MATEO 11
11
1Jesusqa chunka iskayniyuq yachaqaq qatiqninkunaman imachu ruwananku kachkarqan chaykunamanta umancharirqan chhikamantaqa, chayniq suyupi kaq llaqtakunaniqman willaykunata yachachiq puripurqan.
Bawtisaq Juanpaq kachasqankuna
(Lc 7.18-35)
2Bawtisaq Juanqa chaypacha watasqa kachkaspa Cristopaq ruwasqankunamanta yacharqan. Chhikataq paypaq wakin yachaqaq qatiqninkunata kacharqan, 3‘paypunichu chiqampi jamunan kachkarqan, manachayqa wajtachu suyanaykuraq kanqa icha,’ chayta tapurimunankupaq.
4Jesustaq paykunaman ajinata jaynirqan: “Puriychis, jinaspataq Juanman imatachus rikuchkankichis jinataq uyarichkankichis chayta willamuychis. 5Ñawsakunaqa qhawatatanmi, wist'ukunapas puriykachanmi, lliqi unquyniyuqkunapas unquyninkunamanta picharasqam kapunku, luqt'ukunapas uyarinku, wañusqakunapas kawsatatamunku, wajcha kawsayniyuq runakunamantaq sumaq willaykuna willakun, chayta willamuychis –nispa. 6¡Jinallataq kusikuyniyuqmi pichus nuqapi mana mitk'akuyta taripachkan chayqa!”
7Jayk'aqchus Juanpaq yachaqaq qatiqninkuna puripurqanku chhikamantataq, Jesusqa ajinata nispa Juanmanta runakunaman rimapayayta qallarirqan: “¿Ch'usaq qasi pampata purirqankichis chhikaqa, imatataq qankuna rikumurqankichisri? ¿Wayrawan thalarqusqa uj suqus k'aspitachu rikumurqankichisri? 8¿Manachayqa, ima rikuqtaq lluqsirqankichisri? ¿Uj sumaq achkha chaniyuq p'achawan p'achallisqa runatachu rikumurqankichisri? Qankunaqa sumaqtam yachankichis, pikunachus sumaq p'achallisqa kanku chaykunaqa qhapaq suyu apaykachaqkunapaq wasinkunapim kanku. 9Ajinaqa ¿imapaqtaq lluqsirqankichisri? ¿Uj Diospaq sutimpi willaq runata rikumunapaqchu lluqsirqankichisri? Arï, chaytapunim rikumurqankichis, uj Diospaq sutimpi willaqmanta niqtimpas astawan kurajtaraqmi rikumunkichis.” 10Chay Juanmi, maykaqmantachus Qilqasqakunapi ajinata nichkan chayqa:
‘Chayamunaykipaq ñan wakichaqtam willaqniyta qan ñawpaqiykiman kachamuchkani.’
11“Sut'inta niykichis, tukuy runakunamanta niqtimpas manam maykaqpas Bawtisaq Juanmanta astawan kurajkaq karqanchu; chaywampas janaqpacha qhapaq suyupiqa, pichus astawan juch'uykaq kachkan chaykaqmi Juanmanta niqtimpas astawan kurajkaqqa.”
12“Bawtisaq Juanpaq jamusqanmanta kunankamaqa, janaqpacha qhapaq suyupiqa ch'aqwaykunam kan, imaraykuchus kallpayuqkunam chayta tukjachiyta munanku. 13Juanpaq jamunankamaqa, tukuy Diospaq sutimpi willaqkunapaq willasqan jinataq kamachiykunapas qhapaq suyumanta uj chhikan willaykunallam karqan; 14Qankunachus kayta iyaw niyta munankichis chhikaqa, Juanqa Diospaq sutimpi willaq Elías jamunan kachkarqan chaymi. 15Pikunachus ninriyuq kankichis chaykunaqa uyariychis.”
