PIANPATNAK 1
1
Pianpatnak Thu
1Amasabelin, Pathian in lei le vante piangtik hi. 2Lei cu mellim nei ngawlin a lawngpi in um hi. Khuathimin tui thukpi cu khuhin, Pathian i hawvang cu tuipi humah um hi.
3Pathian in, “Khuavak um hen,” a tih ten vaknak cu um hi.#2Kor 4:6; 4Pathian in, a zoh ten pha ti hi. Pathian in vaknak cu thimnak lak pen khenkhuai hi. 5Vaknak cu “Sun” tin samin, thimnak cu “Zan” tin sam hi. Taklam cu boin, zinglam heng hi, mah ni cu ni khatnak hi.
6Pathian in, “Tuipi khen nihin, a khentu tukin van kuumpi um hen,” a tih ten a tihnak bangin um hi.#2Pet 3:5; 7Mah van kuumpi cu Pathian in bawlin, nuailam tui le humlam tui cu khen hi. 8Pathian in mah van kuumpi cu “Van” tin sam hi. Taklam boin, zinglam heng hi, mah ni cu a ni nihnak hi.
9Pathian in, “Leiko lang tukin van nuai a, tuite cu munkhatah khawmdun haw tahen,” tin thu a piak ten a tihnak bangin piang ngangai hi. 10Pathian in leiko cu “Leihum” tin samin, munkhatah a khawmdunmi tui cu “Tuipi Thuanthum” tin sam hi. Pathian in, a bawlsate a zoh ten pha hi, tin ti hi. 11Pathian in, “Leihum pen thingkung, hamkung a phunkim, ci a neimi le ngah a neimi piang hen,” tin thu a piak ten a tihnak bangin piang ngangai hi. 12Mah hangin ci a neimi le ngah a neimi thingkung, hamkung namkim cu leihum pen suaktik hi. Pathian in, a bawlsate a zoh ten pha hi, tin ti hi. 13Taklam boin zinglam heng hi, mah ni cu a ni thumnak hi.
14Pathian in, “Sun le Zan khenkhuaitu tukin, ni le ha, kum khentu tukin le biaknak puai sialnak tukin vanah vaknakte um hen; 15vanah vak haw tuk a, leihumah vaknak pia haw tuk,” ti in, a tihnak bangin um haw hi. 16Pathian in vaknak ngengpi pa nih bawlin, sun hun uktu tukin ni bawl a, zan hun uktu tukin hade le aksi vang bawl hi. 17Leihum vaktiktu tukin hi vaknak cu Pathian in vanah koih hi. 18Sun le zan uktu tukin le vaknak le thimnak khentu tukin Pathian in, a bawlsate a zoh ten pha hi, tin ti hi. 19Taklam boin zinglam heng hi, mah ni cu a ni linak hi.
20Pathian in, “Tuisung a nungmi lunghing namkim cu tuipi pen piang hen, leihum huih lakah vanote leng haw hen,” tin ti hi. 21Mah hangin Pathian in tuisung a, lauhuai lunghing ngengpite piangtikin, tuisung a um, a nungmi phunkim piangtik hi; mahten vano phunkim vang bawl hi. A bawlsate a zoh ten Pathian in pha hi, tin ti hi. 22Pathian in, “Tuisung a nungmi nganhingte cu pungzai unna, tuipi thuanthumah dim khawng un, vanote vang pungzai un,” tin muicu pia hi. 23Taklam boin, zinglam heng hi, mah ni cu a ni nganak hi.
24Pathian in, “Inn ngulh nganhing phunkim le hampa lak a, nganhing a ngeng le neu in hihen, bokvak namkimin, leihum pen piang haw tahen,” ti in, a tihnak bangin piang paih hi. 25Pathian in inn ngulh le nganhing a ngeng le neu hihen, bokvak a phe theimi hempoh bawl hi. Pathian in, a bawlsate a zoh ten pha hi, tin ti hi.
26Pathian in, “Mihing bawl toh nung; eimu melsuun in, eimuh bang hi haw tuk hi. Tui sungum ngasa le vanah a lengmi vano tei humah hihen, inn ngulh nganhing le ngamsa a ngeng a neu humah hihen, thunei haw tuk hi,” tin ti hi.#1Kor 11:7; 27Mah hangin Pathian in mihing bawl hi; Ama melsuunin, pano le numei bawl hi.#Mt 19:4; Mk 10:6;#Pian 5:1-2; 28Pathian in amuhte cu muicu pia a, “Ca tampi nei in, pungzai unna, leipi hi luahin, uk un hi. Tuisung ummi ngasa hihen, leihum a vakmi ngamsa namkim, a ngeng le neu in le van a, vano hempoh humah thuneihnak pia ing,” tin ti hi. 29Mah hum pen Pathian in, “Anci phunkim le thingngah phunkim cu na eih tuk uhin pia ing, ti hi. 30Vano phunkim le nganhing a ngeng le neu namkim tei eih tukin hamhing le thingngah pia ing,” ti hi. A tihnak bangin na cang hi. 31Pathian in, a bawlsa hempoh a zoh ten, pha leita, tin ti hi. Taklam cu boin, zinglam heng hi, mah ni cu a ni luknak hi.
Ngawm Bible © Bible Society of Myanmar, 2014.
