ̇ን ኢዝባር ዪንታ̇ብ ማኪ̇̈ሬ። 3“ኔ ኣ̈ፊ̈ን ጋርታ̇ ዎን ቱ̈ሲ̇ን ቤቃካይዶራ ኔ ኢሻ ኣ̈ፊን ጋርታ̇ ዎ ሱ̈ሊ̇ን ኣባብ ቤቃ̈ራ? 4ኔ ኣ̈ፊ̈ን ጋርታ̇ ዎ ቱ̈ሲ̇ን ኬሳ̇ካይዶራ ኔ ኢሻ ኣ̈ፊን ጋርታ̇ ዎ ቡ̈ሪን ‘ቴ ኔ̈ብ ኬሶ̇’ ጋ̈ንዳ̇ብ ዎዛርታ̇ር ዳንዳኣ̈ራ? 5ኔ ኣሳ ቲ̈ን ኮሽ ማይጻር ቤንታንዳብ ኮዪዛ̈ዶ፥ ኔ ቲ̈ኒታራ ኔ ኣ̈ፊ̈ን ጋርቶ̇ ቱ̈ሲ̇ን ኬ̈ሳ̇ቤ፥ ኢናፖ̇ ዓኒ ኔ ኢሻ ኣ̈ፊ̈ን ጋርቶ̇ን ሱ̈ሊ̇ን ኬሳ̇ንዳ̇ቦ ኔ ኣ̈ፊ̈ን ኮሺንቻ̇ ቤቃ̇̈ሬ።
6ጌ̈ሽ ማ̈ቂ̇ኖ ባዝ ካናብ ኢማ̇ፒቴ ኢንቲ̇ ጋስ ማ̈ቃ̇ሪ ዪንታ̇ ቂ̈ሬ። ማ ኢንቁ ጋዚን ዎይሊን ኣልኣ ማ̈ቂ̇ኖ ሹ̈ቺን ጉዲን ቲ̈ን ሚሻፒ̇ቴ፥ ኣባጌዪን ኢንቲ̇ ፌ ቶ̈ሃባር ሜላ̇ ዬ ኢሲ̇̈ሬ።
ጌሺብቴ̇፥ ኮዪብቴ̇፥ ቆንኪ̇ብቴ̇
ሉቃ̈ሳ 11፡9-13
7“ጾ̈ሳ̇̇ ጌሺብቴ̇ ዪንታ̇ብ ኢሚ̇̈ሬ፥ ኮዪብቴ̇ ኢ ዪንታ̇ብ ቤይሲ̈ሬ ካሪን ቆንኪ̇ብቴ̇ ኢ ዪንታ̇ብ ፊርቂ̇̈ሬ። 8ጌሺዝ ኣሲ ዎይ ኤኪ̇̈ሬ ኮዪዝ ኣሲ ዲጚ̈ሬ ካሪን ቆንኪዛ̈ቦ ፊሪቂ̇ንታ̈ሬ። 9ዪንታ̇ ጋርታ̇ ኢ ናኣ ኢያ ቂጻ̇ ጌሺን ሹች ኢሚ̇ዝ ኣሲ ዎ? 10ዎይ ‘ሞላ ታ̈ብ ኢሚ̇ሼ’ ጌዪ ጌሺን ሾ̈ሽ ኢሚ̇̈ራ? 11ዪዚ ዪንቲ̇ ኢ̈ታ ኣስዶሪ ዪንታ̇ ናኣንቦ ኮሽ ባዝ ኢሚ̇̈ርዶን፥ ዪንታ̇ ባ̈ባ̈ ኣፋ ዎ̈ዲ ኢያ ጌሺዛንቦ ዎዛርፌ̈ን ኮሽ ባዝ ሺሻር ኢሚ̇ባሳ? 12ዪዚ ኣሲ ዪንታ̇ብ ኦምፔን ዪንቲ̇ ኮዪዝ ባዛን ዪንታ̇ር ዪና̇ ኢዝፌ̈ን ኣሳንቦ ኦ̈ብቴ። ሙ̈ሳ ሂጋ̇ ማጻ̈ፋ ጋልዳ̇ሬ ማ ናባን ማጻ̈ፋ ጋልዳ̇ሬ ታማ̈ርሳዝ ሂጊ̇ን ዓና̇ ኢዞ” ጌይዴ።
ኩንእ ካራኬ ሻክ ካራ
ሉቃ̈ሳ 13፡24
13“ይሳ̇ንዳብ ኤ̈ጛዝ ጎይንዳ ሻኬ̇፤ ጌላዝ ካሪንዳ̇ሬ ሻኬ̇፥ ዎይሊን ኣሲ ኢዝባር ጌሊ̈ሬ። 14ሼምፓ ጎይ ኤ̈ጛዝ ጎይሚንዳ ኩንኤ፤ ጌላዝ ካሪንዳ̇ር ኩንኤ፥ ኢዝባር ጌሊዝ ኣሳንር ጊላ̇” ጌይዴ።
ሚ ፌ ካጻ̇ዝ ኣ̈ፊንባር ኤሪንቲ̇̈ሬ
ሉቃ̈ሳ 6፡43-44
