Naanearü ügüchiga 18
18
Tupana rü Abraáü̃maxã inaxuneta rü tá nüxü̃́ nangẽxma ya wüxi ya nane
1Rü wüxi ga ngunexü̃gu meama tocuchigu rü Cori ya Tupana rü Abraáü̃ca̱x nango̱x ga Mamréarü castañanecüwa ga yexguma napataa̱xwa natoyane ga Abraáü̃.
2Rü nadaunagü ga Abraáü̃ rü nüxü̃ nadau ga tomaepü̱x ga duü̃xü̃ ga nape̱xegu chigüxü̃. Rü yexguma ga nüma rü inachi rü paxa naxca̱x nixũ rü nape̱xegu waixü̃mügu nanangücuchi.
3Rü ñanagürü: —Pa Corix, cuxü̃ chaca̱a̱xü̃ rü taxṹ i yaxtacüma íquixũxü̃.
4Rü ngẽxguma cuxü̃́ namexgu rü tá íxraxü̃ i dexáca̱x íchaca nax pegü piyauxgücutügüxü̃ca̱x. ¡Rü nua castañapechitagu paxaãchi perüngü̃gü!
5Rü ñu̱xma nax nua chopatawa pengugüxü̃, rü tá pexü̃ chachibüexẽxẽ nax ngẽmaãcü peporaexü̃ca̱x i namawa ega ipexĩxgu —ñanagürü. Rü nümagü nanangãxü̃: —Marü name —ñanagürügü.
6Rü yexguma ga Abraáü̃ rü napatagu nangaxi rü naxma̱x ga Cháraxü̃ ñanagürü: —¡Paxa, Pa Nge, rü 20 i quíru i mexẽchixü̃ i arína ta nayaxu, rü paũ ta naxü! —ñanagürü.
7Rü ñu̱xũchi ga Abraáü̃ rü wocapǘxü̃wa naña. Rü naxca̱x nadau ga yema rümemaexü̃ ga wocaxacü. Rü wüxi ga norü puracütanüxü̃xü̃ namu, rü nüma rü paxa nanaxü ga yema õna.
8Rü yexgumarüxü̃ ta ga Abraáü̃ rü yema duü̃xü̃gü ga naxü̃tawa ngugüxü̃na nanaxã ga quechu rü lechi. Rü nüma rü ínamemare ga nüxna nax naxããxü̃ ga ta̱xacü ga nanaxwa̱xegüxü̃ ga yexguma castañatüü̃wa nachibüeyane.
9Rü yexguma marü yangugügu ga nax nachibüexü̃, rü Abraáü̃na nacagüe rü ñanagürügü: —¿Ngecü iyixĩ i cuxma̱x i Chára? —ñanagürügü. Rü nüma nanangãxü̃: —Ngẽã chauchiü̃wa ingẽxma —ñanagürü.
10Rü yexguma ga wüxi ga yema naxü̃tawa ngugüxü̃ rü ñanagürü: —Nai ya taunecügu rü wena cuxü̃tagu tá chanaxũane, rü ngẽxguma i cuxma̱x i Chára rü tá marü ixíraxacü —ñanagürü. Rü ngĩma ga Chára rü yoxni bexma nüxü̃ ixĩnü ga yemaacü nax yadexaxü̃, yerü ngĩma rü bexma Abraáü̃ca̱xwegu ichi ga ĩã̱xwa.
11Natürü ga nüma ga Abraáü̃ rü naxma̱x ga Chára rü marü nayae. Rü ngĩma ga Chára rü marü ngĩxna inayarüxo ga nax nachixewexü̃.
12Rü yemaca̱x ga Chára rü tama yáxna namaxã ixĩnü ga nax nacugüxü̃, yerü ñaxü̃gu irüxĩnü: —¿Ñuxãcü tá ichaxãxacüxü̃ erü choma rü chaute rü marü tayaexüchi? —ñaxü̃gu irüxĩnü ga ngĩãẽwa.
13Natürü nüma ga Cori ya Tupana rü Abraáü̃xü̃ ñanagürü: —¿Tü̱xcüü̃ ngĩxü̃́ naxãũchiga i Chára? ¿Ẽ̱xna tama iyaxõ rü tá nax naxãxacüxü̃ i woo nax nayaxüchichirexü̃?
