Yọọn 14
14
Yisọs adọñ mbed amọ esịd
1 “Ikiiyak esịd ndufo atịmede. Ndufo emenịm Abasi ke akpanikọ; innịm miin ñko ke akpanikọ. 2Ke ufọk Ete mmi umiañ ubeed ebañña; miikpidooho ntodo, ami ñkpaakidọkkọ ndufo. 3Ami ñka adikitʌm itie inọ-ọ ndufo, ami ñyaatịmme ndi ndiben ndufo nnọ idem mmi, nọ ndufo eba mme Ami ke itie nte ami mba. 4Ndufo emediọọñọ usʌñ itie a-ami ñkaaha.”
Yisọs ado usʌñ adika mbịne Ete
5Tọmọs amaabo anye ate, “Abọọñ, ñnyịn idiọọñọke nte afo aka, ndin ñnyịn idiinam die idiọọñọ usʌñ ami?”
6Ndin Yisọs amaabọọrọ: “Ami ndo usʌñ, mme akpanikọ mme uwem. Awo ndomokeed idieghe ibịne Ete ibọhọke anto miin. 7Adieke ndufo endiọọñọke miin, eyaediọọñọ Ete mmi ñko. Tọọñọ ke idahami ndufo emediọọñọ anye enyʌñ ekịt anye.”
8Fidib amaabo, “Abọọñ, iwọt ñnyịn Ete, ndin ñnyịn iyaiyʌkkọ.”
9Yisọs amaabo ate, “Nte ami mmekeme iba ye ndufo afịd anyan ini ami, Fidib, ndin afo usʌkkọ undiọọñọ miin? Awo ake adodo añkịtte miin akịd Ete, ndin ndufo ekeme die adibo, ‘Iwọt ñnyịn Ete’? 10Nte ndufo inịmme ke ami mba ke Ete, Ete aba ñko ke ami? Se ami ntañ inọ ndufo intooho miin. Ado Ete a-andʌññọ miin ke idem anam utom amọ. 11Innịm miin ke akpanikọ, ami mmaibo ke mba ke Ete, Ete aba ñko ke ami, mmiidooho ntodo inịm ito ke mme ikpọ utịbe ñkpọ a-ndufo ekiide. 12Ke ata akpanikọ ami ntañ inọ ndufo, awo ake adodo annịmme miin ke akpanikọ ayaanam mme ukem utom a-ami nnamma mi, ayaanyʌñ ananam akan ami, sia ami ñka mbịne Ete. 13Se idodo a-ndufo ebeeñeke ke anyịñ mmi ñyaanam, ma Ete abọ itooro ato ke Ayịn. 14Adieke ndufo ebeeñeke ñkpọ ake adodo ke anyịñ mmi, ami ñyaanam.”
Yisọs anwọñọ adinọ Adisana Sịbidịd
15 “Akpedo ndufo ememma miin, inịm mme ibed mmi. 16Ami ñyaabeeñe Ete, ndin anye ayainọ ndufo idọñesịd mfen adiba mme ndufo ke nsi-nsi, 17Sịbidịd akpanikọ. Ederimbod idiiyemme anye sia ammọ idiọọñọke inyʌññọ ikịt anye. Ado ndufo emediọọñọ anye, sia anye adʌñ ke idem ndufo, anye adiiba ye ndufo ñko. 18Ami ndiikpọññọ ndufo nte nditọ akpa; ami ñyaadi ibịne ndufo. 19Ke etək ini, ederimbod idiiñkịtte miin aba, ado ndufo eyaeñkịt. Sia ami mmedu uwem ndin ndufo ñko eyaedu uwem. 20Ke usen ado ndufo eyaediọọñọ ke ami mba ke Ete, kpa naña ndufo eba ke ami, ami ñko mba ke ndufo. 21Awo ake adodo a-abọọhọ mme ibed mmi anyʌñ anịm ammọ, anye ado ado andimma miin. Awo a-amaaha miin, Ete mmi ayaama anye, ndin ami ñyaama anye ñnyʌñ ñyaara idem mmi nnọ anye.”
22Akem Yudas, (idooho Yudas Iskariọd) abo anye, “Abọọñ, nso-o ido yak afo aduak adiwọt ñnyịn idem mfo ado uwọttọ ederimbod?”
23Yisọs amaabọọrọ ate, “Awo a-amaaha miin ayaanam ukpeeb ñkpo mmi, ndin Ete mmi ayaama anye ndin ñnyịn iyaidi ibịne anye inyʌñ idʌñ mme anye. 24Awo a-mmiimmaaha miin idiinịmme uyo mmi. Ikọ a-ndufo ekoppo mi idooho ake mmi; ado ikọ e-Ete a-akendọññọ miin.
25 “Ami mmetañ mme ñkpọ ami inọ ndufo ke ini nsʌkkọ mba mi mme ndufo; 26Ado Idọñesịd, Adisana Sịbidịd, e-Ete adidọñ ke anyịñ mmi ayaikpeeb ndufo afịd ñkpọ anyʌñ itoiyo ndufo afịd se ami ntañ inọ ndufo. 27Emem ke ami ñkpọñ inọ ndufo; emem mmi ke ami inọ ndufo. Ami inọọhọ ndufo naña ederimbod inọọ. Ikiiyak esịd ndufo etịmede, ikiinyʌñ inyeñ idem.
28 “Ndufo emekop nte ami mbo: ‘Ami ñyaikpọñ, ñyaanyʌñ ntịmme ndi.’ Akpedo ndufo emaemma miin, esịd akpainem ndufo ke ñka mbịne Ete, sia Ete akpon añkan miin. 29Ami mmidọkkọ ndufo idahami, mbemiso ñkpọ ami adat itie, ndin amaatịppe ndufo eyaennịm ke akpanikọ. 30Ami ndiitañña uwak ikọ ye ndufo ñkan ado aba sia idiọọk adidem ederimbod ami asʌk adi. Anye inieeghe adudu ke idem mmi, 31ado anye adi ma ederimbod ediọọñọ ebo ke ami mmema Ete ñnyʌñ nnam se Ete mmi andọñ ami nnam.
“Ndufo idi ndin, yak ñnyịn ika.”
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
