Jọn 8
8
Oḅolom ạnir dị rale ẹmha
1Kụ ạJizos ạghi Eegum Ọlivs kụ ạrol. 2Eḅon ạḍiroor kụ ọdi ạḅile aḅula ẹpe Otu Ịiḅereghi phọ, kụ oomo awe uru ni ọteeny nyọdi, kụ ọdi ạrol ude, kụ amiigh ọtughemi ạbidi. 3Kụ ạbutughemia iilogh phọ rꞌaFarisi phọ ọsighe oniin ạnir dị ale ẹmha kụ oḅolom oru ọmeremi ghisigh ạJizos, 4kụ ọḅeni nyọdi mọ, “Ọtughemia, usiph ạnir phọ ọphon dị odi rale ẹmha. 5#Lịv 20.10; Dut 22.22-24Sịphe iilogh phọ, aMozis ụḅeni iyira mọ oroḅol ghan ikpo ọdo ạnir phọ ọphon oghiigh. Kụ nạ ạḅem aani mọ oḍighi ika nyọdi?” 6Bịdi ụghaaph ịphen phọ ịlo ọnaghan ạḍughum ọnhu ọdi, ọbo bịdi osoorom nyọdi erugh. Kụ ạJizos azuman, kụ ạsighe ghụnugh ọdi ạgeom ghan ude.
7Kụ bịdi opuru bọ rọkpaariom, kụ ọdi ạḅile ạrol aaleeny, kụ ạḅeni bịdi mọ, “Sịphe aḍita phọ anyina ọlo ịkaraph kőḍighi ghan kụ ạphur ạsighe ekpo phọ aroph ạnir phọ ọphon!” 8Kụ ọdi ạḅile kẹn azuman, kụ ạsighe ghụnugh ọdi ạgeom ghan ude phọ. 9Kụ bịdi rọnaghan ịpe ạJizos ạḅem bọ, kụ omiigh omiteghu ekpo amem amem, emiigh kꞌikumoor awe phọ kụ esiemi eekuna. Kụ ogina ạJizos bịn asugha, rꞌạnir phọ dị ạmeera ghisigh ọdi. 10Kụ ạJizos ạḅile ạrol aaleeny, kụ apuru mọ, “Nịr phọ, bịdi odiighi ẹghen? Rꞌoniin ọlo asoph ọoruen aphume nyịna ólho?” 11Kụ ạnir phọ mọ, “Oye phọ, rꞌoniin ólho.”
Kụ ạJizos mọ, “Mị kẹn úsoph ọoruen upume nyịna. Keel, kụ ọlo káḍighi mun ịkaraph.”]
ẠJizos kụ ạḍiḅaal aḅirini phọ
12 #
Mat 5.14; Jọn 9.5 Kụ ạJizos ạḅile ạghaaph ạḅeni bịdi mọ, “Mị kụ ạḍiḅaal aḅirini phọ. Ọlo ụdaph ịmi kátelhe mun esi ufiri, kạmoogh ni ḍịḅaal aghuḍum.”
13 #
Jọn 5.31
Kụ aFarisi phọ ọḅeni nyọdi mọ, “Nạ rạkaaph ghan ịlo ẹmhu ạna bịn. Ọghaaph phọ ạna ọkpe ni.”
14Kụ ạJizos mọ, “Eeye. Ghạlamo mị rạkaaph ni ịlo ẹmhu ạmi bịn, ọghaaph phọ ạmi kọ́kpe ịdi eḍighi bọ mị alegheri ni esi phọ mị ạḍua bọ kụ aru, rꞌẹpe mị rạki bọ. Nyina ílegheri ẹpe mị ạḍua bọ kụ aru rꞌẹpe mị rạki bọ. 15Nyina reegbo ghan ịiruen awe. Mị ọoruen oye kősophonaan ghan. 16Mọ mị ụwa oogbo ịiruen, ọbo ịiruen phọ ạmi miḍighi ni igey, ịdi eḍighi bọ kógina ạmi bịn, Ọde phọ urom bọ ịmi odi ni ọman ạmi. 17#Dut 19.15Ọge kẹn ni pạ iilogh phọ anyina mọ ọnhu ạsiagba ịyal awe kụ ạḅoph, pọ bịdi rọgba ni igey. 18Mị rạkaaph ni ịlo ẹmhu ạmi, ḅịle Ọde phọ urom bọ ịmi rụghaaphaan kẹn ni ịmi.”
19Kụ bịdi opuru nyọdi mọ, “Ọde phọ ạna odi ẹghen?”
Kụ ạJizos mọ, “Nyina ịmi rꞌỌde phọ ạmi ílegheri; nyina ilegheri ni ịmi, ọbo nyina milhegheri kẹn ni Ọde phọ ạmi.”
20ẠJizos ạghaaph oomo phọ ịphen phọ mem mọ dị rạtughemi bọ sịphe Otu Ịiḅereghi phọ ẹpe osoph eekoom ikpoki phọ; kụ oye ósiph nyọdi, loor esi dị amem mọ ọdi kẹ̋teeny.
