प्रेरितों के कम 21
21
यरूशलेम गी जाने दा सफ़र
1जेसलै असैं उन्दे थमां लग्ग ओईयै समुंदरी सफ़र शुरू कित्ता, तां सीधे रस्ते थमां कोस टापू च आए, ते दुए देन रुदुस टापू च, ते उत्त्थुआं पतरा टापू च आए। 2उत्थें एक चाज फीनीके गी जंदा मिलया, ते असैं ओस उपर चढ़ीयै सफ़र शुरू कित्ता। 3जेसलै साइप्रस टापू लबया, तां असैं उसी खबे अथ्थ छुड़या, ते सीरिया लाके गी चलीयै सूर शैर च उतरे; किके उत्थें चाज दा माल तुआरना हा। 4ते असेंगी उत्थें चेलें लबे तां अस उत्थें सत देन तकर रे। उनै पवित्र आत्मा दे सखाए पौलुस गी गलाया के यरूशलेम नेई जाने दी अर्ज कित्ती। 5सत दिने दे बाद जेसलै साड़े जाने दे देन पूरे ओई गै; ते सबनी जनांनीयें ते बच्चें समेत असेंगी शैर दे बार तकर पजाया; ते असैं समुन्दर दे कंडै उपर घुटने टेकियै प्रार्थना कित्ती, 6ओस बेलै एक दुए थमां विदा ओईयै, अस तां चाज उपर चढ़े ते ओ अपने-अपने कर बापस गै।
7जेस बेलै अस सूर शैर थमां समुन्दरी सफर पूरा करियै पतुलिमयिस शैर च पूजे, ते विश्वासी प्राऐं गी नमश्कार करियै उन्दे कन्ने एक देन ओर रे। 8दुए देन अस उत्त्थुआं दा चलीयै कैसरिया शैर च आए, ते फिलिप्पुस शोभ समाचार पर्चारक दे कर च जेड़ा सत्तें बिचा एक हा; जाईयै ओदे उत्थें रे। 9ओस दियां चार कवारियां कुड़ीयाँ हां, जेड़ीयां पविखवाणी करदी हां। 10जेलै अस उत्थें मते देन रेई चुके, तां अगबुस नां दा पविखवक्ता यहूदीया लाके थमां आया। 11ओसने साड़े कोल आईयै पौलुस दा बैलट लेता, ते अपने अथ्थ पैर बन्नीयै आखया, “पवित्र आत्मा ए आखदा ऐ, के जेस मनुक्ख दा ए बैलट ऐ, उसी यरूशलेम च यहूदी एस रीति कन्ने बनी देगन, ते दुई जातीयें दे अथ्थ च सौपी देगन।” 12जेसलै असैं ए गल्लां सुनीयां, तां असैं ते उत्त्थुआं दे लोकें पौलुस कन्ने अर्ज कित्ती के यरूशलेम गी नेई जा। 13लेकन पौलुस ने जबाब दिता, “तोस के करदे ओ, के रोई-रोईयै मेरा मन खराब करदे ओ? आंऊँ तां प्रभु यीशु दे नां खातर यरूशलेम नां सेर्फ कैद ओनें गै नेई बरना मरने लेई बी त्यार ऐं।” 14जेसलै ओस नेई मनया तां अस ए आखीयै चोप्प ओई गै, “प्रभु दी मर्जी पूरी ऊऐ।”
15उनै दिने दे बाद असैं त्यारी कित्ती ते यरूशलेम गी चली गै। 16कैसरिया शैर बिचा बी केछ चेलें साड़े कन्ने ओई गै, ते अस मनासोन नां साइप्रस दे एक पराने चेलें गी इत्थैं क्न्ने लेई आए, के अस ओदे उत्थें टिकचै।
यरूशलेम च पौलुस दा औना
17जेसलै अस यरूशलेम च पूजे, ते विश्वासी प्रा मती खुशी कन्ने साड़े कन्ने मिले। 18दुए देन पौलुस असेंगी लेईयै याकूब दे कोल गीया, जिथें सब अगबें किट्ठे हे। 19ओस बेलै ओस उनेंगी नमश्कार करियै, जेड़े-जेड़े कम परमेसर ने ओसदी सेवा थमां दुई जातीयें च कित्ते हे, एक-एक करियै सारे सनाए। 20उनै ए सुनीयै परमेसर दी मैमा कित्ती, पी ओस कन्ने आखया, “ए प्रा, तू जानना ऐ, के यहूदीयें बिचा केई जारें लोकें प्रभु यीशु उपर विश्वास कित्ता ऐ; ते सारे कनून आसतै जशिले न। 21ते यहूदी वश्वासीयें गी तेरे बारै च सखाया गेदा ऐ, के तू दुई जातीयें च रौने आले यहूदीयें गी मूसा थमां पी फिरने गी सखाना ऐ, ते आखन ऐ, के नां अपने बच्चें दा खतना कराओ ते नां यहूदी रीतियें उपर चलो। 22तां पी के कित्ता जा? लोग जरुर सुनगन के तू इत्त्थैं आएदा ऐं। 