Jon 18
18
Ovolonge Judasi Ye̱su̱ ka̱gga̱me̱ kecebe
(Ma̱te̱yo̱ 26:47-56; Marko 14:43-50; Lu̱ka̱ 22:47-53)
1Baling edeca Ye̱su̱ lawinet itingazzo zin ki nuyak kar kettedit tolol ci een Kidron oot ti̱ti̱me̱ co̱de̱. Aave da̱ moro cidici nginati, anyak keen cik i̱ngi̱ro̱u̱#18:1 Keet ci i̱ngi̱ro̱u̱: Biye cu, anyak keen cik meelek i̱ngi̱ro̱u̱. Okoli keet ci een i̱ngi̱ro̱c ko̱ o̱ya̱u̱ cik wo̱ye̱ adak ol icima amacca ol maal ci irez olli Ya̱u̱do̱ oroot ngati aahe da̱i̱ne̱t icima atukule urez. o̱to̱ne̱ co̱de̱ ke̱; kar zin enne ki nuyak ciginnek ki̱tto̱zo̱ ngin neci.
2A̱gga̱ zin da̱ Judasi bali okko ovolonge nonno ko̱ ngin neci ma̱rri̱t da̱ gon ming arumo Ye̱su̱ ki nuyak waginnek nginati. 3Odola Judasi ngati adawane Ye̱su̱, i̱vi̱ta̱ zin ki aciir cik Romi ki ddi̱ki̱ryyo̱k cik i̱tto̱na̱ alaata cik olli wawaco ki olli Varacisi. Anyak da̱ ol ne̱ke̱ urezwa ki ilanya ki i̱jjo̱ cik jo̱o̱ra̱k.
4Baling a̱gga̱ Ye̱su̱ kaal cik ovvo i̱i̱na̱k nonno ke̱ do̱o̱k, iyok uk u̱ru̱me̱k nogo re̱e̱nu̱n kar zin ki̱jji̱n kizek ne, “Ngene dim ette ci orongnyu niga ko̱?”
5O̱bo̱dde̱k nege nonno izettek ne, “Korongnya Ye̱su̱ wa orog wa een Nazeret.”
O̱bo̱de̱k zin Ye̱su̱ nogo bo̱do̱k izek ne, “Annit nenen icu, Ye̱su̱ wa orog neci een Nazeret ke̱.” Abile enne Judasi bali okko ovolonge nonno ke̱ ki nogo nginati niko. 6Baling ize Ye̱su̱ ne, “Annit nenen icu.” I̱mi̱rrte̱ ki vu̱rru̱t kar zin ku̱yu̱kte̱.
7I̱jji̱n bo̱do̱k Ye̱su̱ nogo dee, izek ne, “Orongnyu dim i̱ye̱ niga ngene?”
O̱bo̱dde̱k bo̱do̱k nege nonno izettek ne, “Korongnya Ye̱su̱ wa orog wa een Nazeret.”
8Izek Ye̱su̱ nogo ne “Ma wanai ming ku̱du̱wa̱u̱ng kizeung ne, annit nenen icu. Ming orongnyang annit, aanycik zin ol ciko koot.” 9Ming i̱i̱ta̱ zoz cu kar zo̱zo̱wa̱ balik u̱du̱wa̱ enne ke̱ kakat mo̱o̱le̱t: Ize zin enne ne, “Ngen zin kokoloz olle balik aanya ke̱ imma, Baba.”#Jon 6:39
10Uvuca zin Si̱mo̱ne̱ Peturu nya̱tu̱ba̱t ci da̱ anyak nyakuraru kar zin ketteda itat ci a̱zzo̱, ci e̱e̱t wa a̱li̱ngli̱ng ki alaan ci a̱ddi̱ki̱re̱ wawaco. (Een da̱ zara cik du̱ca̱i̱t neci ne Malkos).
11Izek Ye̱su̱ Peturu ne, “Bilo, bodek nya̱tu̱ba̱t cunne ko̱! Azi bong i̱nna̱ ne ko̱ngo̱o̱le̱ i̱yo̱ko̱ anna pirnanet ci aanya Baba kar kuk kipira ko̱?”
