Lu̱ka̱ 22
22
Elema Judasi gool ci adawane Ye̱su̱
(Ma̱te̱yo̱ 26:1-5,14-16; Marko 14:1-2,10-11; Jon 11:45-53)
1I̱yo̱ko̱ ize ojon i̱i̱te̱ni̱ wa adahe ol wak Ya̱u̱do̱ Kwo̱o̱r wa Umunet wak iróng Amukcari,#22:1 Kwo̱o̱r wa Umunet wak iróng Amukcari: Adak olli Ya̱u̱do̱ kwo̱o̱r necu gwo̱o̱nya̱ turgerem, aadane nege i̱i̱te̱n bali eelanne Ta̱mu̱ta̱dde̱n ji̱ji̱ti̱gge̱k Masira. Aara nogo ngati e̱e̱ggi̱nne̱ du̱cca̱k. Akane kwo̱o̱r I̱i̱te̱ne̱ wa Va̱rda̱ngi̱nto̱. IkebLu̱ge̱z 12:17-20. akane I̱i̱te̱ne̱ wa Va̱rda̱ngi̱nto̱, 2kar alaani ci a̱ddi̱ki̱re̱ wawaco ki de̱me̱zzo̱k wak lo̱ti̱nno̱u̱ orongit gool ci kar ku̱ru̱kte̱ Ye̱su̱ lo̱mu̱k, eci nege o̱ngo̱o̱le̱ ebere cik ollu. 3I̱tto̱ zin Sitani zinin ci Judasi wa a̱nne̱k ol ne Iskariyot, een enne nuyait co̱de̱ nuyahe cik Ye̱su̱ wak e̱e̱ggi̱n omoto ki rama ko̱. 4Kar Judasi kuk ngati alaat cik olli wawaco ki lo̱ddi̱ki̱re̱ cik Ce̱e̱z wa Ta̱mu̱ta̱dde̱no̱ kar enne kozoz ki nogo gool ci kar enne kadawai Ye̱su̱. 5Atalit zin nege oroot kar kanycik nonno o̱ro̱bi̱ya̱. 6Elema zin Judasi zoz cinne̱ng ke̱, kar zin kuk korong gool ci kar ka̱gga̱me̱k nogo Ye̱su̱ ming a̱zze̱ zu̱we̱ to.
Ozol Ye̱su̱ ki nuyak da̱i̱ne̱t
(Ma̱te̱yo̱ 26:17-25; Marko 14:12-21; Jon 13:21-30)
7I̱ki̱ya̱ zin i̱i̱te̱ni̱ wagon adahe ol umunet wak iróng amunye kumukcarit, kar zin kotodongit nyoon ci a̱zze̱to̱ Va̱rda̱ngi̱nto̱.#22:7 Nyoon ci a̱zze̱to̱ Va̱rda̱ngi̱nto̱: Aanyik Ta̱mu̱ta̱dde̱n lo̱ti̱nno̱k Muses kar ku̱du̱wa̱k olli Israilo kapaktek nyoon kar Ta̱mu̱ta̱dde̱n kicin bi̱ye̱ abanyce ci tatuget cik ce̱e̱zi̱ cigge̱k Masire I̱i̱te̱ne̱ wa Va̱rda̱ngi̱nto̱. Azi zoz necu ne okko atin Ye̱su̱ een Nyoon ci Ta̱mu̱ta̱dde̱no̱ ci okko a̱vi̱la̱ mu̱nye̱n cik ol wak elemtta nonno lo̱o̱ta̱ ngatu ko̱ do̱o̱k. IkebLu̱ge̱z 12:13-15; Marko 14:12; Lu̱ka̱ 22:7; Jon 1:29-36; 1 Ko̱ri̱nto̱ 5:7; 1 Peturu 1:19. 8I̱tto̱n zin Ye̱su̱ Peturu ki Jon, a̱nne̱k ne, “Oot idimanit da̱i̱ne̱t cik I̱i̱te̱n wa Va̱rda̱ngi̱nto̱.”
9I̱jji̱nto̱ zin nege, “Orongnyet i̱nna̱ agit koot kidimanta da̱i̱ne̱t ne̱ke̱ nga?”