15ዪንቲ̇ ማቃ ናባን ጋልዳፖ ዪንታ̇ ና̈ጊብቴ̇። ኢንቲ̇ ፌ ጋልዳ ዶሪ ሻ̈ቻ ማኣሪ ዶሪ ማይጺ̈ርዶሪ ጋርታ ቡሪዝ ዬ̈ያ። 16ዪንቲ̇ ኢንታ̇ ኤራዚንዳ ኢንታ̇ ኦ̈ሲ̇ምባ̇ራ። ጉርጪንቻ̇ ጋልዳፖ̇ ዎይና ኣ̈ፊ፤ ጫጭ ጋልዳፖ̇ ኦች ኣ̈ፍ ሱባ̈ሴ። 17ዪና̇ ኢዝፌ̈ኒ ኮሽ ሚ ዎይ ኮሽ ኣ̈ፍ ካ̈ጺ̈ሬ፤ ኢ̈ት ሚ ኢ̈ት ኣ̈ፍ ካጺ̇̈ሬ። 18ኮሽ ሚ ኢ̈ት፥ ኣ̈ፍ ኢ̈ት ሚ ኮሽ ኣ̈ፍ ካጻ̇ንዳብ ዳንዳኢባ̈ሴ። 19ኮሽ ኣ̈ፍ ካጺባ̈ሶ ሚ ዎይ ቃጺንቲ̇̈ሬ፥ ታማ ጋርታ̇ ቶጚንቲ̈ሬ። 20ዪ̈ኮታ̇ ዪንቲ̇ ኢንቲ̇ ካጻ̇ዝ ኣ̈ፊምባ̇ር ኢንታ̇ ኤሪ̈ሬ።
21“ኣፋ ዎ ቴ ባ̈ባ̈ ጋዝ ባዚን ኦ̈ዝ ኣሳንዶኬ ሜላ̇ ታ̈ና ጎዳ̈ዶ! ጎዳ̈ዶ! ጌይዝ ኣሲ ዎይ ጾ̈ሳ̇̇ ካ̈ቲቲ ጋርታ̇ ጌሊባ̈ሴ። 22ዪና̇ ኢዝ ቃሚ̇ን ዎይሊንን ‘ጎዳ̈ዶ! ጎዳ̈ዶ! ኑ ኔ ሱምባር ካ̈ያ ካ̈ያካ̇ያ? ኔ ሱምባር ኢ̈ታ ኣያ̇ና ኬሳ̇ካ̇ያ? ኔ ሱምባር ዎይሊን ዎልቃ̈ማ ባዝ ኦ̈ካያ?’ ጌይሬ። 23ዪና̇ ኢዝባራ ቴ ዪንታ̇ ዉርሳ ኤራካ̇ዬ፤ ዪንቲ̇ ኢ̈ት ኦ̈ዛን ታ̈ፖ̇ ጌዳ ጎቲ̇ብቴ̇ ጋ̈ራ ፋል ሶ̈ላ̈ሬ።
ሹች ጋልዳ ኬ̈ጺንቲ̇ኖ ኬ̈ኬ ሻ̈ማ ጋልዳ ኬ̈ጺንቲ̇ኖ ኬ̈
ሉቃ̈ሳ 6፡47-49
24ዪዚ ቴ ቃ̈ሊን ዓኖ̇ ሲስካ̇ሪ ኦ̈ሳ ጋልዳ ፌ̈ሺ̇ዝ ኣሲ ዎይ ፌ ኬ̈ን ሹች ጋልዳ ኬ̈ጺ̇ኖ ኤጫ ኣስ ማይጺ̈ሬ። 25ኢሪ ኬዲ̇ዴ፤ ዲኣር ዬ̈ዪዴ፤ ዡባ̇ር ባቃ̇ሪ ኬ̈ን ኢዞ ሱጊዴ፤ ኬ̈ንዳ ሹች ጋልዳ ኬ̈ጺንቲ̇ኖኮታ̇ቦ ዪርዳካይ ኣታ̇ዴ። 26ቴ ቃ̈ሊን ዓኖ̇ ሲስካ̇ሪ ኦ̈ሳ̇ ጋልዳ ፌ̈ሺ̇ባ̈ሶ ኣሲ ፌ ኬ̈ን ሻ̈ማ ጋልዳ ኬ̈ጺ̇ኖ ዳሻ ኣስ ማይጺ̇̈ሬ። 27ኢሪ ኬዲ̇ዴ፤ ዲኣር ኢዝ ጋልዳ ዬይዴ፤ ዡባ̇ር ኢዞ ባቂ̇ዴ፤ ኬ̈ን ኢዞ ሱጊዴ ኢዛር ዪርዳ̇ዴ ኢዝ ዪርዲ̇ንዳሬ ዎይሊን ኢ̈ት ማ̈ቃ̇ዴ” ጌይዴ። 28ዬሱ̈ሲ ዪኖ̇ ታማ̈ርሲ̇ ዉርሲ̇ኖፖ̇ ዓኒ ዎርዣ ኢ ቲሚርታ̇ባር ጋራ̇ሚንቲ̇ዴ። 29ኣባ ጌይን ኢ ታማ̈ርሲ̈ርዶሪ ኣይሁዳን ሂጋ̇ ታማ̈ርሲዝ ኣሳንፌ̈ን ጊዳካ̇ይዶ̈ን ሲልጣ̈ና ዎ ኣስፌ̈ን ታማ̈ርሲኖንኮታ̇ቦ።
