Naanearü ügüchiga 33
33
Acóbu rü Echaú nügümaxã narüngüxmüe
1Rü yexguma Acóbu rü Echaúxü̃ nada̱u̱xgu ga yéma nax ne naxũxü̃ namaxã ga 400 ga norü duü̃xü̃gü, rü nüma ga Acóbu rü tüxü̃ nitoye ga guxema naxacügü ngĩmaxã ga Léa rü Raqué rü guxema taxre ga naxü̃taxü̃gü.
2Rü wixpe̱xewa tüxü̃ naxǘgüxẽxẽ ga naxü̃taxü̃gü tümaxacügümaxã, rü guxemagüwe ga Léa ngĩxacügümaxã. Rü Léawe ixã ga Raqué namaxã ga ngĩne ga Yúche.
3Rü nüma ga Acóbu rü norü duü̃xü̃güpe̱xegu nixũ. Rü 7 e̱xpü̱xcüna waixü̃mügu nayangücuchi ñu̱xmata naenexẽarü ngaicamana nangu.
4Natürü ga Echaú rü Acóbuca̱x niña rü nüxna nayana̱i̱xãchi rü nüxü̃ nachúxu. Rü nügümaxã naxauxe.
5Rü yemawena ga Echaú rü guxema ngexegüxü̃ rü buxegüxü̃ nadawenü rü ínaca rü ñanagürü: —¿Texégü tixĩ ya daxegü? —ñanagürü. Rü Acóbu nanangãxü̃ rü nüxü̃ ñanagürü: —Tupana rü chomaxã namecüma rü ngẽmaca̱x choxna nanamugü i ñaa chaunegü —ñanagürü.
6-7Rü yexguma ga guxema naxü̃taxü̃gü, rü ñu̱xũchi tümanegümaxã naxca̱x taxĩ rü nape̱xegu tayangücuchitanü ñu̱xmata waixü̃müanewa tayaxũcatügü. Rü ñu̱xũchi yemawena rü Léa rü ngĩnegümaxã naxca̱x iyaxũ rü yexgumarüxü̃ ta nape̱xegu nayangücuchitanü. Rü ñu̱xũchi ngĩwa inayacua̱x ga Raqué namaxã ga ngĩne ga Yúche, rü nape̱xegu ta nayangücuchitanü.
8Rü yexguma ga nüma ga Echaú rü Acóbuna naca, rü ñanagürü: —¿Tü̱xcüü̃ cha̱u̱xca̱x ngéma cunamugü i ngẽma naxü̃nagü i nüxü̃ chingauchigüxü̃? —ñanagürü. Rü Acóbu nanangãxü̃ rü nüxü̃ ñanagürü: —Rü ngéma chanamugü nax ngẽmaãcü chomaxã cutaãẽxü̃ca̱x —ñanagürü.
9Rü Echaú nanangãxü̃ rü nüxü̃ ñanagürü: —Tama, Pa Chauenexẽ, erü choma rü marü choxü̃́ nangẽxma i muxũchixü̃ma. Rü cuxrütama nixĩgü i ngẽma cuxü̃nagü —ñanagürü.
10Natürü nüma ga Acóbu rü nüxna nayaxãchigüama rü ñanagürü: —¡Taxṹ i choxü̃́ nüxü̃ cuxoxü̃, Pa Chauenexẽx! Rü ngẽxguma aixcüma chomaxã cutaãẽgu ¡rü nayaxu i ñaa chorü ãmare! Erü cuma rü meama choxü̃ cuyaxu. Rü ngẽma maxü̃́xẽ cuxü̃ nax chadauxü̃ rü ñoma Tupanaxü̃ chadauxü̃rüxü̃ nixĩ.
11-12Rü cuxü̃ chaca̱a̱xü̃ nax choxü̃́ cunayaxuxü̃ i ñaa ãmare i nua cuxca̱x changexü̃ erü Tupana rü choxü̃ namuarü ngẽmaxü̃xã̱xẽxẽ rü taxuxü̃ma choxü̃́ nataxu —ñanagürü. Rü nüma ga Acóbu rü nüxna nayaxãchigüama rü yemaca̱x ga Echaú rü düxwa nanayaxu ga yema ãmare. Rü yemawena rü ñanagürü: —¡Ngĩxã tawoegu i nua! Choma rü yoxni tá cupe̱xegu chixũ —ñanagürü.
13Rü Acóbu nanangãxü̃ rü ñanagürü nüxü̃: —Pa Chauenexẽx, cumatama nüxü̃ cucua̱x nax ngẽma buxü̃gü rü paxãma yapaexü̃. Rü ñu̱xũchi ngẽma nagu charüxĩnü nixĩ i ngẽma carnérugü, rü wocagü i íxãxacüxü̃. Erü ngẽxguma chi ñu̱xmaica namaxã ichixũxgu rü wüxichitama i ngunexü̃gu rü ngürüãchi guxü̃chima i carnérugü nayue.
14Rü name nixĩ i cuma chope̱xegu quixũ i choma nax curü ngü̃xẽẽruxü̃ nax chixĩxü̃. Erü choma rü meamare tá namaxã ichixũ i ñaa naxü̃nagü, rü ñu̱xũchi ñaa buxü̃gü i chope̱xegu ĩxü̃ ñu̱xmatáta cuxü̃tawa changu i Cheíwa —ñanagürü.
15Rü nüma ga Echaú rü ñanagürü nüxü̃: —Rü name nixĩ i ñuxre i chorü duü̃xü̃gü i chowe nua ĩxü̃ rü cuxü̃ narüngü̃xẽẽgü —ñanagürü. Natürü Acóbu nanangãxü̃ rü nüxü̃ ñanagürü: —¡Taxṹ i cha̱u̱xca̱x cuxoegaãẽxü̃! —ñanagürü.
16Rü nüma ga Echaú rü yematama ngunexü̃gu Cheíca̱x nataegu.
17Natürü nüma ga Acóbu rü Chucóxwaama naxũ rü yexma wüxi ga napata naxü. Rü ñu̱xũchi yexma nanaxü ga ñuxre ga düxenü naxca̱x ga norü naxü̃nagü. Rü yemaca̱x nixĩ ga yema nachica ga Chucóxgu naxüégaaxü̃.
18Rü Acóbu, rü yexguma Padáü̃-aráü̃anewa ne naxũxgu, rü taxuxü̃ma nüxü̃ naxüpetü rü mea Canaáü̃anewa nangu. Rü ĩane ga Chiquéü̃arü to̱xma̱xtagu naxãchiü̃.
19Rü Amóx nanegüxü̃tawa naxca̱x nataxe ga wüxi ga naane ga 100 tachinü ga diẽrugu ãtanüxü̃. Rü nüma ga Amóx rü Chiquéü̃ nanatü nixĩ. Rü nüma ga Acóbu rü yema naanegu naxãchiü̃.
20Rü ñu̱xũchi nanaxü ga wüxi ga ãmarearü guruxü̃ rü Erué-iraégu nanaxüéga.
© 2022, Wycliffe Bible Translators, Inc. All rights reserved.
