MATIUS 6
6
Sasasa hal᷊i u l᷊aonggo
1 #
Mat. 23:5
“Tinaungete, kumbahang i kumu mukoa tatuhu su agama su tingo ngu hape tadeau i kawuangu taumata. Boko i kumu mukoa kere'e i kumu sarung tamanarima wawal᷊ise boi Yamangu su sorga.
2Arawe i kumu munggile l᷊aonggo su tau ko susa, kumbahang i puwawuke kere ko i koa u taumata ko pal᷊antikari. I sire makihaghi mukoa tamai haghi e'e su wal᷊e pukakal᷊iomanengang arako sural᷊eng ko l᷊abo, tadeau pakidalo su taumata. Tinaungete, i sire seng nanarima wawal᷊ise. 3Arawe i kumu, boko i kumu munggile l᷊aonggo, onggoe pakarumasi, tadeau takoae ko makatitong. 4Balate ko nikoa u e'e maneng tanikatitonangi sai-sai, su l᷊ikuri Yamangu su sorga. I Sie makawua kakanoau ko tai kawua e'e dang sarung mamal᷊isi si kau.”
Sasasa hal᷊i u mukal᷊iomaneng
(Luk. 11:2-4)
5 #
Luk. 18:10-14
“Bokou i kumu mukal᷊iomaneng, kumbahang manguntu lulungu taumata ko makitika. Kihaghi i sire mukal᷊iomaneng rumarisi su wal᷊e pukakal᷊iomanengang dang sumanga pul᷊engangu ral᷊eng tadeau i tuhungangu taumata. 6Arawe boko i kumu mukal᷊iomaneng, tamaite sarang kamari, humping tukari, mbuhue pukal᷊iomaneng si Yamang ko taikawua e'e. Kute i Yamangu ko makawua kakanoau ko taikawua sarung mamal᷊isi si kau.
7Boko i kumu mukal᷊iomaneng, kumbahang muparal᷊iku musul᷊ungu taumata ko wugha ngu Mawu. I sire manika ndo i sire sarung raringihang ual᷊ingu kakal᷊iomanengi sire manandu. 8Boko manguntu si sire. I Amangu seng matitong apang ko sunaungu, su horo i kumu mundo. 9Inau pukal᷊iomaneng te kiri i:
‘I Yamangi kami su sorga:
I Kau Mawu mang simbau.
Mal᷊umbako i Kau isumba l᷊au i adateng
10I Kau Ratungi kami.
Mal᷊umbako i Kau mamarenta su dunia
dingang kao-U ituhukang kere su sorga.
11Onggoko su silou i'i l᷊aidopi ko kanengang i kami.#6:11: ko kanengang i kami: arako guna ngu dol᷊ou, arako guna ngu l᷊ou-l᷊ou.
12Ampunge ko i kami bou pusansal᷊angi kami,
kere i kami seng nangonggo ampunge su taumata
ko nunsal᷊a si kami.
13Kumbahang mamalangi kami kailangeng u pangangimang su tempo ngi kami i setangteng
kateho l᷊iu ko i kami bou kawasa ko dal᷊ai.
[I Kau Ratu makawasa, mawantughi sarang kal᷊iwuenge. Aming]’
14 #
Mrk. 11:25-26
Boko i kumu munggile ampunge su taumata ko nunsal᷊a si kumu, I Yamangu su sorga mang l᷊ai sarung munggile ampunge su pusansal᷊angi kumu. 15Arawe boko i kumu ta munggile ampunge su pusansal᷊angu taumata ko wal᷊inge, kute i Yamangu su sorga mang l᷊ai sarung tamunggile ampunge su sal᷊angi kumu.”
Sasasa hal᷊i u mupuasa
16“Boko i kumu mupuasa, kumbahang pahesu musahingkudung kere lulungu taumata ko makitika. I sire mamal᷊u pahesi sire tadeau i katitonangu taumata i sire kapupuasange. Tinaungete, e'e wawal᷊ise seng nitarima i sire. 17Arawe boko i kumu mupuasa, panguhauko dang saheko utau, 18tadeau takoae ko matitong i kumu kapupuasange, kitang Yamangu ko tai kawua e'e. I sie makawua kakanoau ko tai kawua e'e sarung mamal᷊isi si kau.”