10O̱bo̱de̱k zin enne nogo, “Ming ovvo niga i̱zzo̱yu̱ Jerusalem, okko atin e̱e̱ti̱ ci odong í̱jjó̱ ci maamu a̱ru̱me̱kku̱ng gool. Unuwet nonno rok ce̱e̱z ci i̱zzo̱we̱ enne, 11kar izektek manyi ce̱e̱z ne, ‘A̱jji̱nne̱ de̱me̱zo̱i̱ti̱: I̱nno̱ ce̱e̱z ci e̱re̱nno̱u̱, kar atidic anna kadak Kwo̱o̱r ci Va̱rda̱ngi̱nto̱ ki nuyak cigannik?’ 12I̱ye̱le̱kku̱ng atidic enne ce̱e̱z ci walwali atadonik imma ta̱dde̱na̱, kar zin kanyak i̱jjó̱ cik ce̱e̱zu̱ do̱o̱k. Idimanit da̱i̱ne̱t ne̱ke̱ nginati.”
13Oot zin nege u̱mu̱dda̱ kaal ne̱ke̱ do̱o̱k ki baling u̱du̱wa̱k Ye̱su̱ nogo ke̱. Idimanit zin nege da̱i̱ne̱t cik I̱i̱te̱n wa Va̱rda̱ngi̱nto̱.
Da̱i̱ne̱t cik Manyi vu̱rrto̱
(Ma̱te̱yo̱ 26:26-30; Marko 14:22-26; 1 Ko̱ri̱nto̱ 11:23-25)
14Baling utube i̱i̱, a̱vvu̱to̱ zin Ye̱su̱ ki nuyak ciginnek ngati da̱i̱nto̱. 15Kar enne kizek nogo ne, “Korongi anna kadak ki i̱ge̱t I̱i̱te̱n wa Va̱rda̱ngi̱nto̱ ko̱ ming ngen kipira. 16Eci ka̱du̱wa̱kku̱ng i̱ge̱ta̱, iróng atin anna kadai da̱i̱ne̱t bo̱do̱k zee kakat zoz ci ba̱a̱li̱ne̱t ci Ta̱mu̱ta̱dde̱no̱ mo̱o̱le̱t.”
17Baling idima enne uduc, kar kaanyik Ta̱mu̱ta̱dde̱n zany kar kize ne, “Idimtta cu kar engerttek e̱le̱tti̱ cuggo̱k. 18Eci ka̱du̱wa̱kku̱ng iróng atin anna kaudi bo̱do̱k o̱ya̱u̱ cik vi̱no̱ zee ki̱ki̱ya̱ ba̱a̱li̱ne̱t ci Ta̱mu̱ta̱dde̱no̱.”
19Idima zin enne umune aanyik Ta̱mu̱ta̱dde̱n zany kar kubunyan, kar zin kaanyik nogo, izek ne, “Een necu ele cinanni anyonikkung i̱ge̱ta̱; u̱tu̱gu̱z gon niko kar abunna ming aadanang.”
20Kar go̱o̱le̱ necu, baling uduttet da̱i̱nte̱ idima enne uduc ci vi̱no̱, ize ne, “Een uduci necu olom wa een jor bi̱ye̱te̱ cigannik cik a̱ddu̱ta̱i̱ zo̱ze̱ cunno̱ng. 21Ma̱i̱je̱ a̱zzi̱ti̱ ci e̱e̱t ci okko atin adawana annit ko̱ kaavtte ki nonno kozol da̱i̱ne̱t ngatu. 22Okko atin Ngerrti E̱e̱to̱ ki bali ming u̱du̱ya̱i̱ ke̱, abarik o̱lle̱ nonga cik e̱e̱t ci adawa nonno.” 23A̱ka̱tte̱ zin nege i̱jji̱nne̱t e̱le̱tti̱ cigge̱k ngene orgene cinne̱ng ci atin okko ogon zoz necu.
Dangonet ci obod ki ddi̱ki̱rze̱t
24A̱ka̱tte̱ bo̱do̱k nege dangonet orgene cinne̱ng ngene ci a̱ddi̱ki̱re̱ ngatinne̱ng. 25Izek zin Ye̱su̱ nogo ne, “Alaata cik ol cik iróng een Ya̱u̱d idany ol cigge̱k kaale do̱o̱k; kar ol ne̱k a̱li̱ngli̱ng alaanzete cinne̱ng ko̱, kizeto ne nogo cik keelanna ol. 26Ma̱i̱je̱ niga iróng ogonnu niko. Abarik e̱e̱ti̱ ci a̱ddi̱ki̱re̱ ngatinno̱ng, abunna ming ogon ki do̱le̱c cidici, okko e̱e̱ti̱ ci abal ol orgene cunno̱ng, anyik ku̱tu̱gu̱ ki du̱ca̱i̱ti̱ cunno̱ng. 27Eci ngene ci a̱ddi̱ki̱re̱ kommog veelek, e̱e̱t ci aave lo̱o̱ta̱ ngati da̱i̱nto̱ icima e̱e̱t ci aanyik ol da̱i̱ne̱t? Iróng een e̱e̱t ci aave lo̱o̱ta̱ ngati da̱i̱nto̱ ko̱? Ma̱i̱je̱ anna kaave orgene cunno̱ng kogonni kiwagon du̱ca̱i̱ti̱. 28E̱e̱ggi̱nnu̱ niga ol cik emenannu ngatinanni ngati atimana ol. 29Kar anna ka̱a̱nyu̱ng ba̱a̱li̱ne̱t ci Ta̱mu̱ta̱dde̱no̱, ki baling aanya Baba annit co̱de̱ ke̱, 30kar atin niga wo̱ye̱ adakku da̱i̱ne̱t bak audenu ngati kaave anna ba̱a̱li̱nte̱ cinanni kar a̱vvu̱t lecerete, ettedu lo̱ki̱ko̱ ci booryyok cik Israilo e̱e̱ggi̱n omoto ki rama.
