Yọọn 11
11
Ñkpa Dasarọs
1Ete keed a-akekereke Dasarọs amaadọñọ. Anye aketo idʌñ Betani, idʌñ Mmeri ye ayịneka amọ Mmata eketooho. 2(Mmeri ami, a-ayịneka amọ Dasarọs a-akedọñọke mi, kpasʌk anye ado ukem awonwaan a-akefiọññọke Abọọñ Yisọs inem ufịk adan anyʌñ adat ided amọ akwokko ikpad Yisọs.) 3Nditọeka ibaan Dasarọs emaedọñ utom enọ Yisọs ete, “Abọọñ anye a-Afo amaaha adọdọñọ.”
4Ke ini Yisọs akoppo anye abo, “Udọñọ ami idiidatta ikiwuọ ke ñkpa. Iyo-o, ado ke ubọọñ Abasi nọ Ayịn Abasi abọ ubọọñ ato do.” 5Yisọs amaama Mmata ye nditọeka amọ, Mmeri ye Dasarọs. 6Ke anye amaakekop ke Dasarọs adọdọñọ, anye amaawoobo aba nte akeba ke usen iba mfen, 7ndin anye amaabo mme mbed, “Yak ñnyịn itịmme ika Yudia.”
8Ammọ emaebo, “Andikpeeb, ke etək-etək ini akeboiyoke mi, mme Yuu emaenwana adutọọñ ke itiad, ado afo abo itịmme ika do?”
9Yisọs amaabọọrọ, “Nte idooho awa duob ye iba aba ke uweeme ayo? Awo a-asañake ke uweeme ayo idiikọppọ iduọ, sia unwana ederimbod anam anye akịt usʌñ. 10Ado anye amaasaña ke akoneyo akeme adikọbọ nduọ sia unwana ibaaha.”
11Anye amaaketañ ami ima, anye amaaka iso abo ammọ, “Ufan ñnyịn Dasarọs adaiya idab, ado ami ñyaaka do ñketọi anye.”
12Mme mbed ebọọrọ, “Abọọñ akpedo anye adadaiya idem ayaasọñ anye.” 13Yisọs aketañ abaña ñkpa Dasarọs, ado mme mbed ekekere ebo ke anye aketañ abaña ñkaña adidaiya idab.
14Ado anam anye atañ inwañ-inwañ ate, “Dasarọs akpa; 15ndin ke ntak ndufo, esịd annem ke ñkebaaha do, ma ndufo enịm ke akpanikọ. Ado yak ñnyịn ika ibịne anye.”
16Ndin Tọmọs, (enyʌññọ esikood Didimọs) amaabo mme ibed mbon ñko ate, “Yak ñnyịn ñko ikeene, ma ikikpa ye anye.”
Yisọs adọñ nditọeka Dasarọs esịd
17Yisọs amaakediwuọ, anye amaakịt ke Dasarọs amaasesịne ke udi usen inaañ. 18Tọọñọ ke Betani ka Yerusedem ikiyọhọke itiad iba, 19ñko ataa uwak mme Yuu emaeka adidọñ Mmata ye Mmeri esịd ke ntak ñkpa ayịneka ammọ. 20Ke ini Mmata akekoppo ke Yisọs asʌk adi, anye amaawuọ akesoobo Yisọs, ado Mmeri akeba ke esịd ufọk.
21Mmata abo Yisọs, “Abọọñ akpedo afo akeba mi ayịneka mmi ikpikikpaaha. 22Ado mmediọọñọ mbo ñkọm idahami Abasi akeme aduunọ se afo akpebebịp.”
23Yisọs abo anye, “Ayịnuka ayaaset.”
24Mmata amaabọọrọ, “Mmediọọñọ ke anye ayaaset ke ñkpa ke adised akpatre usen.”
25Yisọs abo anye, “Ami ndo adised ke ñkpa ye uwem. Awo annịmme miin ke akpanikọ ayaadu uwem akpesʌk ado anye akpaaha; 26ñko awo ake adodo aduuho uwem anyʌñ annịm miin ke akpanikọ idiikpaaha. Nte afo amenịm ami?”
27Anye abo Yisọs, “Ih Abọọñ, mmenịm mbo ke afo ado Mesaya Ayịn Abasi a-anaaha adi ke ederimbod.”
28Mmata amaaketañ ami ima, anye amaadakka akekood Mmeri ayịneka esịkke eda, ate “Andikpeeb mmọ mi, anye asʌk abịp ubaña fiin.” 29Ke ini Mmeri akoppo ami, anye amaasọsọp adakka akesoobo anye. 30Yisọs akesʌk aba ke itie Mmata akesooboke anye, ikidiwuọọhọ idʌñ Betani dion. 31Ke ini mme Yuu ekebaaha ke ufọk mme Mmeri esʌk edọñ anye esịd ekịtte daña anye asọsọp adakka awuọ esion, ammọ emaekeene anye sia ammọ ekekere ebo ke anye aka itie udi aditua ayịd.
