प्रेरितों के कम 12
12
हेरोदेस दा रो पड़कनां
1ओस बेलै हेरोदेस राजा ने कलीसिया दे केछ मनुक्खें गी सताने आसतै उनेंगी कैदी बनाई दित्ता। 2ओसने प्रेरित यूहन्ना दे प्रा याकूब गी तलवार कन्ने मराई दित्ता। 3जेसलै ओसने दिखया, के यहूदी लोग एस कन्ने खोश ओदे न, तां ओसने पतरस गी बी पकड़ी लेता। ओ देन खमीर रुट्टी देन हे। 4ते हेरोदेस ने पतरस गी पकड़ीयै जेले च सुट्टया, ते ओसदी राखी आसतै, चार-चार सपाईयें दे चार पैरें च रखया, एस वचार कन्ने के फसह दे त्यार दे बाद उसी लोकें दे सामने अनें।
पतरस दा जेल चा छटकारा
5जेलै च पतरस दी राखी उआ करदी ही; लेकन कलीसिया ओदे आसतै एक मन ओईयै परमेसर दे अगें प्रार्थना करा करदी ही।
6जेसलै हेरोदेस राजा उसी लोकें दे सामने दोष लाने आला हा, तां उसै राती पतरस दो संगलें कन्ने बन्ने दा, दो सपाईयें बेच सवा करदा हा; ते चौकीदार दरबाजे उपर जेले दी रखया करा दे हे। 7ते दिखो चानक, प्रभु दा एक सोर्गदूत पतरस दे कोल आई खड़ोता, ते ओस कोठरी च लो चमकी, ते ओसने पतरस दी पसली उपर अथ्थ मारीयै उसी जगाया, ते आखया, “जल्दी उठ। ते ओदे अथ्थें चा संगलां खुलीयै किरी गेईयां।” 8ओस बेलै सोर्गदूत ने उसी आखया, “लक बन्न, ते अपनीयां नुकां लाई लै।” ओसने उयांगै कित्ता, पी सोर्गदूत ने उसी आखया, “अपने कपड़े लाईयै मेरे पिछें ओई जा।” 9ओ निकलियै ओदे पिछें ओई गीया; लेकन ए नेई जानदा हा के जे केछ सोर्गदूत करा दा ऐ, ओ सच्च गै, बरना ए समझया के आंऊँ दर्शन दिखा करना ऐं। 10ओस बेलै ओ पैले ते दुए पैरे थमां निकलियै ओस लोहे दे दरबाजे उपर पूजे, जेड़ा शैर आली बखी ऐ। ओ उन्दे लेई अप्पुं गै खुली गीया, ते ओ निकलियै एक गै गली च ओईयै गै, ते फोरन गै सोर्गदूत उसी छुड़ीयै चली गीया। 11ओस बेलै पतरस ने ओश च आईयै आखया, “ऊन मैं समझी लेता के प्रभु ने अपना सोर्गदूत पेजीयै मिकी हेरोदेस राजा दे अथ्थें बिचा छुड़ाई लेता, ते यहूदी अगबें दी सारी आस त्रोड़ी दिती।”
12ते ए सोचीयै, के परमेसर ने मिकी छुड़काई दित्ता ऐ, ओ यूहन्ना दी मां मरियम दे कर आया, जिसी मरकुस आखया जन्दा ऐ। उत्थें बड़े विश्वासी लोक किट्ठे ओईयै प्रार्थना करा दे हे। 13जेसलै पतरस ने दरबाजे दी खेड़की ठोरी, तां रुद्दे नां दी एक दासी दिखन आई। 14ते पतरस दी बाज पनछानियै ओसने खुशी दे मारे दरबाजा नेई खोलया, लेकन दौड़ीयै कोल गेई, ते सनाया के पतरस दरबाजे उपर खड़ोते दा ऐ। 15उनै उसी आखया, “तू पागल ऐं।” लेकन ओ दलेरी कन्ने बोली के इयां गै ऐ। ओस बेलै उनै आखया, “ओसदा सोर्गदूत ओंना।” 16लेकन पतरस पेहत ठोरदा गै रिया; आखरकार उनै खेड़की खोली, ते उसी दिखियै रांन रेई गै। 17ओस बेलै ओसने उनेंगी गी अथ्थ कन्ने शारा कित्ता के चोप्प रो; ते उनेंगी सनाया के प्रभु केस रीति कन्ने उसी जेले बिचा कढी लेई आया ऐ। पी आखया, “याकूब ते प्राऐं गी ए गल्ल सनाई दियो।” ओस बेलै ओ निकलियै दुई जगा चली गीया।
18बड़ा बेला ओदे गै सपाईयें च जेड़े थाने च पतरस दी राखी करा दे हे मती अल चल मची गेई के पतरस दा के ओया। 19जेसलै हेरोदेस राजा ने ओसदी खोज करने आसतै उक्म दित्ता ते ओ नेई मिलया, तां चौकीदारें गी पूछया के पतरस कुत्थें गी गीया, पी ओनें उक्म दिता के ओ मारी दिते जांन; ते पतरस यहूदीया लाके गी छुड़ीयै कैसरिया शैर च जाईयै रौन लगया।
हेरोदेस दी कीड़े पेईयै मौत
20हेरोदेस राजा सूर ते सैदा शैर दे लोकें थमां मता क्रोधी हा। ओस बेलै ओ एक मन ओईयै ओदे कोल आए, ते बलास्तुस गी जेड़ा राजा दा एक बड़ा अफसर हा, मनाईयै मेल करना चाया; किके राजा दे देश चा उन्दे देश दा पालन पोषण ओंदा हा। 21चुनें दे दिनें च हेरोदेस राजा राजवस्त्र पाईयै सिंहासन उपर बैठा, ते उनेंगी पाशन देन लगया। 22ओस बेलै लोग पुकारी उठे, “ए तां मनुक्ख दी नेई परमेसर दी बाज ऐ।” 23उसै कड़ी प्रभु दे एक सोर्गदूत ने फोरन ओदे उपर वार कित्ता, किके ओस परमेसर गी मैमा नेई दिती; ते उसी कीड़े पे ते मरी गीया।
24लेकन परमेसर दा वचन बददा गीया ते विश्वासी लोक फैलदे गे।
25जेसलै बरनबास ते शाऊल अपनी सेवा पूरी करी चुके तां यूहन्ना गी जिसी मरकुस आखया जन्दा ऐ, यरूशलेम चां अन्ताकिया बापस आए।
This work is licensed under Creative Commons Attribution-ShareAlike 4.0 License.
