Yohanes 2
2
Em pésta kawéng ang Kana
1Asi endo katelu awéan pésta kawéng ang Kana an sangkum ing Galilea. Wo si inang i Yesus mai am bitu. 2Si Yesus wo sé murit-Na nienot ka'i mai am pésta kawéng itu.
3Em pésta ra'ipé' icumawus taan en anggor maka'puo. Wo icua i inang i Yesus ai Sia, “Séra kinaka'puano in anggor.”
4Icua i Yesus a si inang-Na, “Kéitu réén si inang rumu'du' in taniitu a Yaku? Ra'ipé' an témpona ituru'-Ku si séi Aku.”
5Taan icua i inang-Na a sé tou sé mengaselewir am pésta itu, “Émaano mangé sapa si aicua i Yesus ai camu.”
6Am bitu awéan enem tampayang papumpunan in dano sé ipatu'tul ing kaperluan pengawu'as iciit ing kanaramen é tou Yahudi. Esa wo i esa tampayang itu papumpunan in dano wona' sangaatus liter. 7Icua i Yesus a sé maselewir itu, “Wutano mio' in dano sé tampayang itu.” Wo pumpunan éra in dano sé tampayang itu akar i mawuta. 8Wo icua i Yesus ai séra, “Kumawus in itu isaapo mio' rano pira asi tampayang itu wo paalino mangé a si kikiiten am pésta anio'.” 9Wo epé'an i kikiiten am pésta itu en dano si mamualio anggor, taan ra'ica kailekanna am bisa eng kinéréan é mengaselewir in anggor itu. Wayake' sé mengaselewir sé sumaap in dano itu e makailek. Wo towan i kikiiten am pésta itu si tuama kumawéng itu mai ai sia, 10wo icuana ai sia, “Eng kanaramen é tou mengaselewir in anggor sé loor eng kataré, wo sa kelio en anggor nielep é sakéi, selewiro éra en anggor sé ra'ica loor. Taan ayéma' i poow en anggor loor akar asi oras anio'.”
11Niéma' i Yesus eng kakaya'kaan-Na kataré itu ang Kana an sangkum ing Galilea. Am bitu aituru'-Na eng kawangko'-Na, ampa'paan in ituo sé murit-Na mercaya ai Sia.
12 #
Mat. 4:13 Kumawus in itu si Yesus mangé ang Kapernaum mewali-wali wo si inang-Na, tua-tuari-Na tuama wo sé murit-Na. Séra mento' am bitu wayake' im pira ngando.
Si Yesus musér sé tou mawangkér am Balé Le'nas
(Mat. 21:12-13; Mrk. 11:15-17; Luk. 19:45-46)
13 #
Kel. 12:1-27 An tutuw i matawio en endo wangko' Paska é tou,#2:13 Awéan rua macam Paska. 1. Sé tou Krésten méma' in endo wangko' Paska en tuma'néi si Yesus tinou sumawel. 2. Sé tou Yahudi méma' in endo wangko' Paska en tuma'néi in endo é apo-apo' éra aicesot i Amang Kasuruan an tana' Mesir. Asi konteks anio' Paska tumuru' in endo wangko' Paska é tou Yahudi, ra'ica torona é tou Krésten. si Yesus mangé an Yerusalem. 14Ang kintal im Balé Le'nas, kaséréan-Na awéan tou sé mawangkér sapi, domba, wo mombo. Wo awéan ka'i sé tou makalukut an somoi i méja-méja pengasawelan in doit am bitu. 15Wo si Yesus méma' in sambok an tali owo wo yusér-Na waya sé tou, sé domba wo sé sapi éra, icesot waya ang kintal im Balé Le'nas. Iwali-walintuang-Na ka'i e méja pengasawelan in doit, akar en doit éra imerar ra'io metu'tul. 16Wo icua i Yesus a sé mawangkér sé mombo, “Paalin wo icesot waya sé mombo wo en lalandangan. Tioo émaan iow em Balé i Amang-Ku mamuali pawangkéran.”
17 #
Mzm. 69:10 Wo sé murit i Yesus makata'néi sapaoka ang Kitap Le'nas awéan en aipatic in tana'i, “En upus-Ku asi Walé i Amang Kasuruan wangko' keli, tanuoka api maembung an até-Ku.”
18Wo Sia sunduren é kikiiten agama é Yahudi, “Ang karapi ing kawasa i séi réén Ico méma' in tanu siitu? Sa Ico awéan kawasa asi Amang Kasuruan owo, émaano mai eng kakaya'kaan tanu tuus ai cami.”
19 #
Mat. 26:61, 27:40; Mrk. 14:58, 15:29 Isowat i Yesus ai séra, “Sa tongkaren iow em Balé Le'nas anio', wangunen-Ku oka sumawel asi teluke' ngando.”
20Wo icua é makakawasa Yahudi ai Sia, “Em Balé Le'nas anio' winangun é tou epat ngapulu' enem ngata'un eng kauréna, wo ro'na réén wangunen-Mu sumawel asi teluke' ngando?”
21Taan em Balé Le'nas em peangé-angén i Yesus, siituo en owak-Na in esa. 22Ampa'paano in itu, an tutuw i Yesus tinou sumawel an uner é tou imaté, kata'néiano é murit-Na sapaoka en itu sumangkumo aicuana-Na. Wo percayan érao ka'i sapa sé aipatic ang Kitap Le'nas wo e nunuwu' sé aicuao i Yesus.
Pakasa en até é tou kailekan i Yesus
23Wo ang karoro'an i Yesus an Yerusalem ang kauréke' in endo wangko' Paska, keli tou maéman ai Sia ampa'paan séra isuméréo in tuu-tuus kakaya'kaan sé niéma'-Na. 24Taan sé tou itu ra'ica percayan i Yesus, ampa'paan kailekan-Na waya en até é tou. 25Wo ra'io sangali esaan tou ka'i eng kumua ai Sia andumoro' in tou, ampa'paan kailekan-Na en até é tou.
En Taar Weru a nunuwu' é Tontemboan @ LAI 2018