14¿Ẽ̱xna nangẽxma i ta̱xacü i Cori ya Tupanaaxü̃́ guxchaxü̃ nax naxüaxü̃? Rü nai ya taunecügu rü aixcüma tá nuxã cuxü̃tagu chanaxũane. Rü ngẽxguma i Chára rü tá marü ixíraxacü —ñanagürü.
15Natürü ga Chára rü yemaxü̃ naxĩnügu rü imuü̃ rü iyaxãxchaü̃ nax ngĩxü̃́ naxãũchigaxü̃. Rü yemaca̱x ngĩgürügü: —Tama nixĩ i chacugüchirexü̃ —ngĩgürügü. Natürü nüma ga Cori rü ngĩxü̃ nangãxü̃ rü ñanagürü: —Ngẽmáacüx, nüxü̃ chacua̱xama nax cucugüxü̃ —ñanagürü ngĩxü̃.
Abraáü̃ rü Tupanana nachogü nax tama napoxcuãxü̃ca̱x ga guma ĩane ga Chodóma
16Rü yexguma ga yema duü̃xü̃gü ga Abraáü̃xü̃tawa ngugüxü̃, rü inachigü rü inaxĩãchi ga Chodómawaama nax naxĩxü̃. Rü Abraáü̃ rü paxaãchi ínayaxümücü.
17Rü yexguma ga Cori ya Tupana rü ñaxü̃gu narüxĩnü: “Name nixĩ i Abraáü̃maxã nüxü̃ chixu i ngẽma tá chaxüxü̃.
18Erü nüma tá nixĩ i norü o̱xi i wüxi i nachixü̃ane i taxü̃ rü poraxü̃. Rü marü namaxã chanaxuegu nax nagagu tá nüxü̃ charüngü̃xẽẽxü̃ i guxü̃táma i nachixü̃anegü i ñoma i naanewa ngẽxmagüxü̃.
19Rü chomatama marü chanayaxu nax nanegümaxã rü nataagümaxã nüxü̃ yaxuxü̃ca̱x i ngẽma chorü mugü nax nümagü i nataagü naga naxĩnüexü̃ca̱x, rü mexü̃ naxügüxü̃ca̱x nax ngẽmaãcü choma chayanguxẽẽxü̃ca̱x i guxü̃ma ga yema namaxã nüxü̃ chixuxü̃”, ñaxü̃gu narüxĩnü ga Tupana.
20Rü yemaca̱x ga Cori ya Tupana rü Abraáü̃xü̃ ñanagürü: —Ngẽma duü̃xü̃gü i Chodómacüã̱x rü Gomóracüã̱x, rü nüxü̃ chaxĩnü i nachiga nax nachixexüchixü̃ rü poraãcü pecadu naxügüxü̃.
21Rü ngẽmaca̱x tá ngéma chaxũ nax íchayadauxü̃ca̱x rü aixcüma yixĩ i poraãcü chixexü̃ naxügüxü̃ ngẽma chomaxã nüxü̃ yaxugüexü̃rüxü̃, rü ngẽmaãcü tá nüxü̃ chacua̱x —ñanagürü.
22Rü taxre ga yema duü̃xü̃gü rü yoxni inaxĩ nax Chodómawa naxĩxü̃ca̱x. Natürü ga Abraáü̃ rü Cori ya Tupanamaxã yexma nayachiãchitanü.
23Rü nüma ga Abraáü̃ rü Cori ya Tupanaca̱x nixũ rü nüxna naca rü ñanagürü: —¿Cunada̱i̱xü̃ tá ta i ngẽma duü̃xü̃gü i mea maxẽxü̃ wüxigu namaxã i ngẽma chixexü̃ ügüxü̃?
24Rü ngẽxguma chi nangẽxmagu i 50 i duü̃xü̃gü i mea maxẽxü̃ nawa ya yima ĩane ¿rü chi cunadaiamaxü̃ rü taxũchima nüxü̃ cungechaü̃xü̃ i ngẽma ĩanecüã̱x nagagu i ngẽma 50 i duü̃xü̃gü i mea maxẽxü̃?
25Cha̱u̱xca̱x rü tama name nax cunada̱i̱xü̃ i ngẽma mea maxẽxü̃ i duü̃xü̃gü wüxigu namaxã i ngẽma chixexü̃ ügüxü̃, ñoma chi guxü̃ma naxügüxü̃rüxü̃ i ngẽma chixexü̃. Rü taxucürüwama ngẽma cuxü erü tama ngẽmagu curüxĩnü. Rü cuma nixĩ i guxãarü maxü̃maxã icucuáxü̃ ¿rü tama ẽ̱xna i ngẽma mea maxẽxü̃gagu nüxü̃ icurüngümaxü̃ nax cunadaiãcuxü̃ ya yima ĩane? —ñanagürü.
