लूका 11
11
चेल्लेयां रा प्रार्थना करणा सिखणा
1इक्क रोज यीशु इक्क जगाह् पर प्रार्थना करेया करदे थिये जां से प्रार्थना करी बैठे तां तिन्हेरे चेल्लेयां बिच का इक्क ने तिन्हा जो बोल्लेया, ओ प्रभु जी, जिय्यां यूहन्ना ने अपणे चेल्लेयां जो प्रार्थना करणा सखाए रा है, तुसा भी असा जो तिय्यां ही सिखाओ। 2तिन्हा ने तिसजो बोल्लेया, ठीक है, तां प्रार्थना करदे बेल्ले इय्यां बोल्लेया करो ओ असा रे पिता जी, तुसा रे नां जो पवित्र मन्यान जाये, तुसा रा राज इस दुनिया पर आई जाओ। 3असा री रोज री रोट्टी असा जो देया करो, 4ते असा रे पाप्पां जो तुसा माफ करी देयो, किजोकी, असी भी अपणे गुनेह्गारां जो माफ करदे, ते असा जो परखीह्णे का बचाई लेयो।
प्रार्थना रे बारे बिच यीशु री शिक्षा
5फिरी यीशु ने तिन्हा जो बोल्लेया, कि तुसा बिच का इदेया कुण है कि तिसेरा इक्क मित्र हो ते से तिसका धरात्ते पर आई करी ए बोल्ली करी त्रै रोटियां मन्गो कि 6मेरा मित्र है ते से सफर का मेरे का आया, ते तिस्जो खुआणे तांइ मेरे का अब्बे किच्छ भी नी है 7ते से अन्दर का जवाब देयो, कि मेरे जो तंग मत करां दुआर बन्द होई गे रा है, मैं बिस्तर अन्दर मेरे कन्ने मेरे निके-निके चैन कने सुत्ते रे हिन, इधेरे तांइ मैं अब्बे बाहर आई करी तिज्जो रोटियां नी देई सकदा 8मैं तुसा जो बोल्ली दिन्दा, कि इक्क मित्तर होणे री वजह कने बसक्क से ना उठ्ठो, पर तिसेरे घड़ी-घड़ी बगैर झिझक रे मंगणे पर से उठ्ठी करी तिसेरी जरुरत रे हिसाब कने देई दैणा। 9ते मैं इधेरे तांइ मैं तुसा जो बोलदा कि तुसा मंगगे तां तुसा जो दित्तेया जाणा तोपगे तां से मिल्णा अते खटखटाँदे रैह्न्गे तां तुसा तांइ दुआर खोली दित्ते जाणे 10किजोकी हर इक्क मणू जे मंगदा, तिसजो मिली जान्दा जे तोपदा से तिसजो पाई लिंदा अते जे खटखटांदा ही रैहन्दा तिसेरे तांइ दुआर खोल्ली दित्तेया जाणा। 11तुसा बिच का इदेया कुण प्यो हुँगा, जिसेरा पुत्तर तिसका रोट्टी मंगो तां से तिसजो पत्थर पकड़ाई देयो: या तां से मच्छी मंगो तां से कीड़ा पकड़ाई देयो? 12या पुत्तर आंड्डा मंगो तां तिस्जो बिच्छु देई देयो 13बुरे स्वभाव रे मणू हुन्दे-सुन्दे भी तुसा जो पता है कि अपणे बच्चेयां जो ठीक चीजां किय्यां दित्ती जान्दी, तां अवे तुसा अप्पु सोच्चो कि असा रा स्वर्ग अन्दर रैह्णे वाला परमेश्वर अपणे मंगणे वालेयां जो खुसी कने पवित्रात्मा किजो नी दिंगा 14फिरी यीशु ने इक्क मणू बिच का दुष्टात्मा निकाली जे कि जल्ली थी: जिस बेल्ले दुष्टात्मा तिस बिच का निकली गई तां से मणू गल्लां लग्गी पेया करणा ते सारे मणू ए दिख्खी करी हैरान होई गे।
यीशु ते बालज़बूल रा सरदार
15पर तिन्हा बिच का मते जणे बोलणा लगे, कि ए तां दुष्टात्मां रे सरदार री मदद कने इन्हा दुष्टात्मा जो कड़दा। 16पर होर मणूआं ने तिन्हा जो परखणे तांइ तिन्हा का स्वर्ग री कोई निशानी मंगी 17पर यीशु तिन्हेरे मन री गल्ल जो समजी गे ते तिन्हा ने जवाब दित्तेया, जिस देस अन्दर फूट पेई गे री हो, से उजड़ी जान्दा: ते जिस घर अन्दर कहला हो पेई गे री से कदी भी बसी नी सकदा 18ते अगर शैतान अप्पु जो नुकसान पूजाणा सुरु करी देयो, तां शैतान रे राज रा सत्यानास होई जाणा तुसा जे मेरे पर इल्जाम लांदे कि मैं दुष्टात्मां रे सरदार री मदद कने दुष्टात्मा जो कडदा, 19जे अगर मैं दुष्टात्मां रे सरदार री मदद कने दुष्टात्मा जो कडदा तां तुसा री औलादां कुसेरी मदद कने कडदी? इधेरे तांइ तिन्हा ने ही तुसा रा फैसला करणे वाला। 