SENESI 6
6
Agakovi a te tagata
1Nee hoko leva ki he temi, kua fakaalu ke kaugamalie osi te u tagata i te kele, pea nee tupu leva ni ofafine kia natou, 2pea nee sisio leva te u foha o te Atua nee matalelei osi te u ofafine o te u tagata, pea nee natou filifili leva ni ihi o natou ko onatou ohoana. 3Koia nee ui leva e te Atua: E mole toe nofo tuumau anai toku Laumalie i te tagata, koteuhi ko he kakano pe te tagata, pea ko te lahi anai o ona aho ko tau e teau uafulu.
4I te temi aia, nee tagata lalahi osi te kele. Pea nee toe feia i te osi o te olo o te u foha o te Atua ki te u ofafine o te tagata, pea nee tupu leva mai ai ni fanau: ko natou aia nee logologona i te temi mua.
5Nee sio leva te Eteleno kua lahi te agakovi a te tagata i te kele, pea kua alu pe te manatu fuli o tona loto i te aho fuli ki te mea ae e kovi. 6Pea nee fakahemala leva te Eteleno i tana fakatupu te tagata i te kele, pea nee mamahi osi tona loto. 7Pea nee ui leva e te Eteleno: E au fakapuli anai i oluga o te kele te tagata ae nee au fakatupu, mai te tagata o kaku ki te u manu lalahi, mo te u manu liliki, pea mo te u manulele fuli o te lagi; koteuhi kua au fakahemala i taku fakatupu natou.
Fau o te aleka
8Kae nee sio leva te Eteleno kia Noe pea nee ofa leva ia ia kia ia.
9Koeni te hakoga o Noe. Ko Noe ko he tagata agatonu mo maonioni ia i tona taitupu. Nee haele ia Noe mo te Atua.
10Nee fakatupu leva e Noe ni foha e tolu: ko Semi, mo Kami, mo Safeti.
11Nee fakalialia te kele ia mua o te Atua, pea nee fonu te kele i te agamalohi. 12Nee sio leva te Atua ki te kele, pea koeni, kua kovi osi ia; koteuhi kua fakalialia te u ala o te u tagata fuli i te kele.
13Koia nee ui ai leva e te Atua kia Noe: Kua au fakapapau ke fakagata te u tagata fuli; koteuhi kua natou fakafonu te kele aki te agamalohi; e au maumaui anai te u tagata mo te kele. 14Fau kia koe he aleka aki te akau ko te kofele; e ke fau anai te aleka aia o vaevaei kogafale, pea e ke pena anai ia aki he pulu kula i loto mo tua. 15E ke fau fenei anai: ko te loa o te aleka ko meta e teau nimagofulu, pea ko tona laulahi ko meta e uafulu ma nima, pea ko tona maoluga ko meta e hogofulu ma nima. 16E ke fau anai i te aleka he matapa fakamalama e tahi i te ato ae e nimagofulu satimeta tona malaga ki oluga; e ke fau anai he matapa e tahi i te fahai o te aleka; pea e ke fau anai he laufata lalo, mo he laufata loto, pea mo he laufata oluga. 17Pea ko au, e au fekaui mai anai te lomaki ke to ki te kele, o maumaui te u mea fuli ae e mauli i lalo o te lagi; pea e mamate anai te u mea fuli ae e mauli i oluga o te kele. 18Kae e au fai anai taku hai mo koe; e ke ulu anai ki te aleka, ia koe mo ou foha, mo tou ohoana pea mo te u ohoana o ou foha. 19E ke toe fakaulu anai ki te aleka, ni hoai manu taki tahi i te u manu kehekehe fuli e mauuli, he manu tagata mo he manu fafine, koteuhi ke fakamauli natou mo koe. 20E omai anai te u manu kehekehe fuli kia koe, o taki toko lua, te u manulele o mulimuli ki onatou faahiga, mo te u manu lalahi o mulimuli ki onatou faahiga, pea mo te u manu totolo o te kele o mulimuli ki onatou faahiga, o tupu ke ke fakamauli natou. 21Pea ko koe, tanaki ni meakai i te u mea fuli ae e aoga ki te kai, pea ke tanaki ke lahi, ke feauga kia koe mo natou.
22Pea nee fai leva ia Noe ki ai: nee ina fai leva te u mea fuli ae nee fakatotonu e te Atua kia ia.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