Amikzene Peturu Ye̱su̱
(Ma̱te̱yo̱ 26:31-35; Marko 14:27-31; Jon 13:36-38)
31“Si̱mo̱ne̱, Si̱mo̱ne̱, a̱jji̱nne̱ Sitani kar ketegelung i̱ge̱t kiwagon labina. 32Ma̱i̱je̱ anna kalawei i̱nne̱t Ta̱mu̱ta̱dde̱n, Si̱mo̱ne̱, kar wo̱ye̱ tu̱we̱ne̱t cunne iróng a̱zze̱. Kar ming okko i̱nna̱ uukce, eela gotonoggu tu̱we̱nta̱ kokkomit kak.”
33Ma̱i̱je̱ enne abarizek, “Manyi, kelemna anna kuk kecebe ki i̱nne̱t lagama icima ka̱da̱i̱ bu̱k.”
34O̱bo̱de̱k zin Ye̱su̱ nonno, “Ka̱du̱wa̱ki̱ i̱nne̱ta̱, Peturu, ming ngen tuulici kogok wazin necu, amikzena atin i̱nna̱ annit lak i̱i̱yo̱ azi ne iróng i̱nna̱ a̱gga̱ya̱n.”
35Izek zin Ye̱su̱ nogo ne, “Baling ki̱tto̱nnu̱ng anna i̱ge̱t ki̱zzi̱ rok o̱bo̱n ci o̱ro̱bi̱ya̱u̱, mu̱ge̱ icima caava, i̱llo̱i̱ da̱ gi̱i̱ imma ngatinno̱ng?”
O̱bo̱dde̱k zin nege, “I̱llo̱i̱, kanyaka ba̱li̱ye̱ kaal do̱o̱k.”
36Izek zin enne nogo ne, “Ma̱i̱je̱ i̱yo̱ko̱ ming anyakku niga o̱bo̱n ci o̱ro̱bi̱ya̱u̱, idimtta, ki mu̱ge̱ bu̱k; kar ming iróng niga anyakku nya̱tu̱ba̱t, ataltoi ru̱u̱m kar u̱tu̱yya̱ co̱de̱. 37E̱he̱rye̱ Warage ci Ta̱mu̱ta̱dde̱no̱, ‘I̱ti̱gi̱lte̱k ol nonno ki olli mu̱nye̱nu̱.’#Isaya 53:12 Ka̱du̱wa̱kku̱ng anna i̱ge̱ta̱ ogone atin kaala ne̱ko̱ ngatinanni. De̱de̱ zoz ci e̱he̱rye̱ zo̱ze̱ cinanni ki̱ki̱ya̱ zin akat mo̱o̱le̱t.”
38A̱nne̱k zin nuyaha nonno ne, “Manyi, cinno, iciko nya̱tu̱ba̱nya̱ ram.”
O̱bo̱de̱k zin enne, “Eleno ne̱ko̱.”
Ala Ye̱su̱ Ta̱mu̱ta̱dde̱n Biye ci I̱ngi̱ro̱u̱
(Ma̱te̱yo̱ 26:36-46; Marko 14:32-42)
39Uk zin Ye̱su̱ Biye ci I̱ngi̱ro̱u̱ kiwagon ko̱ la̱du̱n, kar nuyaha ciginnek kunuwet nonno. 40Baling ovvo nege azuca ngin neci, izek enne nogo ne, “Alac Ta̱mu̱ta̱dde̱n abunna atin iróng gi̱i̱ imma atimannung.” 41Izak enne uk reena ngatinne̱ng idic, akatek u̱zu̱ngti̱nne̱ kar kalawo kize ne, 42“Baba, ming elemi i̱nna̱, dima uduc ci piryanzeto ko̱ ngatinanni; iróng zoz cinanni abarik aanyik zoz cunne ku̱tu̱gu̱we̱.” 43I̱ye̱le̱k zin anjilo ci a̱kku̱ ta̱mu̱-kenga nonno ele kar kanyik nonno doiz. 44Icirit nonno zinin oroot, kar zin enne kalawo oroot, kar muluwa ciginnek ku̱tu̱gu̱zzo̱ kiwagon bi̱ye̱ta̱ cik ereti i̱i̱na̱k lo̱o̱c.
