Naanearü ügüchiga 19
19
Tupana nayagu ga Chodóma rü Gomóra
1Rü yexguma marü nachütachaü̃gu rü yéma Chodómaarü ĩanewa nangugü ga yema taxre ga Tupanaarü orearü ngeruxü̃ i daxũcüã̱x. Rü guma ĩanearü ĩã̱xwa narüto ga Lox ga ngextá duü̃xü̃gü íngutaque̱xexü̃wa. Rü yexguma yema taxre ga duü̃xü̃güxü̃ nada̱u̱xgu, rü inachi ga Lox nax naya̱u̱xãxü̃ca̱x. Rü nape̱xegu waixü̃mügu nanangücuchi.
2Rü ñanagürü nüxü̃: —Pa Corigüx, rü choma nax perü duü̃xü̃ chixĩxü̃ rü pexna chaxu nax chauchiü̃gu pepegüxü̃. Rü ngéma tá pegü piyauxgücutügü, rü marü name i moxü̃ pa̱xmama ipexĩãchi —ñanagürü. Natürü nümagü rü nanangãxü̃ rü ñanagürügü: —Tamoxẽxü̃chi, rü nuxã ĩã̱xtügumare tá tapegü —ñanagürügü.
3Natürü nüma ga Lox rü nüxü̃ nica̱a̱xü̃chigüama, rü yemaca̱x ga nümagü rü düxwa naga naxĩnüe nax napatawa naxĩxü̃ca̱x. Rü yexguma ĩpatawa nangugügu, rü Lox rü norü õna ga mexü̃ namexẽxẽ. Rü paũ ga ngearü pu̱xẽẽruü̃ã́xü̃ ta naxü. Rü nümagü ga yema naxü̃tawa ngugüxü̃ rü nachibüe.
4Rü yexguma taxũta napeegu ga yema taxre, rü yéma naxĩ ga guxü̃ma ga Chodómacüã̱x ga yatügü. Rü ngextü̱xüxü̃güwa inaxügü rü ñu̱xmata iyaxü̃wa nangu. Rü nüxü̃ ínachoeguãchi ga guma Loxpata.
5Rü aita naxüeãcüma Loxna nacagüe rü ñanagürügü: —¿Ngexü̃gü nixĩ i ngẽma yatügü i ngewa̱x nua cupatawa ngugüxü̃? ¡Rü ínamuxü̃, erü namaxã tamaxẽchaü̃! —ñanagürügü.
6-7Rü yexguma ga Lox rü ínaxũxũ ga namaxã nax yadexaxü̃ natürü meama naxcha̱xwa nanawãxta ga norü ĩã̱x. Rü ñanagürü nüxü̃: —Pa Chomücügüx ¡taxṹ i ta̱xacürü chixexü̃ pexügüxü̃!
8Dücax, choma rü choxü̃́ ingẽxma i taxre i chauxacü i taguma yatüxü̃ cua̱xcü. Rü ngẽma tá pexna ngĩxü̃ chamugü nax pema penaxwa̱xexü̃ ngĩmaxã pexüxü̃ca̱x. Natürü tama chanaxwa̱xe nax ta̱xacürü chixexü̃ namaxã pexü i ñaa taxre i yatügü i nüxna chaxuxü̃ nax nua chopatawa nangugüxü̃ —ñanagürü.
9Rü yexguma ga nümagü rü Loxü̃ nangãxü̃ga rü ñanagürügü: —¡Ixũgachi i ngéma! ¿Rü ñuxãcü i cuma nax to i nachixü̃anecüã̱x quixĩxü̃ rü nua toxü̃ cuyamuchaü̃xü̃? Rü ñu̱xma rü ngẽma taxre i nua toxna quinuxuxü̃arü yexera tá cumaxã taxü —ñanagürügü. Rü yexguma rü Loxna nayu̱xgu nax ĩã̱xgu napogüexü̃ca̱x.
10Natürü nümagü ga yema taxre ga daxũcüã̱x ga Loxpatawa ngugüxü̃ rü nachiü̃gu nanayauxcuchigü, rü ñu̱xũchi nanawãxta ga ĩã̱x.
11Rü nayangexetügüxẽxẽ ga guxü̃ma ga yema duü̃xü̃gü ga ĩã̱xtüwa yexmagüxü̃, rü yema ingextü̱xüxü̃wa inaxügü ñu̱xmata yema iyaxü̃wa nangu. Rü yemaacü düxwa nipaemare ga nax ĩã̱xca̱x nadaugüxü̃.
12Rü yexguma ga yema taxre ga orearü ngeruxü̃ i daxũcüã̱x rü Loxna nacagüe rü ñanagürügü: —¿Nangemaxü̃ i togü i cutanüxü̃ i núma daa ĩanewa? Rü ngẽxguma chi nangẽxmagu ya cunegü, rüe̱xna cuxacügü, rüe̱xna cuxã̱xtegü rü ¡ínagaxü̃ i nua wüxigu namaxã i guxü̃ma i ta̱xacü i cuxü̃́ ngẽxmaxü̃ ya daa ĩanewa, rü yáxü̃wa namaxã naxũ!
