LUKA 24
24
Okoboka kwa Yeso
(Mat 28:1–10; Mar 16:1–8; Yoh 20:1–10)
1Korende rituko rie ritang’ani ri’echuma, kobogokiamoka, abakungu baria bakagenda ase oboina, bakaira amanukato aria, ayababegete ang’e. 2Bakanyora rigena riria riatigerigwe korwa ase oboina, 3korende ekero basoa, tibanyora omobere bw’Omonene Yeso. 4Ekero baichanete ase aya, rora, abanto babere bagatenena ang’e asebare, beboyetie chianga chikomeka‐meka. 5Abakungu baria bagasogwa nomoondoko, bagatung’ama inse. Abanto baria bakabatebia, “Nase ki mokorigia oyore moyo ase ebitondo? [Tari aa, korende obokire.] 6Inyora buna abatebetie ekero arenge Galili, 7ng’a nemogwenerete Omwana‐o‐mwanyabanto abekwe ase amaboko ’abanto abanyene ebibe, na kobambwa, na ase rituko ria gatato naboke.”
8Bakainyora amang’ana aye. 9Bakairana korwa ase oboina, bagatebia baria ikomi nomo na baria abande bonsi amang’ana ayio onsi. 10Na baria batebetie abatomwa amang’ana aya nabwo aba: Mariamu Magidalena, na Yoana, na Mariamu ng’ina Yakobo na abakungu bande abarenge amo nabarabwo. 11Amang’ana abo akarorekana koba ng’a naya bosa asebare, gose tibayancha. [ 12Korende Petero akaimoka, akagenda bwango ase oboina, agatung’ama, akarigereria ime, akarora ebitambaa biria bireo bioka, akairana bwoye, okumetie ase aya akorekire.]
Yeso okororekana ase enchera ekogenda Emau
(Mar 16:12–13)
13Rituko riria babere asebare nkogenda baare ase omochie okorokwa Emau, orenge oboare korwa Yerusalemu ang’e chimaeli isano na isato. 14Na barabwo ngokwana baare barabwo ase barabwo igoro ase aya onsi akorekire. 15Kabagokwana na koborania, Yeso omonyene agaika ang’e, akagenda amo nabarabwo. 16Amaiso abo agatubwa, tibanyara komomanya. 17Akababoria, “Mang’ana ki aya mokoborania ase orogendo rwaino?”
Bagatenena, baichanete. 18Oyomo obo, erieta riaye Kiliopa, akamoiraneria, “Inee! Naye bweka ore omogeni ase Yerusalemu, otamanyeti ayare ime yaye amatuko aya?”
19Akababoria, “Mang’ana ki?”
Bakamotebia, “Amang’ana a Yeso Omonazareti, oyorenge omobani, omonyene chinguru ase ogokora na ase ring’ana, ase obosio bwa Nyasae, na ase abanto bonsi; 20na buna abakuani na abanene baito bamoruete ase ekina ki’ogokwa, bakamobamba. 21Korende intwe iga twasemeretie ng’a nere oraboorie Abaisraeli. Kobua aya onsi, rero nerituko ria gatato korwa ekero ayio akorekanete. 22Naende abakungu bande ba seito nigo batoichanetie. Abwo barenge ase oboina mambia, 23na ekero batanyorete omobere oye, bakairana, bakabora ng’a baorokeirwe nabamalaika ababatebetie ng’a moyo are. 24Naende abande abarenge amo naintwe bakagenda ase oboina, bakarora buna abakungu batebete, korende ere tibamorora.”
25Ere akabatebia, “Inwe abanto abariri, nabanyene chinkoro chinyoro ase okwegena onsi aya ababani batebete. 26Inee! Tiyamogwenerete Kristo konyora emechando eye ritang’ani atarasoa ase obonene bwaye?” 27Agachakera korwa Musa na ababani bonsi akabatebereria korwa ase amariko onsi amang’ana arikire igoro yaye.
28Bagaika omochie oria ase baare kogenda, na ere agekora buna nigo arigetie kobaetania. 29Bakamosorora, bakabora, “Kabe amo naintwe, ekiagera bwairire, na omobaso oerire bono.”
Agasoa koba amo nabarabwo. 30Ekero aikaransire amo nabarabwo koragera, akabogoria omogati, akayosesenia, akayosamunyora, akabaa. 31Erio amaiso abo akaramokigwa, bakamomanya; na agwo kegima agasira, tarorekana asebare. 32Bakaborania, “Inee! Emioyo yaito tiyarenge gwoka ekero aba ngokwana are naintwe inchera na gotworokereria amariko?” 33Bakaimoka ensa eria eria, bakairana Yerusalemu, bakanyora baria ikomi nomo basangererekanete, na baria abarenge amo nabarabwo, 34bakabora, “Ekeene, Omonene obokire, oorokeire Simion.” 35Na barabwo bakabatebia aya akoreka inchera, buna emanyekania asebare ase ogosamunyora omogati.
Yeso okoorokera abatomwa
(Mat 28:16–20; Mar 16:14–18; Yoh 20:19–23)
36Ekero baare gokwana iga, Yeso omonyene agatenena egati yabo, akabatebia, “Omorembe obe asemore!”
37Bakegosa, bagasogwa nomoondoko, bagakaga ng’a nerirengari barorire. 38Akabatebia, “Inaki mogoichana? Naende inaki ogosiereria kwaimokire ase chinkoro chiaino? 39Rora amaboko aane na amagoro aane, ng’a ninche omonyene; mbwata‐bwate, morore, ekiagera rirengari tiriri nomobere na amauga buna mondoche inche inde naro.” [
40Ekero akoorire gokwana aya akaborokia amaboko aye na amagoro aye.] 41Ekero bataregena ase engencho y’omogoko, na ogokumia, akababoria, “More na gento mokoria aa?”
42Bakamoa egesamunye gi’enswe gesambire na obooke boke. 43Akabibogoria, akabiria ase amaiso abo.
44Akabatebia, “Aya naro amang’ana aane nare kona‐kobatebia ekero narenge amo nainwe, buna onsi agwenerete goikeranigwa, ayarigetwe igoro yane ase amachiko a Musa, na ase ababani, na ase Zaburi.” 45Erio akaigora chinkoro chiabo, banyare komanya amariko. 46Akabatebia, “Naboigo yarigetwe ng’a nemogwenerete Kristo gochandwa, na koboka korwa ase abakure ase rituko ria gatato; 47na ebisaku bionsi mbiranderigwe ase erieta riaye okoonchoka na okorusigwa kw’ebibe, gochakera Yerusalemu. 48Inwe mbirori b’amang’ana aya. 49Rigereria, nintome asemore aya Tata abarierete eira, korende ikaransa ase omochie oyo Yerusalemu goika mobekwe chinguru chikorwa igoro.”
Yeso okogenda igoro
(Mar 16:19–20)
50Akabatang’ana gochia isiko goika Bethania; akaimokia amaboko aye, akabasesenia. 51Kabasesenirie ageatanana korwa asebare akabogorigwa gochia igoro. 52Na barabwo bakamosasima, bakairana Yerusalemu nomogoko omonene; 53bakaba botambe ime ase Hekalu, bakomotogia Nyasae.
OLD EKEGUSII BIBLE PROTESTANT EDITION
©Bible Society of Kenya, 2020
