Matye 10
10
Kuumi bilaanzi byooli
(Mak 3.13-19; Lik 6.12-16)
1Yeesu kwateli kuumi bilaanzi byooli, wusë bëvaanë lutumu lukukulilë biluunzi bibi i kubelusi yosuku ncyeenzu i yosuku mpilë bibolikinyi. 2Mëzinë më likuumi mimbunzi yi wali, maawaamë : wun'tetë Simu, wunë bëlukë Pyeelë i Andëlee mwanaandi nguli, Zaakë i Za li mwanaandi nguli, baanë bë Zebedee. 3Filiipë i Batelëmi, Tomë i Matye cinoongë mpaku, Zaakë li mwaanë Alëfee i Tadee. 4Simu wunë wun'nwaninë cikaangë mu si yaandi i Zuda Iskalyootë, wo wusumbisi Yeesu.
Cisalu ci kuumi bilaanzi bi byooli
(Mak 6.7-13; Lik 9.1-6)
5Yeesu wusë filë likuumi li bilaanzi byooli mu mweendo. Wusë bëvaanë mëkomini ama : « Luyendyaanu ke bo bëkeeli ko Sizwiifë i lukotyaanu ko mu mëvulë më libweeti li Samali. 6Yiveko, yendaanu ke basë Islayeelë, beekë buke mëmemë mëzimbilë. 7Mu nzilë, tendulaanu i tubaanu : “Lwaangu lu mëyilu lwabelëmë!” 8Belusyaanu bibeedo, vulumunaanu bëfwa, lyomisyaanu bangë bwaasi, kulaanu biluunzi bibi, beeno lutambulë buunë, vaanaanu yivaandi buunë. 9Lunatyaanu ko woolë keti luboongo keti mekutë më mboongo mu sibolusë siinu. 10Lunatyaanu nkutu ko mu mweendo, keti binkutu byooli, sisapaatu ve, keti luveengu, licyelikë cisasi, wufwanikini kubakë ndiwaandi#10.10 1 Ko 9.14; 1Tm 5.18. . »
11« Mu lyosuku livulë kaambofo mu bosuku bwaalë lun'kotë, yufulaanu mooti lum'podi kubakë wun'viipë wunë wube fwanëkënë kulutambulë i lwe kalyaanu fëke naandi tee yi ntaangu yo lum'botëkulë kwaawu. 12Bunë lun'kotë mu n'zo, bilaanu banë bëke mwaawu : “N'sikë we bayiinu#10.12 lubilulu lu Sizwiifë lun'vanaangë n'sikë..” 13Ningë n'zo beenë yibe fwanëkënë, n'sikiinu we kali mu baawu. Kasi mooti na sye lutambulë ko, vutukaanu yi n'sikiinu. 14Ningë mu n'zo kaambofo mu livulë bëbëmaangë kulutambulë i kulukuwulu, basikaanu mu n'zo be yooyi kaambofo mu bwaalë be boobo i kukumunaanu n'kunkuunvu yi maalu miinu#10.14 Mak 6.11.. 15Licyelikë yilukaambë : mu cilumbu ci lufundusu, basë Sodoomë#10.15 Sodoomë i Ngomoolë : Ntn 18-19. i Ngomoolë bën'vyookë lutabu luvyokili mu mëleembi yi livulë be linë lina. »
Sinkwamusi sin'kwiisë
(Mak 13.9-13; Lik 21.12-17)
16« Talaanu! Yakulufilë buke mëmemë fë meeyi mikoomo. Oboobo, lwe zungululaanu buke sinyokë i mpeembi yi mpeeso buke mëbeembi. 17Keelaanu, cibilë ocyo baatu bëluvakulë mu binzonzi i bëluvividë sikoti mu bizutununu byaawu. 18Bëlunatë mu cibilë cyaami fë ntwaalë mikwa-lwaangu i fë ntwaalë mitinu, bwiinji lunatë cimbaanji ciinu fë ntwaalaawu i ke bo bëkeeli ko Sizwiifë. 19Kasi, fanë bëluvakulilë, lwe baanu ko mu lusweenu mu mpilë bikumë lufwenikini kutubë. Mo lufwenikini kutubë mëluveewu mo mu ntaangu beenë. 20Licyelikë, maawu kusë mën'fuminë kuve ke beeno, vandi kasi Ciluunzi ci Tatiinu cyaawu cin'tubë mu beeno. 21Baanë bë nguli bën'vakulë baanë yaawu bë nguli mu kubëvangisi kufwa i mëtaatë bën'vangilë bo bumweekë mu baanë baawu. Baanë bëm'balukilë mëtaatë maawu i bëbëvangisi lusifu lu lufwa. 22Babooso bëluleendë mu cibilë ci lizinë lyaami. Kasi wunë wun'ciimbë moonyi tee fë siitu wun'vuukë. 23Bunë bëlukwamisi mu livulë ali, tiinaanu ku livulë lin'ka. Licyelikë yilukaambë : lusë yimaninë ko mëvulë mooso më Islayeelë, ntetë Mwaanë muutu kutuukë. »
