यूहन्ना 1
1
वचन री तारिफ बिच इक्क भजन
सुरु बिच वचन थिया
1दुनिया रे बणाए जाणे का पैल्ले वचन थिया, वचन परमेश्वर कने थिया ते वचन परमेश्वर थिया। 2से ही सुरु अन्दर परमेश्वर रे कने थिया। 3परमेश्वर ने सब किच्छ वचन रे जरिए बणाया ते हर इक्क चीज जे इस दुनिया बिच बणाई गयी से तिन्हेरे ही जरिए बणाई गयी। 4तिस बिच जिन्दगी थी जे सारे मणूआं जो रौसनी दिंदा। 5रौसनी न्याहरे बिच चमकदी, ते न्याहरा तिसका कदी नी जीत्ती सकदा। 6इक्क मणू परमेश्वर रे पास्से का आया, जिसेरा नां यूहन्ना थिया 7से गवाह बणी करी आया ताकि रौसनी री गवाई दे, ताकि तिसेरे जरिए सारे रौसनी बिच विश्वास करण, 8से अप्पु तां रौसनी नी थी पर तिस रौसनी री गवाई दैणे तांइ आए रा थिया, 9से सच्ची रौसनी जे सारे लोक्कां जो रौसनी दिंदी, से दुनिया बिच आणे वाली थी। 10से दुनिया बिच आया, कने दुनिया तिसेरी वजह कने बणेया थिया, ते दुनिया रे लोक्कां ने तिसजो नी पछाणेया। 11से अपणे लोक्कां का आया पर तिसेरे अपणे लोक्कां ने तिसजो नी अपणाया। 12पर जितणेया ने तिसजो अपणाया, तिसने तिन्हा जो परमेश्वर रे पुत्तर होणे रा हक्क दिता, तिन्हा लोक्कां जो जे तिस पर विश्वास रखदे। 13से मणू ना तां अपणे मां-प्यो री मर्जी कने, ना सरीर री इच्छा कने ते ना ही लोक्कां री बच्चे पैदा करणे री इच्छा री वजह कने पैदा होए रे हिन पर से परमेश्वर री इच्छा कने पैदा होए रे हिन। 14वचन मणू रे रुप बिच आया, ते से अनुग्रह ते सच्चाई कने भरी कने तिसने हमारे बिच डेरा कित्ता कने असी तिसेरी इदेइ बड़ाई दिख्खी जिय्यां पिता रे इकलौत्ते पुत्तर री महिमा दिख्खी हो। 15यूहन्ना ने तिसेरे बारे गवाई दिती कने बड़ी हक्कां लाई करी बोल्लेया, “ए से ही है जिसेरे बारे मैं तुसा जो दस्सेया थिया कि जे मेरे बाद आए करदा है सेह मेरे का भी बधी करी है किजोकी से मेरे का भी पैहले थिया।” 16तिन्हा री अनुग्रह री भरपुरी बिच का असी तिन्हा का इक्क का बाद इक्क मती सारी आशीषां हासिल कित्ती। 17इस तांइ कि मूसा रा कानून तां मूसा रे पास्से का दित्तेया गेरे थिया पर परमेश्वर ने यीशु मसीह रे जरिए अनुग्रह कने सच्चाई लोक्कां पर ज़ाहिर कित्ती। 18परमेश्वर जो कदी कुसकी ने नी दिख्खेया पर इकलौते पुत्तर ने जे अप्पु ही परमेश्वर है, ते पिता रे सबका जादा करीब है। तिन्हा ने ही असा पर परमेश्वर जो प्रकट कित्ते रा है।
यूहन्ना बपतिस्समा दैणे वाले रा बसेख
यूहन्ना बपतिस्मा दैणे वाले री गवाई
