लूका 23
23
पिलातुस रे सामणे यीशु
1तिस बेल्ले सारी सभा रे मणू यीशु जो पकड़ी करी पिलातुस राजपाल का लेई गे। 2से पिलातुस रे अग्गे यीशु पर इल्जाम लगाणा लगे, कि ए यहूदी मणूआं जो भड़काया करदा है, अते तिन्हा जो सम्राट जो चुंगी दैणे जो मन्हा करेया करदा है, अते असा ने इसजो अप्पु जो यहूदियां रा राजा कने मसीह यीशु बोलदा भी सूणेया है 3तां पिलातुस ने यीशु का पूच्छेया, कै तू यहूदी लोक्कां रे राज्जा है? यीशु ने तिसजो जवाब दित्ता, तू अप्पु ही तां बोलदा कि मैं यहूदियां रा राज्जा है 4इस गल्ल पर पिलातुस ने बड्डे पुरोत्त अते मणूआं जो बोल्लेया, मेरे जो इस मणू पर कोई भी बुराई नजर नी आया करदी है 5पर से होर भी जोर पाणा लगे अते बोलणा लगे, ए सारे यहूदियां बिच मणूआं जो अपणी उपदेस देई करी तिन्हा बिच दंगे करदा है अते ए सब किच्छ इन्ने गलील प्रदेश का सुरु कित्तेया थिया। 6ए सुणी करी पिलातुस ने मणूआं का पूच्छेया, कै ए गलील प्रदेश रा रैह्णे वाला है? 7फिरी पिलातुस जो पता लगेया, कि ए गलील प्रदेश रा है तां तिन्ने यीशु जो हेरोदेस अन्तिपास का भेजी दित्ता, किजोकी से तिस बेल्ले यरुशलेम सहर बिच थिया। 8हेरोदेस ने जां यीशु जो दिख्खया तां से बड़ा खुस होया किजोकी से बड़े रोज्जा का तिन्हा जो दिखणा चाह्ंदा थिया, से इधेरे तांइ दिखणा चाह्ंदा थिया, किजोकी तिन्ने यीशु रे बारे बड़ा किच्छ सुणे रा थिया, अते से यीशु जोरे चमत्कारी कम्म दिखणे री आस बिच थिया।
हेरोदेस रे सामणे यीशु
9तिसने यीशु का बड़े सवाल कित्ते, पर यीशु ने तिसेरे कोई भी सवाल रा जवाब नी दित्ता 10बड्डे पुरोत्त अते शास्त्रि ने तित्ते भी यीशु पर इल्जाम लगाणे तांइ कोई कसर नी छडी 11हेरोदेस ने भी अपणे सपाईयां समेत तिन्हेरी बेजती कित्ती अते तिन्हेरा मजाक उड़ाया, अते यीशु जो चटकीले रांग रे कपड़े पुआई करी वापस पिलातुस का भेजी दित्ता। 12तिसी ही रोज पिलातुस अते हेरोदेस दोस्त बणी गे, हलांकि से इसका पैले इक्क दूज्जे रे दुश्मण थिये।
पिलातुस रा यीशु जो मौत री सजा दैणा
13फिरी पिलातुस ने बड्डे पुरोत्त अते यहूदी मणूआं जो ते सरदारा जो, सद्देया, ते तिन्हा जो बोल्लेया।
14तुसा इस मणू जो मेरे का लेई आए कि ए मणूआं जो दंगे करवाणे तांइ भड़कान्दा, मैं इस बारे बिच तुसा रे सामणे तिसजो जाँचे परखेया अते जे तुसा इल्जाम लगाया करदे हिन इदेया किच्छ भी मैं इस पर नी दिखदा, 15ना ही हेरोदेस ने दिख्खेया, किजोकी तिन्ने इसजो वापस असा का भेजी दित्ता जिय्यां कि तुसा दिखदे कि इसने इदेया किच्छ भी नी कित्तेया कि इसजो मौत री सजा दित्ती जाए। 16इधेरे तांइ मैं इसजो बेंत कने कुटवाई करी छडी दिन्दा। 17पिलातुस त्याहार रे दिना यहूदी लोक्कां तांइ इक्क कैदी जो छडदा हुंदा थिया। 