23एस आसतै अस जे तुगी आखनयां न, ओ कर। साड़े इत्थैं चार मनुक्ख न जिनैं मन्नत मनी दी ऐ। 24उनेंगी लेईयै उन्दे कन्ने शोद्ध ओनें दी विधि पूरी कर; ते उन्दे आसतै खर्चा दे, के ओ सर दे बाल कटन। ओस बेलै सारे जानीं लैगन के जेड़ीयां गल्लां तेरे बारै च उनेंगी सखाई दियां न, उन्दे बेच केछ सच्चाई नेईयैं लेकन तू अप्पुं बी कनून गी मनियै ओदे मताबक चलना ऐं। 25लेकन उनै दुई जातीयें दे बारै च जिनैं विश्वास कित्ता ऐ, असैं ए फैसला करियै लिखी पेजया ऐ के ओ मूरतयें दे सामने बलि कित्ते दे मांस थमां ते, खून किती दी चीजां थमां ते ब्यभिचार थमां लग्ग रौन।” 26ओस बेलै पौलुस उनै मनुक्खें गी लेईयै, ते दुए देन उन्दे कन्ने शोद्ध ओईयै मंदर च गीया, ते उत्थें सनाई दित्ता के शोद्ध ओनें दे देन, मतलब उन्दे बिचा अर एक आसतै चढ़ावा चढ़ाए जाने दे तकर देन कदुं पूरे ओगन।
मन्दर च पौलुस दी गेरफ्तारी
27जेसलै ओ सत देन पूरे ओनें आले हे, तां आसिया लाके दे यहूदीयें पौलुस गी मंदर च दिखियै सारे लोकें गी बकाया, ते इयां करलाईयै उसी पकड़ी लेता, 28“ए इस्राएलियें, मदद करो; ए उवै मनुक्ख ऐ, जेड़ा लोकें दे, ते कनून दे, ते एस जगा दे वरोध च अर जगा लोकें गी सखांदा ऐ, इत्थैं तकर के दुई जातीयें गी बी मंदर च आनीयै ओसने एस पवित्र जगा गी अशोद्ध कित्ता ऐ।” 29उनै ए एसकरी आखया, किके पौलुस इफिसुस वासी त्रुफिमुस गी ओदे कन्ने शैर च दिखया हा, ते समझे हे के पौलुस उसी मंदर च लेई आया ऐ। 30एसकरी सारे शैर बेच शोर मची गीया, ते लोग दौड़ीयै किट्ठे ओए, ते पौलुस गी पकड़ीयै मन्दर दे बार कसीटी लेई आए, ते फोरन मंदर दे दरबाजे बंद कित्ते गै। 31जेसलै ओ उसी मारी देना चांदे हे, ते पलटन दे प्रधान गी सनिया पूजया के सारे यरूशलेम शैर च अहला मचा करदा ऐ। 32ओस बेलै ओ फोरन सपाईयें ते सूबेदारें गी लेईयै उन्दे कोल थलै दौड़ी आया; ते लोकें दी पीड ते पलटन दे प्रधान गी ते बाकी सपाईयें गी दिखियै पौलुस गी मारना पीटना छुड़ी दिता। 33ओस बेलै पलटन दे प्रधान ने पौलुस दे कोल आईयै उसी पकड़ी लेता; ते दो संगलें कन्ने बनने दा उक्म देईयै पूछना लगे, “ए कोन ऐ ते एस ने के कित्ता ऐ?” 34लेकन पीड बिचा कोई केछ ते कोई केछ करलांदा रिया। जेसलै शोर दे मारे ओ ठीक सच्चाई नेई जानी सकया, तां उसी अवालात च लेई जाने दा उक्म दिता। 35जेसलै ओ पौड़ीयें उपर पूजया, ते ऐसा ओया के पीड दे दबाब दे मारे सपाईयें उसी चुकियै लेई जाना पिया। 36किके लोकें दी पीड ए करलांदी ओई ओदे पिछें पेदी ही, “उसी मारी उडो।”
37जेसलै ओ पौलुस गी अवालात बिचा लेई जाने आले हे, तां ओसने पलटन दे प्रधान कन्ने आखया, “के मिकी उक्म ऐ के आंऊँ तेरे कन्ने केछ आखी सकां?” ओसने आखया, “के तू यूनानी पाषा जानना ऐ? 38के तू ओ मिस्र देश दे रौने आला नेईयैं, जेड़ा इनें दिनें थमां पैलैं एका बनाईयै, अपने चार जार लोकें गी जंगल च लेई गीया?” 39पौलुस ने आखया, “आंऊँ तां तरसुस शैर दा यहूदी मनुक्ख ऐं! किलिकिया मशूर शैर दा रौन आला ऐं, आंऊँ तेरे अगें अर्ज करना ऐं के मिकी लोकें कन्ने गल्लां करना दे।” 40जेसलै ओसने उक्म दित्ता, तां पौलुस ने पौड़ी उपर खड़ोईयै लोकें गी अथ्थ कन्ने शारा कित्ता। जेलै ओ चोप्प ओई गै, तां ओ इब्रानी पाषा च बोलन लगया।
This work is licensed under Creative Commons Attribution-ShareAlike 4.0 License.
