Matana Enjil 6
6
Bag. 6.
1„Innewertichigi harsewe inna sadagachigi ogjin owollo awmendungi, irgi ururanna jiradilo. Ikke awkurun, kere wekkongi iri komnun intimbab simer dalnaiton. 2Er on sadaga wekki awkin, bugki jommen enn owolged, habisi aawran nawre, jamachir wide darbir, ogjirton dulkanegi edirw an. Aleged irgi wetidirrin, tiri tinna keregi aressan. 3Ama enna sadagagi awin kello enna i mayindi iyirmen agad enna i iyindi aawingi. 4Enna sadagagi bokeged aw. Enn abo boker analilgon ekki er hugengi betirkanin.“
5„Salinna kellogon man habisi galganmen. Salana nosogidti adollan, jamachir wide darbir kute tebos, zolirton naltakkiw an. Aleged irgi wetidirrin, tiri tinna keregi aressan. 6Ama er salin kello enna kan tur toros, enna babki endogor kobos, enn abo boker dalgi salitir. Enn abogon, ekki boker analil, ekki bitirkanin enna keregi. 7Salirunna wattigon weregi digrigirmenwe umachi nawite. Mine tiri tinn ergir aweran werena digrikaneged bigijirtakkiran an. Tir galganmenwe. 8Mine inn abo iyirbun ir hajerungi, tekki iri elgon isigmendungon.“
9„Ikke teran iri saliwe: Wo abo simechir dal, enn er on gadistakkel. 10Enna mulk on tarel. Er awersingon awtakkel ariddogor, simer awbun nawite. 11Kalloton argi kikelgi olongu decchir. 12Annā zenbichigon argi wakedecchir, ari an̄dogochir zenbigi awiligi awaketidirrun nawre. 13Jeribadirgon argi undurirmen. Milirtongon argi gobrir. Mine endum mulkigon, gudragon, wide mejidton, elekenton dimen bokon. Amin.“
14„Ir on zoligi tinna zenbichigi waketidirkurun, intimbab simer dalgon inna zenbichigi biwaketidirin. 15Ir on zoligi tinna zenbichigi waketidirmenkurun, inn abogon irgi biwaketidirmunum inna zenbichigi.“
16„Dertigi injikrungon, inna koyigi suswed tebmenwe habisi nawite. Mine tinna koyigi aechelgirran, zoligi amintidirw an dertigi kagrangi. Aleged irgi wetidirrin, tiri tinna keregi aressan. 17Ama er dertigi injikin, enn urki numegir, wide enna koigon ew, 18mine er dertigi kagingi zoligi nalmenw an, ama enn abo boker dalg anmenkin. Abogon boker analil ekki seregir bijazyen.“
19„Wala dahira wekki ariddogor dahiremenwe, sus akalinn agarro, wide sada dann agarro, widegon magasi urburki awka amagrann agarro. 20Ama inna dahiragi simer dahirewe, teddo sus wekkon wala sada wekkon miligirmunum, wala magasi eske urbirigi awirgi bimagminan. 21Mine enna dahira dann agarro, teddo teran enna a bikewidkanin.“
22„Jitana komsedi misi teran. Enna mis on serey ekin, enna jita kamil bulin. 23Won enna mis on mili ekin, enna jita kamil bidulumaranin. Won dawi edder dal dulumay ekin won dulumana kid biminanin?“
24„Zol habber eskergi tirti owigi bijelimnum. Mine ya wekki tisos owittigi bidolin, ya owoldigodon dig tebos owittigi bihagren. Iri eskergi artigon sheyigongi bihadmemnun.“
25„Inin jiradilo irgi awetidirrin: Inna ayarna joro hememenwe, mingi bikallungon, wide binirungon. Wala inna jitachina jiradilo, minged bidegidirrungi. Ayar kalen dogor genmunum? Wide jita kaden dogor genmunum? 26Uru nalwe simena kawirtechigi. Tiri wala ewirminan, wala jorminan, wala shunachir jamegirminan. Inn abo simer dalgon akalkidirin. Won iri inna kidir tindogochir digriged genimnu? 27Won ni iddeton, hemekin, eskergi tenna nosogidir kew habitoddekki bizeyiden? 28Won ir ma undurarked hemeburun? Uru nalwe guna nawarigi, mine akeyirangi! 29Wala marisminan wala awedminan. In malegodon, irgi wetidirrin, Solum, tenna dulkane kotterro, undurkomnum ingurton wer undredangi. 30Guna magisey on, olongugi aeltakkil wide asalgon bijortakkil wide igir bilufetakkilgi, arti tekki ikke adegidikin, won irgi ingun dogor digriged bidegidirmunu? Wo iri ogji iman gelilkoni! 31Hememenwe, mingi bikallu an, mingon biniru an, walagon minged bidegtakkiru an. In malegi umachi ahemeran. 32Mine inn abo simer dal iyirbun ingu malegi iri hajeburungi. 33Ama owolgi artina mulkigon tenna seregidtongi weriswe. Ingu malegon irgi tendogor bikujurtidirin. 34Asalna jiradilo hememenwe. Mine asal tennewertin dogor bihemen. Ugros nutingi tenna marsigid bikiken.“
Published by the British and Foreign Bible Society in 1912.