19यूहन्ना री गवाई ए है कि जिस बेल्ले यहूदी अधिकारियां ने यरुशलेम सहर रे लेवी पुरोत्तां ते लेवी गोत्र रे लोक्कां जो तिसका ए पूछने जो भेज्जेया “तू कुण है।” 20तिसने सही तौर पर तिन्हा जो दस्सेया, “मैं मसीह नी है।” 21तां तिन्हा ने तिसजो पूच्छेया, “तां फिरी कुण है? ‘क्या तू एलिय्याह भविष्यद्वक्ता है? तिसने बोल्लेया मैं नी है, तां कै तू भविष्यद्वक्ता है?’” तिसने जवाब दिता, “नी।” 22“तां तिन्हा ने तिसजो पूच्छेया, फिरी तू कुण है ताकि असी अपणे भेजणे वालया जो जवाब देई सकन् कि तू अपणे बारे बिच कै बोलदा?” 23तिसने बोल्लेया जिय्यां यशायाह भविष्यद्वक्ता ने बोल्लेया है;
मैं जंगला बिच इक्क अवाज है,
कि परमेश्वर रा रस्ता तैयार करो
24किच्छ मणू फरीसी लोक्कां रे पास्से का भिजवाए रे थिये। 25तिन्हा ने तिसका एह़ सवाल पूच्छेया, “अगर तू न मसीह है न एलिय्याह है, ते ना ही सेह भविष्यवाणी करणे वाला है, तां फिरी बपतिस्मा किजो दिंदा?” 26यूहन्ना ने तिन्हा जो जवाब दित्ता, मैं ता पाणी कने बपतिस्मा दिंदा पर तुसा रे बिच इक्क इदेया मणू खडिते रा है तिसजो तुसा नी जाणदे। 27जे मेरे बाद आणे वाले है मैं तां तिसेरी जूत्ते रे तसमे खोलणे रे जोग्गा भी नी है 28ए गल्लां यरदन नदी रे पार बैतनिय्याह कस्बे बिच होई, जित्ते यूहन्ना लोक्कां जो बपतिस्मा देया करदा थिया।
परमेश्वर रा छेलू
29दूए दिन तिसने यीशु जो अपणे पास्से आंदे दिख्खी करी बोल्लेया, “दिख्खो! ए परमेश्वर रा मेमना है, जे दुनिया रे पाप्पां जो मिटाणे तांइ आए रा है।#1:29 दुनिया रे पाप्पां जो मिटाणे तांइ आए रा है। इत्ते इस पंक्ती रा मतलब है कि यीशु ने अप्पु रा कुर्बानी करी दुनिया का पाप्पां जो दुर करी दैणा।” 30ए से ही है जिसेरे बारे बिच मैं बोल्लेया थिया इक्क मणू मेरे का बाद आणे वाला है जे कि मेरे का बधी करी है किजोकी से मेरे का पैहले थिया 31मैं तां तिसजो पछियाणदा नी थिया कि से मसीह हिन, मैं इधेरे तांइ पाणी कने बपतिस्मा दिंदा आया कि से इस्राएल रे लोक्कां सामणे आई जाए। 32कने यूहन्ना ने गवाई दिती, “मैं आत्मा जो कबूतर रे रुप बिच स्वर्ग का उतरदे दिख्खेया ते से तिस पराल्ले उत्तरी गेया।” 33मैं तां तिसजो पछियाणदा नी कि से मसीह हिन, पर जिस ने मेरे जो पाणी रा बपतिस्मा दैणे जो भेज्जेया तिसी ने मेरे जो बोल्लेया, जिस पराले तू आत्मा जो उतरदे कने रुकदे दिख्खेया से ही पवित्रात्मा कने बपतिस्मा दैणे वाला है। 34ते मैं दिख्खेया कने गवाई दिती कि ए ही परमेश्वर रा पुत्तर है।
यीशु मसीह रा पैल्ला चेल्ला चुणना
यीशु रे पैल्ले चेल्ले
