Marko̱ 1
1
Jua xi Batenda
(Mt 3.1-12; Lk 3.1-9,15-17; Jua 1.19-28)
1Ku̱i̱cha tsaꞌángire̱ nga kistetsajo én tjatse xi chja̱ Jesuu̱, Kjindiꞌe Namiña Diuu̱ xi ꞌBatsjengiña. 2Ngieje nga ku̱i̱cha tsaꞌángire̱ xukúcha kitsuyasún Isaia̱, xi kitsichjen Namiña Diuu̱, nga batetsajo enꞌen:
«Án xi tsingiyaꞌan xu̱ta̱ xi tsuꞌbajo énꞌna
nga kui tjún fuékasen,
ku kui xi tjen ꞌbendairi ndiya
ni̱tjin nga fichiji nangi.
3»Tjín xi tjikjindia nangi kixí:
“¡Tꞌendájnu ndiyá Namiña Diuu̱!
¡Jnuxꞌaa̱jnu ndiyá tuxi ma faꞌa!
¡Ngují najmi xi stengiña nga̱sakure!”»
4-8Kui ni̱tjin, Jua xi Batenda ikúre̱ yajo̱ꞌe xu̱ta̱ nangi kixi. Tsja̱ꞌe̱ kameyo najñu xi baja ku tjiuxin banchu ngaꞌan. Chjaꞌba kjíne ku tsjen xi tjin ngijña.
Ku̱i̱cha kitsúre̱ xu̱ta̱ Jua nga tsichjáju: «¡Tatendájnu yajo̱jnu ku takujnu nga ngite̱ mejínjnu nga najmi xi xaba ñaꞌánjnu! Kjiátse nga tsichatꞌájnu Namiña Diuu̱.» Tekuácha kitsúre̱ nga tsichjáju: «Kjaꞌi xi tjínre ngu ngaꞌñu xi tsé ngisa ndiba ngatunꞌan. ¡Nditsa mejénna musuꞌe úyaꞌan ta̱nga najmína kju̱a̱kixi! Án ndijua tebatendajújnu, ta̱nga kui Ngayaꞌasen xi Tsje batendajújnu.»
Ngieje xu̱ta̱ xi sindu nangi Judea̱, kju̱ xi sindu Jerusalen, fue xu̱ta̱ nangi kixi nga fuétꞌere Jua. Kjín xu̱ta̱ xi tsuya jee xi kitsiꞌin ku ngaya xánga xi ꞌmí Jordan itenda Jua.
Jua itenda Jesuu̱
(Mt 3.13-17; Lk 3.21-22)
9Kui ni̱tjin Jesuu̱ nangi Ngalilea̱ kjitsuꞌba, kꞌi̱a̱ nangi xi ꞌmí Nasare. Itju kui ngande ku kijí janda ndana xi ꞌmí Jordan, ku kꞌi̱a̱ itenda Jua. 10Nga itjujínda Jesuu̱ ngajín ndijua, kube nga jixꞌajín ndiu̱jmi, ku ngayaꞌasenꞌen Namiña Diuu̱ xuku ngu tuju jajen jma nga kjisian. 11Ku kui chu̱ba̱, ngu nda̱ xi jíndiba ngajín ndiu̱jmi ku ku̱i̱cha kitsú: «Jíxi Kjindiꞌna jí, xi kju̱a̱xikjain nga mejénna. Tuxi tsjuatjínre anima̱ꞌna nga̱tꞌari.»
Jesuu̱ kitsiꞌínre xindajin
(Mt 4.1-11; Lk 4.1-13)
12Te kui nga ura, kitsiꞌin Ngaya asenꞌen Namiña Diuu̱ nga kiju̱ Jesuu̱ nangi kixi. 13Ku kꞌi̱a̱ yachan ni̱tjin kumáre Jesuu̱, nga kisꞌejñajinre chu̱ xi tjin ngijña. Ku xindajin mejénre nga tsiꞌin ndsen, ta̱nga kjinditsjeꞌe Namiña Diuu̱ ndá inchatsikuenda Jesuu̱.
Nga tsaꞌángire xá xi kitsiꞌin Jesuu̱
(Mt 4.12-17; Lk 4.14-15)
14Nga je jaꞌa ni̱tjin tjínre nga kinikjai nduya Jua, kijí Jesuu̱ ngande xi chja̱ Ngalilea̱. Kꞌi̱a̱ kitsuyasún en xi ndá kjitsuꞌbajo nga̱tꞌaꞌe Namiña Diuu̱: 15«¡Je ndiba tiña ni̱tjin nga ndiukatexuma Namiña Diuu̱! Tiaꞌánjnu xki̱ Namiña Diuu̱ ku tisꞌejínjnu kui en xi ndá.»
