Jon 17
17
Alaye Ye̱su̱
1Baling u̱du̱wa̱ Ye̱su̱ zoz necu, icin ta̱mu̱-keng kar kalawo, ize ne:
“Baba, i̱ki̱ya̱ i̱i̱te̱ni̱ wa ovvo ol ododoya annit ta̱la̱ke̱ca̱, kar ku̱bu̱lte̱ zara cik Ngerunne kar zin bo̱do̱k Ngerunne kanyik zar cigunnek ku̱bu̱lte̱. 2Aanya ba̱li̱ye̱ i̱nna̱ annit komiz ci kar ka̱gga̱me̱ ol do̱o̱k, kar zin bo̱do̱k kanyik anna ol ne̱ke̱ ruget wa aave udut bali aanya i̱nna̱ ke̱. 3A̱gga̱yi̱ atin nege i̱nne̱t rugete wa aave udut, ize Ta̱mu̱ta̱dde̱n wa een de̱de̱ kar zin bo̱do̱k ka̱gga̱yya̱ annit Ye̱su̱ Ki̱ri̱sto̱ wa bali i̱tto̱na̱i̱ ke̱ nenen necu. 4Kanyiya zar cigunnek ku̱bu̱lte̱ lo̱o̱ta̱ ngati kedecai li̱ngli̱ngo̱n bali aanya i̱nna̱ ku̱tu̱gu̱ ke̱. 5I̱yo̱ko̱ zin Baba, anyik zar cigannik ku̱bu̱lte̱ ngu̱me̱ cunne bu̱le̱nte̱ bali kanyak ki i̱nne̱ta̱ la̱du̱n baling ngen keteehenye looci ke̱.
Alawonik Ye̱su̱ nuyak waginnek
6“I̱yo̱ko̱ zin ki̱ye̱le̱ya̱ ol balik aanya i̱nna̱ annit lo̱o̱ta̱ ke̱ ka̱gga̱yi̱ i̱nne̱t ju̱rru̱m. E̱e̱ggi̱n ba̱li̱ye̱ nege ol cigunnek kar zin i̱nna̱ inya annita, o̱to̱ngo̱o̱ltte̱ zin nege kaal cik edemezi i̱nna̱. 7A̱gga̱c i̱yo̱ko̱ kaal cik aanya i̱nna̱ annit ko̱ do̱o̱k, ming e̱e̱ggi̱n kaal cigunnek. 8Ku̱du̱wa̱ha̱ nogo zo̱zzo̱k balik a̱du̱wa̱ka̱ i̱nna̱ annit ke̱, ma̱i̱je̱ nege elemtta no̱ngi̱tto̱n ne̱ke̱. A̱gga̱c nege la̱du̱n ka̱kku̱ni̱ anna ngatunne, kar zin ku̱tu̱we̱t ming een i̱nne̱t ci i̱tto̱na̱na̱n. 9Kalawonik anna nogo, iróng kalawonik ol wak iróng a̱tu̱we̱, kalawonik ol wak aanya i̱nna̱ annita do̱, ma̱rri̱t nege ming izeto ol cigunnek. 10E̱e̱ggi̱n ol cik kanyai anna ko̱ do̱o̱k cigunnek, ovvo ne̱k anyai i̱nna̱ ko̱ do̱o̱k cigannik. A̱bu̱le̱ zin zara cigannik zo̱ze̱ necu. 11I̱yo̱ko̱ zin kobodaki i̱nne̱t ta̱mu̱-kenga, ngen zin ol wak a̱tu̱we̱ irahek lo̱o̱ta̱. Baba wa A̱li̱le̱, zuute nogo zare wagunnek a̱di̱ngdi̱nge̱, zar balik akanneka i̱nna̱ annit ke̱, kar ko̱do̱ye̱ nege, ki i̱yo̱ko̱ anna ki i̱nne̱ta̱. 12Baling ngen kaavtiya bu̱k, kebei ba̱li̱ye̱ nogo doize bali aanya ke̱. Ngen zin e̱e̱ti̱ imma ngatinne̱ng ki̱zzi̱, kize Judas do̱ bali u̱du̱ya̱i̱ kize gerza ci atin edez Ta̱mu̱ta̱dde̱n nonno, kar zoz cu kakat mo̱o̱le̱t Warage ci Ta̱mu̱ta̱dde̱no̱.