35अगले दिन फिरी यूहन्ना कने तिसेरे चेल्लेयां बिच का दो मणू खडित्ते रे थिये 36कने तिसने यीशु जे जाए करदे थिये दिख्खी करी बोल्लेया दिख ए परमेश्वर रा मेमना है 37तां से दोई चेल्ले तिसका एह़ सुणी करी यीशु रे पीछे चली पे 38यीशु ने मुड़ी करी तिन्हा जो अपणे पीच्छे आंदे दिख्खेया ते बोल्लेया, तुसा कुस जो तोप्पेया करदे हिन, ते तिन्हा जो बोल्लेया, ओ गुरु, तू कुते रैहन्दा। 39तां तिन्हा ने यीशु रे रैह्णे री जगाह् जो दिख्खेया, ते तिस रोजे से तिन्हा कने ही रे। ए सब किच्छ चार बजे रे लगभग होया थिया। 40तिन्हा दोन्नां बिच का जे यूहन्ना री गल्ल सुणी करी यीशु रे पीछे होए रे थिये इक्क शमौन पतरस रा भ्याल अन्द्रियास थिया 41तिसने पहले अपणे सगे भ्याल शमौन जो मिली करी तिसजो बोल्लेया, हमारे जो मसीह मिली गे। 42अन्द्रियास शमौन जो यीशु का लेई आया, यीशु ने तिसजो दिख्खी करी बोल्लेया, तू यूहन्ना रा मुंडा शमौन है, तू कैफा #1:42 ए आरामी भाषा रा शब्द है जिसेरा मतलब चट्टान है।मतलब पतरस #1:42 ए यूनानी भाषा रा शब्द है जिसेरा मतलब चट्टान है।केहलाणा।
फिलिप्पुस ते नतनएल रा सद्देया जाणा
43दूए दिन यीशु ने गलील प्रदेश जाणे रा फैसला कित्तेया। से फिलिप्पुस कने मिल्लेया कने बोल्लेया, मेरा चेल्ला बणने तांइ पीच्छे आई जा। 44फिलिप्पुस अन्द्रियास कने पतरस रे ग्रां बैतसैदा रा रैह्णे वाला थिया 45फिलिप्पुस नतनएल कने मिलया कने तिसजो बोल्लेया, मूसा ते भविष्यद्वक्तां ने ते परमेश्वर रे कानून बिच जिसेरी चर्चा ने कित्ती री है, से असा जो मिली गेया, से यूसुफ रा पुत्तर, नासरत कस्बे रा यीशु है। 46नतनएल ने तिसजो बोल्लेया, कै कोई ठीक चीज भी नासरत का निकली सकदी है? फिलिप्पुस ने तिसजो बोल्लेया, चली करी दिख्खी लै 47यीशु ने नतनएल जो अपणे पास्से आंदे दिख्खी करी उसेरे बारे बिच बोल्लेया: ए सच्ची इस्राएल रे खानदान#1:47 याकूब रा खानदान रा है ते भरोसेमंद है: इस आदमी बिच कोई ढोंग नी है। 48नतनएल ने तिसजो बोल्लेया, तू मेरे जो किय्यां करी जाणदा? यीशु ने तिसजो जवाब दित्ता इसेरे का पैहले फिलिप्पुस ने तिज्जो सदया जिस बेल्ले तू अंजीर रे बूट्टे रे हेठ थिया, तिस बेल्ले मैं तिज्जो दिख्खेया थिया 49नतनएल ने तिसजो जवाब दिता, ओ गुरु, तू परमेश्वर रा पुत्तर है, तू इस्राएल रा महाराजा है। 50यीशु ने तिसजो जवाब दिता, मैं जे किच्छ तिज्जो बोल्लेया कि मैं तिज्जो अंजीर रे बूट्टे रे हेठ दिख्खेया, कै तू इसी तांइ विश्वास करदा, तैं इसका भी बड्डे-बड्डे कम्म दिखणे। 51फिरी तिसने बोल्लेया, मैं तुसा कने सच-सच बोलदा कि तुसा स्वर्ग जो खुले रे कने परमेश्वर रे स्वर्गदूतां जो मणू रे पुत्तर, जे मैं ही है, पराले उतरदे कने उप्पर जांदे दिखणा।
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
