GENESISE 16
16
Hagare le Išemaele
1Jaana Sarai, mosadi wa ga Aberame, a bo a sa bone bana nae; a bo a na le lelata, e le Moegepeto, leina la gagwe go twe, Hagare. 2Sarai a raya Aberame a re: “Bona jaana, Jehofa o ntlhokisitse go bona bana; ke a go rapela, ya kwa lelateng la me, e tle e re gongwe ke bone bana ka ene.” Aberame a reetsa lentswe la ga Sarai. 3Sarai, mosadi wa ga Aberame, a tsaya Hagare wa Moegepeto, lelata la gagwe, a mo naya Aberame monna wa gagwe, gore e nne mosadi wa gagwe. E ne e le morago ga Aberame a sena go aga dinyaga di le lesome mo lefatsheng la Kanana. 4A ya kwa go Hagare, a nna moimana; o rile a ipona a le moimana, a ikgodisa a simolola go nyatsa mohumagadi wa gagwe.
5Sarai a raya Aberame a re: “Ke molato wa gago gore tiro e e sa siamang e, e ntirafalele. Ke isitse lelata la me mo sehubeng sa gago; o rile a ipona a imile a nnyatsa. A Jehofa a atlhole fa gare ga me le wena.”
6Aberame a raya Sarai a re: “Bona, lelata la gago le mo seatleng sa gago; mo dire se se molemo mo matlhong a gago.” Sarai a mo direla ka bopeloethata; a tshaba sefatlhogo sa gagwe.
7Moengele wa ga Jehofa a mo fitlhela fa motsweding wa metsi mo nageng, fa motsweding o o mo tseleng e e yang Shure. 8A re: “Hagare, lelata la ga Sarai, o tswa kae? Mme o ya kae?”
A re: “Ke tshaba sefatlhogo sa mohumagadi wa me, Sarai.”
9Moengele wa ga Jehofa a mo raya a re: “Boela kwa mohumagading wa gago, o ineele mo seatleng sa gagwe.” 10Moengele a ba a mo raya a re: “Ke tlaa ntsifatsa losika lwa gago thatathata, lo ba lo tla lo retela go balwa ke bontsi.” 11Moengele wa ga Jehofa a mo raya a re:
“Bona, o moimana jaana,
o tlaa bona ngwana wa mosimane;
o tlaa raya ngwana leina o re: ‘Išemaele’,
ka gobo Jehofa o utlwile patikego ya gago.
12“Ene o tlaa nna jaaka esela ya naga mo bathong; o tlaa lwantsha motho mongwe le mongwe; le motho mongwe le mongwe o tlaa mo lwantsha. O tlaa aga a lebaganye le bana botlhe ba ga rraagwe.”
13A raya Jehofa yo o buileng nae leina, a re: “O Modimo o o bonang;” gonne a re: “A ntsaana ke bonye fano ene yo o mponang?” 14Ke gone ka moo sediba sa bidiwa Beere-lahai-roi (ke go re: “Sediba sa Motshedi yo o mponang”). Bonang, se fa gare ga Kateše le Berete.
15 Hagare a bona ngwana wa mosimane le Aberame. Aberame a raya leina la ga morwawe yo Hagare a mmonyeng a re, Išemaele. 16Aberame a bo a le dinyaga di le 86 fa Hagare a bona Išemaele nae.
© Bible Society of South Africa 1992. Used with permission. All rights reserved.