13“Kobodaki i̱nne̱t ta̱mu̱-kenga, ku̱du̱wa̱ha̱ ba̱li̱ye̱ kaal ne̱ke̱ baling ngen kaavtiya ki nogo bu̱k lo̱o̱ta̱, kar demezyaha cigannik katalto oroot ngatinanni. 14Ku̱du̱wa̱ha̱ nogo zoz cunne abarik zin ol wak iróng a̱tu̱we̱ lo̱o̱ta̱ ngatu, amartoi nogo, ma̱rri̱t nege e̱e̱ggi̱n ol wak a̱tu̱we̱, iróng ngen e̱e̱ggi̱n olli lo̱o̱tu̱, ki i̱yo̱ko̱ anna ming iróng ngen ke̱e̱ni̱ ci lo̱o̱tu̱ ko̱. 15Iróng zin i̱yo̱ko̱ kalayi kar eenyek demezyak wagannik lo̱o̱ta̱ ngatu, abarik kalayi kar zuute nogo lo̱rye̱nta̱. 16Iróng bo̱do̱k nege ngen e̱e̱ggi̱n olli lo̱o̱tu̱ ki i̱yo̱ko̱ anna ming iróng ngen ke̱e̱ni̱ e̱e̱t ci lo̱o̱tu̱ ko̱. 17Anyik nogo ka̱vvu̱to̱ do̱ ki̱li̱le̱c kar ke̱de̱me̱zi̱t zoz cunne wa een de̱de̱, 18ki baling i̱tto̱na̱na̱ i̱nna̱ annit lo̱o̱c ki̱ki̱ya̱ ku̱du̱wa̱k ol zoz cunne ke̱, ki̱tto̱nni̱ bo̱do̱k anna nogo kar koot kuwaktek ol zoz cunne lo̱o̱co̱we̱. 19Kanyiya anna ele cinanni ki̱li̱li̱ la̱du̱n, kar ki̱li̱ngli̱ngo̱zi̱k nogo, kar nege kabaito zo̱ze̱ ci een de̱de̱ udut.”
Alawonik Ye̱su̱ ol wak a̱tu̱we̱ do̱o̱k
20“Iróng lawinet cinanni een cinne̱ng do̱. Kalawonik ol ne̱k atin elemnana annita zo̱ze̱ cinne̱ng, 21kar nege do̱o̱k kurumte ko̱do̱ye̱, Baba ki i̱yo̱ko̱ ming ko̱do̱ye̱ anna ki i̱nne̱t ko̱. Iróng ucca nege bu̱k o̱do̱ye̱ kar ol cik lo̱o̱tu̱ ko̱ kelemit ming een i̱nne̱t ci da̱ i̱tto̱na̱na̱ annit! 22Kanyiya anna nogo ki̱di̱ngdi̱nga̱ni̱t ol ki bali aanya i̱nna̱ ke̱, kar nege kizeto ol co̱de̱ ki i̱yo̱ko̱ ming ko̱do̱ye̱ naga ko̱. 23Ko̱do̱wi̱na̱ anna ki nogo kar zin bo̱do̱k i̱nna̱ ki annita ko̱do̱ye̱. Anyik bai nogo kurumte ko̱do̱ye̱ ṯok kar anyik ol wak lo̱o̱tu̱ ka̱gga̱c ming een i̱nne̱t ci i̱tto̱na̱na̱n, irezzit zin nogo ki bali ming irezang annit ke̱.”
24“Baba, korongi ol ne̱k aanya ko̱ koot ka̱vvu̱to̱ nginati kokko kaave anna ke̱, kar kicinnet bu̱le̱ne̱t cinanni bali aanya i̱nna̱ ke̱ ma̱rri̱t ireza i̱nna̱ annit baling ngen keteehenyai looci.”
25“Baba wa abunna, ming iróng ol cik lo̱o̱tu̱ a̱gga̱yi̱ i̱nne̱t nu̱nu̱n, ka̱gga̱yi̱ anna, a̱gga̱ zin demezyaha cigannik niko ming i̱tto̱na̱na̱ i̱nna̱. 26Ku̱du̱wa̱ha̱ anna zar cigunnek nogo ka̱gga̱c, kemenna kanyik, ka̱du̱wa̱i̱ ka̱gga̱yi̱ kar rezinet wa ireza i̱nna̱ annit ka̱vvu̱ ngatinne̱ng bu̱k kar zin anna bu̱k ko̱do̱ye̱wa̱ ki nogo.”
© 2018, Wycliffe Bible Translators, Inc. All rights reserved.