13Erü tá tayagu ya daa ĩane. Erü Cori ya Tupana rü marü tama yáxna namaxã naxĩnü i ñaa duü̃xü̃gü i daa ĩanewa maxẽxü̃, rü ngẽmaca̱x toxü̃ namu nax tayaguxü̃ca̱x —ñanagürügü.
14Rü yexguma ga Lox rü naxü̃tawa naxũ ga yema naxã̱xtegüchaü̃ ixĩgüxü̃ rü ñanagürü nüxü̃: —¡Ipechigü rü ípechoxü̃ i nua! Erü Cori ya Tupana rü tá nayagu ya daa ĩane —ñanagürü. Natürü ga yema naxã̱xtegüchaü̃ ixĩgüxü̃ rü tama aixcüma nayaxõgü ga yema namaxã nüxü̃ yaxuxü̃.
15Rü yema marü nax yangunechaü̃xü̃, rü Loxü̃ napaxagü ga yema taxre ga daxũcüã̱x i orearü ngeruü̃gü. Rü ñanagürügü: —¡Paxãma, inachi rü tüxü̃ iga ya cuxma̱x rü ngẽma taxre i cuxacügü ega cumaxchaü̃gu ngẽxguma tayaguxgu ya daa ĩane! —ñanagürügü.
16Natürü ga Lox rü nanuxcüãxẽ, rü yemaca̱x ga yema taxre ga daxũcüã̱x i orearü ngeruü̃gü rü naxme̱x nayayauxãchigü rü namaxã nixü, yerü Cori ya Tupanaaxü̃́ nangechaü̃tümüxü̃. Rü yexgumarüxü̃ ta ga guxema naxma̱x rü naxacügü rü tüxü̃ ínamuxü̃ ga guma ĩanewa nax tama tayuexü̃ca̱x.
17Rü yexguma marü guma ĩanearü yáxü̃wa nayexmagügu, rü wüxi ga yema daxũcüã̱x i orearü ngeruxü̃ rü ñanagürü: —¡Iña nax tama peyuexü̃ca̱x! ¡Rü taxũtáma cugü íquidau rü taxuca̱xtama icuyachiãchi i nua! ¡Rü yea ma̱xpǘneanewa naña ega tama cuyuxchaü̃gu! —ñanagürü.
18Natürü nüma ga Lox rü ñanagürü: —Dücax, Pa Chorü Corigüx, tama chanaxwa̱xe nax ngéma choxü̃ pemu.
19Pema rü marü taxü̃ma i ngü̃xẽxẽ choxü̃́ pexü, rü poraãcüma chomaxã pemecümagü rü pegagu nixĩ i chamaxü̃xü̃. Natürü pemaxã nüxü̃ chixu rü choma rü taxucürüwa máxpü̱xanexü̃wa chaña, erü ngẽxguma chi ngéma chañaxgu rü ngẽma üxüema rü namagu chitama choxna nanguema rü ngẽxma chi chayu.
20Rü nuaarü ngaixcamana nangẽxma ya wüxi ya ĩanexacü nax nawa chañaxü̃. ¡Rü yima ĩanewa choxü̃ pemu nax ngẽmaãcü chamaxü̃xü̃ca̱x! Rü yima ĩane rü aixcüma wüxi ya ĩane ya íxrane nixĩ —ñanagürü.
21-22Rü yexguma wüxi ga yema Tupanaarü orearü uruxü̃ ga daxũcüã̱x rü ñanagürü nüxü̃: —Marü cuxü̃́ chaxĩnü i ngẽma chomaxã nüxü̃ quixuxü̃ rü tá chanaxü i ngẽma choxna naxca̱x cucaxü̃. Rü taxũtáma chayagu ya yima ĩanexacü ya chomaxã nüxü̃ quixuxü̃ne. ¡Natürü paxa inaxũãchi nax yima ĩanexacüwa cuxũxü̃! Erü naxü̃pa nax yima ĩanexacüwa nax cunguxü̃ rü taxucürüwama chayagu ya yima ĩane ya Chodóma —ñanagürü. Rü Lox nawa maxü̃ne rü Chóagu naxãégaxü̃.
23-24Rü yexguma marü yangóonegu rü Lox guma ĩanexacü ga Chóawa nanguxgu, rü nüma ga Cori ya Tupana rü Chodómaétügu rü Gomóraétügu üxüema ga achúfremaxã ãéü̃xü̃ narüyixẽxẽ.
