Ala Kalɔ Buse 5
5
Kalɛ Na Bekyuli Bélie Ngba Ɔ́si Adam Útédu Noa Lɛlɔ
1Kalɛ na Adam údie kaba na bénweni bése lɛlɔ kɔtɛ ndi ɔmɛni.
Uwi ɔni na Katɔti údie ukyuli ni, údie-nwu na anwu Katɔti udu kenye. 2Na údie-ma na badi ɔnana ku uleku. Na úte-ma kusɛ kusɛ. Na uwi ɔni na údie-ma mmɔ ni, ɔ́sia-ma lɛnyi ɔnii ukyuli.
3Adam ɔ́ƒɔ akwa eti anyɔ ku avlaatɛ (130) na ɔ́wɔ ubi ɔnanabi na ɔ́lɛ-nwu na nwuna udu kenye. Na ɔ́sia-nwu lɛnyi ɔnii Set. 4Ka Adam ɔ́wɔ Set kama ni, ɔ́sɔ úlie akwa eti leevu-aku (800) na ɔ́wɔ bebi bananabi ku belekubi bamba lɛnɔ asa na úkpi. 5Anwuɔsu Adam akwa ani na úlie ngba ƒui ndi akwa eti leevu-maane ku avlaatɛ (930).
6Ɔmmɔ kama ni, Set lɛnɔ ɔ́ƒɔ akwa eti anyɔ ku ɛlɔ (105) asa na ɔ́wɔ Enos. 7Uwi ɔni na Set ɔ́wɔ Enos kama ni, ɔ́sɔ úlie ngba akwa eti leevu-maane ku maatɛ (807) úbu na ɔ́wɔ bananabi ku belekubi bamba lɛnɔ. 8Anwuɔsu nwuna akwa ani ƒui na ɔ́ƒɔ asa na úkpi adi akwa eti leevu-yaalenwi ku leevu-inyɔ (912).
9Ka Enos ɔ́ƒɔ akwa liti ku aavlene ni, ɔ́wɔ Kenan. 10Na Enos ɔ́sɔ úlie ngba akwa eti leevu-aku ku leevu-ɛlɔ (815) úbu na ɔ́wɔ bebi bananabi ku belekubi bamba. 11Anwuɔsu Enos akwa ani ƒui na ɔ́ƒɔ asa na úkpi adi akwa eti leevu-maane ku ɛlɔ (905).
12Ɔmmɔ kama ka Kena ɔ́ƒɔ akwa liti ku aavlanyɔ (70) ni, ɔ́wɔ Mahalalel. 13Na Mahalalel bɔwɔ kama ni, Kena ɔ́sɔ úlie ngba akwa eti leevu-aku ku aavlene (840) úbu na ɔ́wɔ bananabi ku belekubi bamba. 14Anwuɔsu akwa ani ƒui Kena ɔ́ƒɔ asa na úkpi adi akwa eti leevu-maane ku leevu (910).
15Ka Mahalalel ɔ́ƒɔ akwa liti ku leevu-ɛlɔ ni, ɔ́wɔ Yared. 16Na Yared bɔwɔ kama ni, Mahalalel ɔ́sɔ úlie ngba akwa eti leevu-aku ku avlaatɛ (830) úbu na ɔ́wɔ bebi bananabi ku belekubi bamba. 17Anwuɔsu Mahalalel akwa ani ƒui na ɔ́ƒɔ asa na úkpi adi akwa eti leevu-maatɛ ku aavlene-ɛlɔ (895).
18Ɔmmɔ kama ka Yared ɔ́ƒɔ akwa eti atɛ ku leevu-inyɔ (162) ni, ɔ́wɔ Henok. 19Na Henok bɔwɔ kama ni, Yared ɔ́sɔ úlie ngba akwa eti leevu-aku (800) úbu Na ɔ́wɔ bebi bananabi ku belekubi bamba. 20Anwuɔsu akwa ani ƒui na Yared ɔ́ƒɔ asa na úkpi adi akwa eti leevu-yaalenwi ku liti ku leevu-inyɔ (962).
21Ka Henok ɔ́ƒɔ akwa liti ku leevu-ɛlɔ ni, ɔ́wɔ Metusala. 22Na Metusala bɔwɔ kama ni, Henok ɔ́siaku Katɔti kama geen akwa eti aku (300) na ɔ́wɔ bebi bananabi ku belekubi bamba. 23Anwuɔsu akwa ani ƒui na Henok ɔ́ƒɔ adi akwa eti maatɛ ku leevu-ɛlɔ (365). 24Na Henok ɔ́siaku Katɔti kama geen ɔni na Katɔti útiku-nwu ɔ́tɔlɔku na ɔdi ɔ́sɔ útanu-nwu kudii.
25Ɔmmɔ kama ka Metusala ɔ́ƒɔ akwa eti atɛ ku avlaatɛ-maatɛ (187) ni, ɔ́wɔ Lamek. 26Na Lamek bɔwɔ kama ni, Metusala ɔ́sɔ úlie ngba akwa eti leevu-ɛlɔ ku avlaatɛ-inyɔ (782) úbu na ɔ́wɔ bebi bananabi ku belekubi bamba. 27Anwuɔsu akwa ani ƒui na Metusala ɔ́ƒɔ asa na úkpi adi akwa eti leevu-yaalenwi ku leevu-yaalenwi (969).
28Ka Lamek ɔ́ƒɔ akwa eti atɛ ku avlaatɛ-inyɔ (182) ni, ɔ́wɔ ɔnanabi. 29Na ɔ́sia-nwu lɛnyi ɔnii Noa. Mmɔ na ɔ́su ɔnini, “Ubi ɔmmɔ ndubɔda-bu udie abi ani na buubó na buunú ɔlɛ geen na bula enu kabla kani na bɔɔbla kemmo ka Katɔti úwida kalɔ kammɔ ƒui ɔsu.” 30Na Noa bɔwɔ kama ni, Lamek ɔ́sɔ úlie ngba akwa eti leevu-unwi ku aavlene-ɛlɔ (595) úbu na ɔ́wɔ bebi bananabi ku belekubi bamba. 31Anwuɔsu akwa ani ƒui na Lamek ɔ́ƒɔ asa na úkpi adi eti leevu-ɛlɔ ku aavlanyɔ-maatɛ (777).
32Ɔmmɔ kama ka Noa ɔ́ƒɔ akwa eti leevu (500) ni, ɔ́wɔ Sem ku Ham ku Yaƒet.
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
