PIANPATNAK 3
3
Mihing i Thungaih Ngawlnak
1Pathian i bawlmi nganhing hempoh lak pen ngulpi cu a awklawl mahtak hi. Ngulpi in numei nu i lakah, “Pathian in, huan sung thingkung pa kha khat i ngah ei pahsuh un tin, ti ngangai maw?” tin dong hi.#Mang 12:9; 20:2;
2Numei nu in, “Huan sung thingngah hempoh ei thei ung,” 3mahnaven “Huan laizang a ummi thingngah cu ei thei ma ung. Pathian in mah thingngah cu ei tukma uh ci, a zen hei zen tukma uh ci, na ei uh tale, thi tuk uh ci, ti hi,” tin ngulpi cu donleh hi.
4Ngulpi in, “Imah tuk, thi hihim tukma uh ci. 5Na ei uh tale na eih ni uhin, na mit uh vak tuk a, Pathian amah bangin, a sia le pha theih theihnak nei tuk uh ci, tihmi Pathian in, a theihsa hangin a khammi hi,” tin numei nu i lakah hilh hi.
6Numei nu in, huan laizang a, thingkung i mawidan le a ngah a uk oldan cu mu in, cihnak cu iti zahin pha tuk him tin ngaisung hi. Mah hangin thingngah cu thawi in, ei hi. A pasal lakah pia in, a pasal vangin, na ei lualuam bok hi. 7Thingngah a eih celh bek haw ten theih theihnak nei in, thacang a hih haw lam theidunin, theipi ceh khui khawmin, hupdun haw hi.
8 Topa Pathian cu mah ni taklamin huan sungah hungin, a hun thawm a zak haw ten huan sung thingcam lakah ngelh haw hi. 9Mahnaven Topa Pathian in, “Ilai ah um nge cim?” tin, mipa cu sam hi.
10Mah mipa in, “Huan a, na hun thawm ka zak ten, thacangin um, ka hih hangin lau in ngelh ing,” ti hi.
11Pathian in, “Akua in kaw thacangin, na um lam a hilhtu? Thingngah ei pahsun ka tihmi ei cim?” tin dong hi.
12Mah mipa in, “Keimah tuah um langkhat tukin na piakmi numei in thingngah cu pia in ei zo ing,” ti hi.
13 Topa Pathian in, numei nu i lakah, “Ita hi bangin bawl cim?” tin dong hi.
Numei nu in, “Ngulpi in zolin ei ing,” tin ti hi.#2Kor 11:3; 1Tim 2:14;
Pathian i Thukhennak
14 Topa Pathian in, ngulpi lakah, “Hi bangin dantat tung hi. Ngamsa hempoh lak pen nangmah bekin hih tamsiatnak cu thuak tuk ci. Tu pepan na pumin bokvak tuk ci a, na nunsung hempoh na eih tukmi an cu leivul hi tuk hi. 15Numei nu tuah ngalduntik tung a, na casuan uh tianin ngaldun tuk uh ci. Amuh ten na lu supeek haw tuk a, nang vangin, a kecawk cik tuk ci,” tin ti hi.
16Pathian in, numei nu i lakah, “Nau na pai ten na haksatnak khangtik tung. Na hin ten na natnak cu pungtik tung. Mahti bang ahi hei in, na pasal cu deihzet leng tuk ci a, nangmah uk tuk laih hi,” ti hi.
17Pathian in, mipa i lakah, “Na zi thu ngai saw na hih ten, eih tuk ngawl ka tihmi thingngah na eih hangin, leingam cu nangmah hangin tamsiatin um hi. Na pumcawmnak tukin na nun sung hempoh cim zetin nadek tuk ci. 18Leisung pen ling le so, hiam le hampa phunkim po tuk a, mahlai a po mi hampa cu ei tuk ci. 19Leivul tuah bawlmi na hih hangin leivul na suahleh tian, na nunnak tukin na khawum tulveu in nadek tuk ci. Leivul tuah bawlmi na hih hangin leivul lengin suakleh tuk ci,” ti hi.
20Adam in, a zi cu mi hempoh i nu a hih hangin Evi, tin sam hi. 21Topa Pathian in, Adam le a zi ca tukin savun puan bawlsakin silhtik hi.
Huan Pualam Ah Hawlvawk Co Haw
22 Topa Pathian in, “Atu-in mihing cu eimuh bangin a sia le pha khen thei zo haw hi. Nunnak thingngah ei in, kumkhua in, nung sual kha haw tuk hi.” 23Mah hangin Topa Pathian in, mihing cu amah a bawlnak lei bungleh tukin Eden huan pen hawlvawk hi. 24Pathian in mihing cu hawlvawkin nunnak thingkung elah a kuamah i hun ngam ngawlnak tukin huan i nisuahnak lamah Cherubim le a de zawzokin, a pei vuvungmi ngalnam koih hi.
Ngawm Bible © Bible Society of Myanmar, 2014.
