SENESI 9
9
Noe mo ona foha
1Nee tapuaki leva te Atua kia Noe mo ona foha, o ui kia natou: Koutou fanaunau, mo koutou liuliuga, pea mo koutou fakafonu te kele. 2E matataku anai te u manu fuli o te kele kia koutou, te u manulele fuli o te lagi, mo te u mea fuli ae e taka i oluga o te kele, pea mo te u ika fuli o te tai: kua tuku fuli atu natou ki okotou nima. 3E tuku atu anai kia koutou te u mea fuli ae e gaugaue mo mauli ke koutou kai: e au tuku atu kia koutou te u mea fuli aia o hage ko taku tuku atu kia koutou te luna fuluihega. 4Kae ke aua pe naa koutou kai he kanoi manu mo tona laumalie, mo tona toto. 5Ke koutou iloi foki, e au toe kumi anai te toto o okotou laumalie, e au toe kumi anai ia ki te u manu fuli; pea e au toe kumi anai te laumalie o te tagata ki te tagata, ki te tagata ae ko tona tehina. 6Kapau e liligi e he tahi te toto o he tagata, pea e toe liligi anai e te tagata tona toto; koteuhi kua fakatupu e te Atua te tagata o fakatatau kia ia. 7Pea ko koutou, ke koutou fanaunau, mo koutou liuliuga, mo koutou mafola i oluga o te kele, pea mo koutou fakahahai ia ia.
8Nee toe palalau leva te Atua kia Noe mo ona foha, o ui: 9Koeni, e au fai taku fakapapau kia koutou mo tokotou hakoga i okotou muli, 10pea mo te u mea fuli ae e mauuli i okotou tafa: tatau te u manulele, mo te u manu lalata, mo manu fuli o te vao, mo te u manu ae nee mavae mai te aleka, pea mo te u manu fuli ae e mauli anai ki amuli i oluga o te kele. 11E au fai anai taku fakapapau kia koutou: e mole toe tamatei anai e te vai o te lomaki te u kakano fuli i he aho, pea e mole toe to anai he lomaki o maumaui te kele. 12Nee ui leva e te Atua: Koeni te fakailoga o te fakapapau ae e au fai mo koutou, mo te u mea fuli ae e mauli mo koutou mai te taitupu ki te taitupu: 13kua au fakatuu taku nuanua i te ao, ke tuu ko he fakailoga o te hai ae kua au fai mo te kele. 14I te aho ae e au tanaki ai anai ni ao i oluga o te kele, e ha anai te nuanua i te ao, 15pea e au manatui anai taku hai ae kua au fai mo koutou mo te u faahiga manu kehekehe fuli, pea e mole toe liliu anai te ua ko he lomaki o maumaui te u kakano fuli. 16E tuu anai te nuanua i te ao, pea e au sio anai ki ai, pea e au toe manatui anai te hai heegata ae kua fai e te Atua ki te u mea fuli e mauli, mo mea fuli e kakano ae e mauli i oluga o te kele. 17Nee ui leva e te Atua kia Noe: Koena te fakailoga o te hai ae kua au fai kia koe mo te u mea fuli ae e kakano ae e mauli i oluga o te kele.
18Ko te u foha o Noe, ae nee mavae mai te aleka: ko Semi, mo Kami, mo Safeti. Nee liliu leva ia Kami ko te tamai o Kanaane. 19Ko te u foha aia e tolu o Noe, pea ko tonatou hakoga ae nee natou fakahahai leva te kele katoa.
20Nee kamata gaue leva ia Noe ki te kele, pea nee ina to leva he vite. 21Nee ina inu leva te vino, pea nee kona leva ia ia, pea nee nofo telefua leva ia ia i tona falela. 22Ko Kami, tamai a Kanaane, nee sio leva ki te telefua o tana tamai, pea nee ina fakaha leva te mea aia ki ona tehina e toko lua ae nee nonofo i fafo. 23Koia nee too ai leva e Semi mo Safeti he pulupulu o hili ki ona fugauma, pea nee na haele fakaholomuli leva ki loto o te falela, o uufi te telefua o tana tamai. Nee sio kehe ona mata ke aua naa na sisio ki te telefua o tana tamai. 24I te ofo ake a Noe i tona kona, nee logo leva ia ia ki te mea ae nee fai kia ia e tona lua foha. 25Pea nee ina ui leva: Ke malaia ia Kanaane! Ke liliu ia ia ko te mea faifekau a te u tagata faifekau o ona tehina. 26Nee ina toe ui foki: Ke manuia te Eteleno, ko te Atua o Semi! Pea ke faifekau ia Kanaane kia Semi! 27Ke fakalahi e te Atua te u koloa o Safeti, pea ke nofo ia ia i te u falela o Semi, pea ke faifekau ia Kanaane kia Safeti!
28Nee mauli leva ia Noe, i te osi o te lomaki ia tau e tolugeau nimagofulu. 29Ko te u aho fuli o Noe ko tau e hivageau nimagofulu; pea nee mate leva ia ia.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
