लूका 15
15
गुआचे री भेड़ रा उदारण
1मते सारे चुंगी लैणे वाले ते पापी मणू यीशु का तिन्हेरा उपदेस जो सुनणे तांइ आए रे थिये। 2ए दिख्खी करी फरीसी ते शास्त्रि लोक्कां बुड़-बुड़ करणा लगे, कि ए तां पापी मणूआं कन्ने रैहन्दा अते तिन्हा कन्ने रोट्टी भी खाई लिन्दा 3इस गल्ल पर यीशु ने तिन्हा जो इक्क उदारण दित्तेया 4मन्नी लेयो कि तुसा बिच्च का इक्क जणे का सौ भेड़ां हिन ते तिन्हा बिच का इक्क भैड्ड़़ चरदे चरदे गोच्ची जाओ, तां कै से मणू अपणी नढ़िनूए भैड्ड़़ाँ जो द्रबड़ा बिच खुल्ला छड्डी करी, तिस गोच्चे री भैड्ड़ जो तां तांइ तोपदा रैह्णा, जां तांइ से तिसजो मिल्ली नी जाओ। 5अते जां तिसजो से भैड्ड़ मिल्ली जाणी, तां तिनिए बड़े खुस होई करी तिसजो अपणे मुह्ण्डे़ पर चुक्की करी लेई आणा। 6ते अपणे घरे आई करी अपणे मित्रा ते पड़ोसियाँ जो सद्दाई करी तिन्हा जो बोलणा, कि मेरी भेड़ गोच्ची गे री थी, अते से अवे मिल्ली गई, इधेरे तांइ तुसा मेरे कन्ने इस गल्ल री खुसी मनाओ 7मैं तुसा जो बोलदा, कि इय्यां ही जां कोई मणू अपणे पाप्पां का तौबा करी लिन्दा तां स्वर्ग अन्दर इतणी ही खुसियां मनाई जान्दियां, जितणी कि तिन्हा नढ़िनूए ऐसे धार्मिक मणूआं तांइ नी, जिन्हा जो ए लगदा कि तिन्हा जो मन फिराणे री जरुरत नी है।
गुआचे रे सिक्के रा उदारण
8फिरी यीशु ने बोल्लेया, या इदेय कुण जनानी है, जिस का चाँदी रे दस्स सिक्के होन् ते इक्क सिक्का गोच्ची जाए ते से तिसजो तोपणे तांइ दीया बाली करी ते सौत बाई-बाई करी घरे रे हर इक्क कुणे अन्दर तां तांइ नी तोपदी रैंह्गी, जां तांइ से सिक्का तिसजो मिल्ली न जाओ? 9फिरी जां तिसजो से सिक्का मिल्ली जान्दा तां से अपणी सेल्लीयाँ ते पड़ोसणियाँ जो सद्दी करी बोल्गी, मेरा चाँदी रा सिक्का गोच्ची गे रा थिया ते से अवे मिल्ली गेया, तिसेरे मिलणे री खुसी मेरे कन्ने मनाओ 10मैं तुसा जो बोलदा, कि इय्यां ही जां कोई मणू पाप्पां जो छड्डी करी परमेश्वर रे रस्ते पर चलणा लग्गी पैन्दा, तां तिसेरे तांइ स्वर्गदूतां रे सामणे उतणी ही खुसियां मनाई जान्दियां।
उड़ाऊ मुडें रा उदारण
11यीशु ने तिन्हा जो इक्क उदारण देई करी जवाब दित्तेया, कि कुसकी मणू रे दो निक्के थिये, 12तिन्हा बिच का हल्के निक्के ने अपणे प्यो जो बोल्लेया, अवे मेरे जो अपणी जायदात बिच का मेरा हिस्सा देई दे, ते तिसेरे प्यो ने अपणे दोन्नां निक्केयां अन्दर बराब्बर-बराब्बर जायदात बन्डी दित्ती। 13हल्ले बड़े रोज नी थिये होये रे, कि तिसेरा हल्का निक्का अपणा सारा समान बटोली करी कुसकी दूज्जे देसा जो चली गेया अते तित्ते अपणे सारे पैसे बुरे कम्मां अन्दर उड़ाई दित्ते। 14जिस बेल्ले तिसका सारे पैसे मुकी गे ते जित्ते से रैहन्दा थिया तित्ते अकाल पेई गेया ते तिसका खाणे जो भी किच्छ नी रेया, 15इधेरे तांइ से कम्म तोपदे तोपदे तित्ते रैह्णे वाले रे घरे जाई रेया, तिसने तिसजो सूअर चराणे तांइ भेज्जेया। 16जां तित्ते तिसजो बड़ी वरी भूख लग्गी तां से सोचणा लगेया, कि मेरे जो ए फलियां खाणे जो मिली जाण, जे सूअर खाया करदे हिन, तां खरा रैह्णा किजोकी, कुसकी ने तिसजो इक्क फली भी खाणे जो नी दित्ती। 