Jɛnɛsis 8
8
Aw Di Flɔd Bin Dɔn
1PAPA GƆD nɔ bin fɔgɛt se Noa ɛn ɔl dɛn animal bin de insay di bot; i mek big briz blo, ɛn di wata bigin go dɔŋ. 2PAPA GƆD lɔk ɔl dɛn say we wata bin de pas ɔnda grɔn, ɛn lɔk di klawd fɔ mek ren nɔ kam. 3Di wata bigin go dɔŋ smɔl smɔl. Bay di tɛm we i de wan ɔndrɛd ɛn fifti de, i dɔn go dɔŋ dɔn. 4Di sɛvintin de na di mɔnt we mek sɛvin, di ak bin slam na mawnt Ararat. 5Di wata bin de go dɔŋ te di mɔnt we mek tɛn. Di fɔs de na da mɔnt de dɛn bigin si di mawnten dɛn.
6Afta fɔti de bifo Noa bin opin wan winda, 7ɛn i sɛn wan revɛn#8:7 Revɛn Na bɔd we de na Amɛrika, Eshia ɛn Yurop. I fiba minista bɔd. Di bɔd go ɛn i bigin de flay rawnd rawnd sote di wata dray. 8Afta dat Noa sɛn wan dɔv fɔ go luk if di wata dɔn dray, 9bɔt we di dɔv si se di wata bin stil de ɔlsay ɛn nɔ gɛt ples fɔ tinap, i flay go bak na di ak. Noa put in an na do ɛn briŋ di bɔd kam insay saful. 10Noa wet fɔ ɔda sɛvin de bifo i sɛn di dɔv go bak. 11Di dɔv tɔn bak ivin tɛm wit ɔliv lif nain mɔt. Dat mek Noa no se di wata dɔn de dray. 12Noa bin wet fɔ ɔda sɛvin de bak bifo i sɛn di dɔv wantɛm mɔ; dis tɛm di dɔv nɔ kam bak.
13Di fɔs de na di fɔs mɔnt, we Noa siks ɔndrɛd ɛn wan ia, ɔl di wata dray. Noa pul di kɔba we de pan di ak, i luk rawnd, ɛn i si se di wata dɔn dray na di grɔn. 14Na di twɛnti-sɛvin de na di sɛkɛn mɔnt di wata dray na di grɔn ɔltogɛda.
15PAPA GƆD tɛl Noa se, 16“Kɔmɔt insay di ak wit yu wɛf, yu bɔypikin dɛn, ɛn dɛn wɛf. 17Pul ɔl di bɔd ɛn di animal dɛn na do, dɛn go bɔn pikin ɛn de ɔlsay na di wɔl.” 18So Noa kɔmɔt insay di ak wit in wɛf, in bɔypikin dɛn, ɛn dɛn wɛf. 19Ɔl di animal ɛn bɔd dɛn bin kɔmɔt insay di ak bay pia, wankayn to wankayn.
Noa Ɔfa Sakrifays
20Noa bil ɔlta fɔ PAPA GƆD. I tek tu-tri pan di ‘klin’ animal ɛn klin bɔd dɛn, ɛn bɔn dɛn wanol wan fɔ sakrifays pantap di ɔlta. 21We di sakrifays bin de bɔn, in sɛnt bin so fayn dat i mek PAPA GƆD in at gladi, nain i tɔk nain at se, “A nɔ go swɛ di wɔl igen fɔseka wetin mɔtalman de du; a no se frɔm we i smɔl na soso bad tin i de tink bɔt. A nɔ go ɛva pwɛl ɔltin we gɛt layf na dis wɔl, lɛkɛ aw a jɛs du. 22Wans di wɔl nɔ dɔn yet, tɛm go de fɔ plant ɛn tɛm go de fɔ avɛst; di ples go kol ɛn di ples go wam; Sɔma ɛn Winta”#8:22 Sɔma ɛn Winta Sɔma na lɛkɛ wi dray sizin; Winta na lɛkɛ ren sizin. go de; do go klin, nɛt go kam. Ɔl dis nɔ go ɛva tap.
Krio Bible © The Bible Society of Sierra Leone, 2013.