Ñujún xu̱ta̱ xi kjienꞌinjin jajin Jesuu̱
(Mt 4.18-22; Lk 5.1-11)
16Tsꞌua tꞌandeꞌe chincha tsé xi ꞌmí Ngalilea̱ kju̱a̱ꞌá Jesuu̱, nga kube Ximo kju̱ Jandre̱, jó xu̱ta̱ kjeꞌinjín xi ngutsꞌe ma, xi inchakjeinꞌinjín naꞌyaꞌe. 17Ku̱a̱cha kitsúre̱ Jesuu̱: «Ndiba tjengijnu. Ngandeꞌe̱ nga tjio̱ májnu ndubá, tusá xu̱ta̱ tꞌetkujnu xi án ngandibatjengina.»
18Tekuini chu̱ba̱, Ximo ku Jandre̱ ꞌyendu naꞌyaꞌe ku kitjengire Jesuu̱.
19Janda kje tseji ꞌbema, Jesuu̱ kubeni Santia ku Jua, nistiꞌe Sebedeo̱. Tekuácha xu̱ta̱ kjeꞌinjín kui xu̱ta̱, ku ngu ngaya tsutsu je inchaꞌbenda naꞌya. 20Tsichjáre̱ Jesuu̱, ku kijitjengire, ngaya tsutsu je kisꞌejña namiꞌen, kju̱ xu̱ta̱ xi inchatsixajo.
Xta̱ xiꞌin xi tjínjin yajo̱ꞌe asenꞌen xindajin
(Lk 4.31-37)
21Jesuu̱ ku xu̱ta̱ xi kjibakuyáre̱ nangi jma nga ꞌmí Kafarnau̱n kijí. Nga ni̱tjin xubato ni̱ngu̱xi̱ kijí Jesuu̱ ku tsaꞌángire nga ikuyáre xu̱ta̱. 22Ngieje xu̱ta̱ nga se̱n inchamáre̱ kju̱a̱kitakun xi kjibaku, nga̱tꞌa nga tjichja̱, tuxi tjínre ngaꞌñu mitsa xuku chjine Kju̱a̱kixiꞌe ni̱ngu̱xi̱.
23Ngaya ni̱ngu̱xi̱ kjitsuꞌba ngu xu̱ta̱ xi tjinjín yajo̱ꞌe ngayaꞌasenꞌen xindajin. 24Kui Ngayaꞌasen xaba ku̱i̱cha skindiare Jesuu̱:
—¡Jesuu̱ xi xu̱ta̱ Nasare! Mí xi tjínri nga̱tꞌajni. A kui xá kju̱a̱ꞌi nga jín kju̱a̱ꞌinikjéjni. Beꞌan ꞌyáni jí. ¡Jí xi Kjindiꞌe Namiña Diuu̱!
25Jesuu̱ kitsitiu̱jú asen xabaꞌe̱ xindajin ku ku̱i̱cha kitsúre̱:
—¡Si̱ niꞌínji! ¡Titjui ngaya yajo̱ꞌe kui xta̱!
26Tjikjindia nga itju ngayaꞌasen xabaꞌe̱ xindajin ku tuxi ndá kitsikjatse xu̱ta̱ xi tjinjín yajo̱ꞌe.
27Tuxi se̱n kumáre xu̱ta̱ xi inchabase, ku ku̱i̱cha inchatsú: «Mí xi ku̱i̱cha ma. A kju̱a̱kitakun tjatse kui. Mí tkuya ngaꞌñu xi tjínre kui xu̱ta̱. Nga tuxi tjínre ngaꞌñu nga tsiꞌinre manda ngayaꞌasen xabaꞌe̱ xindajin, ¡ku tꞌeꞌénre!»
28Ku kuyajín nga ndá Jesuu̱ nga ngieje ngande xi xu̱ta̱ Ngalilea̱.