20पर जे मैं परमेश्वर रा नां लेई करी दुष्टात्मा जो कडदा, तां तुसा ए समजी लेयो कि परमेश्वर तुसा रे बिच राज करणे तांइ आई गेरे हिन। 21जां कोई ताकतवर मणू पूरी तयारी कने अपणे घर री पैहरेदारी करदा तां तिसेरा घर-बार बची रैहन्दा। 22पर जिस बेल्ले कोई तिसका भी जादा ताकतवर मणू आई करी तिस पर हमला करी के तिसजो हराई देयो तां तिसेरे हथियारां जो जिन्हा पर तिसजो विश्वास थिया, खुस्सि करी तिसेरा घर-बार लुट्टी करी से सब किच्छ अप्पु-मिते बंड्डी लिन्दे। 23जे मेरे पास्से नी है से मेरे खिलाफ है, ते जे मेरे कन्ने नी बटोलदा, से बखेरी रखदा।
अधूरे सुधार कने मुसीबत
24जां कोई दुष्टात्मा कुसकी मणू बिच का निकली जान्दी तां से अराम करणे तांइ सुकी जगाह् का होई करी जान्दी, ते जिस बेल्ले तिसजो अराम नी मिलदा तां से बोल्दी, मैं अपणे पुराणे घरे जो दुबारा हटी जान्दी जित्ते का मैं आए री है। 25ते हटी करी तिसजो से साफ-सुथरा ते सजा सजाया मिलदा। 26होर तां होर, इस बेरी से अप्पु कन्ने सत्त होर दुष्टात्मा जो भी कन्ने लेई आंदी, अते तिस बिच वास करणा लग्गी पैन्दी ते तिसेरी हालत पैल्ले का भी जादा बुरी होई जान्दी।
धन्न कुण है?
27जिस बेल्ले यीशु हल्ले ए सब गल्लां बोल्लेया ही करदे थिये, कि मणूआं री भीड़ बिच का इक्क जनानी ने जोरे सणे बोल्लेया, कि धन्न है से जनानी जिसा तुसा जो जम्मेया, ते धन्न है से जनानी जिसा तुसा जो अपणा दूद्द पियाया। 28इस गल्ल पर यीशु ने बोल्लेया, हाँ, पर जादा धन्न से हिन जे जे परमेश्वर रे वचनां जो ध्यान कने सूणदे ते तिन्हा पर मनदे भी।
स्वर्गीय निशानी री मांग
29जिय्यां जिय्यां मणूआं री भीड़ बधणा लग्गी, तां यीशु तिन्हा जो बोलणा लगे कि इस जुग रे मणू बड़े भरी बुरे हिन, से निशानी तोपदे रैह्न्दे पर इन्हा जो योना रे अलावा होर कोई भी निशानी नी दित्ती जाणी।
30जिय्यां योना नीनवे रे मणूआं तांइ इक्क निशानी बणेया थिया, तिय्यां ही मणू रे पुत्तर, जे मैं ही है ने इस जमाने रे मणूआं तांइ निशानी बणना 31दक्षिण री राणी ने इस जमाने रे मणूआं पर इल्जाम लगाणे ते तिन्हा जो गुनेह्गार साबित करणा, किजोकी से राजा सुलैमान री समजदारी वाली गल्लां सुनणे तांइ दुनिया रे इक्क कुणे का आए थी, ते इत्ते तां कोई राजा सुलैमान का भी बड्डा है। 32नीनवे रे मणूआं ने भी परमेश्वर रे हिसाब लैणे वाले रोजे अज्ज रे जुग रे मणूआं पर इल्जाम लाणे, किजोकी उन्हा ने योना री गल्लां सुणी करी अपणे पाप का तौबा कित्ती थी, ते अवे तां योना का भी खास कोई इत्ते है।
सरीर रा दीया
33कोई भी मणू दीय्या बाली करी तिसजो लुह्काई करी या भान्डे अन्दर पाई करी नी रखदा, पर ऊच्ची बखारी पर रखदा ताकि इणे-जाणे वाले जो लौ मिल्दी रेयो।
34हाख्खियां मणू रे सरीर रे दीये सांई हुंदी, इधेरे तांइ जे अगर तेरी हाख्खी साफ है तां तेरा पूरा सरीर भी लौ कने चमकदा होणा पर जे अगर से बुरी हिन तां तेरा पूरा सरीर न्याहरा है। 35इधेरे तांइ ध्यान रेयो, कि तुसा रे अन्दर री लौ नह्यारा नी बणी जाओ 36पर जे तुसा रा पूरा सरीर लौ कने चमकदा है, ते सरीर रा कोई भी हिस्सा न्याहरे बिच नी है तां से पूरी तरह् कने इय्यां लस्कणा मन्नो कोई दीया तुसा पर अपणी किरणां चमकाया करदा है।