O̱o̱tte̱ ol Ye̱su̱ ngati e̱e̱t ci een Annas
(Ma̱te̱yo̱ 26:57-58; Marko 14:53-54; Lu̱ka̱ 22:54)
12E̱ce̱bi̱t aciiri ki ddi̱ki̱ryo̱i̱t wa a̱ddi̱ki̱rne̱ aciiru#18:12 Ddi̱ki̱ryo̱i̱t wa a̱ddi̱ki̱rne̱ aciir: Een enne ddi̱ki̱ryo̱i̱t ci a̱gga̱m aciir cik e̱e̱ggi̱n i̱bbo̱ng co̱de̱. ki lo̱ddi̱ki̱re̱ wak Ya̱u̱do̱ ke̱ Ye̱su̱. 13Anyakttak arrak e̱e̱t ci een Annas, i̱nyi̱k ci e̱e̱t ci een Kaipas. Een da̱ enne Kaipasi alaan ci a̱ddi̱ki̱re̱ wawaco e̱rki̱t neci. 14Kaipas ci i̱lo̱t ol ne̱k e̱e̱ggi̱n Ya̱u̱d ke̱, a̱nne̱k ne, “Abunna abarik ming a̱da̱i̱ e̱e̱ti̱ co̱de̱ olle wak e̱e̱ggi̱n Ya̱u̱d kar kuruget ol do̱o̱k.”#18:14 Abunna abarik ming a̱da̱i̱ e̱e̱ti̱ co̱de̱ olle wak e̱e̱ggi̱n Ya̱u̱d kar kuruget ol do̱o̱k: Ozoz Kaipasi zoz ci Ye̱su̱. IkebJon 11:49-50.
Etezine Peturu Ye̱su̱
(Ma̱te̱yo̱ 26:69-70; Marko 14:66-68; Lu̱ka̱ 22:55-57)
15Annu da̱ Si̱mo̱ne̱ Peturu ki nuyait imma Ye̱su̱. Ma̱rri̱t baling a̱gga̱ alaani ci a̱ddi̱ki̱re̱ wawaco nuyait neci, i̱tto̱ enne re̱e̱nu̱n ci alaano, 16ma̱i̱je̱ Peturu erewo tatuga eci re̱e̱nu̱no̱. Uk nuyaiti neci a̱gga̱ alaan ci a̱ddi̱ki̱re̱ wawaco ke̱ oboda, kar zin kozozik do̱le̱c ci da̱ a̱li̱ngli̱ng wazin neci, kar zin Peturu ki̱tto̱.
17I̱jji̱n zin do̱le̱c neci tatuga ke̱ Peturu, izek ne, “Iróng i̱nna̱ e̱e̱ni̱ nuyait imma ci ol wak edemez Ye̱su̱ ko̱?” Obodehe Peturu nonno izek ne, “A̱zze̱ to, ka̱mi̱ri̱.”
18Alali da̱ looci ba̱a̱li̱n neci oroot. Avadit da̱ du̱cca̱ha̱ ki ddi̱ki̱ryyo̱k cik a̱li̱ngli̱ng nginati gwo̱o̱ kar zin ka̱vvu̱tte̱k. A̱vi̱k Peturu gwo̱o̱ neci bu̱k.
I̱jji̱n alaani ci a̱ddi̱ki̱re̱ wawaco Ye̱su̱
(Ma̱te̱yo̱ 26:59-66; Marko 14:55-64; Lu̱ka̱ 22:66-71)
19I̱jji̱n zin alaani ci a̱ddi̱ki̱re̱ wawaco ko̱ Ye̱su̱ kaal cik obod ki nuyak cik edemez enne ko̱ ki kaal cik obod ki de̱mzi̱ne̱t cinne. 20Obodehe Ye̱su̱ nonno izek ne, “Kozozi gon zoz cinanni kiziyet ol do̱o̱k i̱i̱wa̱ labak, kar zin gon kedemez ol Ce̱e̱ze̱ wa Ta̱mu̱ta̱dde̱no̱ ki Ce̱e̱zi̱nne̱ wak Lawinto wak gon alutene olli Ya̱u̱do̱ nga̱to̱de̱. A̱zze̱ zoz ci ka̱du̱wa̱ lo̱mu̱k to. 21A̱jji̱nna̱ i̱ye̱ annit a̱jji̱na̱ka̱ nya? Ji̱n ol ne̱k gon azikna annit ming kedemze, a̱gga̱ ri̱t nege zoz ci ku̱du̱wa̱.”