45Baling edeca enne lawinet, itinga i̱mi̱ro̱zi̱k nuyak, umuda enne nogo udungeta zo̱ze̱ ci omozine nege. 46I̱jji̱n zin enne nogo, “Nya ming adungnu niga ko̱? Itingaz je̱e̱na̱, alac Ta̱mu̱ta̱dde̱n kar abunna iróng niga i̱nna̱kku̱ timaninet.”
Ce̱bi̱ne̱t ci Ye̱su̱
(Ma̱te̱yo̱ 26:47-56; Marko 14:43-50; Jon 18:3-11)
47Baling ngen enne ozoz niko, i̱vi̱ta̱ koole, kar e̱e̱ti̱ ci een zara Judas een e̱e̱t co̱de̱ to̱ni̱a̱he̱ wak e̱e̱ggi̱n omoto ki rama ko̱, ci bali anyaha nogo. I̱ki̱ya̱k enne Ye̱su̱ kar zin kizza nonno, 48ma̱i̱je̱ Ye̱su̱ i̱jji̱n nonno, “Judas, adawa i̱nna̱ Ngerrti E̱e̱to̱ ngati izawe?”
49Baling icinnet nuyaha gi̱i̱ ci okko ogone, izeto zin nege ne, “Manyi, ketengedit ol ne̱ko̱ nya̱tu̱ba̱tnya̱i̱?” 50Etted zin e̱e̱ti̱ co̱de̱ ngatinne̱ng du̱ca̱i̱t ci alaan ci a̱ddi̱ki̱re̱ wawaco#22:50 Alaan ci a̱ddi̱ki̱re̱ wawaco: Ommog alaani ci a̱ddi̱ki̱re̱ wawaco ko̱ alaat cik olli wawaco eci een nonno do̱ ṯok ci gon i̱i̱zo̱ Ce̱e̱z wa Ta̱mu̱ta̱dde̱no̱ Ngin wa A̱li̱le̱ Oroot e̱rki̱ta̱ lak co̱de̱. Anyaha enne bi̱ye̱ cik kar kutuny mu̱nye̱n cigge̱k. Aave Ta̱mu̱ta̱dde̱n di̱ngdi̱ngo̱nta̱ Ngin wa A̱li̱le̱ Oroot, zoz zin ci iróng alaani ci a̱ddi̱ki̱re̱ wawaco ko̱ i̱i̱zo̱ ngintu i̱i̱te̱n imma e̱rki̱ta̱. IkebLeviticus 16; I̱bu̱ru̱ 9:1-7. itat ci a̱zzo̱ ko̱ ne, pur.
51Ma̱i̱je̱ Ye̱su̱ abarizek nonno, “Ma ngen ogonnu niko!” Kar enne ku̱u̱m e̱e̱t necu itat kar kangaru nonno kalal niko. 52Izek zin Ye̱su̱ alaat cik olli wawaco ki ddi̱ki̱ryyo̱k cik aciir wak ebek Ce̱e̱z wa Ta̱mu̱ta̱dde̱no̱, ki lo̱ddi̱ki̱re̱ wak a̱vvu̱na̱k nonno ne, “Kanyike anna ol kutuburret nong ngatinno̱ng ci a̱vvu̱na̱kka̱ng nya̱tu̱ba̱tnya̱i̱ ki colnyai ko̱? 53Kaave anna ki i̱ge̱t odohize reene ci Ce̱e̱z wa Ta̱mu̱ta̱dde̱no̱, iróng zin niga atadikang a̱zzi̱t. Ma̱i̱je̱ i̱yo̱ko̱ een necu i̱i̱ cunno̱ng ci ogone kaala mu̱hu̱ra̱.”