26Rü yexguma ga Cori ya Tupana rü Abraáü̃xü̃ nangãxü̃ rü ñanagürü: —Ngẽxguma chi yima Chodómaarü ĩanewa nüxü̃ ichayangauxgu i 50 i duü̃xü̃gü i mea maxẽxü̃, rü ngẽmagagu taxũtáma chanapoxcue i ngẽma ĩanecüã̱x —ñanagürü.
27Natürü nüma ga Abraáü̃ rü wenaxarü nüxna nacaama rü ñanagürü nüxü̃: —¡Choxü̃ nangechaü̃ nax cuxna chicachigüamaxü̃! Erü cuma rü Tupana quixĩ rü choma rü wüxi i duü̃xü̃mare chixĩ.
28Natürü ngẽxguma chi tama mea yanguxgu i 50 wa nax nanguxü̃ i ngẽma duü̃xü̃gü i mea maxẽxü̃, rü chi 45 icatama i mexü̃ i duü̃xü̃gü ngẽxmagu ¿rü ngẽma nax tama mea 50 wa nanguxü̃ca̱x rü tá cunapoxcuxü̃ ya yima ĩane? —ñanagürü. Rü Cori ya Tupana nanangãxü̃ rü ñanagürü: —Ngẽxguma chi 45 i duü̃xü̃gü i mea maxẽxü̃ ngéma ichayangauxgu, rü taxũtáma chanapoxcu —ñanagürü.
29Natürü ga Abraáü̃ rü wenaxarü nüxna nacaama rü ñanagürü: —¿Natürü ngẽxguma chi 40 icatama ngẽxmagu? —ñanagürü. Rü nüma ga Cori rü nanangãxü̃ rü ñanagürü: —Ngẽma 40 ca̱x rü taxũtáma chanapoxcue —ñanagürü.
30Natürü ga Abraáü̃ rü wenaxarü Tupanana nicachigü rü ñanagürü nüxü̃: —Cuxü̃ chaca̱a̱xü̃ nax tama chomaxã cunuxü̃ca̱x naxca̱x i ngẽma nax yexü̃cürü cuxü̃ chachixewexü̃ ¿natürü ngẽxguma chi 30 icatama ngẽxmagu? —ñanagürü. Rü nüma ga Cori ya Tupana nanangãxü̃ rü ñanagürü: —Woo 30 i duü̃xü̃gü i mexü̃ ngẽxmagu rü taxũtáma chanapoxcu —ñanagürü.
31Natürü ga Abraáü̃ rü nüxü̃ nica̱a̱xü̃chigüama, rü ñanagürü: —Pa Corix, marü changupetüxüchiama nax cuxü̃ chaca̱a̱xü̃ ¿natürü ngẽxguma chi 20 icatama i duü̃xü̃gü i mea maxẽxü̃ ngẽxmagu? —ñanagürü. Rü nüma ga Cori ya Tupana nanangãxü̃ rü ñanagürü: —Ngẽma 20 i mea maxẽxü̃gagu rü taxũtáma chanapoxcu ya yima ĩane —ñanagürü.
32Natürü ga Abraáü̃ rü wena nüxna nacaama rü ñanagürü: —Pa Corix ¡taxṹ i chomaxã cunuxü̃! Ñuxica wena cuxna chacaxchaü̃, rü ngẽmawena rü marü taxũtáma cuxü̃ chachixewe. ¿Rü ta̱xacü chi cuxüxü̃ i ngẽxguma 10 icatama i duü̃xü̃gü i mea maxẽxü̃ ngẽxmagügu? —ñanagürü. Rü nüma ga Cori ya Tupana rü ñanagürü: —Ngẽma 10 gagu rü taxũtáma chanapoxcu ya yima ĩane —ñanagürü.
33Rü yexguma marü Cori ya Tupana nüxü̃ rüchauxgu ga Abraáü̃maxã nax yadexaxü̃ rü ínixũ. Rü nüma ga Abraáü̃ rü napataca̱x nataegu.
© 2022, Wycliffe Bible Translators, Inc. All rights reserved.