22Baling u̱du̱wa̱ Ye̱su̱ zoz necu, apan e̱e̱ti̱ imma ci ojongzo ki Ye̱su̱ nonno ngu̱m eliya, kar zin ku̱cu̱b kizek ne, “Gool ci ozozike i̱nna̱ alaan ci a̱ddi̱ki̱re̱ wawaco necu?”
23Obodehe Ye̱su̱ nonno izek ne, “Ming ku̱du̱wa̱ ette zoz ci gerze, du̱wa̱ da̱ zoz neci, baling ku̱du̱wa̱ zoz ci zin een de̱de̱, apana zin gaganiko nya?”
24I̱tto̱ni̱k zin bo̱do̱k e̱e̱ti̱ ci een Annas Ye̱su̱ kuk ngati ngen e̱ce̱bi̱ne̱ niko kuk ngati alaan ci a̱ddi̱ki̱re̱ wawaco Kaipas.
Etezoi bo̱do̱k Peturu Ye̱su̱ kize lak i̱i̱yo̱
(Ma̱te̱yo̱ 26:71-75; Marko 14:69-72; Lu̱ka̱ 22:58-62)
25Baling ngen Si̱mo̱ne̱ Peturu a̱vi̱k gwo̱o̱, i̱jji̱n bo̱do̱k e̱e̱ti̱ imma nonno, izek ne, “Iróng i̱ye̱ i̱nna̱ bu̱k e̱e̱ni̱ nuyait imma olle wak gon edemez enne ko̱?”
Imma Peturu ize ne, “Ka̱mi̱ri̱.”
26Een da̱ du̱ca̱i̱ti̱ ci alaan ci a̱ddi̱ki̱re̱ wawaco Kaipas ko̱ boorit ci e̱e̱t bali etteda Peturu itat ke̱, adangek nonno zoz dee, izek ne, “Iróng i̱ye̱ ba̱li̱ye̱ anna kicini i̱nne̱t ming orkoryyu ki Ye̱su̱ aratawe ci i̱ngi̱ro̱u̱?” 27Etezo bo̱do̱k Peturu dee, ma̱i̱je̱ tuulici ogowa.
Ibil Ye̱su̱ lo̱ki̱ko̱ ngati alaan ci een Pilato
(Ma̱te̱yo̱ 27:1-2,11-14; Marko 15:1-5; Lu̱ka̱ 23:1-5)
28I̱nya̱ma̱ni̱t zin ol cik e̱e̱ggi̱n Ya̱u̱d Ye̱su̱ ce̱e̱ze̱ ci Kaipasi o̱o̱tte̱ ngati ddi̱ki̱ryo̱i̱t ci gaala cik Romi. Aala da̱ looci, kar zin ol cik e̱e̱ggi̱n Ya̱u̱d iróng orong ku̱tu̱lle̱t e̱le̱tti̱ ngati i̱zo̱we̱ orog ci e̱e̱t neci. Orong da̱ nege kar kadait I̱i̱te̱n wa Va̱rda̱ngi̱nto̱. 29Iyowak zin Pilato nogo reena, kar zin kizek ne, “Abac ette e̱e̱ti̱ cu zoz ci azi ne?”
30O̱bo̱dde̱k zin nege Pilato izettek ne, “Wo̱ye̱ ette ming iróng e̱e̱ti̱ cu een mu̱ju̱l, iróng wo̱ye̱ kanyahakin.”
