Iiḍighi 5
5
Ạnanayas rꞌạSafaira
1Kụ oniin oye dị oghol mọ Ạnanayas rꞌạSafaira ạnir ọdi, aal li ephua ạbidi, 2kụ ạaghi opol ikpoki phọ. Kụ olhom mọ ạsighe opol bịn aruomonaan butelhedom mọ, kụ ạnir phọ ọdi alegheri aani ni. 3Kụ aPita ạḅeni mọ, “Ạnanayas, uḍighi ika kụ aSetan mạar bọ nyịna ologhi mọ seerian opol ikpoki phọ nạ aal bọ ephua phọ ạgbaam ọkpe Uwaloor Iigbia phọ? 4Mem mọ úbool bọ, ephua phọ kẹ́lo ạna ḍụghum? Kụ maal bọ, ikpoki phọ kị́lo ạna ḍụghum? Iḍighi bọ ika kụ ịphen phọ kụ ẹḅile bọ eḍigh ologhi phọ ạna? Nạ ọ́gbaam ọkpe phọ we bịn, nạ ạgbaam Ẹnaan.” 5Ạnanayas rọnaghan ikpo ọnhu phọ ịphen, bịn apekele ameel amugh; kụ akuboom aruugu asiph ni oomo phọ ạbuphe ọnaghan bọ. 6Kụ ugheel ạnmuny phọ oḅerenu ophurughi nyọdi, kụ ọgban omitenom ọghi oḍi.
7Ị́kar íbia bịn ạnir phọ ọdi aru aḍigh. Ólhegheri aani ịpe emite bọ. 8Kụ aPita apuru nyọdi mọ, “Ụḅeni ịmi mụghumo ịphen ni bịn kụ ịdi nyina aal bọ ephua phọ!”
Kụ ạnir phọ ạphagharanaan mọ, “Ii, ịphen ni bịn.”
9Kụ aPita apuru nyọdi mọ, “Iḍighi ika kụ nyina ẹḅoph bọ ọnhu ịlo obi Uwaloor Ọmoogh-we phọ? Pogh! Ạrada ạbuphe oḍi bọ olhom mọ ạna ẹmeregha ni pạ ọnhu-aḍibuo phọ, kụ bịdi kọgban aani ni nyịna omitenom.” 10Egina amem, bịn ạSafaira apekele ameel ruwol aPita amugh. Ugheel ạnmuny phọ oḍiku ologhi otu phọ bịn ọmiin dị mamugh, kụ ọgban nyọdi ọghi oḍi ịigaany olhom mọ ọdi. 11Kụ akuboom aruugu asiph ni oomo ạbuo ạsiosi phọ, rꞌoomo ạbuphe ọnaghan bọ ịphen emite bọ.
Areḍeenaan rꞌịiḍaany
12Kụ abutelhedom mọ oḍighi yogh ghan reḍeenaan rꞌịiḍaany igbo awe phọ, kụ oomo phọ ạbuphe omeeraam bọ oru ghan Otu Ịiḅereghi phọ ookpomoghan ịisua phọ ạSolomon. 13Oye ómighirom ghan oḍighom bịdi. Awe phọ ụlogh ni bịdi eboom eghuan. 14Kụ aḍita alephiri rꞌạnmariir dị okiton omeeraam aani Ọmoogh-we phọ oḍighan bụḅel phọ ịbugh ni iboom. 15Kụ ọmiin bọ ịiḍaany phọ ịpe abutelhedom mọ roḍighi yogh bọ, ụsighe ghan ni bụdi úmoonogh ọmuneen ghan rịmina rꞌareetere kụ orool osereghi ghan ọgbal aroḅodo phọ, mọ iini aPita raten, oogho phọ ọdi kameelom ni buniin ạbidi aḍume yogh. 16Kụ ạbuo ạramha phọ ekoom bọ Jeruselem ọsighe yogh ghan bụo ạreezegh, rꞌạbuphe ịkaraph aruwaloor ẹrol bọ ẹmhu phọ orumom, kụ oomo phọ ạbidi oḍumogh.
Ịdi ọgbiphoghom butelhedom mọ
17Kụ uwo ẹmhu oyil ạrikia phọ, rꞌoomo ạbuphe rꞌọdi ọḅophan bọ ẹku aSadusi phọ, ụghagham ni butelhedom mọ iloghi iboom 18kụ osiphi bịdi ọlogh otu ikoli. 19Ḍughul kụ ọokpaany Ọmoogh-we phọ aghunyon rughuugh phọ kụ ạsighe bịdi amitenom, kụ ạḅeni mọ, 20“Ịki ẹmeera pạ Otu Ịiḅereghi phọ, ẹghaaph oomo ịlo akumoom aghuḍum mọ ạkuen ẹḅeni weye!” 21Bịdi ụnaghanan ni, kụ rẹḅaal, kụ oḍigh Otu Ịiḅereghi phọ omiigh ọtughemi.
