Iiḍighi 6
6
Oḍual awe dị odi ghan eḍien
1Riiḍio phọ ịpe mem dị ạbumatuan phọ roḍiza bọ, bụo aJu phọ rọḅa ghan bọ ọnhu phọ aGris ụgumom ghan ni bụphe rọḅa ghan bọ ọnhu phọ aHibru, mọ aḍio etum ḍio ụ́logh elegh rukpukele ạnmariir phọ ạbuno esi amadi eḍien phọ. 2Kụ ḍioph rꞌịyal abutelhedom mọ ookpomoghi oomo ạbueri phọ omeeraam bọ kụ ọḅem mọ, “Ị́kpianaan dị yoor kọbile ọghaaph ọghaaph phọ Ẹnaan, kụ odi ghan eḍien. 3Esi ịduon phọ, bụo asiya, ịson emitiom sịphe ogbo phọ anyina oḍual awe, lọ olegheri mọ ọmoogh ni igey ạraaghara, dị Uwaloor Iigbia phọ rꞌolegheri ịyaar emuza loor, lọ yoor kọḅogh oḍighi phọ ọphon ọlogh ḍịghaagh ạbidi. 4Ọbo yoor ọsighe loor ayoor ọkuom esi ịiḅereghi rꞌọghaaph ghan adom mọ.”
5Kụ ịphen abutelhedom mọ ọghaaph bọ ịḅeeraan ni oomo ạbueri phọ, kụ bịdi ọma Stivin, oye dị omeeraam rꞌUwaloor Iigbia phọ emuza loor, rꞌaFilip, rꞌạProkoros, rꞌaNikanor, rꞌaTimon, rꞌaPaminas, rꞌạNikolaos, ooruen ọlo Ạntiok dị raako ghan eḍighinom ịyaar ạbuo aJu phọ. 6Kụ ọsighe bụen phọ ọmeremi risigh abutelhedom mọ, kụ bịdi ọoḅereghi kụ ọḅam rạghaagh rụmhu ạbidi.
7Kụ ọghaaph phọ Ẹnaan aleeny eleeny, kụ aḍita ạbuphe omeeraam bọ Jịzos ẹbugh ịminighan ẹpe Jeruselem, kụ aḍita ariil ạrikia phọ omeeraam aani.
Ịdi osiph Stivin
8Kụ aStivin, oye dị ạḍiseph rꞌịikpo emuza loor, aḍighi yogh ni iboom ịiḍaany rꞌareḍeenaan igbo awe phọ. 9Kụ buniin awe úḍighan Stivin. Bụen phọ ạbuo obughotu dị oghol mọ “obughotu awe okpetenaan”, dị ạḅaram Ju ạbuo aSairini rꞌẠleksandria. Bụen phọ rꞌạbunon aJu ạbuo aSilisia rꞌEsia, omiigh ọogbaghanaan rꞌaStivin. 10Kụ bịdi ụ́man ọmerenyan olegheri ịyaar phọ Uwaloor Iigbia phọ ạngo bọ Stivin ọghaaphom ghan phọ. 11Kụ bịdi omian ọkpaariom we dị ọḅem mọ, “Yoor ụnaghan ni dị ạghaaph ịlo ọopuom aMozis rꞌẸnaan.” 12Kụ bịdi owiiliom ọnhu ḍita phọ rꞌikumoor awe phọ rꞌạbutughemia iilogh phọ, kụ bịdi oru osiph Stivin ọsighe oruom ookpomoghan ikpolom awe phọ, 13kụ omitiom we mọ ọgbaaghi ọkpe ọḅam ẹmhu ọdi. Bịdi mọ, “Oye phọ ọphon rásoph ghan mem ọghaaph ọphuenom otu iigbia phọ ọphon, rꞌiilogh phọ aMozis. 14Yoor ụnaghan ni dị ọdi ạḅem mọ ạJizos ọpo ạNazeret phọ kalereghi otu phọ ọphon, kụ anmeeghi eḍighinom ạraraar phọ aMozis amitiom bọ ụngo iyira.” 15Kụ oomo phọ ạbuphe ọrol bọ pạ ookpomoghan phọ uphogh ni Stivin okananaam, kụ ọmiin ghisigh ọdi dị ạghigh ghisigh ọokpaany Ẹnaan.
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