Kakakala su sorga
(Luk. 12:33-34)
19 #
Yak. 5:2-3
“Kumbahang mangomol᷊i kakakala guna ngu watangeng su dunia su tampa ko pia uanenge dingang u tai ngu uase ko makarusa dang tahatako sumongo manako. 20Sul᷊ikuru e'e, pangomol᷊e kakakala su sorga, su tampa ko apang uanenge dingang u tai ngu uase tamakarusa, dingang u tahatako ta sumongo manako. 21Watu'u suapa pia kakakalau, su se'e l᷊ai naungu!”
Kasasua su badang
(Luk. 11:34-36)
22“Mata ko sol᷊o ngu badang. Boko matangu matilang, kaul᷊i u badangu suminang. 23Arawe boko matangu mal᷊uwuhi, kaul᷊i u badangu marundung. Inau boko sol᷊o ngu badangu marundung, kira kal᷊ie rundung e'e!”
Mawu Ruata dingang u kakakala
(Luk. 16:13, 12:22-31)
24“Takoae singkatau ko makapuhal᷊i boko mawunge duang katau. Watu u i sie sarung mapal᷊iu kumindaghi u simbau bou kowal᷊inge. Arako i sie sarung mapal᷊iu mapia su mawunge simbau bou kowal᷊inge. Kere e l᷊ai i kumu. I kumu tamariadi mutahamawu Mawu Ruata dingang u mutahamawu ngu l᷊ai kakakala.
25Ual᷊ingu e'e tinaungete: Kumbahang ghumaghangu puwawiahu, ko apa sarung kanengang dingang u inungang, arako apa ko sarung l᷊ohokangi kumu. Wughangu puwawiahi nae ko nangilebe bou idopi, dang badang nae ko nangilebe bou pakeang? 26Tuhungete burung su kinuang. I sire tamusuang, ta manipo, dang l᷊ai tamangomol᷊i sukengu sasuange su wal᷊e. Maneng kere e i Yamangu su sorga mang mupal᷊ihara si sire! Wughangi kumu ko nangilebe mahariga bou manga burung su kinoang? 27I sai bou tal᷊oarai kumu ual᷊ingu ghaghange botonge makatamba umure maneng kitang singkodo-kodo?#6:27: makatamba umure maneng kitang singkodo-kodo?: arako nanamba marange maneng kitang singkodo.
28Nakura we i kumu maghagha hal᷊i u pakeangu? Tuhunge ko manga bungang bakung ko nutumuwo su ngudae. Manga bungang e'e tamul᷊ahal᷊i dang tamukakoa heka; 29#1Raj. 10:4-7; 2Taw. 9:3-6kateho Ratu Salomo kere'e kakalae e'e ta nul᷊oho pakeang kere kasadada u bungang e'e! 30Ruku sungudae tumuwo silou i'i, ndai mal᷊ou nasue tutunge. Arawe Mawu Ruata kere'e kapiange nutal᷊ung manga ruku e'e. Nangilebe we si kumu. Arawe i kumu mang ta mangimang! 31Kumbahang ghumagha, bou e'e mangul᷊i, apa sarung kanengangi kite, arako apa sarung inungangi kite, arako apa sarung l᷊ohokangi kite? 32Kaul᷊iu tamai e'e sintinia iwawatukangu manga taumata ko wughangu Mawu. Kateho I Yamangu su sorga matitong i kumu ko mo kaul᷊ie e'e. 33Inau pul᷊iagha ko horo, tadeau Mawu Ruata mamarenta su puwawiahu dang pukoa ko apang kao-E. Kuteu kaul᷊ie e'e sarung i onggou Mawu Ruata l᷊ai si kumu. 34Ual᷊ingu e'e kumbahang ghumaghangu l᷊ou dol᷊ou. Watu u dol᷊ou pia kaghaghaghange sisane. Susangu silou i'i seng kapapiange, tawahal᷊uasi mborong sau tambang.”
2014 Indonesian Bible Society (Lembaga Alkitab Indonesia)