Amikzene Peturu Ye̱su̱
(Ma̱te̱yo̱ 26:57-58,67-75; Marko 14:53-54,66-72; Jon 18:12-18,25-27)
54A̱gga̱mi̱t zin nege Ye̱su̱ kar zin ko̱o̱tte̱ rok ce̱e̱z ci alaan ci a̱ddi̱ki̱re̱ wawaco. Unu zin Peturu nogo vu̱rrta̱ kar ka̱vvu̱ reena idic. 55Ma̱i̱je̱ baling a̱va̱dde̱k nege gwo̱o̱ re̱e̱nu̱n orgen kar ka̱vvu̱to̱ lo̱o̱ta̱ nga̱to̱de̱, i̱ki̱ya̱ zin Peturu a̱vvu̱ lo̱o̱ta̱ ki nogo. 56Icin zin du̱ca̱i̱ti̱ ci nga̱a̱ye̱ nonno ming a̱vvu̱ lo̱o̱ta̱ gwo̱o̱ya̱. Egelem zin nonno oroot kar kizek ol ne, “Aave ba̱li̱ye̱ e̱e̱ti̱ cu ki Ye̱su̱.”
57Ma̱i̱je̱ Peturu etezo ize ne, “Ngaa cu, iróng anna ka̱gga̱ nonno.”
58Imma bo̱do̱k nginti dici niko, icin e̱e̱ti̱ imma nonno kar kize ne, “E̱e̱ni̱ i̱nna̱ bu̱k e̱e̱t cinne̱ng co̱de̱.”
O̱bo̱de̱k zin Peturu nonno, “Nger, iróng anna ke̱e̱ni̱ e̱e̱t ci ol ne̱ke̱.”
59Kar baling edeccai saa co̱de̱, u̱du̱wa̱ bo̱do̱k e̱e̱ti̱ imma, “Ka̱gga̱ anna, aave ba̱li̱ye̱ e̱e̱ti̱ cu ki nonno, eci enne een e̱e̱t ci Ga̱li̱li̱.”
60Abarizek zin Peturu zoz neci, “Nger, iróng anna ka̱gga̱ zoz ci ozozi i̱nna̱ ko̱.” Baling ngen enne ozozi, ogok tuulici. 61Utuhuwe zin Manyi Ye̱su̱ kar kegelem Peturu. A̱a̱da̱ zin Peturu zoz bali Manyi ozozek nonno ke̱: “Ming ngen tuulici kogok wazin necu, amikzena atin i̱nna̱ annit lak i̱i̱yo̱.” 62Iyok zin Peturu uk reena uk u̱tu̱lu̱ oroot.
A̱gi̱d ol wak ebekce ko̱ Ye̱su̱
63A̱ka̱tte̱ ol balik ebek Ye̱su̱ zoz ci a̱gi̱dde̱ nege nonno kar ki̱bi̱cce̱t. 64U̱bu̱nge̱t nege ebere ciginnek kar kizettek ne, “Du̱wa̱ arizet cunne! Ngene ci a̱ru̱ki̱ i̱nne̱ta̱?” 65Kar ku̱du̱kta̱ kaal cik meelek odome nege nonno.
Abile Ye̱su̱ lo̱ki̱ka̱ ngati Pilato ki He̱ro̱d
(Ma̱te̱yo̱ 26:59-66; Marko 14:55-64; Jon 18:19-24)
66Ma̱i̱je̱ bali nge̱rre̱t, a̱vvu̱to̱ zin lo̱ddi̱ki̱re̱, alaat cik olli wawaco, ki de̱me̱zzo̱k wak lo̱ti̱nno̱u̱ nga̱to̱de̱, kar zin koole kanyaktak Ye̱su̱ nogo. 67I̱jji̱nne̱t zin nege nonno, “Ming e̱e̱ni̱ i̱nna̱ Ki̱ri̱sto̱, du̱wa̱kke̱ta̱.”
Abarizek zin Ye̱su̱ nogo, “Ming ka̱du̱wa̱kku̱ng anna i̱ge̱ta̱, iróng atin niga a̱tu̱yya̱ng, 68kar ming ka̱jji̱nnu̱ng anna i̱ge̱ta̱, iróng atin niga abarizzu. 69Ma̱i̱je̱ i̱yo̱ko̱ kuk, aave atin Ngerrti E̱e̱to̱ a̱tte̱ ci a̱zzo̱ Ta̱mu̱ta̱dde̱no̱ wa anyak komiz do̱o̱k.”
70I̱jji̱nto̱ zin nege do̱o̱k, “E̱e̱ni̱ zin i̱nna̱ Ngerrti Ta̱mu̱ta̱dde̱no̱?”
O̱bo̱de̱k enne nogo, “Ilemnyyu niga ming a̱du̱wa̱nnu̱ ke̱e̱ni̱ anna ngene.”
71Izeto zin nege ne, “Nya ming korong naga bbacak u̱gge̱ ko̱? Kiziyet naga utuge cinne ele.”
© 2018, Wycliffe Bible Translators, Inc. All rights reserved.
