Luka 24
24
Okuhimbuka kwa Yesu
(Mat 28:1-10; Mar 16:1-8; Yoh 20:1-10)
1Aha kiro kya mbere ky'eilimansi, omu rukyakya, abakazi bagya aha nyanga. Bagenda n'emibazi y'omugaju eyo babaire batekatekire. 2Bashanga eibare lihilingisiibwe lirugire aha nyanga, 3kyonkai kabatahiremu, omubili tibagushangiremu. 4Kababaire bakyatangaliire ekyo, babona abashaija babili bemeleire aha rubaju bajwete ebijwaro bilikwengelera. 5Obutiini bubali kubi, amaisho galebire ahansi, abashaija babaza bati, “Kubaki nimuhiga omurora omu bafu? Takili hanu; yahimbuka. 6Mwijuke okwo yabagambiire akyali Galilaya, 7okwo Omwana w'Omuntu naragirwa kunagwa omu miikono y'abafakare, bamubambe, kandi aha kiro kya kashatu ahimbuke.” 8Abakazi baijuka ebigambo bya Yesu ebyo. 9Baruga aha nyanga bagya babarulira abegesibwa eikumi n'omoi n'abasigaire bona. 10Maria Magadalena, Yoana na Maria nyina Yakobo n'abakazi abandi abo babaire bagenzire nabo, nibo babibaruliire entumwa. 11Kyonkai ebaruro egyo ebabera rugano, tibagikiliize. 12Petero ogwo aimuka airuka agire aha nyanga. Yainama yalinguliza, yabona okwo emyendo ya kitaani eli yonkai. Yagaruka omuka natangazibwa ebyabaho.
Yesu nahabukira abegesibwa ba Emausi
(Mar 16:12-13)
13Kiro kyonene ekyo, abegesibwa babili bashangwa nibagya omu kyaro kya Emausi, kili emaili nka mushanju kuruga Yerusalemu. 14Bakaba nibafumora aha byabaireho. 15Orwo babaire nibafumora, Yesu abagoba agenda nabo. 16Kyonkai n'orwo bamuboine tibamumanyire. 17Ababaza ati, “Ni bihai ebi ebyo mulikugenda nimufumora?” Bemelera bagandara, bakwatwa obujune. 18Omoi, n'iwe Keleopa, amuhorora ati, “Iwe wenkai n'iwe mugenyi omuli Yerusalemu atalikumanya makuru agabairemu omu bir'ebi?” 19Yesu ababaza ati, “Makuruki?” Bamugambira bati, “Amakuru ga Yesu owa Nazareti, abaire ali murangi w'amani omu bigiro n'omu bigambo ahali Ruhanga n'abantu bona. 20Abakuhani baitu abakuru n'abatwazi bamwisize bamubamba. 21Kyonkai ichwe tubaire nitumushuubira kuchungura Isiraeli. Mbwenu kandi eki kiro kya kashatu kuruga amakuru aga gabaireho. 22N'abakazi bamoiho, abegesibwa bataahi baitu batutangaza. Bwankya karai baba baimukire aha nyanga, 23omubili tibagushangamu. Bagaruka nibagamba okwo bahabukirwa abamalaika, abo babagambira okwo Yesu yahimbuka. 24Abandi abo twaba twinabo bakwata omuhanda bagya aha nyanga, babishanga nk'okwo abakazi babigamba. Kyonkai Yesu wenene tibamubona.” 25Yesu abagambira ati, “Inywe bafera, emitima yanyu telikukokoka kwikiliza byona eby'abarangi basigire bagambire! 26Manyasi Kirisito kwija kubona ekitinwa abaire ali w'okushasha kushasha kuturwa ebyo byona.” 27Atandikira ahali Musa n'abarangi bona, yagya n'omu Bihandiko Bitakatifu byona yabashoboorora byona ebyahandikirwe ahali Kirisito ogwo.
28Bagoba ekyaro ekyo babaire nibagyamu. Kizoka oti Yesu nagendelera omu maisho. 29Bamutanga bati, “Oije tugye owaitu; ni bwaigoro n'eizoba lyaija kugwa.” 30Kayabaire naraagira nabo, akwata omukate, asiima, agubegura, agubaha. 31Aho amaisho gabo gabona, bamumanya; wenene ababura aha maisho. 32Bagambirangana bati, “Emitima yaitu tiyaba nebengeya orwo yaba natufumolera omu kihanda, natukyanura omu Bihandiko Bitakatifu?” 33Omu kaanya ako baimuka bagaruka Yerusalemu. Bashanga eikumi n'omoi n'abandi abo babaire bainabo bateraine 34babagambira bati, “Omukama yahimbukakwo, yahabukira Simoni!” 35Na bonene aba Emausi babarura agabaho omu kihanda, n'okwo bamumanyira aha kubegura omukate.
Yesu nahabukira abegesibwabe
(Mat 28:16-20; Mar 16:14-18; Yoh 20:19-23; By' 1:6-8)
36Kababaire nibafumora ebyo, Yesu wenene abemelera omugati. 37Bahukuka, batiina, balenga bati babona omuzimu. 38Ababaza ati, “Kiki, nka mwayechura, n'emitima yanyu neyebaza bingi? 39Mundebe ebiganja n'ebilenge. Omuzimu tigugira mubili na magufa nk'okwo ndi.” 40Kayamazire kugamba atyo, yaboleka ebiganja n'ebilenge. 41Kababaire batakaikiliize aha rw'ebyera, batangaire, ababaza ati, “Hanu aha mwinaho ak'okulya?” 42Bamuheleza ekichweka ky'enfuru ekazirwe 43akitora, akilya bamulebire.
44Ashuba abagambira ati, “Ebi nibyo mbagambiire nkyaina inywe, okwo buli kantu akampandikirweho omu Mateka ga Musa, n'ebyo abarangi bangambireho, n'ebyo ezaburi zingambaho nibiragirwa kugobeelera.” 45Aho abashoboza kushobokerwa Ebihandiko Bitakatifu, 46amara abagambira ati, “Oku nikwo byakahandikirwe okwo Kirisito ali w'okushasha kushasha, kyonkai aha kiro kya kashatu ahimbuke omu bafu. 47Omw'ibaralye amahanga gona garangirwe okwo k'abantu balyechuza amafu gabo baligarulirwa; eikora elyo libandize Yerusalemu. 48Inywe muli bajulizi b'ebigambo ebyo. 49Kandi ningya kubatwekera owo Tata yaragaine. Kyonkai mwikare omu kigo kya Yerusalemu kuhika orwo muraijurwa amani g'omw'iguru.”
Yesu natemba omw'iguru
(Mat 16:19-20; By' 1:9-11)
50Yesu ayebembera abegesibwabe abagobya Betania, aimukya emikono abatunga omugisha. 51Kayabaire nabatunga omugisha abasigaho atemba omw'iguru. 52Bonene bamufukamira, bagaruka Yerusalemu n'ebyera bingi, 53mara bata nibaija Rwensinga obutosha kusingiza Ruhanga.
Ruhaya DC Bible © Bible Society of Tanzania, 2001.
