Yoosuwa 6
6
1Yerikô-magaalak afa Israayil mari culaamak alifit teneeh; num akak yawqeeh culam duudak mananna. 2YALLI Yoosuwak iyyemii, «Anu Yerikô-magaalaay tet malik kee teetil enna 'ta agiirah tan qaskar ku gabal heeyyo. 3Koo kee ku qaskar lica ayroh gide, ayrol inki adda magaalak iro le kabuk woo qaxaak a qaxa mermeritetton. 4Malcina seekiy maruw gaysak bicsen *baanta gabat lehiyya woo YALLIH Qahdih-Sanduguk foocat gexxaama. Malcinhaytoh ayro woo seeka baanta taagure waqdi, koo kee ku qaskarak takkeenimik woo magaalat malcina adda mermerita. 5Sarrak baanta ayseede'kal waqla fan meqe gide xongolisaanama. Too anay taabben waqdi aki mari yakkeemiik xongolaama. Too waqdi woo magaalah gasoosa inkih addah addigillele. Tohuk lakal qaskar elle sugte'kkek takkeemiik magaala cultaama» kaak iyye.
6Too yab yoobbek lakal, Yoosuwa seekah seeceh annah keenik iyye. «YALLIH-Qahdih-Sandug beyaay malcina seekiy maruw gaysak bicsen baanta lehiyya foocat isinnik haa. ‹Woo Qahdih Sanduguk foocat gexa› keenik inxica» iyye. 7Sarrak Yoosuwa isi qaskarak, «Siinik garab woo Qahdih Sanduguk naharat gexxa seekak foocat gacak magaalat mermerita» keenik iyye.
8-9Too waqdi Yoosuwa ken elle amrisa innal, fooci-qaskar, baanta taagure seekak foocat gexxeeh; ken lakat woo YALLIH Qahdih Sandug tabbixe seeka gacte. Woo seekah lakat kaadu qaskar ten. Tah elle takkeemil baanta aagaruk gexen. 10Takkay immay Yoosuwa iyyeemih, «Anu siinik axce'kal num siinik xongole waay; num guduqqa siinik axce waay» keenik iyye. 11Woo mari usuk iyyem abeeh; naharsi ayro, woo YALLIH Qahdih Sandug yabbixe mari inki adda magaalat mermerite. Tohuk gaba kalen waqdi elle yinfiddigen aracah yuduureeniih barak wokkel elle xiinen.
12-13Woo ayrol katayta ayro Yoosuwa maaca dibroh ugteeh; qaskar kaaduuy duma Yoosuwa aba keenik elle iyye innal, nammeyhaytoh ayro kaadu naharat fooci-qaskar gacteeh; ken lakat kaadu malciin takke seekay malcina baanta taagure gacteeh; woo seekah lakat YALLIH Qahdih Sandug quukah tabbixe seeka gacte. YALLIH Qahdih Sandug tabbixe seekak ellecabot qaskar gacca 'teh magaalat mermeriten. Tah elle abaanamal baanta aagaruk yenen. 14Too ayro inki adda magaalat mermeritta 'yeenih woo elle yinfiddigen arac fan yuduuren. Lica ayro fan tonnah abak sugen.
15Malcinhaytoh ayro, ayro bukka 'te waqdi ugutta 'yeenih malcina adda teetit mermeriten. Too ayrok sah wohuk dumal malcina adda woo magaalat mermeriteenih masuginnon. 16Malcinhaytoh adda mermeritta 'yeenih seeka woo baanta toogore waqdi, Yoosuwa isi marak, «YALLI a magaala siinih yeceek, xongola» iyye. 17Sarrak kaadu iyyeemih, «A magaala kee tet addal tanim inkih YALLIH sadgatah bayisa. Racab deqsitta xiiqareh xiinah ten barra nanu gibah rubne mara neh tooqoreemih sabbatah, tet buxah mara kee tet maxagina. 18Tonna'mmay woo bayissoonu waytan duyyek isinnih tu isinnih maraqsitina. Wohuk tu raaqisseenik, Israayil marah umaane kee baati baahettoonum ixiga. 19Lakqo kee dahabaay, nacaas kee birtak bicsen duyye inkih YALLAH rikeek yan aracal haanam faxxintaah, Yallih im elle haan ikkel daanisaanam faxxinta» 'yaanamih amri keenil oobise.
20Sarrak seeka baanta toogoreeh; too waqdi raqqa 'ye mari too baantah anay akah yoobbe innaak kaxxa xongoloh xongolen. Too waqdi magaalat maroh tan gasoosa tiddigilleh. Sarrak qaskar takkeemik woo magaala elle tan kooma fan yewqeeniih magaala yibbixen. 21Magaalah addal suggu 'ye marak lab mara takkuu, say mara takku urru takku idoola takku inkih seefit qiden. Toh lih kaadu laay illi kee danoona qideenih.
22Yoosuwa woo gibah ruubeh suge namma numuk iyyemii, «Woo xiiqareh xiinah tan barrah buxa gexay, xagana teetih akah culten innah tet kee tet buxah mara baaha» iyye. 23Osonuuy gexeeniih Racab kee tet abba kee inaay, tet tooboko kee maqanxix kee raqqa 'ye tet buxah marak tu macabinnoonuy inkih baahen. Tet kee tet buxah mara inkih woo Israayil mari elle yinfiddigeh yen arac fanah beenih, rikeek yan aracal ken heen. 24Tohuk lakal woo magaala kee tet addal sugga 'teemik dahab kee lakqooy nacaas kee birtak bicsen duyye kalihim inkih carariseenih. Too duyyeh tu gactek, bahha heenih YALLAH rikeek haan duyye elle daanisan aracal heen. 25Yoosuwa, Racab kee teetih ramad elli haytam inkih rabak cateh. Woh akah abem is, usuk Yerikô-magaala fan gibah ruube namma num tooqoreh raaqisseh ten. Teetih ramad le mari a saaku fan Israayil baaxol yan.
26Too saaku Yoosuwa keenik iyyemii, «Yerikô-magaala nammeyhaak xisu waa num YALLIH abaaro geele. A magaala xisa'gidih makaado hayu waa saaku, naharsi-baxa weeleeh; teetik alifu bicisu waa saaku, ellecabol kaah yooboke lab-baxa weele» 'yaanam digga luk keenih qaddoyse.#1 Malikwa 16:34
27Too saaku tekkeemik gexxaamah YALLI Yoosuwâ-wakali yekkeeh; Yoosuwâ-migaq inkih tan baaxol yontoobbe.