32Mmeri akewuọ itie Yisọs akebaaha, akịd anye, Mmeri amaaduọ ke ukod amọ abo, “Abọọñ, akpedo afo amaaba mi, ayịneka mmi ikpikikpaaha.”
33Ke ini Yisọs akịtte ke anye ye mme Yuu e-ekesañake ye anye esʌk etua, amaanekke afịna Yisọs ke sịbidịd. 34Anye abịp, “Mmọ-ọ ke ndufo ekenịm anye?”
Ammọ ebọọrọ anye, “Abọọñ, di dise.”
35Yisọs amaatua.
36Ado anam mme Yuu ebo, “Sese daña anye akema anye!”
37Ubaak ammọ emaebo, “Nte anye akenamma nnan akịd usʌñ ikpikinamma nọ ete ami akuukpa.”
Yisọs anam Dasarọs aset ke ñkpa
38Yisọs amaamaana afʌhọ ke esịd, asaña adiwuọ itie udi. Udi akedo aba itiad e-emaekeben itiad ekwe ke inua. 39Anye amaabo ammọ, “Iwere itiad ami isio.”
Mmata, ayịneka akpañkpa amaabo, “Abọọñ, akpo amọ atọọñọ aditebe idahami, sia anye ana do usen inaañ.”
40Yisọs amaabo ate, “Ñketañña inọ ndufo mbo ke ekpenịm ke akpanikọ ndufo eyaekịt ubọọñ Abasi?”
41Ammọ emaewere itiad esio ndin Yisọs adịppe anyen ke anyọñ anyʌñ abo ate, “Ete, ami mmukọọm fiin sia afo amekop uyo mmi. 42Mmaadiọọñọ mbo ke afo amesikop uyo mmi afịd ini, ado ñketañ ke ntak ufọn mme atu awo e-ebaññake mi, ma ammọ enịm ke afo akendọñ miin.”
43Ke Yisọs amaaketañ ami ama, anye akood ke akpọsọñ uyo ate, “Dasarọs wuọ di.” 44Akpañkpa amaawuọ adi mme daña ekenyʌñ ewañ anye mbai dinen, ye afọñ ke ubọk ye ukod ye iso.
Yisọs abo ammọ, “Ekpọk anye afọñ udi, eyaak anye aka.”
Uduak adiwot Yisọs
45Uwak mme Yuu e-ekedieeghe adise Mmeri ekenyʌñ ekịt se Yisọs akenam emaenịm anye ke akpanikọ. 46Ado ubaak ammọ emaekebʌk enọ mme Farisi se Yisọs akenam. 47Ndin mme ikpọ aku ye mme Farisi emaekood mbono esob Sanhidrin.
“Nso-o ke ñnyịn inam dion? Se daña awo ami aka iso anam mme utịbe ñkpọ. 48Ñnyịn ikpiyak anye aka iso ntom, afịd awo eyaenịm anye ke akpanikọ ndin mbon Rum eyaedibọ ñnyịn tembịd ye afịd idịd ñnyịn.”
49Awo keed ke atu ammọ a-akekereke Kaifas, a-akedooho akwa aku isua ado amaabo ate, “Ndufo idiọọñọke bene ñkpọ keed. 50Ndufo ikịtte ke afọn awo keed adikpa nnọ afịd awo ñkan afịd idʌñ aditak.”
51Anye ikitañña ami nte ikọ idem amọ, ado nte akwa aku isua ado anye aketañ nte brọfed ke Yisọs ayaakpa ke iwuod afịd idịd mme Yuu, 52inyʌññọ ido idịd ado ikpọọñ, ado ayaakpa anọ nditọ Abasi e-ekesuanake eyọhọ afịd itie abok ammọ nọ ammọ ekappa edo keed. 53Ndin tọọñọ ke usen ado ammọ emaeyem usʌñ naña ekpedat uwem amọ.
54Ado amaanam Yisọs ikiwuọọñọke aba isaña anwa-anwa ke ufọọd mbon Yudia. Anye amaakeba mme mbed amọ ke esịd idʌñ a-akereke Ifrem, a-akpereke akpautatan.
55Akekpere ini akwa usọrọ mme Yuu e-ekoodo Basofa, uwak awo emaekpọñ esịd idʌñ edika Yerusedem adinam idem ammọ asana ke mbeñe idem nnọ Basofa. 56Ammọ emaeka iso eyem Yisọs, naña ammọ edaaha ke mme afe tembịd ammọ emaeka iso ebịp keed aken ete, “Afo akere so-o? Me anye idiidiighe usọrọ ami?” 57Mme ikpọ aku ye mme Farisi emaedọñ etob ete emaekịt nte Yisọs aba yak edidọkkọ mmimọ ma ekemʌm anye.
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
