Duk 24
24
Yisọs aset ke ñkpa
1Ke akpa usen ke udua, ke usieere, ibaan ado emaeben mme inem-inem ufịk adan ammọ ekenamma eka udi. 2Ammọ ekekịt ke emaewere itiad esio ke udi, 3ado ke ini ammọ edʌkkọ esịd, ammọ ikịtte akpo Abọọñ Yisọs. 4Nte ammọ esʌkkọ eda do ke ñkpaidem, ideen iba e-ekesịneke nsem-nsem afọñ ebiọññọ ammọ ke ñkañ. 5Ke ndịk, mme ibaan ado emaesuuk iso ke isọñ. Ado mme ideen ado ebo ammọ ete, “Ntak a-ndufo eyemme adu uwem ke atu mme akpañkpa-a? 6Anye ibaaha mi, anye amaaset. Itoiyo se anye akidọkkọ ndufo ke ini anye asʌkkọ aba ke Kadidi: 7‘Akena eyaak Ayịn Awo esịn ke ubọk mme anam idiọọk, ekọñ anye ke eto krọs, anye anyʌñ aset ke ayọhọ usen ita.’ ” 8Ndin ammọ etoiyo ikọ amọ.
9Ammọ emaekenyọñ udi edi emaeditañ afịd ñkpọ ami enọ mme mbed duob ye keed ye mme mbon mfen. 10Mme ibaan ado ekedo Mmeri Makdadin, Yoana, ye Mmeri eka Yemsi ye mbon mfen eketañ enọ mme abọsịd. 11Ado ammọ ikinịmme mme ibaan ami ke akpanikọ, sia mbʌk ammọ akeba nte ata ndisịme. 12Ado Bita amaadakka ada afeghe aka udi. Akewuọ, akenyuuñọ ase esịd udi ado ikịtte ñkpọ ntekeed mfen ikan dinen e-ekesịnne Yisọs nte ana ke idem amọ; anye ndin adakka anyọñ ke ñkpaidem.
Ke usʌñ Emaus
13Kpa ukem usen ado, iba ke atu mme ibed amọ ekeka idʌñ keed a-akekereke Emaus, a-akedooho itiad itiaba tọọñọ ke Yerusedem, 14Ammọ ekesʌk eneme ebaña afịd ñkpọ se ikitịppe. 15Ndin nte ammọ esʌkkọ eneme ñkpọ ami, Yisọs ke idem amọ abiọññọ anyʌñ asaña ye ammọ; 16ado anyen ammọ ikitarake nọ ammọ ediọọñọ anye.
17Anye abo ammọ ate, “Nso-o ke ndufo eneneme ami?”
Ammọ etuak eda, iso ammọ ayọhọ ye mfʌhọ. 18Ndin keed ke atu ammọ, a-akekereke Kreobas, abọọrọ anye ate, “Afo ado asenawo ke Yerusedem a-mmuudiọọñọke afịd se iba ke usen ifañ ami.”
19Anye amaabịp ate, “Me nso-o ñkpọ?”
Ammọ ebọọrọ ete, “Abaña Yisọs ake Nasared. Anye akedo brọfed, anie adudu ke ikọ ye ke adinam ke iso Abasi ye ke atu afịd awo. 20Mme ikpọ aku ye mme adaukara ñnyịn emaesaana anye eyaak nọ ebiire ikpe ñkpa enọ anye enyʌñ ekọñ anye ke eto krọs; 21ado idodanyen ñnyịn akedo ke anye adido andifak Isred. Ikweeñeke ke ado: usen ita ado ami tọọñọ mme ñkpọ ami aketịppe. 22Ke ado aboiyoke, ubaak ibaan ke atu ñnyịn enam nọ idem ikpa ñnyịn. Ammọ ekeka udi ubak-ubak usen, 23ke ini ammọ mmiikikịtte akpo Yisọs, ammọ emaenyọñ edidọkkọ ñnyịn ete ke mmimọ ikikịt ñkukịd mme enyere, e-ekebooho mmimọ ke anye mmọdo ke uwem. 24Ubaak mbon nsaña ñnyịn emaeka udi enyʌñ ekekịt afịd ñkpọ naña ibaan ado eketañ, ado ammọ ikikịtte Yisọs idem.”