शास्त्रि ते फरीसियां जो फटकार
37जां यीशु ए गल्लां बोल्ली बैठ्ठे तां कुसकी फरीसी मणू ने तिन्हेरे छंदे कित्ते, कि तुसा मेरे घरे रोट्टी खाओ, ते से अन्दर जाई करी रोट्टी खाणा बेई गे।
38जिस बेल्ले तिस फरीसी ने दिख्खेया कि यीशु ने रोट्टी खाणे का पैल्ले अपणे हत्थ नी धोये तां तिसजो बड़ी हैरानी होई 39ते इस गल्ल पर प्रभु जी ने तिसजो जवाब दित्तेया, ओ फरीसियों, तुसा थाली ते कटोरी जो तां उपरा-उपरा का माँजदे, पर तुसा ही अन्दर का लालच अते बुराई कन्ने भरितेरी हिन 40ओ बेअक्कलो, जिनिए बाहरले हिस्से जो बणाया, कै से अन्दरले हिस्से जो नी बणाए रा है? 41पर जे तुसा अन्दरे री चीजां जो दान करी दिंगे तां तुसा रा सब किच्छ सुच्चा होई जाणा 42पर, ओ फरीसियों, तुसा पर लाणत है! किजोकी तुसा अपणे पुदीने ते सुदाब बूटियाँ रा दसमा हिस्सा तां चढ़ान्दे पर, परमेश्वर रे प्यार ते तिन्हेरे फैसले जो नकारी दिन्दे दसमा हिस्सा तां दैणा चाहिदा, पर परमेश्वर रे प्यार अते तिन्हेरे फैसले जो नकारे रे बगैर 43ओ फरीसी मणूओं तुसा पर लाणत है! तुसा सभास्थल बिच छैल जगाह् बैणा चाह्ंदे ते जां बजार जान्दे तां सबणी मणूआं का अप्पु जो प्रणाम कराणा चाह्ंदे 44तुसा पर लाणत है! किजोकी तुसा तिन्हा लुके री कब्रां सांई हिन जिन्हा पर मणू चलदे पर जाणदे नी। 45तां कुसकी शास्त्री लोक्कां ने तिन्हा जो जवाब दित्तेया, कि ओ गुरु जी, इदेय गल्लां बोल्ली करी तुसा असा री भी बेजती करेया करदे हिन 46यीशु ने तिस्जो बोल्लेया, कि ओ शास्त्रियों, तुसा पर भी लाणत है! तुसा लोक्कां तांइ नियमां रा इदेया बोझ बणाई दिदें जिस जो चुकणा भी मुस्किल है ते अप्पु तिसजो अपणी उंग्गल कने भी छुणा नी चाह्ंदे 47तुसा पर लाणत है! किजोकी तुसा तिन्हा भविष्यद्वक्ता तांइ कबराँ बणान्दे, जिन्हा जो तुसा रे बाब्ब-दाद्देयां ने ही मारेया थिया 48इन्हा सबणी गल्लां कने तुसा ए साबित करदे कि तुसा रे पूरखां ने जे भविष्यद्वक्तां जो मारे तिस बिच तुसा राजी हुंदे, किजोकी तिन्हा ने मारेया थिया ते तुसा ने तिन्हेरी कब्रां बणाई दित्ती। 49इधेरे तांइ परमेश्वर रे वचन अन्दर भी बोल्ले रा है, कि मैं तिन्हा का भविष्यद्वक्ता जो ते प्रेरिता जो भेजणा ते तिन्हा ने उन्हा मणूआं बिच का किच्छ जो मारी दैणा ते किच्छ मणूआं तांइ मुसीबत खड़ी करी दैणी 50इधेरे तांइ दुनिया री सुरुआत का जितणे भी भविष्यद्वक्ता रा खून रूलया, तिसेरा हिसाब इस पीढ़ी रे मणूआं का लित्तेया जाणा 51मतलब ए है कि हाबिल रे खून होणे का लेई करी जकरयाह रे मरणे तिकर, जे कि परमेश्वर रे मन्दिर ते वेदी रे बिच मरे थिये तिन्हेरे मरणे रा हिसाब, इस पीढ़ी रे मणूआं का लित्तेया जाणा 52तुसा शास्त्रियों पर लाणत है! किजोकी तुसा ने समजदारी री मती सारी गल्लां सिख्खी तां लेईयाँ, पर अप्पु तिन्हा गल्लां पर नी चले ते जे चलणे री कोसीस करदे थिये तिन्हेरे भी रस्ते पर तुसा रुकावट बणे 53ते फिरी जां यीशु तित्ते का चली गे तां फरीसी ते शास्त्रि तिन्हेरे खिलाफ होई करी बुरे हाल्ले पीच्छे पेई गे कि से होर भी गल्लां पर यीशु कने सवाल-जवाब करण 54किजोकी से तिन्हेरी ही बोल्लेरियाँ गल्लां पर तिन्हा जो फँसाणे री भाल अन्दर थिये।
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
