PIANPATNAK 6
6
Mihing i Ngitlohnak
1Leihum buppiah mihing cu pungzai sesemin, canu tampi hing haw hi,#Job 1:6; 2:1; 2pathian i capa ten mah khanglai a muh haw ten mawi a sakzet haw taktoh cu a deih haw mi tengin huai haw hi. 3Topa in, “Mihing tei lakah ka hawvang cu kumkhua in umtik tukma toh ing, itahim titale taksa neimi haw hi. Tu pepan kum za le sawm nih sangin tam saw nung haw ma toh hen,” tin ti hi. 4Mahlai khan le mahnung khan hei ten vanmi ten leihum numeite zaupihin, a hin haw mi cate cu mi ngengpi hi haw hi. Amuhte cu tanglaih khan a, mi minthang le mi ngalphazette na hi haw hi.#Mipum 13:33;
5Pathian in, leihummi hempoh cu mipha ngawl ngeh haw in, a lungmu sung hawah ngaihsutnak sesuak bek dim hi tih cu a theih ten,#Mt 24:37; Lk 17:26; 1Pet 3:20; 6leihumah mihing a bawl cu siklehzet hi. 7Mah hangin, “Ka bawlsa mihing hempoh, ilai banglaiah a um haw hei in, siatsuah khawng tung. Ngamsa hempoh le vano hempoh vang siatsuah khawng tung, ka bawl cu siklehzet ing,” tin ti hi. 8Mahnaven Noah humah Topa cu a lungdam hi.
Noah
9-10Noah i cate cu hite haw hi; capa pa thum nei in, Shem, Ham le Jafet hi. Noah cu miphazet hi in, ama khan sungah amah pa khat bek Pathian tuah pawlkomdun haw hi.#2Pet 2:5; 11Mahnaven midang hempoh cu Pathian i maiah sehuaizet haw in, a sehuaidan haw cu khua hempoh ah zaito pepel hi. 12Pathian in, leihum cu pha ngawl zetin mu hi, itahim titale mi hempoh phatngawlnak tuah dim haw hi.
13Pathian in, Noah lakah, “Mihing cu leihum pen botik tukin ngaisung zo ing. Siatsuah khawng tung, itahim titale a bawl haw mi sualnak cu leihumah dim hi. 14Nangma ca in, thingpha phun tuah timbaw bawlin hi. A sungah khan tampi bawl inna, a sunglam le a pualam hempoh cu caknai noihin hi. 15Mah timbaw cu pi za li le sawm nga sau, pi sawm salih le pa nga zal, pi sawm li le pa nga sangin bawlin hi. 16A khuh bawl inna, a khuh le a pang laklawh cu letmah sawm le liat khawihin hi. Thuah thumin bawl inna, a panglamah kongka bawlin hi. 17Leihumah tuihau tungtik tung a, nunnak a neimi hempoh siatsuah khawng tung hi. Leihum a, a nungmi hempoh thi khawng haw tuk hi. 18Mahnaven nangmah tuah thutiamnak bawl tung. Na zi, na capate le a zi haw tuah timbaw sungah tum un hi. 19Nunnak a neimi hempohin nangmah tuah a nun theihnak haw tukin ngamsa namkim, a nu le pa kop khat tenin, timbaw sungah khumin hi. 20Vano le ngamsa namkim lak pen a ngeng hihen, a neu hihen pa nih tenin, a nun theihnak haw tukin timbaw sungah tumpihin hi. 21Eihpha tui le an namkim cum inna, nangmuh le amuh tei ca in koihin hi. Hihi cu timbaw sung pen na eih tuk uhmi,” tin ti hi. 22Pathian i hilhmi bangkekin Noah in bawl hi.#Heb 11:7;
Ngawm Bible © Bible Society of Myanmar, 2014.