25Rü yemaacü ínanagu ga guma ĩanegü wüxigu namaxã ga guxü̃ma ga duü̃xü̃gü ga yéma maxẽxü̃ rü yema nanetügü ga yéma rüxügüxü̃.
26Natürü guxema naxma̱x ga Lox ga naweama ne ñaxe, rü tügü ítidau rü yexgumatama yuxcüranaxca̱x ga duü̃xü̃chicüna̱xã tixĩ.
27-28Rü moxü̃ãcü pa̱xmama rü nüma ga Abraáü̃ rü wenaxarü nawa naxũ ga yema nachica ga Cori ya Tupanamaxã íyadexaxü̃. Rü nagu nadawenü ga guxü̃ma ga yema doonexü̃ ga guma ĩanegü ga Chodóma rü Gomóra nawa yexmagüne. Rü guxü̃wama ga yema naanewa üxüema yéma nacaixnagü, ñoma wüxi ga naane iguxü̃ caixnagüxü̃rüxü̃.
29Rü yemaacü nixĩ ga Cori ya Tupana ga ínaguaxü̃ ga guma ĩanegü ga Lox nagu ãpatane ga doonexü̃wa yexmagüne. Natürü nüma ga Cori ya Tupana rü Abraáü̃na nacua̱xãchi rü Loxü̃ ínagaxüchi ga yema nachica ga yaguxü̃wa.
Nangóe ga Moátanüxü̃ rü Amóü̃tanüxü̃
30Rü yemawena ga Lox rü namuü̃ nax ĩane ga Chóawa nayexmaxü̃. Rü yemaca̱x yema taxre ga naxacügümaxã ma̱xpǘneanexü̃wa naxũ. Rü yema tomaepü̱x rü wüxi ga ãxmaxü̃wa nayexmagü.
31-32Rü wüxi ga ngunexü̃gu ga Loxacü ga rüyamaecü, rü ngĩeya̱x ga rübumaecümaxã ngĩgürügü: —Tanatü rü marü taya rü nua ñaa nachica i nawa íngẽxmagüxü̃wa rü nataxuma ya yatü ya tamaxã ãma̱xchaü̃cü, ngẽma guxü̃ma i duü̃xü̃gü üxü̃rüxü̃. Rü ngẽmaca̱x ¡ngĩxã rü tanatüxü̃ tangãxẽxẽ nax ngẽmaãcü tüxü̃́ natauxchaxü̃ca̱x nax tanatümaxã ipegüxü̃ nax ngẽmaãcü tanatüaxü̃́ ixãxacügüxü̃ca̱x! —ngĩgürügü.
33Rü yema chütaxü̃gutama rü ngĩnatüxü̃ bínumaxã ingãxẽẽgü rü yema rüyamaecü rü ngĩnatümaxã ipe. Natürü ga ngĩnatü rü tama nüxü̃ nacua̱x nax ñuxguacü yixĩxü̃ ga yema naxacü namaxã ipexü̃, rü tama nüxü̃ nacua̱x ga yexguma pewa ínadaxgu.
34Rü moxü̃ãcü pa̱xmama ga yema naxacü ga rüyamaecü rü ngĩeya̱x ga rübumaecümaxã ngĩgürügü: —Dücax, ngexwa̱xarü chütaxü̃gu i choma rü marü tanatümaxã ichape, rü ngẽmaca̱x ñaa chütaxü̃gu rü name nixĩ i wena tanatüxü̃ tangãxẽxẽ nax ngẽmaãcü cuxí tanatümaxã icupexü̃ca̱x nax ngẽmaãcü yixema i taxre rü wüxigu tanatüaxü̃́ ixãxacügüxü̃ca̱x —ngĩgürügü.
35Rü yema chütaxü̃gu rü wenaxarü nanatüxü̃ bínumaxã nangãxẽẽgü. Rü yema rübumaecü rü ngĩxí ngĩnatümaxã ipe. Natürü ga ngĩnatü rü tama nüxü̃ nacua̱x nax ñuxguacü yixĩxü̃ ga yema naxacü namaxã ipexü̃, rü tama nüxü̃ nacua̱x ga yexguma pewa ínadaxgu.
36Rü yemaacü ga yema taxre ga Loxacü rü íyaxãxacü ngĩnatüaxü̃́tama.
37Rü yema rüyamaecü rü iyatüne, rü Moágu inaxüéga ga ngĩne. Rü gumáwa nixĩ ga ne naxĩxü̃ i ngẽma ñu̱xmax Moátanüxü̃ ixĩgüxü̃.
38Rü yexgumarüxü̃ ta ga yema rübumaecü rü ta iyatüne rü Ben-amígu inaxüéga ga ngĩne. Rü gumáwa nixĩ ga ne naxĩxü̃ i ngẽma ñu̱xmax Amóü̃tanüxü̃ ixĩgüxü̃.
© 2022, Wycliffe Bible Translators, Inc. All rights reserved.