18तां सारे मिली करी जोरे जोरे बोलणा लगे असा रे तांइ बरअब्बा जो छडी देयो जे कुसी झगड़े री वजह कने जे सेह्रा बिच् होया थिया ते खून करणे री बजाह् कने जेल बिच थिया 19बरअब्बा जो सहर बिच लड़ाई झगड़े अते जान लैणे रे इल्जाम अन्दर जेला बिच पाए दा थिया 20पिलातुस यीशु जो छडी दैणा चाह्ंदा थिया इधेरे तांइ तिन्ने मणूआं जो फिरी समजाया 21पर मणू होर जोरे जोरे लेरां मारी करी बोलणा लगे, इसजो सुली पर चढ़ाई देयो 22पिलातुस ने मणूआं का तिज्जी वरी पूच्छेया, इस मणू री कै गलती है? मेरे जो इसेरे खिलाफ कोई इदेयी गल्ल नी लिब्बी जे मैं इसजो मौत री सजा देयां इधेरे तांइ मैं इसजो बेत लगवाई करी छडी दिन्दा 23पर मणू होर जोरे जोरे लेरां मारी करी अपणी गल्ल जो मनवाणा लगे कि इसजो सुली पर चढ़ाई देयो अते इय्यां होया कि तिन्हेरी मरजी पूरी होई गई 24अते पिलातुस ने हुकम दित्ता कि ए जिय्यां चाह्ंदे तिय्यां ही हो 25पिलातुस ने तिस मणू जो छडी दित्ता जे लड़ाई झगड़े अते जान लैणे रे इल्जाम अन्दर जेला बिच पाए दा थिया, अते यीशु जो तिन्हेरी मरजी रे मुताबिक तिन्हा का देई दित्ता।
यीशु रा सुली पर चढ़ाया जाणा
26जां से यीशु जो लेई चले तां तिन्हा ने कुरेन रे रैणे वाले शमौन नां रे इक्क मणू जो, जे अपणे ग्रां का आया करदा थिया, तिसजो पकड़ी लेया अते तिस पर सुली जो लदी दित्ता अते उस्स जो यीशु रे पीच्छे-पीच्छे चलणे जो बोल्लेया।
यीशु रा सुली पर चढ़ाया जाणा
27अते तिन्हेरे पीछे बडे़ वरी लोक्की चले दे थिये अते तिन्हा बिच किच्छ जनानियां भी थिया जे कि यीशु तांइ रुन्दी अते छाती पिटदिया चले री थियां 28यीशु ने तिन्हा जनानियां पास्से मुड़ी करी दिख्खेया अते बोल्लेया, यरुशलेम री जनानियों, मेरे तांइ मत रो, बल्कि जे गल्लां अग्गे चली करी होणे वाली हिन तिस वजह कने खुद अपणे तांइ कने अपणे बच्चेयां तांइ रो। 29किजोकी इदेया मुस्किल बेल्ला आणे वाला है, जां मणूआं ने बोल्णा, से जनानियां बड़ी भाग्गा वालियां हिन, जे ओत्तर हिन कने से भी बड़ी भाग्गा वाली हिन जिन्हेरी कोख खाली है से स्तन धन्न हिन जिन्हा दूद्द नी पियाया हो। 30तिस बेल्ले मणूआं ने बोल्णा, कि पहाड़ असा रे पर आई पेयो अते फाटियाँ असा जो दबी दे। 31किजोकी जां से हरे बूट्टे कने इय्यां करदे तां से सूक्के बूट्टे कने कै किच्छ नी करगे? 32दो होर मणू, जे दोई ही बदमाश थिये, सिपाई तिन्हा जो भी पकड़ी करी यीशु रे कने मौत री सजा दैणे तांइ लेई चले दे थिये। 33फिरी जां से तिस जगाह् पर आई रे जिस जो खोपड़ी बोलदे, अते तिन्हा ने त्रै जणेया जो सुली पर चढ़ाई दित्ता इक्क बदमाश यीशु रे खब्बे हात्थाँ पास्से थिया अते दुज्जा सज्जे हात्थाँ पास्से थिया। 34तां यीशु ने बोल्लेया, ओ परम पिता, इन्हा जो माफ करेयां किजोकी ए नी जाणदे कि ए कै करेया करदे हिन फिरी सपाईयां ने यीशु रे कपड़े तांइ परचियाँ पाईयाँ अते यीशु रे कपड़े आपस बिच बन्डी लै। 35मणू खड़ी करी दिख्खेया करदे थिये, ते लोक्कां रे हाकिम भी मजाक उड़ाई करी बोल्लेया करदे थिये इन्ने दूए लोक्कां जो बचाया, जे अगर से परमेश्वर रा मसीह यीशु है ते तिन्हा रा चुणे रा है, तां अप्पु जो बचाई लै। 36सपाईयां ने भी यीशु रा मजाक उड़ाया तिन्हा ने यीशु जो सिरके रा रास्स चुसाया, अते बोल्लेया। 37जे तू यहूदी लोक्कां रा राज्जा है, तां अप्पु जो बचाई लै 38यीशु रे सुली रे उप्पर लिखी दित्ता कि ए यहूदी लोक्कां रा राज्जा है।