Nyina kétue esi ẹpe mị rạki bọ
21Kụ ạJizos ạḅile ạḅeni bịdi mọ, “Mị kạḍua ni. Nyina kịwa ni ịmi, kụ nyina kemughom ni ịkaraph phọ anyina. Ẹpe mị rạki bọ, nyina kétue esi.”
22Kụ ạbuo aJu phọ ọḅem mọ, “Ẹmhu phọ eeghe kụ ọdi rạḅem ghan bọ mọ nyina kétue esi ẹpe mị rạki bọ? Emeeraam mọ ọdi kakiigha loor ḍụghum?”
23Kụ ạJizos mọ, “Nyina ịḍua ạtu-ropoḍi kụ eru, mị ụḍua kꞌạke kụ aru. Nyina ạbuo ịsien aḅirini phọ, mị kọ́lo ịsien aḅirini phọ. 24Ịduon kụ iḍighi kụ mị ịḅeni bọ inyina mọ nyina kemughom ni ịkaraph phọ anyina. Nyina kemughom ịkaraph phọ anyina dị nyina ímeeraam mọ ‘Mị odi ni ịdipho mị odi bọ’.”
25Kụ bịdi opuru nyọdi mọ, “Nạ phọ ạnhian?”
Kụ ạJizos mọ, “Igina phọ ịpe mị rịḅeni ghan bọ ni inyina kꞌemiighom mọ. 26Esugha ni ịbadi ạraraar dị mị ạmoogh ọghaaph ḅịle rꞌịiruen oogboonaan anyina. Ọpo urom bọ ịmi ọgbaam igey, kụ mị rạkaaph ghan rạraar phọ ịpe mị ạnaghan bọ esi ọdi kạḅeni aḅirini phọ.”
27Bịdi ụ́naghan mọ ọdi ạghaaph ghan ịlo Ọde phọ kụ ạḅeni bọ bụno. 28Kụ ạJizos mọ, “Mem dị nyina ephoophe Mọony phọ Oye ẹghiom ạnyu, nyina kelegheri ni mọ ‘Mị odi ni ịdipho mị odi bọ.’ Pụruku nyina kelegheri mọ mị ụ́da ghan rꞌẹmhu ạmi bịn uḍighi, emuton ọghaaph ghan ịpe Ọde phọ mụtughemi bọ ịmi. 29Ọpo urom bọ ịmi odianaan ni rꞌạmi. Ọdi ịmi ụ́wile bịn, ịdi eḍighi bọ mị raḍighi ghan ni ịpe ẹḅeeraan bọ nyọdi.”
30Kụ ịbadi dị ọnaghan bọ ọghaaph phọ ọphon umeeraam ni Jịzos.
Ạbuo ade ḅịle rꞌạrebene
31Kụ ạJizos ạḅeni bụo aJu phọ momeeraam bọ nyọdi mọ, “Nyina ẹdaph ọnhu phọ ạmi, pọ nyina kụ ọkaraghi ạbumatuan phọ ạmi. 32Nyina kelegheri ni ịpe eru bọ igey phọ, kụ ẹtuan igey phọ ekpetenaan.”
33 #
Mat 3.9; Luk 3.8 Kụ bịdi mọ, “Yoor ạbuo ẹemara Ebraham. Yoor kőḍighi ghan rẹbene ọngo oye. Ẹmhu ika nụun kụ nạ ạḅem bọ mọ, ‘Nyina kekpetenaan’ phọ?”
34Kụ ạJizos ạḅeni bịdi mọ, “Mị ạkar rịḅeni ghan inyina mọ tọrobo oye lọ raḍighi ghan ịkaraph, pọ ẹbene ịkaraph. 35Ẹbene rạ́tolan ghan bụo otu phọ oomo amem. Ọony phọ kụ ọlo otu phọ kꞌagee-pọ. 36Eḍighi ịyaar dị Ọony phọ kụ aḍighi dị nyina ekpetenaan, pọ nyina kẹkaraghi ni ekpetenaan. 37Mị alegheri ni mọ nyina ạbuo ẹemara Ebraham, kụ nyina rẹwa ghan bọ ni oghiigh ạmi, ịdi eḍighi bọ eepoogh ísugha mun sịphe iloghi phọ anyina dị ọghaaph phọ ạmi kaḍigh aani. 38Mị rạkaaph ghan ịpe mị ạmiin bọ kꞌỌde phọ ạmi, kụ nyina reḍighi ghan ịpe nyina ẹnaghan bọ kꞌọde phọ anyina.”
39Kụ bịdi mọ, “Ebraham kụ ọde ayoor.”
Kụ ạJizos ạḅeni bịdi mọ, “Eḍighi ịyaar dị nyina eḍighi bụo ẹemara Ebraham, nyina mịtuugh ni iiḍighi phọ Ebraham kụ eḍighi aani. 40Kꞌaḍio phọ mị rịḅeni ghan inyina igey phọ mị ạnaghan bọ esi Ẹnaan, kụ nyina rẹwa ghan bọ ni oghiigh ạmi. Ebraham óḍighi ịyaar dị ẹrol ịduon. 41Nyina reḍighi ịpe ọde phọ anyina aḍighi ghan bọ.”
