Génesis 6
6
Runakuna huchallikusqanmanta
1Runakuna kay pachapi mirayta qallaykuptinkum warmi churinkupas nacemurqa. 2Diospa churinkunam, runakunapa warmi churinkuna kuyayllapaq kasqanta qawaykuspanku, munasqankuta akllakuykuspa casarakurqaku. 3Chaymi Tayta Dios nirqa:
Manam wiñaypaqchu espirituyqa runakunapi kanqa, cheqaptapunipas payqa runallam, pachak iskay chunka watallatañam kawsanqa, nispa.
4 #
Nm 13.33. # 6.4 Diospa churinkuna nisqanqa manam yachakunchu pikunam kasqanpas. Diospa churinkuna llapa runakunapa warmi churinkunawan casarakuptinkum, churinku nacemurqa paykunam karqaku llumpay hatun sayayniyuq runakuna. Paykunaqa ñawpaqmantapacham ancha reqsisqa hinaspa guerrapi peleaq kallpasapa runakuna karqaku.
5 #
Mt 24.37; Lc 17.26. Tayta Diosmi qawarirqa kay pachapi runakuna llumpay mana allin ruwayllapiña kasqankuta, chaynallataq yuyaymanayninkupas sapa punchaw mana allin ruwayllamanña qokurusqanta. 6Chaymi runa ruwasqanmanta, Tayta Dios llumpayta pesakurqa, sonqonpipas anchatam llakikurqa. 7Chayraykum Tayta Dios nirqa:
Kay pachapi unanchasqay runakunatam chinkarachisaq. Chaynataqmi uywa animalkunatawan purun animalkunatapas, qasqonpa puriq animalkunatawan alton pawaq animalkunatapas chinkachisaq. Pesakunim ruwasqaytapas, nispa.
8Noeytam ichaqa Tayta Dios allinpaq qawarqa.
Noeypa arca ruwasqanmanta
9 #
2~Pe 2.5. Kaymi Noeypa vidanmanta willakuy. Noeyqa karqa runamasinkunamantapas allin ruwaq runam, payqa mana faltayuq kaspam Diospa munasqanman hina kawsarqa. 10Noeypa churinkunam kimsa karqa: Sem, Cam hinaspa Jafet.
11Diospa qayllanpim llapa runakuna paqwayta huchallikurqaku, chaymi kay pachaqa llumpay mana allinpa huntasqan karqa.
12Diosmi kay pachata qawamurqa huchapa llumpay intusqanta, llapa runam paqwayta huchaman qokururqaku. 13Chaymi Noeyta Dios nirqa:
Kunanmi tantearuni llapa runakuna chinkachiyta, paykunapa huchanmantam kay pacha kaynaniraq tarikun. Chaynaqa, kay pachamantam puchukachisaq.
14Gofer sachamanta huk arcata ruway, ruwaytaq ukunpi cuartokunatapas hinaspa hawanta ukunta breawan llusiy, yaku mana yaykunanpaq.
15Kaynatam ruwanki: Arcapa largonmi kanqa pachak kimsa chunka pichqayuq metro, anchonñataqmi kanqa iskay chunka iskayniyuq metro parten, sayayninñataqmi kanqa chunka kimsayuq metro parten. 16Chay arcataqa ruwanki kimsa altosniyuqtam, ventanantañataqmi qatanmanta medio metro ukunpi ruwanki, punkuntapas waqtanpim ruwanki.
17Ñoqam kay pachaman sinchi parata kachaykamuspay pamparachisaq, chaynatam kay pachapi llapallan kawsaqkunata chinkachisaq. Manam chullapas puchunqachu. 18Qanwanmi ichaqa huk pactota ruwasaq. Chay arcamanmi yaykunki, yaykunqataqmi warmikipas chaynataq churikikunapas warmintinkama.
19Llapa animalkunatapas, castanman hinam parisnintintakama orqontin chinantinta arcaman yaykuchinki, chaynapi qanwan kuska kawsanankupaq. 20Alton pawaqkunatapas, uywa animalkunatapas, allpapi qasqonpa puriqkunatapas castanman hinam parisnintintakama orqontin chinantinta yaykuchinki, qanwan kuska kawsanankupaq.
21Apaykunkitaqmi tukuy rikchaq mikuykunatapas, qamkuna mikunaykichikpaq chaynataq animalkunapa mikunanpaqpas.
22 #
Heb 11.7. Noeymi Diospa kamachisqanman hina lliwta ruwarqa.
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