24« Cilaanzi kupodi ve kuvyokililë n'loonjyaandi, keti n'dongo mu kuvyokililë fumwaandi. 25Bufwenikini cilaanzi kuba buke n'loonjyaandi. I n'dongo fwenikini kuba buke fumwaandi. Ningë fumu n'zo bëkun'teelë Belëzebuulë#10.25 Bëlëzebuulë : lizinë bëvaanë ke dyaabu fumu biluunzi bibi., buni bën'kaambu kufingilë banë bëke yaandi n'zo mweekë! »
Wunë lufwenikini kutiinë
(Lik 12.2-7)
26« Lutinyaanu muutu ko, linë liswaamë lim'monikë, i linë like mu mësweeci lin'zabëkënë. 27Linë yilukambilë ku fuundu, tubilaanu lyaawu fë ciyalëlë. Linë bëm'bokëtë, tendulaanu lyaawu fë yilu myaanzë. 28Lutinyaanu boomë ko banë bën'voondë nyitu, bën'kaambu kuvoondë mbali, kasi tiinaanu yiveko wunë wum'podi kuvangisi kuvoondë#10.28 Zak 4.12. mbali i nyitu ku buluunji bu mbaasu. 29Kusë bën'sumbisyaangë ko mëvyoodo mwaali mu mpatakwe? I limweekë ve mu maawu lim'bwa fë n'toto kukaambë Tatiinu kulizaabë. 30Kasi mu beeno mileenjiinu yi n'tu yitaangu yakë yooso. 31Nubaanu boomë ko : beeno lwiinji luvalu yi mpaapë mëvyoodo. »
Kuvitikë kaambofo kumaangë Yeesu Kliistu
(Lik 12.8-9)
32« Mu lyaawu, wunë mba wun'tubilë mu miinu fë meeso më baatu, miinu yivaamë yikun'tubilë fë nduunzi Tataami wuke ku mëyilu. 33Kasi wunë mba wukum'maangë fë meeso më baatu#10.33 2 Ti 2.12., miinu yivaamë mba yikum'maangë fë meeso më Tataami wuke ku mëyilu. »
N'sikë kuve, kasi cincindu
(Lik 12.51-53; 14.26-27)
34« Nubalyaanu ko ti miinu yiyisilë mu kutwaalë n'sikë fë n'toto. Miinu yisye kwisilë kuve mu kutwaalë n'sikë, kasi cincindu. 35Yiyisilë mu kukabulë mwaanë libakëlë i tataandi, mwaanë wu n'cyeetu i mamaandi, n'kwekisi i mamë n'nunyaandi. 36Simbeenyi si baatu bëkalë yaandi n'zo mweekë#10.36 v.35-36, Mis 7.6.. 37Wunë wuzolisi tataandi, kaambofo mamaandi kuvyokilë miinu, na woowo wusye kun'fwanëkënë ko. Wunë wuzolisi mwanaandi wu bakëlë kaambofo wu n'cyeetu kuvyokililë miinu, na woowo wusye kun'fwanëkënë ko. 38Wunë wun'kaambu kunatë kuluuswaandi i wun'kaambu kun'daandë fë mbusë, na woowo wusye kun'fwanëkënë ko. 39Wunë wun'toombë kuluundë luziingu lwaandi, mba wulunyambikini. Wunë wun'nyambikini luziingu lwaandi mu cibilë cyaami, mba wulubakë. »
Sindobu
(Mak 9.41)
40« Wunë wulutambulë, miinu yikun'tambulë i wunë wukun'tambulë wun'tambulë yivaandi wunë wukun'filë. 41Wunë wun'tambulë m'bici mu bubici bwaandi, na woowo wun'tambulë ndobu dedë mweekë yi m'bici. Wunë wun'tambulë muutu wusulëmë, wum'bakë ndobu bën'vaanë ke muutu wusulëmë. 42Wunë mba wun'vaanë tokë mbuungu mweekë masi mëcyoosi ke wun'viipë mu bibabanë obyo, cibilë naandi wuli cilaanzi cyaami, cyelikë yilukaambë, na woowo wun'tambulë ndobwaandi. »
© 2019, Wycliffe Bible Translators, Inc. and © Alliance Biblique du Congo. All rights reserved.