Kụ bịdi mọ, “Ẹnaan bịn kụ ogina Ọde phọ ayoor. Ụ́gaanyogh burunhiin ayoor kụ ụmaraghi bọ iyoor.”
42Kụ ạJizos ạḅeni bịdi mọ, “Eḍighi ịyaar dị Ẹnaan kụ eru ọde phọ anyina, ọbo nyina mịphomoghian ni ịmi, loor esi dị mị ụḍua kꞌẸnaan kụ aru bọ odi sịen. Mị ụ́daanaan ẹmhu bịn utu. Ọdi kụ urom ni ịmi. 43Uḍighi ika kụ nyina ịmi ị́naghanan bọ? Nyina ịmi ị́naghanan ịdi eḍighi bọ nyina ítue ịkparam ịnaghan ọghaaph phọ ạmi. 44Nyina ạnmuny Eru ọde phọ anyina, kụ nyina rẹwa ghan ọdaph areten ọdi. Kꞌemiighom mọ, ọdi ọokom-enu. Ọdi kọ̋rolan ghan ẹku igey, ịdi eḍighi bọ igey loor ọdi ílho. Mem lọ ọdi ạgba ọkpe, pọ ịdipho kụ ọlem ọdi ni, ịdi eḍighi bọ ọdi ọgbaam ọkpe ḅịle rꞌọde oomo ọkpe. 45Ịdi mị rạgba ghan bọ igey phọ kụ nyina ịmi ímeeraam bọ. 46Ạnhian ọnyo anyina kụ katue ạgba ịkaraph ạmi amitiom? Kụ eḍighi ịyaar dị mị rạkaaph ghan igey kịḅeni inyina, uḍighi ika kụ nyina ịmi ímeeraam bọ? 47Ọpo ạḍua bọ kꞌẸnaan kụ aru rạnaghan ghan ni ọghaaph phọ Ẹnaan. Nyina rẹ́naghanan ghan, loor esi dị nyina ị́ḍua esi Ẹnaan kụ eru.”
ẠJizos rꞌEbraham
48Ạbuo aJu phọ ọphagharanaan mọ, “Anem ayoor oopho esi ípe ọḅem ghan mọ nạ ọlo aSameria ni dị eru eghola.”
49Kụ ạJizos mọ, “Mị eru ráḍigh ghan, mị rakueni ghan Ọde phọ ạmi, kụ nyina risooromi ghan ịmi. 50Mị rạ́wa ghan oghuenian aloor. Oye dị rụwaanaan ịmi eghuan phọ odi ni. Ọdi kugheelemi ni ịmi ịiruen phọ. 51Mị ạkar rịḅeni ghan inyina mọ oye lọ ạnaghanan ọghaaph phọ ạmi ḍuugh kạ́miin.”
52Ạbuo aJu phọ ọḅeni nyọdi mọ, “Pụruku yoor molegheri mọ eru eghola ni nyịna. Ebraham bịn amugh ni. Ariil phọ kẹn omuughu ni. Kụ nạ rạkaaph ghan mọ, ‘Oye lọ ạnaghanan ọghaaph phọ ạmi ḍuugh kạ́miin.’ 53Nạ ragbi mọ nạ kụ upu Ebraham ọde phọ ayoor amugh bọ ni ḍụghum? Nạ ragbi mọ nạ kụ upu riil phọ omuughu bọ ni ḍụghum? Nạ phọ ạnhian nụun?”
54Kụ ạJizos mọ, “Mị kụ aghuenian loor, pọ arughuenian phọ ạmi ịyaar ị́man. Ọde phọ ạmi, ọpo nyina rẹḅem ghan bọ mọ Ẹnaan anyina phọ kụ ughueni bọ ịmi. 55Kụ nyina nyọdi ke̋lhegheri. Mị alegheri ni nyọdi, kụ mị ạḅem mọ mị nyọdi úlegheri, pọ mị maḍighi aani ọgbaam ọkpe ịdipho anyina. Kụ mị alegheri ni nyọdi rạnaghanan ghan kẹn ịpe ọdi ạḅem bọ. 56Ịḅaal li ologhi Ebraham ọde phọ anyina ọmiin aani aḍio phọ ạmi. Kụ ọdi ạmiin ni, kụ ạmoogh iboh.”
57Ạbuo aJu phọ ọḅeni nyọdi mọ, “Nạ ooghdi ạsia kọ̋man, kụ nạ mạmiin ghụn ni Ebraham?”
58Kụ ạJizos mọ, “Mị ạkar rịḅeni ghan inyina mọ tụtu kọmar bọ Ebraham, mị odi ni.”
59Kụ bịdi ọsighiogh ikpo oroḅol ọdi, kụ ạJizos ạaghian amite pạ Otu Ịiḅereghi phọ ạḍua.
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
