Markusna Enjil 9
9
Bag. 9.
1Wide wetidirsum: „Aleged irgi wetidirri, indo ahan weri daran diarki binalmenili artina mulkigi gudraged tabungi nalmendann owollo.“
2Ugros gorijn aharro Butruskon Yagubkon wide Hanagongi agudegir aredir jebel sokebul werdogor kujsum. Teddo tinn owollo tenna shebah echelanossidirsum. 3Tenna kadechi desen aroyan abargesan telij nawite. Wala tenna arogid galig wer eltakkimnum. 4Wide tirgi binetidirsum Eliyagon wide Musegon. Wide tiri Yesugodon abainsan. 5Butrus wide bain Yesugi wetirsum: „Wo rabi, indo kewdar an̄nai adelma! Keri toskigi bawrun, wekkon endigir, wekkon Musendigir, wekkon Eliyandigir.“ 6Ter awesingi iyirbukomnum, mine sarkebusanged. 7Gem wekkon tararrigi garedirsum. Wide ter gemirton hisi wer bel targi wesum: „In anna tod dolida teran. Tekki gijirtirwe!“ 8Tinna hawalendo shutte urusan. Zol wekkongi elkomnan, Yesu agudeg anmenkin.
9Tiri jebelloton shugurburangon ter we tidirsum zol wekkodon tiri nalsanged bainmendangi, zolna tod diarroton imbelinbokon. 10Weregi hafaded ittiwrigi isigsan diarroton imbelar min engi. 11Tir wide tekki isigsan: „Won mine abajili aweran: Malen owollo Eliya bitan an?“ 12Ter rude wetidirsum: „Eliya owolgir bitan. Wide haja malegi tenn agarro battan. Won mine zolna toddogor bajbun?: ‚Tendogor dan digrigi wajiadton wide riziladton.’ 13Ama ai irgi wetidirrin, Eliya bidakosum. Wide tiri abirigsan malegi tekked awsan, tekked bajbun nawite.“
14Tenna hiraninai tasinna wattigi jema digri wekki tinna hawalendo nalsum, widegon aba: jiligon tirgi ajadlerangon. 15Tenna saayen jema kamil tekki nalosirgiheyirtakkossan. 16Wide bodirgi tekki salamesan. Ter abajiligi isigirsum: „Min wekked ir tirgi ajadleirsure?“ 17Wer jemachigon rude wesum: „Wo arif, ai anna todti ennai kiyedtasim, newerti mumud wer tekki egragingad. 18Tekki arinn agarro orijka, lufeka, wide neligi duskikidika asowigrin. Ai enna hiranigi wetidirsim: ‚Tur ososw an.’ Tirgon marossan.“ 19Ter rude wide tirgi wetidirsum: „Wo jil imankiyi, sittagbokon irgodon kewidrin? Wide sittagbokon irgi himleirrin? Aig abidi attawe!“ 20Tekk abidi tekki gedimedtatirsan. Tekki urusinna wattigi tenna saayen newerti tekkodon maaski arrigi ardir digirkidos marigekidi wide reyimekidisum. 21Yesu timbabki isigsum: „Sittagton in tekki atatirin?“ Timbab rudetirsum: „Tenna affikanerton. 22Gir digri wekkon igir luf undursum wide essirgon, tekki beri an. Ama er on haja wekki eskekin, argi shefegeir wide argi ineiru.“ 23Yesu tekki wetirsum: „ ‚Er on eskekin’ er aigi awena? Haja male esketakkin amnelnai.“ 24Tenna saayen todna timbab armossiged wigirgi wide wesum: „Amneri, wo anna tirti, anna imankiyikanegi ine!“
25Yesu uru nalsum jema abodjamengi. Wide newerti nijiski nehre wetirsum: „Wo newerti kobbul wide mumud, ai ekki awetirrin, teddoton bolos wide owittiged tedder tomen.“ 26Newerti arwij wide ardir shidaged todti lufe wide bolossum. Affi wide dibul galg esum. Zoli tekki mani hallo nalos wesan: „Diossum an.“ 27Yesu tekki tenna irton arrigi agsingad wide imbelossum.
28Ka werro torossinna kello tenna hirani tekki isigsan, agudanossann aharro: „Ar ma tekki eske osmensunde?“ 29Tirgi wetidirsum: „In newertin jinsi salagon wide dertin injarkonna masir abelmunum.“
30Mandoton belos Jelilged ta nogsan. Wide ter zol wer iyirmeningi birigsum. 31Mine tenna hiranigi akurkidirsum. Wide wetidirsum: „Zolna tod zolina ichir biselimtakkin. Wide tekki biberan. Wide tekki berosrann aharro ugros toskittir bimbelkanin. 32Ama tiri in weregi fehmemendigi tekki isigarki sarkisan.
33Wide Kafrinahumgir tasum. Kar dabungon isigirsum: „Minged iri ittiwrigodon darbir abainsure?“ Kitossan. 34Mine tiri ittiwrigodon darbir ahijesan, edi saï tiddeton dul ter engi. 35Ter tegos diminde owingarigi uwedtaïr wide tirgi wetidirsum: „Zol wer on owolaningi abirigkin, in malena ahar an agad, wide malena hadaman agad.“
36Ogicchoddekki ar seler ebros, wide tenna ogirro undured wetidirsum: 37„Zol ann erir affi wekki geblel, in ogicchod galigki, aigi geblesin galgin. Wide aigi geblelna tirtigon aigi ageblemnum, ama aigi ishinelgi.“
38Hana tekki wetirsum: „Arif, ari id wekki nalsun, shetanigi enn erir aturingon. Won argi tebaemeningad argon tekki gobrossun.“ 39Yesu wesum: „Gobirmenwe! Mine wekkon eskergi ann erir shida wekki awos, wide tenna saayen gelbe adder uski biwemnum. 40Zol arg abidimenil argodonum. 41Irgi essi dibite wekki an erir igidil, iri komisbuldichi erungad, aleged irgi wetidirrin, tenna ajr dabmunum.“
42„Wide zol in kinatoni aiged aamneligi atrel, tennai gen esum juna kulu wekki tenna eyer digros essin tur luf undurar. 43Enna i on ekki atrekin, meros. Ennai genum i habbekked ayarro tongi, i owiged jehenebir tosindogor wide ig atafitakkimenillo. 44Teddo tinna wigid adimnum, wide igkon atafitakkimnum. 45Enn os on ekki atrekin, meros. Ennai genum ayarro fogorayan tokin, osi owiged jehenebir lufe tosindogor, wide ig atafitakkimenillo. 46Teddo tinna wigid adimnum, wala ig atafitakkimnum. 47Won enna mis on ekki atrekin, kujos! Ennai genum misi wekked artina mulkir tokin, misi owiged jehenebir tosindogor. 48Teddo tinna wigid adimnum, wala ig atafitakkimnum.“
49„Mine wer nutin igked teran bumbudkolanin. 50Umbud adelum. Ama umbud on magaganoskin, minged tekki bumbudtirran? Innewertichir umbudkolanwe. Wide ittiwrigodon kuderarked aïwe!“
Published by the British and Foreign Bible Society in 1912.