Kjín xu̱ta̱ kitsindaya Jesuu̱
(Mt 8.14-17; Lk 4.38-41)
29Ku kjia itju Jesuu̱ ngaya ni̱ngu̱xi̱ ku jña kijí Santia kju̱ Jua nga niꞌyaꞌe Ximo ku Jandre̱. 30Nga tsasꞌen ngaya nga niꞌya, kiꞌmiyáre̱ nga ndáji xu tjínre nachꞌaꞌe Ximo, tꞌaiꞌñu xu inchare̱. 31Kikasere Jesuu̱, kiskabe tsja ku kitsikisitjen, tekuini chu̱ba̱ kjitjubaꞌare̱ tꞌai, ku kui chjun ꞌyeyanire xi chine.
32Nga je kjamajñu, xu̱ta̱ jichuju̱re̱ Jesuu̱ ngieje xi ndáji sindure kju̱ xi xindajin sindujín yajo̱ꞌe. 33Ngieje xu̱ta̱ na̱xi̱nanda kutku kjíndetsinꞌen Ximo jmá nga̱tjen kjitjen kjindetju̱a̱. 34Kꞌi̱a̱ tuxi kjín xu̱ta̱ kitsindaya Jesuu̱ xi kjín tku̱ya chiꞌin tjínre, ku tekuácha kjín xindajin itsjé ngaya yajo̱ꞌe xu̱ta̱. Ta̱nga ichiji kitsjuáre̱ kju̱a̱ nga xu̱ta̱ kui xindajin, nga̱tꞌa be kꞌi̱a̱ xi ꞌmí Jesuu̱.
Jesuu̱ tsuya én xi tjínre kju̱a̱ndá
(Lk 4.42-44)
35Nga je kjimaꞌasen isitjen Jesuu̱ ku ngu ngande subá kijí nga tsinengi kju̱a̱ndá. 36Nga je tꞌaji kijí ku kijitjengire Ximo kju̱ xu̱ta̱ xi jña tjima nga kikangitsjai. 37Nga jichú jmá kjitjián, ku̱i̱cha kitsúre̱:
—Ngieje xu̱ta̱ nga jí inchamangitsjairi.
38Ku̱i̱cha skengire Jesuu̱:
—Kjaꞌi nangi xi tiña sindu kꞌui taingiña. Tekuácha tsubáre nga faxiyaꞌan kui én xi tjínre kju̱a̱ndá, nga̱tꞌa kui xá jíndibaꞌan nga̱sunde.
39Ngieje ngande xi chja̱ Ngalilea̱ kisꞌebixi Jesuu̱ nga kitsuyasún en xi tjínre kju̱a̱ndá ngaya ni̱ngu̱xi̱ xi tjin nga ngu ngu nangi ku itsjé xindajin xi sindujin yajo̱ꞌe xu̱ta̱.
Jesuu̱ kitsindaya ngu xta̱ xi chiꞌin findu tjiuxinña tjínre
(Mt 8.1-4; Lk 5.12-16)
40Ngu xu̱ta̱ xi tjínre chiꞌin tjiuxinꞌen kitsitiña yajo̱ꞌe jmá kjitjián Jesuu̱, iséntꞌare tkuꞌe̱ ku ku̱i̱cha kitsúre̱:
—Ndia̱ꞌna, beñaꞌan nga mari nindayeina. Tindayeina ngu kju̱a̱ndá.
41On kiskutꞌa Jesuu̱ kui xu̱ta̱ xi ndáji tjínre, skexinga tsja, skingajun ku ku̱i̱cha kitsúre̱:
—¡Tsindayara! ¡Je kundaye!
42Tjeꞌñu kundaya tsjetsje kui xta̱; 43ta̱nga Jesuu̱ tuxi ꞌñu tsinengire̱ nga kitsingiya:
44—Ngatu ngují xi ꞌmiyeri kúcha kundaye. Chanaꞌmitsje tꞌain chaseri ku ngatasejun ngatasetꞌari, ku chꞌei kju̱a̱tjocha xukúcha tsu manda xi yeꞌé Moise. Tuxi nga̱tube ja chanaꞌmi nga je ngite najmíri chiꞌin.
45Ta̱nga kui xu̱ta̱ ngieje xu̱ta̱ kitsuyáre̱ kúcha kundaya. Ku kui kju̱a̱ nga Jesuu̱ majín chan fabixi ngieje nangi, ki kju̱a̱ kjindetsin na̱xi̱nanda ꞌbejña, jma nga ꞌñujín kjin xu̱ta̱ tjin. Ta̱nga tekui xi fichutꞌare xu̱ta̱.
México © Sociedad Bíblica de México, A.C. AÑO