Kụ uwo ẹmhu oyil ạrikia phọ rꞌạbuo ạmuḅoph phọ ọdi, ọmagh oomo ikpolom awe phọ Ịzirel ookpomoghi, kụ orom ọghiom ẹpe otu ikoli phọ mọ ọsighe butelhedom mọ oru. 22Kụ ạbuo adom mọ ọghi bọ osi, ụ́miin bịdi; kụ oḅula ọḅeni mọ, 23“Yoor ọghi bọ, ọkasaghi ni otu ikoli phọ okitonom, kụ bụphe rokori ghan bọ bụo ikoli phọ ọmeregha ni pạ ọnhu-aḍibuo phọ, kụ yoor oghughuron bọ, oye ọ́rol.” 24Uw-ẹmhu okoriom otu ịiḅereghi phọ, rꞌạbuo ạrumhu ariil ạrikia phọ ọnaghan bọ ịphen phọ, uukia ni ịlo memitenaan butelhedom mọ. 25Kụ oniin oye aru aḍigh ạḅeni bịdi mọ, “Awe phọ nyina ẹlhogh bọ ikoli phọ ọmeregha ni ẹpe Otu Ịiḅereghi phọ rọtughemi ghan we phọ.” 26Kụ uwo ẹmhu phọ ạpham we ọghi ọsighe bịdi oru. Ụ́kimom ịikpo, ịdi eḍighi bọ bịdi ughiilaan ni mọ awe kotoḅol bụno ikpo.
27Kụ ọsighe bọ bịdi oru ọmeremi pạ ookpomoghan ikpolom awe phọ, kụ uwo ẹmhu oyil ạrikia phọ ạḅaam bịdi 28#Mat 27.25kụ ạḅem mọ, “Yoor ịphur ri inyina rụru mọ kẹ́tughemi mun ịlo aḍien phọ ạḍien. Kụ nyina mẹsighe kẹn ịtughemi phọ anyina eleenye oomo phọ aJeruselem. Nyina regbiom ghan ịlo ọsighe ịḅaal oye phọ ọphon ọḅam ạrumhu ayoor.”
29Kụ aPita rꞌạbueri phọ abutelhedom mọ ọphagharanaan mọ, “Yoor kọnaghanan Ẹnaan, kọ́naghanan we. 30Ẹnaan ạburude ạburude phọ ayira kụ iḅeton bọ Jịzos, nyọpo nyina esin bọ loor oreeny phọ eghiigh. 31Kụ Ẹnaan ephoophe nyọdi ẹrolomi ḍịghaagh elhiom mọ ọdi, eḍighi Oḍiemiom rꞌỌpelia ịlo aweye phọ Ịzirel kokiton esi ịkaraph phọ ạbidi, ọbo ọmoogh ọsar ọwilenaan. 32Yoor rọgbaanaan ghan ịphen phọ, ịdipho Uwaloor Iigbia phọ ọpo Ẹnaan ẹngo bọ bụlo ọnaghanan nyọdi rạgbaanaan aani bọ.”
33Kụ ookpomoghan ikpolom awe phọ ọnaghan bọ ịphen phọ, ịiḅaghami ni iloghi ạbidi kụ ọwa ọze abutelhedom mọ. 34Kụ oniin ọnyo aFarisi dị oghol mọ ạGamaliel, ạrol aani ni pạ ookpomoghan phọ. Ọdi aḍighi ọtughemia iilogh, dị oomo awe rokueni ghan. Oye phọ ọphon aḅetenu ni ạmeera kụ ạḅem mọ ọsighe we phọ omitiom erugh mọony amem. 35Kụ ọdi ạḅeni ookpomoghan phọ mọ, “Weye Ịzirel, igona loor esi ịpe nyina rẹwa bọ oḍighi awe phọ ạbuen. 36Mem dị meten, aTiodas amite ni ạḅem mọ ọno ogbogh oye, kụ aḍita awe dị ọghiom ni inya okuron, oḍighan nyọdi. Kụ awe ughiigh ni nyọdi ọwalawalami bụphe ọdaphan ghan bọ nyọdi, bịn ogbo phọ ạbidi aphe. 37Kụ ọdi roten, kụ aJudas ọpo aGalili phọ aḅetenu riiḍio phọ ịpe rogbi bọ we phọ, kụ aḍur bụminighan ạsighe ạloghoma. Kụ ọdi phọ kẹn aphe ni, kụ oomo phọ ạbuphe ọdaph bọ nyọdi ọwalala. 38Kụ sịen ịphen emite bọ nyịidipho, mị rịḅeni inyina mọ ịkporion we phọ ạbuen rạghaagh ẹwile, kụ eḍighi dị ịitughian phọ ịphen rꞌoḍighi phọ ọphon ẹḍua ḍịghaagh awe kụ eru, pọ kepe ni. 39Kụ eḍighi dị ẹḍua ḍịghaagh Ẹnaan kụ eru, pọ nyina kétue epiemi bịdi. Iini sịen nyina rebiom Ẹnaan elephiri.”
Kụ bịdi ọnaghanan oroma phọ ạGamaliel, 40kụ ọmagh butelhedom mọ ọlogh otu ọgurogh, kụ ọphur rụru mọ kụ́kaaph mun ịlo ạJizos, kụ ọwile mọ bịdi ogheel. 41Kụ bịdi ọḍua pạ ookpomoghan phọ rꞌibo dị Ẹnaan megbiom aani mọ ạbuno ọmanam ni ọtuan aḍien phọ ạJizos ọmiinom, 42Kụ bịdi úsoph ghan ḍio ọtughemi rꞌọghaaph ghan sịphe Otu Ịiḅereghi phọ rꞌiloghi aruutu awe phọ, mọ ạJizos kụ aMesaya phọ ni.
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