17फिरी तिसजो अपणी गलती रा एहसास होया ते सोच्णा लगेया, कि मेरे प्यो का कम्म करणे वाले किन्ने ही मजदूर रज्जी करी रोट्टी खान्दे थिये, अते खाणे रे बाद रोट्टी बची भी जान्दी थी, ते मैं इत्ते भूखा मरेया करदा है। 18अवे मैं अपणे प्यो रे घरे वापस जाणा ते तिन्हा जो बोलणा, कि मैं परमेश्वर ते तुसा रे खिलाफ पाप कित्ते रा है, 19अते अवे मैं तां इस जोग्गा भी नी है कि अप्पु जो तुसा रा पुत्तर बोल्ली सकां पर तुसा इय्यां करो कि मेरे जो अपणा इक्क मजूर बणाई करी रख्खी लेयो 20तां से तिस देस का निकली करी अपणे प्यो रे घरे चली पेया, ते जां से घरे नेड़े़ जाई पूज्जेया तां प्यो ने अपणे मुंडे जो दूरा का ही दिख्खी लेया, ते से तिसका दौड़ी गेया अते तिसजो गले लगाई करी सुन्ने दित्ते। 21उनिए अपणे प्यो जो बोल्लेया, पिता जी, मैं परमेश्वर ते तुसा रे खिलाफ पाप कित्ते रा है, ते अवे मैं तुसा रा पुत्तर बोलणे जोग्गा भी नी रेया। 22पर, तिसेरे प्यो ने अपणे नौक्करां जो बोल्लेया, मेरे इस मुंडे तांइ छैल का छैल कपड़े लेई आओ, ते इसेरी उंगली अन्दर अंगूठी पुआओ अते पैरां अन्दर नौई चप्पलां पुआओ। 23ते सबका बदिया धाम तैयार कित्ती जाए, किजोकी असा ने मेरे पुत्तर रे वापस हटणे री खुसी अन्दर धाम दैणी, 24किजोकी मेरे जो लग्गेया थिया कि मेरा हल्का निक्का मरी गे रा थिया पर ए जिन्दा है, ए गुआच्ची गे रा थिया, पर अवे वापिस मिली गे रा है। ते फिरी से खुसियां मनाणा लग्गी पे 25पर तिस बेल्ले, जां से मणू खुसियां मनाया करदे थिये, मणू रा जेठ्ठा पुत्तर, जे कि खेत्रा का कम्म करी के घरां जो हटेया करदा थिया, तिनिए गाणे बजाणे अते नचणे री अवाजां सुणियाँ। 26तिनिए अपणे इक्क नौक्कर का पूच्छेया, कि ए सब किच्छ कै होया करदा है? 27तिनिए तिसजो बोल्लेया, तुसा रा हल्का भ्याल सह्ई-सलामत वापस हटी आए रा है, इस खुसी अन्दर तुसा रे प्यो ने बड़ी बड्डी धाम भी पाए री है। 28ए सुणी करी तिसजो बड़ी-भरी लैह्र चढ़ी, ते से घरां अन्दर जाणा ही नी चाह्ंदा थिया, पर तिसेरा प्यो अप्पु ही बाह्र आई रेया ते तिसजो घरे चलणे तांइ समझाणा लगेया, 29पर से अपणे प्यो जो बोल्णा लगेया, कि मैं तां मते सालां का तुसा कन्ने ईमानदारी कने कम्म करेया करदा है ते अज्ज तांइ तुसा री कोई गल्ल नी टाली, पर तुसा मेरे तांइ कदी छोटी-मोटी धाम भी नी पाई 30पर जां तुसा रा ए हल्का निक्का तुसा री जायदात जो कंजरी जनानियां पर लुटाई करी खाल्ली हत्थ हटी आया, तां तुसा इस तांइ सबणी का बदिया धाम पाया करदे हिन। 31तिसेरे प्यो ने तिसजो जवाब दित्तेया, मेरे बच्चे, सुण! असी दोह्ई तां किठ्ठे ही रैह्न्दे ते जे किच्छ भी मेरे का है, से सब तेरा ही तां है, 32पर अज्ज असा जो तेरे हल्के भ्याल रे हटी आणे री खुसी मनाणा चाएदी किजोकी असा जो लग्गेया थिया कि तेरा हल्का भाई मरी गे रा होणा पर ए जिन्दा है, ए गुआच्ची गे रा थिया, पर अवे वापिस मिली गे रा है।
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
