Mark añgw’a téndé 1
1
ÈLUKW’A BÔHÔ (1)
Yôan‐Batist.
1Itasé gya Ntandô mwa Mpalè mwa Yésu‐Krist.
2Ètè a ndèni mwa ñkañga Èsaya mwa ñgo bé té: Yôkyèkyè, ma lèkyè ntôlô mwamè ô bôhô bwobè, añgô bé yèbèky’obè pèy. 3Kyiñgô ya pôtañga pia ménloñ té: Yèbèkyany pèy a Tata, hakwakany mélombo myègyi pènyo. 4Ènoñgo mènè, Yôan‐Batist a hulañga pia ménloñ, a tanda batu batèm i fumbamaka ménléma, i nonoko té ba ñkwègyibwè mambô mabébé mañgô. 5Sônd’imènè, batu bahagyè ba moñgo mwa Yudé na ba Yérusalèm ba lwa pi’añgw’a gyi, ba mèmè mambô mabébé mañgô, a wè bañgô batèm ô nzôa Yordan.
6Yôan mènè, méñhalô myègyi mya gya méñkuñgyè mya samô, a gya na ñkogyi ñkanza mwa sitô ô ñkuku, a gyaka banyama na mabôy. 7Y’añgw’a tanda batu té: Mutu a ya mè mpia, añgw’é pénda mè. Mè ndèka piñzô i lokomoko ô héhé, i suñgwaka méñkogyi mya batsôtsô bègyi. 8Mè ma mu wè bihi batèm na ñsô, ndé añgô bé wèkyè bihi batèm n’Èkôkôy Èkia.
Yésu a kwa batèm.
9Mia mènè, Yésu a yiñka pia Nazarèt, mpôka ya moñgo mwa Galilé; ya Yôan a wè añgô batèm ô Yordan. 10Sônd’añgw’a many’ô ñsô, ôkaté a ñkwèn’ikô gya ka nyôhôhô, Èkôkôy ya hula pi’añgw’a gyi, ya yué nta induma; 11èsi mènè, kyiñgô ya yiñka pi’kô té: Obè bé Mwan’amè wa ma nono bukyé, ma ñkwènè boñ bunènè n’obè.
Yésu a luñgubwè na Satan.
12Èsi mènè èko, Èkôkôy ya yizè Yésu i lwaka pia ménloñ; 13ôkaté Satan a luñg’añgô mia makô manay. A gya ô pañga basitô, bañgèlè ba nyamw’añgô.
Yésu a huñwana ô moñgo mwa Galilé.
14Sônda ba hugyè Yôan ô tsôkô, Yésu a lwa pia moñgo mwa Galilé, a lwa tanda Ntandô mwa Mpalè mwa Nzambé. 15A ñgo té: Èlomo ya kôka; Ikaka gya Nzambé gya ya kuna; fumbamakany, bukwèkyany Ntandô mwa Mpalè.
Yésu a bañga bayôkwè ba bôhô.
16Sônd’añgw’a yékana ñkoñgoko mw’idziba gya moñgo mwa Galilé, a ñkwènè Simon bañgw’a mwanyañgwè André, ba fa mbusa idziba, bôsina ba gya babômé ba bafé. 17Yésu a ñgo na bañgô té: Hiñkyèkyany mè, ôkaté ma bé kaôgyèkyè bihi bahali ba batu. 18Ba gyika bambusa bañgô kwakwa, ba hiñky’añgô.
19A lwa pia bôhô aminè, a ñkwènè Yakobu, mwana Zébédé, bañgw’a mwanyañgwè Yôan; ba gya ôkatw’èmpôñgô, ba lata bambusa bañgô. 20Ôkaté a bañga bañgô kwakwa; ba gyika hañgw’añgô Zébédé na bagyazi ôkatw’èmpôñgô, ba lwa n’ègyi.
Yésu a lwa Kapèrnaum. A haka èbôkyi, na nyañgw’a mwagy’a Simon, n’imyaté mémbèlu.
21Ba pwa Kapèrnaum. Sônda bwia bwa saba bwa kôka, Yésu a kwéya ô’lôñkw’a Nzambé, a hèlè batu. 22Ba ñkyèkyè ihèlé gyègyi bukyé, bôsina bw’añgw’a hèlè bañgô nta kw’èhagyi, habé nta batèndi ba méndèni bañgô.