16“¿Kaypacha kawsaq runakunata imawantaq rijch'anachiymanri? Llaqtakanchakunapi pujllanapaq tiyaykuspa wawamasinkunaman ajinata waqach'aq wawakunaman rijch'akunku: 17‘Pinkilluta phukuripuykichis, qankunataq manam tusurqankichischu; llakikuy takiykunata takiripuykichis, qankunataq manam waqarqankichischu.’ 18Imaraykuchus Juan jamurqan, paytaq mana mikhunchu, manallataq ujyampaschu, chaymantaq qankunaqa supayniyuqmi nispa ninkichis. 19Chhikamantataq Nuqa runapaq Churin jamuni, jinaspataq mikhuni jinataq ujyani, qankunataq ancha thathaqmi, ujyajmi, mana allin jucharara runakunapaq jinataq Roma llaqtapaq qulqi apthapiqkunapaq masinmi nispa niwankichis. Chaywampas Diospaq athun yachayninqa ruwasqankunamantam riqsikun.”
Diosman mana iyawniyuq llaqtakunaman k'amiykuykuna
(Lc 10.13-15)
20Jesusqa chhikapacha, maypichus achkha musphay ruwaykunata ruwarqan chay llaqtakunaman k'amiyta qallarirqan, imaraykuchus paykunaqa manam Diosman kutirimusqakuchu. Jesustaq ajinata nirqan: 21“¡Corazín, imalla qanmanta kachkanqa! ¡Betsaida imalla qanmanta kachkanqa! Imaraykuchus Tiro jinataq Sidón llaqtakunapichus kay musphay ruwaykuna qankuna chawpipijina ruwakunman karqan chhikaqa, llakikuy p'achawan p'achallt'akuspa jinataq uchphawan jach'ikiparikuspam paykunaqa maypachaña Diosman kutirimunkuman karqan. 22Chaywampas kayta niykichis, athun juchanchay p'unchaypiqa, Tiromanta jinataq Sidón llaqtakunamanta niqtimpas qankunapaq ñak'ariyniykichisqa astawan kurajraqmi kanqa. 23Qanrï Cafarnaúm, ¿janaqpachakama uqharisqa kanaykitachu yuwachkankiri? ¡Ukhupachaman chayanaykikama urmaykuchisqam kanki! Sodoma llaqtapichus kay musphay ruwaykuna qampaq ruwakuchkan ajinata ruwakunman karqan chhikaqa, chay llaqtaqa kunan p'unchaykamam kakuchkanmanraq karqan. 24Chayrayku niykichis, athun juchanchana p'unchaypiqa, Sodoma jallp'amanta niqtimpas astawan ñak'arichisqaraqmi kanki.”
Churin sapallam pipaq Tata kasqanta yachan
(Lc 10.21-22)
25Chaypachapi Jesusqa ajinata nirqan: “Yupaychaykim Tatay, janaqpacha jinataq kaypacha Apu Dios Tata, imaraykuchus llamp'u sunquyuqkunaman imatachus athun yachaysapakunamanta pakt'anki chayta riqsichinki. 26Arï Tatay, imaraykuchus ajinatam qan munarqanki.”
27“Tatayqa tukuy imantintam nuqaman jap'ichiwan. Pipas manam chiqampi nuqa Churinta riqsichkawanchu, manachayqa Tatay sapallanmi riqsiwan; jinataq manallataqmi pipas Tatayta riqsichkankuchu, manachayqa nuqa Churin sapallam riqsini, jinallataq pikunamanchus nuqa Churiqa riqsichiyta munani chaykunallam riqsinku. 28Tukuy pikunachus llank'anaykichismanta jinataq q'ipiykichismanta sayk'usqa kankichis chaykunaqa nuqaman jamuychis, nuqam qankunata samararichisqaykichis. 29Ima q'ipitachus apanaykichispaq churaykichis chayta jap'iqakuychis, jinataq nuqamanta yachaqakuychis, imaraykuchus nuqaqa llamp'u jinataq sumaq sunquyuqmi kani; ajinamantam samarayta taripankichis. 30Imaraykuchus churachkaykichis chay q'ipiqa, manam ancha llasachu kachkan, jasallam apanaqa.”
Nuevo Testamento Quechua Norte Boliviano © Sociedad Bíblica Boliviana, 2006.