31Izek Pilato ne, “O̱o̱tte̱ kar oot etteddek ba̱ci̱ cinne go̱o̱le̱ ci lo̱ti̱nno̱k cuggo̱k e̱le̱tti̱ne̱.”
O̱bo̱dde̱k ol ne̱k e̱e̱ggi̱n Ya̱u̱d ke̱ nonno izettek ne, “Iróng naga kanyaka komiz ci wo̱ye̱ kettedika e̱e̱t imma daiz.”
32I̱i̱na̱ zoz necu ki i̱yo̱ko̱ kar ki̱ye̱la̱i̱ zoz wa ozoze Ye̱su̱ gool ci okko enne a̱da̱kne̱.
33I̱tto̱ zin Pilato ce̱e̱z to, kar zin kutu Ye̱su̱ bu̱k kuk ki̱jji̱n kizek ne, “E̱e̱ni̱ i̱nna̱ de̱de̱ alaan ci Ya̱u̱do̱?”
34I̱jji̱n bo̱do̱k Ye̱su̱ nonno izek ne, “A̱kku̱ zoz cu zinine cunne yo, icima u̱du̱kta̱i̱ da̱ ette ol uggak zoz ci obod ki annita?”
35O̱bo̱de̱k zin Pilato nonno, izek ne, “Iróng anna ke̱e̱ni̱ Ya̱u̱de̱ni̱t? Ol wagunnek e̱le̱tti̱ ki alaat cik olli wawaco cik anyahanni i̱nne̱t rok annita. Abacu ette i̱nna̱ zoz ci azi ne?”
36Izek zin Ye̱su̱ Pilato ne, “Iróng alaanzet cinanni een ci lo̱o̱c cu, wo̱ye̱ ette ming kize anna alaan ci lo̱o̱tu̱, oorto wo̱ye̱ ette du̱cca̱ha̱ cigannik ki ol balik e̱e̱ggi̱n Ya̱u̱d a̱gga̱mnya̱ annit ke̱. Imma zin i̱yo̱ko̱ iróng alaanzet cinanni een ci lo̱o̱c cu.”
37Izek Pilato nonno ne, “E̱e̱ni̱ zin ette i̱nna̱ alaan?”
Obodehe zin Ye̱su̱ nonno izek ne, “Ilemi i̱nna̱ ming azi ne ke̱e̱ni̱ anna alaan ko̱. De̱de̱ ka̱ri̱ta̱i̱ zin ba̱li̱ye̱ anna zo̱ze̱ neci, kar zin zo̱ze̱ necu ki̱ki̱ya̱k lo̱o̱c kar abunna ming kokko ki̱ye̱le̱i̱ ol zoz wa een de̱de̱. Azikna zin ol do̱o̱k wak a̱gga̱ zoz wa een de̱de̱.”
38I̱jji̱n zin Pilato Ye̱su̱, izek ne, “Nya ci een de̱de̱?” Kar zin kiyok kuk reena ngati aavtte ol cik Ya̱u̱do̱ ke̱, kar zin kize ne, “Kamuda i̱llo̱i̱ gi̱i̱ imma ci abaci e̱e̱ti̱ cu kar kettedek nonno lo̱ki̱ko̱.”
Etteddek ol Ye̱su̱ daiz
(Ma̱te̱yo̱ 27:15-31; Marko 15:6-20; Lu̱ka̱ 23:13-25)
39“Azi zin keer cunno̱ng ne abunna ming koogakkung e̱e̱t co̱de̱ olle ne̱k e̱ce̱bje̱ ke̱, ming adakku I̱i̱te̱n wa Va̱rda̱ngi̱nto̱. Orongnyang koogaung ‘alaan wanno̱ng olli Ya̱u̱do̱’?”
40Egerenyit izeto ne, “A̱zze̱to̱, ma oogakket nonno! Oogaet abarik Barabas!” E̱ce̱bje̱ da̱ e̱e̱ti̱ ci een Barabas ke̱ ngati aburnek gaala nong kar ki̱tto̱ zari.
© 2018, Wycliffe Bible Translators, Inc. All rights reserved.