23Mutu a gya ôkatw’èlôñkw’a Nzambé, a gya n’èkôkôy ibébé; y’añgw’a pôtañga té: 24Yésu wa Nazarèt, y’ô péka bèhè bé ndé? Ô mu ya i higyèkyè bèhè wé? Ma yéb’obè: obè bé Mutu Èkia Nzambé. 25Yésu a ñkanya n’èkôkôy mènè, a ñgo na yañgô té: Kañgaka mwé, manyaka pia mut’ôté a gyi. 26Èkôkôy ibébé ya luñkwè na piñzô inènè, ya liñky’añgô, yañgw’a pôtañga yôkyè inènè, ya manya pi’añgw’a gyi. 27Batu bahagyè ba ñkyèkyè, ba lwa humwa bamènè a bamènè té: Gyité gyambô bé ndé? Taka ñhèmu mwa ihèlé muté mwa ba piñzô inènè. Gyakana békôkôy bibébé, a yizè byañgô, na byañgô bya yôka. 28Kum’ègyi ya hañgana kwakwa bégyikyi byahagyè bya gya kuna na moñgo mwa Galilé.
29Sônda ba pwa ô’lôñkw’a Nzambé, bañgw’a Yakobu na Yôan ba lwa ô’lôñkw’a Simon n’André. 30Nyañgw’a mwagy’a Simon a nañg’ôkaté, a yôka nyô ya ñgôñga. Ba soho na Yésu kwakwa bôsina bwègyi. 31Y’añgw’a hinyana pi’añgw’a gyi, y’añgwa band’añgô ôbo, a tègyè añgô ntètè. Nyô ya ñgôñga añgô ya hiya, a hukwa bañgô magya.
32Sônd’iko gya lwa, ôkaté bwia bwé boso, ba ya hèlèky’añgô mémbèlu myahagyè na bébôkyi. 33Mpôka hagyè ya y’i sonoko ô ha itulu. 34Y’añgw’a haka batu ba gya na makaka ma mémpôñgô bukyé, a yila na békôkôy bibébé bukyé, ndé ndèka himè té bya sohokyè, bôsina bya yéb’añgô.
Yésu a bondoñgo na Nzambé. A lwa hèlè batu mampôka mampôka pia moñgo mwa Galilé.
35Kwagyi mènè, a many’ô héhé na kwakwagyi, a pwa ô hèñgyè; y’añgw’a lwa iyaté’si amènè, a bondoñgo na Nzambé ôkaté. 36Simon bañgw’a batu ba gya n’ègyi, ba haka añgô. 37Sônda ba ñkwèn’añgô, ba ñgo n’ègyi té: Batu bahagyè ba hak’obè. 38Y’añgw’a ñgo na bañgô té: Ñgakany imaté mampôka ma kun’ôsaté, ma lwa tanda Ntandô mwa Mpalè pimènè; gyambô gya mu gyèlè mè mwéhé, gyañgô bé gyè. 39Y’añgw’a lwa gyôñga moñgo mwa Galilé mwahagyè, a lwa soho ôkatwa bélôñkwè bya Nzambé, a yila na békôkôy bibébé.
Yésu a haka mutu a bégyima.
40Mutu a bégyima a ya pi’añgw’a gyi, a kutama maboñgo ô bôhô bwègyi, y’añgw’a bondoñgo n’ègyi té: Nd’ô himè, obè na piñzô i hakaka mè. 41Yésu a ñkwèn’añgô kyèy, a hèmbwè ôbo, a nanama añgô, a ñgo n’ègyi té: Ma himè mômpô nè, gyak’ôbwégyi. 42Èsi mènè èko, bégyima byègyi bya hiya, a gy’ ôbwégyi. 43Yésu a hugy’añgô kwakwa, a himp’añgô na kyiñgô a bwa té: 44Ndèka tanda gyañgô mut’ipinè; lwaka i hèlèkyè nyô pia prèt a gyi; sônda ô mu byoho, ô bé wèkyè èmpa bônyènyè, nta Mosès a gyika, i gyaka ndémbô pia batu té ô byoho.
45Na mutu mènè a pwa, a lwa tanda ntandô mènè masi mahagyè; Yésu ndèka piñzô i hèlèkyè nyô mampôka ô’yèhèhè, ndé a gya ôkatw’ ègyikyi, ôsa gya ndèka batu; batu ba yiñka masi mahagyè, ba ya pi’añgw’a gyi.
historical text maintained by the British and Foreign Bible Society