25Ndin anye amaabo ammọ ate, “Ndufo emesịme eti-eti! Inyʌññọ ikan isọp inịm afịd se mme brọfed eketañ ke akpanikọ! 26Nte ikinaaha Mesaya abọ afịd ufen ami ndin adʌk ke itooro ubọọñ amọ?” 27Ndin anye amaatọọñọ ke Moses ye mme Brọfed mbon ñko anam anwaña ammọ ufañ ikọ Abasi a-akebañake anye.
28Ke ini ammọ emaekekpere itie a-ammọ ekekaaha, Yisọs anam nte iyaisʌk ikaka iso ke isañ. 29Ado ammọ eyịre anye ete aba ye mmimọ. Ammọ ete anye ke ayo akịm. Anam anye amaakeba ye ammọ.
30Ke ini ammọ ekesʌkkọ edia ñkpọ, anye amaaben uyo anọ ekọọm, abuuñ, ndin atọọñọ adideeme nnọ ammọ. 31Do ke anyen ammọ aketara ndin ammọ enyʌñ ediọọñọ anye; ado anye amaasosop ammọ ke anyen. 32Ndin ammọ ebo idem ammọ ete, “Nte esịd ñnyịn ikiduọghọ ini anye akesʌkkọ atañ ikọ ye ñnyịn anyʌñ akappa ñwed Abasi inọ ñnyịn ke usʌñ?”
33Kpa idahado ammọ etịmme enyọñ Yerusedem. Do ammọ ekesoobo ye mme mbed duob ye keed nte eboho ye mme nsaña ammọ. 34Mbon ado ebo ammọ ete, “Abọọñ aset ke ñkpa ke akpanikọ, anyʌñ ayaara idem anọ Saimọn.” 35Ndin ammọ awo iba etañ se ikitịppe ke usʌñ isañ, ye naña ammọ ekediọọñọ anye ke ini anye akebuuñọ uyo.
Yisọs awọt mme mbed idem
36Ammọ ekesʌk etatañ ebaña afịd mme ñkpọ ami ke inua, Yisọs ke idem amọ amaawuọ ada ke atu ammọ anyʌñ abo ammọ ate, “Emem aba ye ndufo!”
37Ammọ emaedịkke enyʌñ ekop ndịk sia ekekere ke ikịt ekpo. 38Ado anye abo ammọ ate, “Nso-o ido ntak esịd ndufo atịmekede; nso-o inyʌñ inam ndufo enie eyịghe ke esịd ndufo? 39Se ubọk ye ukod mmi nọ ediọọñọ ke ami ke ado. Intuuk miin ise; ekpo inieeghe ikpọkidem ye akpọ naña ami nnie ami.”
40Nte anye asʌkkọ atañ ikọ ami, anye awọt ammọ ubọk ye ukod amọ. 41Ammọ emaekop inemesịd tutu ikanna inịm se ekekịt, sia idem amaakpa ammọ; anam anye abo ammọ ate, “Emenie ñkpọ se edia?” 42Ammọ emaeben ibio nsaad iyak enọ anye. 43Anye abọ anyʌñ ata ke iso ammọ.
44Ndin anye abo ammọ, “Se ami ñketañ inọ ndufo ke idaha ñkesʌkkọ mba ye ndufo ado: Afịd se ekewet embaña ke Ibed Moses, ye ke ñwed mme Brọfed ye mme Saam ana osu.”
45Ndin anye amaanam ikọ Abasi anwaña ammọ. 46Anye abo ammọ ate, “Ewet ebo ke Mesaya ayaabọ ufen ndin aset ke ñkpa ke ayọghọ usen ita, 47ñko ke anyịñ amọ eyaekwọrọ adifeen ke mme idiọọkñkpọ enọ afịd mme idịd, tọọñọ ke Yerusedem. 48Ndufo edoñño ntiense enọ mme ñkpọ ami. 49Ami ñyaanọ se Ete mmi akenwọñọ isọk ndufo; ado iba ke abio Yerusedem tutu adudu ato anyọñ isịm ndufo.”
Adidọọk Yisọs ke anyọñ
50Ndin Yisọs amaakebem ammọ akewuọ adaña abio Betani, anye amaadịppe ubọk adiọñ ammọ. 51Nte anye asʌkkọ adiọñ ammọ, anye asịkke akpọñ ammọ ndin emaeben anye edọọk ke anyọñ. 52Ammọ emaekpono anye, enyʌñ etịmme enyọñ Yerusedem ye akwa idaara. 53Ndin ammọ ekeba ke tembịd afịd ini etooro Abasi.
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
