Matthai 7
7
Malie Bie Va Ripana
(Luk 6:37-38, 41-42)
1Nama zaw bie ripa pa na cuo li riypata malie bie kha va ripa kha. 2Tahematapakieca malie bie na ripa pa haakhata nama zaw bie ripa pata na cuo aa. Malie cuota nama na hmuopa panangna khata na nama zaw panangpa ta na cuo aa. 3Na ming chunglie thingtung hmuo siysaa ri li pata tuokhaatama na uvnu ming chunglie mingbuo kha na mang? 4Na ming chunglie thingtung a aw pata tuokhaatama na uvnu ca, ‘na ming chunglie mingbuo kha ca lapa'a ang,’ na ta the? 5Nama, phahruo a cuopa, nama ming chung taata thingtung kha thuepathla taa lamuo na uvnu ming chunglie mingbuo thue riypa kha siephele khata na hmung the'a ta.
6A pathepa hmang kha uv va pi kha ung. Nama lungvaa kha va hmielie va thaw kha ung. A phyi ta a chaapuo khu taata caa vya palichiy'a te a ca sie'a yi.
Hie, Huv, Cakhaw
(Luk 11:9-13)
7Hie ungla pi pata nama cuo aa; huv ungla nama hmung aa; cakhaw ungla ingchiy kha aca pahaw'a yi. 8Tahematapakieca a hiepa bangkhuo ca pipa cuo'a yite, a huvpa bangkhuo ca ama hmung aa, a cakhawpa bangkhuo ca ingchiy kha pahaw pata ama cuo aa. 9Nama saata ta viechuo acaa hiepa yi ta alung a pipa pakha chuo nama aw'a ma? 10Ngaa acaa hiepa yi ta pariy a pipa pakha chuo nama aw'a ma? 11Niema a pha lipa tie ta nama saata kha tuokhaatama hmangphapa i pi aa tapa nama pachang kieca, vuoruo lie a awpa nama paa changchiy taca ama'a lie a hiepa tie kha hmangphapa khatluv tama a pi'a yi?
Ziyphung Rungnaapa
12Malie ta ima cunglie vya tue yi se tapata nama khingpa haakhata malie cunglie kha va tue tie ung. Ama cana phungbie hne profet tie pacuvna ta a cuo.
Chiypakaa Baata
(Luk 13:24)
13Chiypakaa baata taakhata a ngie tie ung. Tahematapakieca rana luo a sipa chiypakaa ca ku te a luopuv zaw a na,#7:13 Hluo vie caa-uv lieca a luo ca ku te a na a ta. a ziypa zaw ama hluvsa. 14Cuorasala hringna luopuv a sipa chiypakaa ca baa te a luo zaw a ruv, a hmungpa cawsaa zaw ama cawta.
Thingkungpa Hne A Thyi
(Luk 6:43-44)
15Profetpakhipa tie kha a raaring tie ung. Tuv vang a buv pata niema'a luo a vaw yite, cuorasala ama chung luo ca cahnie a hruopa na ama lu. 16Iema ca ama thyipaa kha mang ungla nama pachang aa. Ahling kung taata mingsuv thyi ama lu buo ma? Saakuvmuokalaw kung taata thyikuv ama lu buo ma?. 17Cahaangiethiecata thingkung phapa ta thyiphapa pathyi te thingkung pha lipa ta thyiphalipa a pathyi.
18Thingkung phapa ta thyiphalipa pathyi vyi, thingkung pha lipa ta thyiphapa pathyi ra vyi. 19Thyiphapa a pathyi lipa thingkung bangkhuo ca hu pata myi luo thawpa a cuo aa. 20Cahaa cata profetpakhipa tie ca ama thyipaa khata nama pachang aa.
Ca Pachang Va Yi Ang
(Luk 13:25-27)
21“Abyipa, Abyipa naa tapa bangkhuo vuoruo pena chung luo a ngie diy'a vayi, cuorasala vuoruo lie a awpa i Paa khingna a tuepa dyina a ngie aa. 22Capa ning thue ca cawsaa hluvpuv ta, ‘Abyipa, Abyipa! na ming ta Khazing thuophaabie ma za ri, na ming ta khuevuo zaw za papya yi pate, na ming ta kharuehaa hmang zaw ma za tue cuo vama?’ ama ta aa. 23Catiyta kama ta, ‘Ca pachang buo vayi ang. Cakuo ung, cawsaa pha lipa zaw, i ta'a yi,’ a ta.
A Thyituv Hne A Tuetuv
(Luk 6:47-49)
24“Cakhutaata i bie hing thyi te a ziypa ca alung cunglie ing a sapa cawsaa singpapaa haatana a cuo. 25Khy a saa, tiy a le, thliy khuopuv ta a vya hruo te capa ing ca a nuo tiyta alung cunglie sapa a cuo nakawta a lie vyi.
26I bie thyi raalaa te a ziy lipa ca viehnang cunglie ing a sapa a ngaapapaa haatana a cuo. 27Khy a saa, tiy a le, thliy khuopuv ta a vya hruo te a nuo ca capa ing ca a lie te, a ra patlaa diy,” a ta.
28Zingsuv ta hing bie palang a ri khu taata cawsaazaapuv ca a pacuv na zya kha ama kharue a haasa, 29tahematapakieca phungbie saya tie haakhata cuo li pata nawhnyituv tie haakhata a pacuv yi.
New Testament in Chin Lautu © Bible Society of Myanmar, 2015.
