GENESISE 14
14
Aberame o golola Lote
1Ga dirala e rile mo metlheng ya ga Amerafele kgosi ya Shinare, le Arioke kgosi ya Elasare, le Ketorelaomere kgosi ya Elame, le Titale kgosi ya Goime, 2ba tsosa ntwa le Bera kgosi ya Sotoma, le Bireša kgosi ya Gomora, le Shinabe kgosi ya Atema, le Shemebere kgosi ya Seboime, le kgosi ya Bela, ke go re Soare. 3Ba botlhe ba kopanela mo mokgatšheng wa Sidime, fa jaanong go bidiwang Lewatle la Letswai. 4Ba direla Ketorelaomere ka dinyaga di le 12; ka ngwaga wa motso wa boraro ba mo tsogologela. 5Ka ngwaga wa lesome le bone, ga tla Ketorelaomere, le dikgosi tse a nang natso, ba kgemetha Barefaime mo Ašeterothe-Karenaime, le Basusime mo Hame, le Baemime mo Shafe-Kiriathaime. 6Le Bahore mo Seire, thaba ya bone, go fitlha kwa Eleparane, yo o bapileng le sekaka. 7Ba sokologa, ba fitlha kwa Enamišepate ke go re Kateše, ba kgemetha lefatshe lotlhe la Baamaleke, le la Baamore ba ba neng ba agile mo Hasasone-tamare.
8Ga bolola kgosi ya Sotoma, le kgosi ya Gomora, le kgosi ya Atema, le kgosi ya Seboime, le kgosi ya Bela, ke go re Soare; ba ba abela ntwa mo mokgatšheng wa Sidime. 9Ba e abela Ketorelaomere kgosi ya Elame, le Titale kgosi ya Goime, le Amerafele kgosi ya Shinare, le Arioke kgosi ya Elasare; dikgosi di le nne di tlhabana le tse tlhano. 10Jaana mokgatšha wa Sidime wa bo o tletse didiba tsa bitumena; mme kgosi tsa Sotoma le Gomora tsa sia, tsa wela mo didibeng, ba ba falotseng ba tshabela kwa thabeng. 11Ba thopa dithoto tsotlhe tsa Sotoma le Gomora, le dijo tsotlhe tsa bone, ba tsamaya. 12Ba tshwara Lote, morwa monnaa Aberame, yo o agileng mo Sotoma, le dithoto tsa gagwe, ba tsamaya.
13Ga tla mongwe yo o falotseng, a bolelela Aberame wa Mohebere: jaana ene a bo a agile fa maokeng a ga Mamere wa Moamore, morwa rraagwe Ešekole, le morwa rraagwe Anere; bao ya bo e le bathusanyi le Aberame. 14E rile Aberame a utlwa fa monnawe a tshwerwe, a bolotsa banna ba gagwe ba ba rutegileng, ba ba tsaletsweng mo ntlong ya gagwe ba le 318, a ba latelela go ya go fitlha kwa Dane. 15A ba ikabela bosigo, ene le batlhanka ba gagwe, a ba kgemetha, a ba letelela go fitlha kwa Hoba, o o potileng Damaseko ka fa ntlheng ya la molema. 16A busa dithoto tsotlhe, le gone a ba a busa Lote, monnawe, le dithoto tsa gagwe, le basadi, le batho.
Melekiseteke o segofatsa Aberame
17Kgosi ya Sotoma ya tswa, ya ya go mo kgatlhantsha a sena go boa kwa polaong ya ga Ketorelaomere, le dikgosi tse a neng a na natso, kwa mokgatšheng wa Shafe, ke gore, Mokgatšha wa Kgosi. 18 Melekiseteke kgosi ya Saleme a tswa a tshotse senkgwe le bojalwa jwa mofine; a bo a le moperesiti wa Modimo Mogodimodimo. 19A mo segofatsa; a re: “A go segofadiwe Aberame ke Modimo Mogodimodimo, Mong wa legodimo le lefatshe. 20A go bakwe Modimo Mogodimodimo, o o tsentseng baba ba gago mo seatleng sa gago.” Mme a mo naya sabosome sa tsotlhe.
21Kgosi ya Sotoma ya raya Aberame ya re: “Nnaya batho, wena o tseye dithoto.”
22Aberame a raya kgosi ya Sotoma a re: “Seatla sa me ke se tsholeleditse Jehofa Modimo Mogodimodimo, Morui wa legodimo le lefatshe. 23Ka re ga nketla ka tsaya tlhale, le fa e le kgole ya setlhako, le fa e le sepe se e leng sa gago, e se re gongwe wa re: ‘Ke humisitse Aberame.’ 24Fa e se se makau a se jeleng, le kabelo ya batho ba ke tsamaileng nabo, e bong Anere le Ešekole le Mamere, bao a ba tseye kabelo ya bone.”
© Bible Society of South Africa 1992. Used with permission. All rights reserved.