सुली पर मन फिराणे वाला मणू
39सुली पर चढ़ाए रे बदमाशाँ बिच का इक्क यीशु री बेजती करी के बोलणा लगेया, कै तू मसीह यीशु नी है? जे है तां असा जो कने अप्पु जो बचाई लै।
40पर दुज्जा बदमाश तिसेरे खिलाफ होई करी बोलणा लगेया, कै तू परमेश्वर का नी डरदा? तू भी तां से ही सजा भोग्या करदा। 41असा ने जे भी बुरे कम्म कित्ते तिधेरी सजा असा जो मिलया करदी है पर इस मणू ने तां इदेया किच्छ भी नी कित्तेया। 42फिरी तिन्ने बोल्लेया, यीशु जां तुसा अपणे स्वर्ग रे राज बिच जांगे तां मेरे जो जरुर याद रखेयो। 43यीशु ने तिसजो बोल्लेया, मैं तिज्जो सच बोल्दा, अज्ज ही तू मेरे कने स्वर्ग-लोक बिच होणा।
यीशु रा मरणा
44तिस बेल्ले धियाड़ी रे बारा बजे थिये अते तिस बेल्ले का लेई करी तीन्न बजे तांइ पूरी दुनिया बिच न्याहरा होई गेया।
45अते सूरज री लौ जान्दी रेई अते तित्ते मन्दिर रा परदा फटी गेया। 46अते यीशु ने जोरे सणे बोल्लेया, ओ परम पिता, मैं अपणी आत्मा तुसा बिच दिन्दा अते बोल्ली करी यीशु ने अपणे प्राण देई दित्ते। 47तां रोमी सपाईयां रे हिसाब ने जे किच्छ भी होया थिया तिसजो दिख्खेया अते परमेश्वर री तारिफ करदे बोल्लेया पक्का ए इक्क धार्मिक मणू थिया। 48कने तित्ते आए रे मणू भी ए सब किच्छ दिख्खी करी अपणी छाती पिटदे-पिटदे वापस अपणे घरे हटी गे। 49पर यीशु रे सब जाण-पछाण वाले अते गलील प्रदेश का आए दी जनानियां भी, जे कि गलील का यीशु रे पीछे पीच्छे आई थिया, तित्ते का थोड़े दुर खड़े होई करी इन्हा सब गल्लां जो हुंदे दिख्खेया।
यीशु रा दब्बेया जाणा
50तित्ते यूसुफ ना रा यहूदी महासभा रा इक्क बन्दा थिया, से बड़ा खरा मणू थिया। 51से तिन्हेरे इस कम्म कने राजी नी थिया, अते ना ही इस कम्म तांइ से यहूदी लोक्कां रे इक्क सहर अरिमतिया रा रैणे वाला थिया अते से परमेश्वर रे राज री भाल अन्दर थिया। 52से मणू पिलातुस का गेया अते तिन्ने तिसका यीशु री लास जो मन्गेया ताकि से तिन्हा जो दबाई सकण। 53तिसने यीशु जो सुली का थल्ले उतारेया अते सन रे कपड़े बिच लेपेटी दित्ता फिरी तिसी ने यीशु जो सपड़ जो कट्टी करी बणाई गे री कब्र बिच रख्खी दित्ता, जिस बिच इसका पैले कुसकी जो भी नी रख्खेया गेया थिया। 54अते से रोज तयारी रा दिन थिया ते विश्राम दिन रे दिन सुरु होणे वाला थिया। 55से जनानियां जे गलील का यीशु कने आई थी, से यूसुफ रे पीच्छे-पीच्छे चली पेई, अते तिन्हा ने से कब्र दिख्खी, अते दिख्खया कि यीशु री लास जो कुते रख्खे दा है। 56फिरी से घरां जो हटी आई अते तिन्हा ने यीशु रे सरीर पर मलणे तांइ खुशबू वाली चीजां कने इत्र रा लेप तैयार कित्तेया। अते तिय्यां ही विश्राम दिन वाला रोज आई गेया अते तिन्हा ने मूसा रे कानून रे हिसाब कने तिस रोज अराम कित्ता।
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
